Yoni 6 - The Keyagana NT and 25 OT books

Yesuʼa neʼyaʼmo faefu tauseniʼa vayaʼmo apamiʼniya gemae

¹ Henagaʼamo Yesuʼa ani kotuʼmo agiʼamo Galeliya ani kotuʼmo lakaeno mugagayaga faligamo uʼniye. Ani ani kotuʼmo alu agiʼamo Taipiliyasi ani kotune.

² Agaemo alagena kavaʼmo huno kaita hapauʼniya vayaʼaina alino hapageno apateʼnigeʼa ageʼnayaʼmofeʼmo asole vayaʼmo akame huʼa uʼnae.

³ Yesuʼe geʼamo neʼafiya vayaʼeʼmo mago aise avefiʼmo uʼa haiʼa maiʼnae.

⁴ Pasova hopa afinaʼmo ago alagi hogo huʼniye.

⁵ Yesuʼa alino maku huno apakeyana asole vayaʼmo agaetegamo eʼnageno apaketeno Filipifeʼmo hunoʼaeʼmo, mani asole vayaʼmo eʼnagi neʼyaʼmo nesaya yaʼmo haiyatetiʼmo miya faigune, huno afi geʼniye.

⁶ Agaiʼamo ani hisiya kavaʼmo ago ageʼniyana Filipifeʼmo na agufa gemo hisifi, huno amalageka huno ge huno afi geʼniye.

⁷ Filipiʼa hunoʼaeʼmo, tu hataleti kinaletiʼmo neʼyaʼmo miya faigunana mani asole vayaʼmogimo nesaya agufa kavaʼmo osugiye, huno ha paiʼniye.

⁸ Mago vekamo geʼamo neʼafiya vekamo agiʼamo Eʼnaluʼa Saimoni Pita aganaʼamoʼa,

⁹ mago manile maiʼniya mafaʼnemoʼa faefuʼa mali peleti mayaʼe lole noyamelaʼeʼmo aliʼniye. Aliʼniyaʼmonanafa asole vayapiʼmogeno mani neʼyaʼatomoʼa kanale osugiye, huno ha paiʼniye.

¹⁰ Yesuʼa hunoʼaeʼmo, etapa kahauleʼmo itopaleʼmo maiyo, huta hapa paiyo, huno hapa paiʼnigeʼapaeʼmo muki vayaʼaifeʼmo hapa paiʼnageʼa kahauleʼmo eʼa itopaleʼmo maiʼnae. Ani vayaʼmo faefu tauseniʼa vayaʼmo maiʼnae.

¹¹ Yesuʼa peleti mayamo aliʼneno Gotifeʼmo hao ke heteno maiʼnaya vayaʼmo alino fako huno apamiteno noyameʼeʼmo ani kava huno alino apakaiʼapimo hapauʼniya agufa kavaʼmo huno apamiʼnigeʼa neʼnae.

¹² Neʼyaʼmo neʼa apamu hutagenoʼaeʼmo Yesuʼa geʼamo neʼafiya vayaʼaifeʼmo hunoʼaeʼmo, fiku yanageno neʼyaʼmo atupaʼamo lageso hugiyanagi alita anupa hiyo, huno hapa paiʼnigeʼa

¹³ faefuʼa peleti mayafatiʼmo neʼa apamu huteʼa ataleʼnaya atupamo aliʼa tuolofuʼa hona yuvapafiʼmo maleʼa havai teʼnae.

¹⁴ Apakaemo ageʼnayana Yesuʼa noʼagaya agufa aune kavaʼmo huno alino apave liʼnigeʼa ageteʼapaeʼmo, Gotitegati gemo alinineno aeno hakalo huno hapa paisiya vekamo ma mopafiʼmo afole aigiye, huʼa huʼnaya vekamo agaekeʼmae, huʼa huʼnae.

¹⁵ Ani vayaʼmogimo eʼa Yesuʼmo atafauʼa yagaino apatesiya kini vekamo aliʼa hamaleʼa atesayafeʼmo huʼnagenoʼaeʼmo Yesuʼa apakeʼniyaʼmofeʼmo apataleno agaiʼageʼmo avefiʼmo uno haiʼniye.

Yesuʼa ani agotofuleʼmo eʼniya gemae

^16-17 Yegemo uno lamino faleʼnigeʼapaeʼmo Yesu geʼamo neʼafiya vayaʼmo ani kotutegamo uʼa lamiʼa sipifiʼmo uʼa haiʼa maiteʼa mugagayaga faliga Kapeneyamu taonifilagamo aniʼmo lakaeʼa visayafeʼmo neʼvagenoʼaeʼmo hani huʼniyana Yesuʼa apakaetegamo oʼmeʼniye.

¹⁸ Lusi kava huno yasimo alinineno aniʼmo aino holakau holakau huʼnigeʼapaeʼmo

¹⁹ apakaemo latapa kayotetiʼmo aniʼmo avaleʼa ataleme ataleme aise afagiʼaleʼmo neʼuʼapaeʼmo agayana Yesuʼa ani agotofuleʼmo sipi haopaleʼmo eʼnigeʼa ageteʼapaeʼmo koli nehagenoʼaeʼmo

²⁰ Yesuʼa hunoʼaeʼmo, nagaemo neʼovanagi koli osiyo, huno hapa paiʼnigeʼapaeʼmo

²¹ hapauʼnigeʼa sipifiʼmo avaleʼa ateteʼapaeʼmo malage huʼa uʼa ani agiʼnaleʼmo avaʼyi huʼnae.

Yesufeʼmo kahauya huʼnaya gemae

²² Egaʼamo mugagayaga faliga vayaʼmogi agayana egamo haneʼnigeʼa ageʼnaya sipigeʼmo magokeʼageʼmo haneʼnigeno Yesuʼa ani sipifiʼmo oʼuʼnigeʼa geʼamo neʼafiya vayaʼageʼmo uʼnageʼa apakeʼnae.

²³ Magoʼe sipimo Taipiliyasi kotegatiʼmo eʼa Yesuʼa neʼyaʼmo Gotifeʼmo hao ke heteno apamiʼnigeʼa neʼnayategamo eʼnae.

²⁴ Asole vayaʼmogi apakayana Yesuʼe geʼamo neʼafiya vayaʼeʼmo anileʼmo oʼmaiʼnageʼa apaketeʼapaeʼmo mago sipigopiʼmo uʼa haiʼa maiteʼa Yesufeʼmo kahauya huʼa agesayafeʼmo aniʼmo lakaeʼa uʼnae.

Yesuʼa afaʼa maisaya yaʼmo neʼapamiya peleti mayagana huno maiʼniya gemae

²⁵ Ani kotuʼmo mugagaya faligamo lakaeʼuʼa avaʼyi huteʼa Yesuʼmo maiʼnigeʼa ageteʼapaeʼmo, Tisao, huʼa, hainu afinaʼmo manileʼmo eka maiʼnane, huʼa afi geʼnagenoʼaeʼmo

²⁶ Yesuʼa hunoʼaeʼmo, alagi lama gemo lapa nepauve, huno, noʼagaya agufa aune kavaʼmo agetapa aeto huʼnayaʼmofeʼmo nagesayafeʼmo oʼmeʼnafa peleti mayamo lapamiʼnogetapa netapa lapamu huʼnayaʼmofeʼmo nagesayafeʼmo eʼnae.

²⁷ Lapakaemo kasalisiya neʼyaʼmo alisayafekeʼmo aliʼyaʼmo oʼalitapa hanege hanege huno hanesiya neʼyaʼmo lapamisigetapa alagepa hutapa maige maige hutapa maisaya yaʼmo alisayafekeʼmo aliʼyaʼmo aliyo. Vemo Mafaʼnemoʼmo ani agufa neʼyaʼmo lapamigiye. Muki yaʼmo Afoʼamoʼmo Gotiʼa lekana paiʼna ateʼnove, huno alino apave lisiyafeʼmo himamuʼamo amiʼniye, huno hapa paiʼnigeʼapaeʼmo,

²⁸ Gotiʼa hauʼniya kavaʼmo hisunafeʼmo na agufa aliʼya na agufa aliʼyaʼmo aligune, huʼa ge huʼa afi geʼnagenoʼaeʼmo,

²⁹ Gotiʼa hauʼniya kavaʼmo magokeʼageʼmo haneʼniyana alino ateʼnigeno emineʼniya vekaeʼmo lapakesamo afita fatago hisaya kavakeʼmo aliʼyaʼamo haneʼniye, huno hapa paiʼnigeʼapaeʼmo,

³⁰ Lama gemo nehane, huta hisunafeʼmo haiya agufa noʼagona kaune kavaʼmo huka lave ligane. Na agufa kavaʼmo hugane.

³¹ Laginago vayaʼmogi kaʼme kotega mana neʼyaʼmo neʼnae. Ani kavatefeʼmo Goti mukufi gemoʼmo hunoʼaeʼmo, agaemo kokuʼnapatiʼmo peleti mayamo apamiʼnigeʼa neʼnae, huno huʼniye, huʼa ha paiʼnagenoʼaeʼmo

³² Alagi lama gemo lapa nepauve, huno, Moseseʼa kokuʼnapati lama ge peleti mayamo oʼapamiʼnifa Afoʼnimokeʼmo kokuʼnapatiʼmo lama ge peleti mayamo nelapamiye.

³³ Gotiʼa neʼapamiya peleti mayamo kokuʼnapatiʼmo emineno ma mopafi vayaʼmo afaʼa maisaya yaʼmo neʼapamiya vekamo maiʼniye, huno hapa paiʼnigeʼapaeʼmo,

³⁴ Ala kava nene, huʼa, muki afinaʼmo ani peleti mayamo lamigeta neno, huʼa ha paiʼnagenoʼaeʼmo,

³⁵ nagaemo afaʼa maisaya yaʼmo neʼapamiya peleti mayagana huʼna maiʼnove. Nagaetegamo esaya vayaʼmo apaka otegaiye. Nagaefeʼmo apakesamo afiʼa fatago nehisaya vayaʼmo anifeʼmo alagi ohapaugiye.

³⁶ Ago lapa paiʼnaeʼmo, nageʼnayaʼmonanafa lapakesamo afita fatago nosae, huʼna ago lapa paiʼnove.

³⁷ Muki vayaʼamo muki yaʼmo Afoʼamoʼmo apavaleno neʼnamiya vayaʼamo nagaetegamo egae. Nagaetegamo eʼa maiʼnisaya vayaʼmo alagi aliʼna hapafaiʼna oʼapatalegauve.

³⁸ Ani kavatefeʼmo nagaiʼni nahauʼnisiya kavaʼmo hisuvafeʼmo emiʼnoʼmeʼnofa alino nateʼnigeʼna emiʼneʼnova vekamoʼa hauʼniya kavaʼmo hisuvafeʼmo emiʼneʼnove.

³⁹ Muki yaʼmo Afoʼamoʼmo alino nateʼnigeʼna emiʼneʼnova vekamoʼa hauʼniyanageʼna muki apavaleno namiʼniya vayapatiʼmo magoke vekamo alagi afaʼa atalesugeno afela hesiyafeʼmo ohauʼniyanageʼna ma mopamo hano hisiya afinaʼmo muki vayaʼamo aliʼna he tiʼna apatesuvafekeʼmo hauʼniye.

⁴⁰ Alino nateʼnigeʼna emiʼneʼnova vekamoʼa hauʼniyanageʼa muki vayaʼamogi Mafaʼneʼamo ageʼa aeto huteʼapaeʼmo agaefeʼmo apakesamo afiʼa fatago nehisaya vayaʼmo afaʼa maige maige huʼa maisaya yaʼmo aligae. Aliʼnisageʼna ma mopamo hano hisiya afinaʼmo aliʼna he tiʼna apategauve, huno hapa paiʼniye.

⁴¹ Yesuʼa hunoʼaeʼmo, kokuʼnapatiʼmo emiʼneʼniya peleti mayagana huʼna maiʼnove, huno hapa paiʼniyaʼmofeʼmo aepa faiʼa hagalu hagalu huʼa ge hauʼnae.

⁴² Ge hauʼapaeʼmo, ani kanomo Yesuʼa Yosefe mafaʼnemo oʼmaiʼnifiye. He, ani kanomo maiʼnigeta itaʼafoʼalaʼmoganimo ago anakeʼnone. Na kava higenoʼaeʼmo, nagaemo kokuʼnapati emiʼneʼnove, huno nehiye, huʼa huteʼa huʼa faipa huʼa ateteʼa ge hauʼnae.

⁴³ Yesuʼa geʼapileʼmo aeno atagaina huno hapa painoʼaeʼmo, lapakaitapimo hagalu hagalu gemo osiyo.

⁴⁴ Magoke vekamoʼa agaiʼamo nagaetegamo afaʼa oʼmegaiyaʼmonanafa Afoʼnimoʼmo alino nateʼnigeʼna emiʼneʼnova vekamokeʼmo ayate heno avayu hulino esigenoʼaekeʼmo nagaetegamo egaiye. Nagaetegamo esigeʼnaeʼmo ma mopamo hano hisiya afinaʼmo aliʼna he tiʼna ategauve.

⁴⁵ Gotitegati gemo alini eʼa aeʼa hakalo huʼa hapa nepaiya vayaʼmogimo Goti mukufiʼmo avoʼmo kaeʼapaeʼmo, Gotiʼa muki vayaʼaina alino apaya malegaiye, huʼa avoʼmo kae maleʼnae. Ani gemo huʼnayaʼmofeʼmo muki yaʼmo Afoʼamoʼmo huʼniya gemo afiteʼa ageʼnaya vayaʼmo mukiʼamo nagaetegamo ete ete nehae.

⁴⁶ Ani gemo huvaʼmonanafa magoke vekamoʼa Afoʼnimoʼmo oʼageʼniye. Gotitegatiʼmo magoke vekamo emineʼniya vekamokeʼmo muki yaʼmo Afoʼamoʼmo ageʼniye.

⁴⁷ Alagi lama ge lapa nepauve, huno, Apakesamo afiʼa fatago nehaya vayaʼmo afaʼa maige maige huʼa maisaya yaʼmo ago aliʼnae.

⁴⁸ Nagaemo afaʼa maisaya yaʼmo neʼapamiya peleti mayagana huʼna maiʼnove.

⁴⁹ Lapakinago vayaʼmo kaʼme kotega maiʼneʼapaeʼmo mana peleti mayamo aliʼa neʼnayaʼmonanafa ago faliʼnae.

⁵⁰ Kokuʼnapati emineʼniya peleti mayamo aeto agufa kanale peleti mayamo haneʼniyanageʼa neʼnisaya vayaʼmo alagi ofaligae.

⁵¹ Nagaemo afaʼa maisaya yaʼmo neʼapamiya peleti mayamo kokuʼnapatiʼmo emineʼniya peleti mayagana huʼna maiʼnove. Ina lagimo ani peleti mayamo neʼnisafigeʼa muki afinaʼmo afaʼa maige maige huʼa maigae. Apamisuva peleti mayamo nagufafati nameʼanimo haneʼniye. Ma mopafi vayaʼmo afaʼa maige maige huʼa maisayafeʼmo nameʼanimo apamiguve, huno hapa paiʼniye.

⁵² Hapa paiʼnigeʼa afiteʼapaeʼmo apakaiʼapimo ge vaiteʼapaeʼmo, Ani vekamo ameʼamo nesunafeʼmo haiya kava huno lagauno lamigiye, huʼa huʼnae.

⁵³ Yesuʼa hunoʼaeʼmo, alagi lama gemo lapa nepauve, huno, lapakaemo Vemo Mafaʼnemo ameʼaʼe kolaʼaʼeʼmo oʼneʼnisayana afaʼa maisaya yaʼmo alagi oʼaliʼnae.

⁵⁴ Ina lagimo nameʼniʼe kolaʼniʼeʼmo neʼnisafigeʼa afaʼa maige maige huʼa maisaya yaʼmo ago aliʼnayanageʼna ma mopamo hano hisiya afinaʼmo aliʼna he tiʼna apategauve.

⁵⁵ Nameʼanimo lama ge neʼyaʼmo haneʼnigeno kolaʼnimo lama ge aniʼmo haneʼniye.

⁵⁶ Ina lagimo nameʼniʼe kolaʼniʼeʼmo neʼnisafigeʼa nagaepiʼmo maiʼnageʼna apakaepiʼmo maiʼnove.

⁵⁷ Muki yaʼmo Afoʼamoʼmo afaʼa maisaya yaʼmo aepa vekamoʼa alino nateʼnigeʼna emineʼnove. Agaemo afaʼa maisuva yaʼmo aepa vekamo maiʼnigeʼna nagufafati nameʼanimo neʼnaya vayaʼmo afaʼa maisaya yaʼmo aepa vekaʼapimo maiʼnove.

⁵⁸ Manimona kokuʼnapatiʼmo emineʼniya peleti mayamo haneʼniye. Lapakinago vayaʼmogi neʼnaya peleti mayagana huno ohaneʼnifa aeto agufa kanale peleti mayamo haneʼniye. Lapakinago vayaʼmogi neteʼapaeʼmo ago faliʼnayaʼmonanafa mani peleti mayamo neʼnisaya vayaʼmo muki afinaʼmo afaʼa maige maige huʼa maigae.

⁵⁹ Yesuʼa mani gemo Kapeneyamu taonifiʼmo mono nopiʼmo alino apaya maleʼniye.

Geʼamo neʼafiya vayapatiʼmo mago vayaʼamo ago ataleʼa uʼnaya gemae

⁶⁰ Asole vayaʼmo geʼamo neʼafiya vayapatiʼmo mago vayaʼamo ani gemo afiteʼapaeʼmo, ani gemoʼmo kana huʼniyaʼmofeʼmo ina lagimo ani gemo afiʼa aeto hugae, huʼa huʼnae.

⁶¹ Yesuʼa agaiʼa aipafiʼmo agesa afinoʼaeʼmo geʼnimo neʼafiya vayaʼmogi huʼnova geeʼmo hagalu hagalu gemo nehae, huno apaketenoʼaeʼmo, mani huva gemoʼmo aneʼaifiʼmo hegekana huno lapatafauʼnifiye.

⁶² Agesayana Vemo Mafaʼnemo atagi neno uno haino maisigetapaeʼmo, na agufa yane hutapa lapakesamo afigae.

⁶³ Nauneʼnameʼmoʼa afaʼa maisaya yaʼmo neʼapamiye. Nagufafati nameʼamoʼmo lapa oʼmaegaiye. Lapa nepauva gefiʼmo aunemeʼamo haneʼniyanageno afaʼa maisaya yaʼmo neʼapamiya gemo haneʼniye.

⁶⁴ Haneʼniyaʼmonanafa lapakaepatiʼmo mago vayaʼmo apakesamo afiʼa fatago nosae, huno hapa paiʼniye. Yesuʼa aliʼyaʼamo aepa faino aliʼniya afinatetiʼmo apakesamo afiʼa fatago osisaya vayaʼe kutulu yaʼmo alisiya vekaʼeʼmo ago apakeʼniye.

⁶⁵ Huno hapa paitenoʼaeʼmo, ani kavatefeʼmo, mago vekamoʼa nagaetegamo agaiʼamo afaʼa oʼmegaiyaʼmonanafa Afoʼnimoʼa fiku ha maeno amisigeno egaiye, huʼna ago lapa paiʼnove, huno hapa paiʼniye.

⁶⁶ Ani gemo huno hapa paiʼniyaʼmofeʼmo asole vayaʼmo geʼamo afiʼnaya vayapatiʼmo agaeʼeʼmo magoʼe huʼa lokaeʼa umenitata osuʼa ago ataleʼa uʼeʼa huʼnae.

⁶⁷ Ataleʼa uʼnagenoʼaeʼmo Yesuʼa tuolofuʼa vayaʼmo geʼamo neʼafiya vayaʼaifeʼmo hunoʼaeʼmo, lapakaeʼeʼmo nataletapa ugefe nehafiye, huno ge huno apafi geʼnigenoʼaeʼmo

⁶⁸ Saimoni Pitaʼa hunoʼaeʼmo, Ala kava nene, huno, ina lategamo ugune. Kagae gemoʼa afaʼa maisaya yaʼmo neʼapamiya gemo haneʼniye.

⁶⁹ Hemenimo lagaemo lagesamo afita fatago huteta kageʼnonana aeto agufa vekamo Gotitegatiʼmo emikeʼnana vekamo maiʼnanageta kageʼnone, huno ha paiʼnigeno

⁷⁰ Yesuʼa hunoʼaeʼmo, nagaemo lekana paiʼna lapateʼnovaʼmonanafa lapakaepatiʼmo mago vekamo aipafiʼmo hosu aune vekamo maiʼniye, huno hapa paiʼniye.

⁷¹ Agaemo Yutasiʼa Isakaliyoti kotega vekamo Saimoni mafaʼneeʼmo huʼniye. Yutasiʼa ani tuolofuʼa vayapati vekamoʼa kutulu yaʼmo aliteno Yesuʼmo avaleno apamisigeʼa amagisaya vekamo maiʼniye.