Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Yoni 8 - The Keyagana NT and 25 OT books


Kumai kavaʼmo huʼniya a kanoeʼmo huʼniya gemae

1 Muki vayaʼmo noʼapilegamo ataleʼa utageno Yesuʼa Alifiʼaepa avefiʼmo uno haino maiʼniye.

2 Egaʼamo kotilamiyapiʼmo halate atagi nenuno Yulusalemu taonifi alopa mono nopiʼmo uno haino maiʼnigeʼapaeʼmo agaetegamo eʼa aliʼa anupa huʼa maiʼnageno itopaleʼmo maiʼnenoʼaeʼmo aepa faino alino apaya maleʼniye.

3 Alino apaya neʼmalegeʼapaeʼmo keʼaepa gemo avoʼmo kaeʼa aliʼa apaya neʼmalaya vayaʼe Falasi vayaʼmogiʼeʼmo mago a kanomo kumai kavaʼmo huʼnigeʼa ageʼnaya a kanomo avaleliʼeʼa muki vayaʼai apaulagaleʼmo aliʼa he tiʼa ateʼnae.

4 Ateʼneʼapaeʼmo, Tisao, huʼa, mani a kanomoʼa kumai kavaʼmo huʼnigeta ageʼnone.

5 Moseseʼa keʼaepa gemo hunoʼaeʼmo, ani agufa kavaʼmo hisaya aʼne anagaʼaina yafa kayotetiʼmo kamiti apamagiyo, huno huʼniyana kagaemo na agufa gemo hugane, huʼa ge huʼa afi geʼnae.

6 Amalageka huʼa afiteʼapaeʼmo hosu gemo huʼniye, huʼa huteʼa agoti huʼa atesaya geeʼmo kahauya hisayafeʼmo ge huʼa afi geʼnayaʼmonanafa ape huno maiʼneno ati yagaina ayatetiʼmo mopaleʼmo avoʼmo kaeno maiʼniye.

7 He tiʼa maiʼneʼa magoʼe magoʼe huʼa ge huʼa afi geʼnagenoʼaeʼmo he tino maiʼneno hapa painoʼaeʼmo, lapakaepatiʼmo magoke hosu kavaʼmo alagi osuʼnisiya vekamokeʼmo hogoteno yafa kayotetiʼmo amagigiye, huno hapa paiteno

8 halate ape huno mopaleʼmo avoʼmo kaeno maiʼniye.

9 Ani gemo afiʼnagenoʼaeʼmo yuʼilaga vekaʼapimoʼa hosu kavaʼapimo alino apave liʼnigeʼapaeʼmo muki vayaʼamo ataleʼa ute ute huʼnae. Hogoteʼa asole kafugamo maiʼnaya vayaʼmo utageʼapaeʼmo henagaʼamo aise kafugamo maiʼnaya vayaʼmo magoke magoke vayaʼmo ute ute huʼa uʼnae. Ataleʼa utageno Yesuʼa agaiʼageʼmo maiʼnigeno ani a kanomo he tino maiʼniye.

10 Yesuʼa he tino ageyana ani a kanomo agaiʼageʼmo maiʼnigeno agetenoʼaeʼmo, agoti huʼa katesayafeʼmo huʼnaya vayaʼmo haiyate maiʼnae. Mago vekamoʼa hosu a kanomo maiʼnane, huno huʼniya vekamo oʼmaiʼnifiye, huno afi geʼnigenoʼaeʼmo,

11 Ala kava nene, huno, mago vekamo oʼmaiʼniye, huno ha paiʼnigeno Yesuʼa hunoʼaeʼmo, nagaeʼeʼmo hosu a kanomo maiʼnane, huʼna osuguve. Kagaemo afaʼa ataleka uteka halate magoʼe huka hosu kavaʼmo osuvo, huno ha paiʼniye.


Yesuʼa ha le yakana huno maiʼniya gemae

12 Yesuʼa halate ina ge huno hapa paiʼniye. Ma mopafi vayaʼai ha le yaʼapimo maiʼnove. Ina lagimo nakame nehisafigeʼa alagepa huʼa maisaya yaʼmo alino apave lisiya ha le yaʼmo aliteʼa hanipiʼmo umenitata osugae.

13 Falasi vayaʼmogimo huʼapaeʼmo, kagaikaekeʼmo ani faigoko gemo huka kaha maeka nehana gemoʼmo alagi kanale nosiye, huʼa ha paiʼnageno

14 Yesuʼa hunoʼaeʼmo, nagaiʼniekeʼmo ani faigoko gemo huʼna naha maeʼna nehuvaʼmonanafa he alagi lama gemo nehuve. Haiya kotegatiʼmo eʼnofi haiya kotegamo visufi huʼna ago ageʼnovaʼmofeʼmo alagi lama gemo nehuve. Lapakaemo haiya kotegatiʼmo eʼnofi haiya kotegamo visufi hutapa oʼnageʼnae.

15 Lapakaemo apakufaʼalekeʼmo apaketetapa alita fako hutapa neʼapatae. Nagaemo mago vayaʼmo aliʼna fako huʼna noʼapatove.

16 Nagaiʼnigeʼmo oʼmaiʼnofa Afoʼnimoʼmo alino nateʼnigeʼna emineʼnova vekaʼeʼmo magokepi lokaetaʼa maiʼnoʼaʼmofeʼmo aliʼna fako huʼna apatesuvana alagepa huʼnageʼmo aliʼna fako huʼna apategauve.

17 Lapakae keʼaepa gemoʼa hunoʼaeʼmo, lole vekalaʼmoganimo magoke agufa gegeʼmo nehisaʼana alagi lama gemo nehaʼae, hutapa nehae, huno hapa paiʼniye.

18 Nagaemo nagaiʼniekeʼmo ani faigoko gemo huʼna naha maeʼna nehugeno Afoʼnimoʼa alino nateʼnigeʼna emineʼnova vekamoʼeʼmo nagaefeʼmo faigoko geʼnimo huno naha maesiya gemo nehiye, huno hapa paiʼnigeʼapaeʼmo,

19 Afokamoʼmo haiyate maiʼniye, huʼa ge huʼa afi geʼnagenoʼaeʼmo, lapakaemo nagaemo nagetapa aeto osuʼnayaʼmofeʼmo Afoʼnimo agetapa aeto osuʼnae. Nagetapa aeto huʼnaesinana Afoʼnimoʼeʼmo agetapa aeto huʼnaesine, huno hapa paiʼniye.

20 Yesuʼa alopa mono nopiʼmo ofalini monimo neʼmalaya kesimo haneʼniya nopiʼmo uno haino alino apaya maletenoʼaeʼmo ani gemo hapa paiʼniye. Afinaʼamo afole oʼaiʼniyaʼmofeʼmo atafauʼa kalavusi huʼa oʼateʼnae.


Lapakaemo visuva koteʼmo alagi oʼugae, huno hapa paiʼniya gemae

21 Yesuʼa halate ina ge huno hapa paiʼniye. Nagaemo uʼna maisuva koteʼmo uta kahauya hutapa nagesayafeʼmo hugayana alagi hosu kavatapifiʼmo maiʼnetapaeʼmo faligae. Visuva koteʼmo afaʼa oʼugae.

22 Yu vayaʼmogimo apakaiʼapimo huʼapaeʼmo, visuva koteʼmo oʼugae, huno huʼniya gemo aepaʼamo na agufa gemo huʼniye. Agaiʼamo aneʼmu aesiyafeʼmo huʼnifi, huʼa huʼnae.

23 Yesuʼa hunoʼaeʼmo, lapakaemo afelagatiʼmo eʼnageʼna nagaemo anagatiʼmo emiʼneʼnove. Lapakaemo ma mopafi vayaʼmo maiʼnae. Nagaemo ma mopafi vekamo oʼmaiʼnove.

24 Ani kavatefeʼmo huʼnaeʼmo, hosu kavatapifikeʼmo maiʼnetapaeʼmo faligae, huʼna ago lapa paiʼnove. He, lapakaemo hutapaeʼmo, agaemo muki afinaʼmo neʼmaiya vekamo maiʼniye, hutapa nagaefeʼmo lapakesamo afita fatago osisayana hosu kavatapifikeʼmo maiʼnetapaeʼmo faligae, huno hapa paiʼniye.

25 Apakaemo huʼapaeʼmo, ina lagae, huʼa afi geʼnagenoʼaeʼmo, aliʼyaʼnimo aepa faiʼna aliʼnova afinatetiʼmo ago lapa paime lapa paime eʼna hemeniʼeʼmo ani agufa gegeʼmo huʼna lapa nepauve.

26 Nagaemo asole kavatapieʼmo agoti huʼna lapatesuva kavafeʼmo lapa paisuva gemo haneʼniyaʼmonanafa alino nateʼnigeʼna emiʼneʼnova vekamoʼa alagi lama gemo nehigeʼna afiteʼnaeʼmo ma mopafi vayaʼaifeʼmo hapa nepauve.

27 Apakaemo muki yaʼmo afoʼamofeʼmo ani gemo nehiye, huʼa oʼafiʼnae.

28 Inagi Yesuʼa hunoʼaeʼmo, lapakaemo Vemo Mafaʼnemo alita he titapa atetetapaeʼmo, Mesaiya vekamo maiʼniye, hutapa agegae. Agaiʼamo agesafatiʼmo agesa afino mago kavaʼmo osuʼnifa muki yaʼmo Afoʼamoʼa alino aya maleʼniya gemo hapa paiʼniye, hutapa nagegae.

29 Nagaemo muki afinaʼmo alino nateʼnigeʼna emiʼneʼnova vekamoʼa hauʼniya agufa kavaʼageʼmo nehuvaʼmofeʼmo nataleno noʼvifa nagaeʼeʼmo magokepi lokaeno neʼmaiye, huno hapa paiʼniye.

30 Asole vayaʼmogimo ani gemo afiteʼapaeʼmo agaefeʼmo apakesamo afiʼa fatago huʼnae.


Afaʼa maiʼnaya vayaʼe kalavusifi maiʼnaya vayaʼefeʼmo huʼniya gemae

31 Inagi Yesuʼa Yu vayaʼmogi agaefeʼmo apakesamo afiʼa fatago nehaya Yu vayaʼaifeʼmo hunoʼaeʼmo, geʼnifiʼmo maime maime neʼvisayana lama ge vayaʼmo geʼnimo neʼafiya vayaʼmo maiʼnae.

32 Lama geʼamo afitapa aeto hisageno lama geʼaletiʼmo hatu maeno lapatesigetapa afa vayaʼmo maigae, huno hapa paiʼniye.

33 Hapa paiʼnigeʼapaeʼmo, Emalehamu aginago vayaʼamo maiʼnonageʼapaeʼmo kalavusi huʼa olateʼnae. Na kava higekaeʼmo, afa vayaʼmo maigae, huka nehane, huʼa afi geʼnagenoʼaeʼmo

34 alagi lama gemo lapa nepauve, huno, haiya vayaʼmogi hosu kavaʼmo nehisafigeno hosu kavaʼapimoʼa kalavusi huno apateʼnigeʼa aliʼyaʼamo neʼaliya vayaʼmo maiʼnae.

35 Kalavusi aliʼyaʼmo neʼaliya vekamoʼa aliʼyaʼmo afoʼamo nopiʼmo uno haino alagi oʼmaigiyaʼmonanafa aliʼyaʼmo afoʼamo mafaʼneʼamokeʼmo noʼafiʼmo alagi maigiye.

36 Goti Mafaʼneʼamokeʼmo hatu maeno lapatesigetapa alagi afa vayaʼmo maigae.

37 Lapakeʼnovana Emalehamu aginago vayaʼamo maiʼnageʼna lapakeʼnovaʼmonanafa geʼnimo lapaipafiʼmo afitapa oʼmaleʼnayaʼmofeʼmo namagisayafeʼmo nehae.

38 Nagaemo Afoʼnimoʼa alino nave liʼnigeʼna ageʼnova kavafeʼmo ava gemo huʼna lapa nepauvaʼmonanafa lapakaemo afotapimoʼa hiyo, huno nehiya gegeʼmo akame hutapa nehae, huno hapa paiʼnigeʼapaeʼmo,

39 Emalehamuʼa afotimoʼmo maiʼniye, huʼa ha paiʼnagenoʼaeʼmo, Emalehamu mafaʼneʼamo lama ge mafaʼneʼamo maiʼnaesinana Emalehamuʼa huʼniya agufa kavakeʼmo nehaesine.

40 Gotiʼa naha paiʼnigeʼna afiteʼnaeʼmo alagi lama gemo lapa nepauvaʼmonanafa lapakaemo namagisayafekeʼmo nehae. Emalehamuʼa ani agufa kavaʼmo osuʼniye.

41 Lapakaemo afotapimoʼa nehiya agufa kavaʼmo nehae, huno hapa paiʼnigeʼapaeʼmo, Afotimoʼmo magoke vekamo Gotiʼa maiʼniye. Megusa mafaʼnemo oʼmaiʼnone, huʼa ha paiʼnagenoʼaeʼmo,

42 Nagaiʼnimo nagesamo afiʼna eminoʼmeʼnofa Gotiʼa alino nateʼnigeʼna eʼnove. Gotitegatiʼmo emiʼneʼnovaʼmofeʼmo Gotiʼa afotapimoʼa maiʼniyesinana nagaefeʼmo lapau lapayamopafiʼmo lapauʼniyesine.

43 Na kava higetapaeʼmo geʼnimo afitapa aeto nosae. Geʼnieʼmo olapauʼniyaʼmofeʼmo geʼnimo afaʼa oʼafigae.

44 Afotapimoʼmo Sataniʼa maiʼnigetapaeʼmo mafaʼneʼamo maiʼnetapaeʼmo afotapimoʼmo hauʼniya kavaʼmo akame nehae. Aepa faiʼniya afinatetiʼmo vayaʼmo neʼapamagiya vekamo maiʼniye. Lama gemo aipafiʼmo alagi ohaneʼniyaʼmofeʼmo lama gelefeʼmo kame nehiye. Aigofe gemo aepa vekamo maiʼniyaʼmofeʼmo aipafatiʼmo alagi aigofe gemo nehiye.

45 Maiʼniyaʼmonanafa nagaemo lama gemo lapa nepauvaʼmofeʼmo nagaefeʼmo alagi lama gemo nehiye, hutapa lapakesamo afita fatago nosae.

46 Lapakaepatiʼmo haiya vekamoʼa hosu kavaʼnimo alino nave ligiye. Lama gemo nehisuvana na kava higetapaeʼmo alagi lama gemo nehiye, hutapa nosae.

47 Gotiʼa alino apateʼniya mafaʼneʼamogimo Goti geʼamo neʼafiye. Lapakaemo Gotiʼa alino olapateʼniyaʼmofeʼmo Goti geʼamo noʼafiye, huno hapa paiʼniye.


Yesuʼa Emalehamufeʼmo huʼniya gemae

48 Yesuʼa ani gemo hapa paiʼnigeʼapaeʼmo, lagaemo kagaefeʼmo hutaeʼmo, Sameliya vekamo maiʼnigeno hosu aune vekamo aipafiʼmo maiʼniye, huta nehune. Lama gemo nosupiye, huʼa afi geʼnagenoʼaeʼmo,

49 mago hosu aune vekamo naipafiʼmo oʼmaiʼniye. Nagaemo Afoʼnimo agiʼaleʼmo aliʼna asaga huʼna neʼatovaʼmonanafa lapakaemo nagiʼnileʼmo alita afepi neʼnatae.

50 Vayaʼmogi nagiʼnileʼmo aliʼa asaga huʼa natesayafeʼmo aliʼyaʼmo noʼalufa mago vekamo alino fako huno neʼapateya vekamokeʼmo nagiʼnileʼmo alino asaga huno atesiyafeʼmo aliʼyaʼmo neʼaliye.

51 Lama gemo lapa nepauve, huno, Geʼnimo akame nehaya vayaʼmo ofaligae, huno hapa paiʼnigeʼapaeʼmo,

52 Hemenimo lagaemo afiʼnonana hosu aune vekamo kaipafiʼmo maiʼniye, huta ago afiʼnone. Emalehamuʼa ago faliʼnigeʼa Gotitegati gemo alini eʼa aeʼa hakalo huʼa hapa nepaiya vayaʼmo ago faliʼnayaʼmonanafa kagaemo hukaeʼmo, geʼnimo akame nehaya vayaʼmo ofaligae, huka nehane.

53 Kagaemo laginago vekamo Emalehamuʼmo ago aeka agaseʼnapiye. Agaemo ago faliʼniye. Gotitegati gemo alini eʼa aeʼa hakalo huʼa hapa nepaiya vayaʼeʼmo ago faliʼnae. Kagaemo ina laʼnae, huka kagesa neʼafine, huʼa afi geʼnageno

54 Yesuʼa hunoʼaeʼmo, nagaiʼni nagiʼnileʼmo aliʼna asaga huʼna neʼnatovesinana ina agufa yakana huno haneʼniyesine. Lapakaemo Afoʼnimofeʼmo hutapaeʼmo, Gotitimoʼmo maiʼniye, hutapa nehaya vekamoʼa nagiʼnileʼmo alino asaga huno neʼnate.

55 Gotitimoʼmo maiʼniye, hutapa nehayaʼmonanafa oʼageʼnageʼna nagaekeʼmo ageʼnove. Oʼageʼnove, huʼna nehuvesinana lapakaekana huʼna aigofe gemo nehuva vekamo maiʼnovesine. Nagaemo ago ageʼnovaʼmofeʼmo geʼamo akame nehuve.

56 Lapakinago vekamo Emalehamuʼa nagaemo afole aisugeno nagesiyafeʼmo hauʼnigeno avayagunagu huno nagava maiʼniye. Nagetenoʼaeʼmo amogaga aiʼniye, huno hapa paiʼnigeʼapaeʼmo

57 Kagaemo fifitiʼa kafugamo oʼmaiʼnanagi Emalehamuʼa ageʼnapiye, huʼa afi geʼnagenoʼaeʼmo,

58 alagi lama gemo lapa nepauve, huno, Emalehamuʼa itaʼamoʼmo alino oʼateʼniya afinatetiʼmo nagaemo hogoteʼna muki afinaʼmo alagi maiʼnova vekamo maiʼnove, huno hapa paiʼnigeʼapaeʼmo

59 yafa kayotetiʼmo yaga auʼa amagisayafeʼmo neʼaligenoʼaeʼmo Yesuʼa alopa mono nopatiʼmo ataleno apakae folagapiʼmo uno lamiʼnigeʼa oʼamagiʼnageno uno lamino uʼniye.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ