Yuti 1 - The Keyagana NT and 25 OT books

¹ Nagaemo Yutiʼnamo Yesu Kalaisi aliʼyaʼamo neʼaluva vekamo Yemisi aganaʼamoʼnamo maiʼnove. Afotimo Gotiʼa keya aeno ge huno lapavaleno alino lapaote lapateʼnenoʼaeʼmo Yesu Kalaisipiʼmo afaʼa maisayafeʼmo yagaino nelapateya vayaʼmogitapaeʼmo mani gemo avoʼmo nekaove.

² Gotiʼa magoʼe magoʼe huno hau huno lapateteno hau ayamopafiʼmo hauʼninageno lapaipamoʼmo falu hino.

Alagepa faigoko gelefeʼmo kame huʼa neʼataya vayaʼaifeʼmo huʼniya gemae

³ Neʼnahaiya vayaʼnimogitapae, huʼna, Gotiʼa lagaeʼe lapakaeʼeʼmo lagufamo alino katino lateʼniya kavafeʼmo avoʼmo kaegauve, huteʼna lusi kavaʼmo huʼna nagesamo afiteʼnaeʼmo hogoteʼna avoʼmo kaesuva kavaʼmo afole aiʼniye. Lagesamo afita fatago nehuna gelefeʼmo kamemo hutapa ha maesayafeʼmo mani gemo avoʼmo kaeʼna lapaipamo aliʼna lokiya vaiʼna lapatesuvafeʼmo huve. Gotiʼa mani gelefeʼmo lagesamo afita fatago nehuna gemo muki afinafeʼmo magoke afinaʼmo agaemo laote vayaʼamo lamiʼniye.

⁴ Mago vayaʼmogimo Gotifeʼmo alagepa huʼa mono nosaya vayaʼmo kesi katetiʼmo eʼa lagae folagapiʼmo afole aiʼnae. Apakaemo hapaʼye nehigeʼa kumai kavaʼmo hisayafeʼmo Goti geʼamoʼmo fikumo laha maeno nelamiya kavafeʼmo ava gemo aliʼa afe leʼa alu gemo nehae. Magoke vekamo yagaino neʼapateya Ala kava netimo Yesu Kalaisifeʼmo apakameʼyamo amiʼnae. Akeyaʼvilagamo Gotiʼa ani kavatefeʼmo lekana pai maleʼniyana agoti huʼna apateteʼna kayoʼmo apamiguve, huno hu maleʼniye.

⁵ Lapakaemo ani kavafeʼmo ava gemo ago afiʼnayaʼmonanafa halate magoʼe hutapa ani geeʼmo lapakesamo afisayafeʼmo lapa paiʼnaeʼmo, Ala kava neʼmoʼa Isaleli vayaʼmo Isipi kotegatiʼmo apakufamo alino katino apateteno hapa maeno apavalelino eʼniyaʼmonanafa henagaʼamo apakesamo afiʼa fatago osuʼnaya vayaʼmo alagi alino apagoʼya lagauno apataleʼniye.

⁶ Gotiʼa mago enisole vayaʼmo aliʼyaʼmo apamiʼnigeʼapaeʼmo yagaiʼnaya aliʼyaʼapimo atalege maiʼnaya koʼapimo atalege huʼnagenoʼaeʼmo Gotiʼa apatafauno hanege hanege huno hanesiya seli nofitetiʼmo kino apateteno alopa agotimo huno apatesiya afinafeʼmo malaga hani kopiʼmo apateʼnigeʼa maiʼnae.

⁷ Sotomi taonifiʼmo maiʼnaya vayanagi Gomola taonifiʼmo maiʼnaya vayanagi ani lole taonilaʼmo haopaleʼmo haneʼniya taonifiʼmo maiʼnaya vayanagi huʼa apakaiʼapimo ani agufa kumai kavaʼmo huʼa maiʼneʼapaeʼmo aeto agufa hosu kavaʼmo huʼa vemogimo ve apafalugimo alige aʼnemogimo aʼne apafalugimo alige huʼa maiʼnayaʼmofeʼmo muki vayaʼmogimo ageteʼapaeʼmo koli hisayafeʼmo Gotiʼa alopa ata kayoʼmo yu oseno lege lege huno neleya ata kayotetiʼmo apamagiʼnigeno leno pasaga liʼniye.

⁸ Ani kavaʼmo huʼa mago vayaʼmogimo alagamuna ageteʼapaeʼmo apakufamo aliʼa hosu huʼa apateteʼapaeʼmo yagaiʼa neʼapataya vayaʼai geʼapimo noʼafiye. Apakaemo ha le konali vayaʼmo yagaiʼa neʼapataya vayaʼaifeʼmo huʼa faipa huʼa neʼapatae.

⁹ Neʼapatayaʼmonanafa enisole vayaʼaiteʼmo hogote vekamo yagaino neʼapateya vekamo Maikoʼa Sataniʼeʼmo Mosese agufaʼalefeʼmo ge vaiteʼanaeʼmo Maikoʼa Satanifeʼmo koli huʼniyaʼmofeʼmo huno faipa huno ge ohauʼniyaʼmonanafa, Ala kava neʼmoʼa ge kahaugiye, huno ha paiʼniye.

¹⁰ Ha paiʼniyaʼmonanafa ani vayaʼmogi muki oʼageʼnaya kavafeʼmo huʼa faipa huʼa ateteʼapaeʼmo ageʼnaya kavafeʼmo afela afumogi nehaya kavaʼmo huʼa apakaiʼapimo aliʼa hosu huʼa neʼapatae.

¹¹ Vaehae, huʼna, apakaetegamo kagegage kavaʼmo afole aigiye. Keniʼa hosu kateʼmo uʼniya kava huʼa ani kateʼmo uʼnae. Melamiʼa monimo alisiyafeʼmo hosu kavaʼmo huʼniya kavaʼmo huʼa apayamukiki huʼnae. Kolaʼa Mosese geʼamo oʼafiʼniyaʼmofeʼmo Gotiʼa alino agoʼya lagauno ataleʼniya kava huʼa hosu kavaʼmo nehayanageno alino apagoʼya lagauno apatalegaiye.

¹² Lapakaemo magoke konagamo maiʼnone, hutetapa magokepi alita anupa huta maiʼnetapaeʼmo neʼyaʼmo neʼnaya afinaʼmo mani vayaʼmogi koli osuʼa lusi neʼyaʼmo neʼneʼapaeʼmo apakaiʼapiekeʼmo apakesamo afiteʼa yagaiʼa neʼapatayaʼmonanafa kukenaleʼmo mago hosu yaʼmoʼa aeno nekamaeya agufa yakana huʼa maiʼnae. Apakaemo hiyapatiʼmo mago ko noʼaiya hiyaʼmo yasimoʼmo alinino neʼviya hiyakana huʼa maiʼnae. Yosa alagamo afu neleya afinaʼmo mago alagamo oʼaeʼniya yosamo hafuʼyaʼaʼeʼmo aino halaka tiʼnigeno alagi falu teʼniya yosagana huʼa maiʼnae. Apakaemo lole afinaʼmo faliʼnaya vayaʼmo maiʼnae.

¹³ Solovala aniʼmoʼa aino holakau holakau nehigenoʼaeʼmo oʼaniʼya aviʼnaʼmo afole neʼaiya kava huʼa apayamukiki nehagenoʼaeʼmo apavagage hisiya agufa kavaʼmo afole neʼaiye. Kanefiʼmo aiʼa atafaiʼa asagauʼa neʼaiya kanefiʼmogimo koʼapimo ataleʼa uʼeʼa nehaya kava huʼa maiʼnayanageʼa hani kopiʼmo maisayafeʼmo alo hu maleʼniye.

¹⁴ Atamu akamelegati napa seveni vekamo Inokiʼa ani vayaʼaiteʼmo afole aisiya kavafeʼmo ava gemo Gotitegati gemo alino hapa painoʼaeʼmo, Afiyo, huno, Ala kava neʼmoʼa lagaemo lekana opaisuna agufa enisole vayaʼmo tauseni tauseniʼa apaote enisole vayaʼaʼeʼmo magokepi eminegaiye.

¹⁵ Muki vayaʼmo agoti huno apateteno agaefeʼmo mono nosaya vayaʼai apaipafatiʼmo mono nosaya hosu kavaʼapimo alino apave liteno mono nosaya vayaʼmogi lokiya geʼapimo kame huʼa ateʼnaya geʼapimo alino apave lisigeʼapaeʼmo hosu kavaʼmo huʼnone, huʼa hisayafeʼmo eminegaiye.

¹⁶ Ani vayaʼmogimo muki kavafeʼmo ohapauʼniyaʼmofeʼmo hagalu hagalu gemo nehuʼapaeʼmo aiʼa maku make nehae. Apakufamoʼmo hauʼniya kavaʼmo akame nehuʼapaeʼmo, ala vayaʼmo maiʼnone, huʼa nehae. Apakaemo hapauʼniya kavaʼmo afole aisiyafeʼmo apavayaletiʼmo ge huʼa hapao ke nehae.

Mani kavaʼmo hiyo, huno huʼniya gemae

¹⁷ Nahauʼniya vayaʼnimogitapae, huʼna, Ani agufa kavaʼmo nehayaʼmonanafa lapakaemo Ala kava netimo Yesu Kalaisi apa vayaʼamogi afole aisiya kavafeʼmo ava gemo huʼa lapa paiʼnaya geeʼmo halate lapakesamo afitapa ho hiyo.

¹⁸ Apakaemo, mago vayaʼmogimo henagaʼamo Goti geʼaeʼmo kigi huteʼa mono osuʼa apakufamoʼmo hauʼniya kavakeʼmo hugae, huʼa ago lapa paiʼnae.

¹⁹ Ani kavaʼmo nehaya vayaʼmogimo siosi vayaʼmo aliʼa fako huʼa neʼapatae. Goti Aunemeʼamo oʼaliʼa ma mopafi vayaʼmo maiʼnae.

²⁰ Nahauʼniya vayaʼnimogitapae, huʼna, ani kavaʼmo huʼa maiʼnayaʼmonanafa lapakaemo Goti Aunemeʼaletiʼmo nunumuʼmo nehutapaeʼmo lapakesamo afita fatago nehaya kavatapileʼmo lapakaitapimo magoʼe hutapa alita lokiya vaita lapateme lapateme viyo.

²¹ Lapakaefeʼmo Ala kava netimo Yesu Kalaisiʼa hau huno lapatesigetapaeʼmo maige maige hutapa maigayaʼmofeʼmo agava maiyo. Agava maiʼnetapaeʼmo Gotiʼa lapakaefeʼmo hau ayamopafiʼmo hauʼniya agufa kavategageʼmo maiyo.

²² Alita fako hutapa apatetetapaeʼmo mago vayaʼaifeʼmo lapau hutapa apateyo.

²³ Hugayaʼmonanafa alu vayaʼmogi apakufamo alita katita apatetetapaeʼmo koli hiyo. Apakufamoʼmo hauʼniya kavaʼmo nehaya kavaʼmoʼa kukena yaʼapileʼmo oʼaniʼya faigekana agufa kavaʼmo nehiye. Hapa maesayafeʼmo apame oʼalitapa koli huʼnetapaekeʼmo atafatiʼmo atafaeta apateyo.

Goti agiʼaleʼmo alita asaga higetao, huno huʼniya gemae

²⁴ Laha neʼmaeya Gotiʼa agaiʼageʼmo ageteno afiʼniya vekamo agiʼaleʼmo alita asaga huta ategetao. Agaemo alagi asagauta oʼaisayafeʼmo lapatafauno maigiye. Ha le konali vekamo aulagaleʼmo afaʼa lapavalelino esigenoʼaeʼmo vaiʼmo olapamisigetapa lusi kava hutapa lapamogaga aita maigae.

²⁵ Ha le konali yaʼamo hanege ala agiʼamo hanege himamuʼamo hanege huʼnisigeno hemenimogi muki afinaʼmogi huno yagaino lapatege lapatege huno yagaino lapateno. He, lama ge.