Yoni 19 - The Keyagana NT and 25 OT books

Pailatiʼa Yesufeʼmo, amagisageno faligiye, huno hapa paiʼniya gemae

¹ Inagi Pailatiʼa ati vekaeʼmo hunoʼaeʼmo, nofi kayotetiʼmo amagiyo, huno ha paiʼnigeno amagiʼniye.

² Ati vayaʼmogimo uʼa aufe nofiʼmo aliʼa kalagiteʼa agenopaleʼmo kakolitamo maleʼa ateteʼa haesa kenaletiʼmo alonokuʼmo maleʼa ateteʼapaeʼmo,

³ Yu vayaʼaiteʼmo yagaika neʼapatana kini vekamo maiʼnananagi alagepa huka maiyo, huʼa huteʼa apayaʼmo aliʼa ataleli eʼa amagite amagite huʼnae.

⁴ Pailatiʼa halate kumatega uno lamino, afiyo, huno, amagisuva kavaʼmo aepaʼamo oʼageʼnovaʼmofeʼmo lapakaemo hutapaeʼmo, amagisiya kavaʼmo aepaʼamo oʼageʼniye, hutapa agesayafeʼmo lapakaetegamo avaleliʼna emiʼnegauve, huno hapa paiʼniye.

⁵ Yesuʼa aufe nofi kakolitamo agenopaleʼmo maleʼa ateteʼa haesa kenaletiʼmo alonokuʼmo maleʼa ateʼnaya yaʼmo alinino kumatega emineʼnigeno Pailatiʼa hunoʼaeʼmo, ani vekamo maiʼniyanagi ageyo, huno hapa paiʼniye.

⁶ Mono huʼa neʼapataya vayaʼaiteʼmo yagaiʼa neʼapataya vayaʼe alopa mono noteʼmo neʼyagaiya ati vayaʼmogiʼeʼmo ageteʼapaeʼmo, malipu yosaleʼmo nili aiteka alika he tika ato. Malipu yosaleʼmo nili aiteka alika he tika ato, huʼa alopa gefatiʼmo huʼnagenoʼaeʼmo Pailatiʼa hunoʼaeʼmo, amagisuva kavaʼmo aepaʼamo oʼageʼnovanagi lapakaitapigeʼmo avalelituta malipu yosaleʼmo nili aitetapa alita he tita ateyo, huno hapa paiʼniye.

⁷ Yu vayaʼmogi huʼapaeʼmo, agaemo Goti mafaʼneʼamo maiʼnove, huno huʼniyaʼmofeʼmo keʼaepa getimoʼmo hunoʼaeʼmo, ago faligiye, huno huʼniye, huʼa ha paiʼnae.

⁸ Pailatiʼa ani gemo afitenoʼaeʼmo magoʼe huno koli huʼniye.

⁹ Halate Pailatiʼa agoti nopiʼmo uno haino Yesufeʼmo hunoʼaeʼmo, haiyategatiʼmo eʼnane, huno afi geʼnigenoʼaeʼmo Yesuʼa ge osuno afaʼa maiʼniye.

¹⁰ Pailatiʼa hunoʼaeʼmo, nagaefeʼmo naha opaigapiye. Nagaefeʼmo yagaika apatesana vekamo maigane, huʼa lekana paiʼa nateʼnayaʼmofeʼmo afaʼa ateyo, huʼna hisugeʼa katesageka afaʼa ugane. Amagiyo, huʼna hisuvana malipu yosaleʼmo nili aiteʼa aliʼa he tiʼa kategae, huno ha paiʼnigeno

¹¹ Yesuʼa hunoʼaeʼmo, Gotiʼmo namagisana agufa himamukamo okamiʼniyesinana nagaetegamo mago kavaʼmo afaʼa osanesine. Huʼniyaʼmofeʼmo navalelineno kamiʼniya vekamo hosu kavaʼamoʼmo kagae hosu kavaʼmo ago aeno agaseʼniye, huno ha paiʼniye.

¹² Pailatiʼa ani gemo afitenoʼaeʼmo Yesuʼmo afaʼa atesigeno visiya kafeʼmo kahauya huʼniyaʼmonanafa Yu vayaʼmogimo huʼapaeʼmo, atesanageno visiyana Sisaʼa hogote vekamo ala vekaʼapimo yagaino neʼapateya vekamo ao vekamo oʼmaiʼnane. Ala vekaʼapimo yagaiʼna neʼapatova kini vekamo maiʼnove, huʼa nehaya vayaʼmo Sisa kameʼamo maiʼnae, huʼa alopa gefatiʼmo huʼnae.

¹³ Pailatiʼa ani gemo afitenoʼaeʼmo Yesuʼmo kumatega avalelino uno lamino fai maiʼneno agoti huno neʼapateya siyateʼmo fai maiʼniye. Asole latapa yafaʼmo mopafi maleʼnaya yafateʼmo siyamo maleteno fai maiʼniya yatefeʼmo Himulu gefatiʼmo agiʼamo Gamatagayagae, huʼa agi aeʼnae.

¹⁴ Ani afinaʼmo Pasova neʼyaʼmo alo nehaya afinaʼmo haneʼniye. Yegemo haine neʼegenoʼaeʼmo Pailatiʼa hunoʼaeʼmo, ageyo, huno, yagaino nelapateya kini vekatapimo maiʼniye, huno hapa paiʼnigeʼapaeʼmo,

¹⁵ malipu yosaleʼmo nili aiyo, nili aiyo, huʼa huteʼa nili aiteka alika he tika ato, huʼa alopa gefatiʼmo huʼnae. Pailatiʼa hunoʼaeʼmo, yagaino nelapateya kini vekatapimo malipu yosaleʼmo nili aiteʼna aliʼna he tiʼna atesufiye, huno apafi geʼnigeʼapaeʼmo mono huʼa neʼapataya vayaʼaiteʼmo yagaiʼa neʼapataya vayaʼmogimo, Sisakeʼmo yagaino nelateya kini vekatimo maiʼniye, huʼa ha paiʼnae.

¹⁶ Inagi Pailatiʼa Yesuʼmo malipu yosaleʼmo nili aiteʼa aliʼa he tiʼa atesayafeʼmo avaleno apamiʼnigeʼa avaleliʼa uʼnae.

Yesuʼmo malipu yosaleʼmo nili aiteʼa aliʼa he tiʼa ateʼnaya gemae

¹⁷ Avaleli uʼnagenoʼaeʼmo agaiʼamo malipu yosaʼamo alino kofilino uno taonimo alino ataleno malaga mago aupilaga agiʼamo Anuʼayamufagayagamo uno avaʼyi huʼniye. Himulu gefatiʼmo agiʼamo Gogata haopalene.

¹⁸ Ani haopalegamo malipu yosaleʼmo nili aiteʼa aliʼa he tiʼa ateʼnae. Lole vekalaʼeʼmo malipu yosaleʼmo nili aiteʼa aluga aluga haopalateʼmo aliʼa he tiʼa anateʼnageno Yesuʼa folagapiʼmo maiʼniye.

¹⁹ Pailatiʼa mago gemo avoʼmo kaeteno mago vekamo amiʼnigeno agenopaleʼmo malipu yosaleʼmo nili ai maleʼniye. Ani gemoʼmo hunoʼaeʼmo, Yesuʼa Nasalasa vekamo Yu vayaʼaiteʼmo ala vekaʼapimo yagaino neʼapateya kini vekamae, huno avoʼmo kae maleʼniye.

²⁰ Yesuʼa malipu yosaleʼmo nili aiteʼa aliʼa he tiʼa ateʼnaya yategamo taoni haopaleʼmo haneʼniyaʼmofeʼmo muki Yu vayaʼmogimo ani kae maleʼniya avoʼmo lekana paiʼa ageʼnae. Ani gemo Himulu gefatiʼmo avoʼmo kaege Galiki gefatiʼmo kaege Lomu gefatiʼmo kaege hu maleʼniye.

²¹ Inagi mono huʼa neʼapataya vayaʼaiteʼmo yagaiʼa neʼapataya vayaʼmogimo Pailatifeʼmo huʼapaeʼmo, Yu vayaʼaiteʼmo ala vekaʼapimo yagaino neʼapateya kini vekamae, huka avoʼmo okaeka Yu vayaʼaiteʼmo yagaiʼna neʼapatova kini vekaʼapimo maiʼnove, huno huʼniye, huka avoʼmo kao, huʼa ha paiʼnageno

²² Pailatiʼa hunoʼaeʼmo, haʼao, huno, avoʼmo ago kae maleʼnovaʼmofeʼmo ani gemo alagikeʼmo kae maleʼnove, huno hapa paiʼniye.

²³ Ati vayaʼmogimo Yesuʼmo malipu yosaleʼmo nili aiteʼa aliʼa he tiʼa ateteʼapaeʼmo kukenaʼamo aliʼa fako huʼa loleʼe loleʼe hetamamo maleteʼa apamete apamete huʼa aliʼnae. Yesuʼa agufaleʼmo vaino neʼaliya siotiʼamo ofakaniʼniya siotimo asagiʼa maleʼneʼapaeʼmo,

²⁴ alita apake oʼaigetao, huteʼa yokalo lesunageno aeno lagasesiya vekamoʼa ani siotimo aligiye, huʼa huʼnae. Goti mukufiʼmo hu maleʼniya gemo afole aisiyafeʼmo ani kavaʼmo huʼnae. Ani gemoʼmo hunoʼaeʼmo, Kukenaʼnimo aliʼa fako huʼa magoke magoke huʼa aliʼnae. Yokalo leteʼa mago aeno apakaseʼniya vekamoʼa yatala kukenaʼnimo aliʼniye, huno huʼniye.

²⁵ Yesu itaʼamoʼagi itaʼamo aganaʼamoʼagi Maliyaʼa Lopasi anagi Maliyaʼa Maganala kotega anagi huʼa eʼa Yesu malipu yosamo aepaleʼmo he tiʼa maiʼnae.

²⁶ Yesuʼa anakeyana itaʼamoʼe hauʼniya vekamo geʼamo neʼafiya vekaʼeʼmo eʼana maiʼnaʼageno anaketenoʼaeʼmo itaʼamofeʼmo hunoʼaeʼmo, Ane, huno, agaemo mafaʼnekamae, huno ha paiteno

²⁷ geʼamo neʼafiya vekaeʼmo hunoʼaeʼmo, agaemo itakamoʼmae, huno ha paiʼnigeno ani vekamoʼmo ani afinaʼmo noʼalegamo avalelino uno alagepa huno yagaino ateʼniye.

Yesuʼmo faliʼniya gemae

²⁸ Yesuʼmo agesa afinoʼaeʼmo, muki aliʼyaʼnimo ago aliʼna hano huʼnove, huno agetenoʼaeʼmo Goti mukufiʼmo huʼniya gemo alino afole aino atesiyafeʼmo ina gemo hunoʼaeʼmo, anifeʼmo neʼnahaiye, huno huʼniye.

²⁹ Mago yuvapafiʼmo nofi alagafati aniʼmo atu neheya aniʼmo haneʼnigeʼa kanipa kayoteʼmo faiʼa lanu paiteʼa ani anipiʼmo kakiʼnofagana yaʼmo aliʼa aeteʼa alini uʼa Yesuʼa nesiyafeʼmo amiʼnae.

³⁰ Ani aniʼmo netenoʼaeʼmo, aliʼyaʼnimo ago aliʼna hano huʼnove, huno huteno ape huno maiʼnenoʼaeʼmo aunemeʼamo ataleteno faliʼniye.

Ati vekamoʼmo Yesu haopafiʼmo hayoletiʼmo aeʼniya gemae

³¹ Ani afinaʼmo Pasova neʼyaʼmo alo huʼa neʼmalaya afinaʼmo haneʼniyaʼmofeʼmo egamo hogote Sapati hopa afinaʼmo malipu yosaleʼmo nili aiʼnaya vayaʼmo malipu yosaleʼmo apakufaʼamo hanesiyafeʼmo Yu vayaʼmogi ohapauʼniyaʼmofeʼmo ati vayaʼmogi Pailatifeʼmo huʼapaeʼmo, Uʼa apaiyamo aiʼa lo aeteʼa apakufaʼamo aliniʼuʼa akaiʼa ataleyo, huʼa ha paiʼnae.

³² Ati vayaʼmogi uʼa lole vekalaʼani anaiyalaʼmo aiʼa lo aeteʼapaeʼmo

³³ Yesuʼmo agayana ago faliʼnigeʼa ageteʼa aiyamo aiʼa lo oʼaeʼnayaʼmonanafa

³⁴ mago ati vekamoʼa hayoletiʼmo haopafiʼmo faiʼnigenoʼaeʼmo malage huno kolaʼe aniʼeʼmo emineʼniye.

³⁵ Apakesamo afiʼa fatago hisayafeʼmo ani kavaʼmo ageʼniya vekamoʼmo faigoko gemo huno hapa paiʼniye. Agaemo hunoʼaeʼmo, lama gemo nehuve, huno, ago ageʼnove, huno hapa paiʼniye.

³⁶ Goti mukufiʼmo hu maleʼniya gemo aliʼa afole aiʼa atesayafeʼmo ani kavaʼmo huʼnae. Mago gemoʼmo hunoʼaeʼmo, magoke ayamufamo aiʼa lo oʼaegae, huno huʼniye.

³⁷ Magoʼe huno Goti mukufi gemoʼmo hunoʼaeʼmo, agufafiʼmo faiʼnaya vayaʼmogimo agegae, huno huʼniye.

Lole vekalaʼmoganimo yafa kapiʼmo alini uʼana kiʼana ateʼnaʼa gemae

³⁸ Ani kavaʼmo hutageno Yosefeʼa Alamatiya taonifi vekamoʼa uno Pailatifeʼmo hunoʼaeʼmo, Yesu agufaʼamo alininuʼna kiʼna ategesuve, huno afi geʼnigenoʼaeʼmo, he, huno ha paiʼniye. Yosefeʼa Yesu geʼamo neʼafiya vekamo maiʼniyaʼmonanafa Yu vayaʼaifeʼmo koli huʼniyaʼmofeʼmo aeno hakalo huno hapa opaiʼniye.

³⁹ Nikonimasiʼa hogoteno mago haniʼilagamo Yesutegamo eʼniya vekamoʼmo lole yosalapati aniʼmoʼa alagepa atumo neʼaiya malasini aniʼmoʼa agufaʼamo okasalino afaʼa hanesiya anitalamogani anakiʼanimo meyaʼe atosiʼeʼmo lusi kava huno kana huʼniya kuʼmo alinino eʼniye. Kana huʼniya yaʼamoʼmo 34 kilo agufa kana huʼniya yaʼmo haneʼniye.

⁴⁰ Lole vekalaʼmogani Yesu agufaʼamo aliʼana alagepa yaveyave kenafiʼmo hayaeteʼana alagepa atumo neʼaiya malasinimo aliʼana folagapiʼmo maleteʼana hayaeʼnaʼae. Ani kavaʼmo Yu vayaʼmogi nehaya agufa kavaʼmo huʼnaʼae.

⁴¹ Malipu yosaleʼmo nili aiteʼa aliʼa he tiʼa ateʼnaya haopaleʼmo mago yosa hoyamo haneʼnigeno mago saufa yafa kaʼmo haneʼnigeʼa mago vekamo kiʼa oʼateʼnaya yafa kaʼmo haneʼniye.

⁴² Yu vayaʼmogi Pasova neʼyaʼmo alo huʼa neʼmalaya hopa afinaʼmo ago hogo huʼnigeno ani yafa kaʼmo haopaleʼmo haneʼniyaʼmofeʼmo alini eʼana yafa kapiʼmo kiʼana ateʼnaʼae.