Yoni 15 - The Keyagana NT and 25 OT books

Yesuʼa nofikana huʼna maiʼnove, huno huʼniya gemae

¹ Yesuʼa hunoʼaeʼmo, nagaemo lama ge alagamo neʼaeya nofikana huʼna maiʼnove. Afoʼnimoʼmo ani nofi hoyamo afoʼamoʼmo maiʼneno neʼyagaiye.

² Agaemo nagaepatiʼmo aeʼniya nofi akopamoʼmo alagamo noʼaeya nofi akopamo hatagauno alino alagepa nehiye. Ani agufa kavakeʼmo huno alagamo neʼaeya nofi akopafatiʼmo magoʼe huno alagamo aesiyafeʼmo hatagauno alino alagepa nehiye.

³ Nagaemo hatagauʼna aliʼna alagepa hugekana huʼna aliʼna lapaya maleʼnova geletiʼmo hosu kavatapimo sese huʼna lapateʼnogetapa yaveyave vayaʼmo maiʼnae.

⁴ Nagaepiʼmo aeta hanitapa maigeʼnao nagaemo lapakaepiʼmo alagi maino. Nofi akopamoʼmo nofiʼafiʼmo aeno ohaniʼnigeno alagamo noʼaeya agufa kavaʼmo hutapa nagaepiʼmo alagi oʼmaiʼnisayaʼmoʼmo alagamo alagi oʼaegae.

⁵ Nagaemo nofiʼagana huʼna maiʼnogetapa nofi akopaʼagana hutapa maiʼnae. Naote maige lapaote maige huʼnisunana lapakaemo mago kavaʼmo afaʼa osugayaʼmofeʼmo nagaepiʼmo alagi maiʼnisageʼna lapakaepiʼmo alagi maiʼnisugetapaeʼmo asole alagamo afaʼa aegae.

⁶ Mago vekamoʼa nagaepiʼmo aeno hanino oʼmaiʼnisiyaʼmoʼmo akopamo hatagauno ataleʼnisigeno leno vaitesigeʼa aliʼa anupa huteʼa atafiʼmo aliʼa yaga auʼa kaesageno leno sagaligiye.

⁷ Lapakaemo nagaepiʼmo aeta hanitapa maiʼnisageno geʼnimo lapaipafiʼmo haneʼninagetapa lapauʼnisiya yafeʼmo Gotifeʼmo ge hutapa afi gesagenoʼaeʼmo afaʼa lapamigiye.

⁸ Lapakaemo asole alagamo aeʼnetapaeʼmo Afoʼnimoʼmo ala agiʼamo amisaya kavatetiʼmo geʼnimo neʼafiya vayaʼmo maigae.

⁹ Afoʼnimoʼmo nagaefeʼmo hau ayamopafiʼmo hauʼniya kava huno lapakaefeʼmo nahau nayamopafiʼmo nahauʼniye. Nahau nayamopafiʼmo nahauʼniya kavapiʼmo aeta hanitapa maiyo.

¹⁰ Geʼaepa geʼnimo akame hisayana nahau nayamopafiʼmo nahauʼniya kavapiʼmo aita hapaitapa maigae. Ani kava huʼna Afoʼnimo keʼaepa geʼamo akame nehuʼnaeʼmo Afoʼnimoʼmo hau ayamopafiʼmo hauʼniya kavapiʼmo alagi maiʼnove.

¹¹ Namogaga neʼauva kavaʼmoʼa lapaipafiʼmo havai tesigetapaeʼmo lapamogaga aisayafeʼmo mani gemo lapa nepauve.

¹² Geʼaepa geʼnimo haneʼniyana lapakaefeʼmo nahau nayamopafiʼmo nahauʼniya kava huno konagatapieʼmo lapau lapayamopafiʼmo lapaino.

¹³ Mago vekamoʼa ao vayaʼaifeʼmo hau ayamopafiʼmo hauʼninageno falino apatesaiyana ani agufa hau ayamopafiʼmo hauʼniya kavaʼamoʼmo muki vayaʼmogimo hapau apayamopafiʼmo hapauʼniya kavaʼapimoʼa ago aeno agaseʼniye.

¹⁴ Lapakaefeʼmo muki gemo mani kava hiyo, ina kava osiyo, huʼna lapa paiʼnova geʼnimo akame nehisayaʼmoʼmo nao vayaʼmo maiʼnae.

¹⁵ Aliʼyaʼmo afoʼamoʼmo aliʼyaʼamo neʼaliya vayaʼmo muki aliʼyaʼamo alisayafeʼmo aliʼyaʼmo aepaʼamo alino apave noliyaʼmonanafa aliʼyaʼnimo neʼaliya vayaʼageʼmo maiʼnayaʼmofeʼmo hemenimo magoʼe huʼna ge osuguve. Afoʼnimotegatiʼmo muki geʼamo afiʼnova gemo ago lapa paiʼnovaʼmofeʼmo nao vayaʼmo maiʼnae, huʼna nehuve.

¹⁶ Lapakaemo lekana paitapa oʼnateʼnafa nagaekeʼmo lekana paiʼna lapateʼnovanagetapa alagamo hanege hanege huno hanesiya alagamo aesayafeʼmo lekana paiʼna lapateʼnove. Afoʼnimofeʼmo nagiʼniletiʼmo muki kavafeʼmo ge hutapa afi gesayana afaʼa lapamigiye.

¹⁷ Inagi ani keʼaepa geeʼmo lapa paiʼnaeʼmo, konagatapieʼmo lapau lapayamopafiʼmo lapaino, huʼna ago lapa paiʼnove, huno hapa paiʼniye.

Ma mopafi vayaʼmogimo apaini hugae, huno hapa paiʼniya gemae

¹⁸ Ma mopafi vayaʼmogimo lapakaefeʼmo apaini huʼnisayana hogoteʼa Ala kava nefeʼmo apaini huʼnaya kava huʼa lagaefeʼmo apaini nehae, hutapa lapakesamo afiyo.

¹⁹ Lapakaemo ma mopafi vayaʼmo maiʼnaesinana ma mopafi vayaʼmogimo vayaʼapieʼmo hapauʼniya agufa kavaʼmo huʼa lapakaefeʼmo hapau apayamopafiʼmo hapauʼniesine. Hapauʼniyesinaʼmonanafa nagaemo ma mopafi vayapatiʼmo lekana paiʼna lapateʼnogetapa ma mopafi vayapiʼmo oʼmaiʼnayaʼmofeʼmo lapakaefeʼmo apaini nehae.

²⁰ Nagaemo, mago aliʼyaʼamo neʼaliya vekamoʼmo aliʼyaʼmo afoʼamoʼmo aeno noʼagase, huʼna lapa paiʼnova geeʼmo lapakesamo afiyo. Apakaemo apaini huʼa natesaya agufa kava huʼa lapakaeʼeʼmo apaini huʼa lapategae. Apakaemo geʼnimo afiʼnisayana getapimo afigae.

²¹ Apakaemo alino nateʼnigeʼna emiʼneʼnova vekamo oʼageʼnayanageʼa vayaʼnimo maiʼnayaʼmofeʼmo lapakaetegamo muki ani agufa kavakeʼmo hugae.

²² Emiʼneʼna hapa opaiʼnovesinana apakameʼyamo oʼnamisageno hosu kavaʼapimo afaʼa ohaneʼniyesine. Ago hapa paiʼnovaʼmofeʼmo hosu kavatimo oʼageʼnone, huʼa alagi osugae.

²³ Ina lagimo nagaefeʼmo apaini nehafi ani kava huʼa Afoʼnimoʼefeʼmo apaini nehae.

²⁴ Nagaemo apakaetegamo emineʼna vayaʼmogi nosaya agufa kavaʼmo osuʼnovesinana apakameʼyamo oʼnamisageno hosu kavaʼapimo ohaneʼniyesinaʼmonanafa huʼnova kavaʼmo ago ageteʼapaeʼmo nagaeʼe Afoʼnimoʼefeʼmo apaini huʼnae.

²⁵ Apakae keʼaepa gemoʼmo hunoʼaeʼmo, apakaetegamo mago hosu kavaʼmo osuʼnovaʼmonanafa nagaefeʼmo fikumo apaini huʼnae, huno avoʼmo kae maleʼniya gemo afole aisiyafeʼmo ani kavaʼmo nehae.

²⁶ Nagaemo lapa maesiya vekamo alagi lama gemo aepa Aunemeʼamo Afoʼnimotegatiʼmo aliʼna atesugeno emineno nagaefeʼmo faigoko geʼnimo hugiye.

²⁷ Lapakaemo aliʼyaʼnimo aepa faiʼna aliʼnova afinatetiʼmo nagaeʼeʼmo magokepi lokaeta maime maime etapa hemeniʼeʼmo maiʼnayaʼmofeʼmo lapakaeʼeʼmo nagaefeʼmo faigoko geʼnimo aeta hakalo hugae, huno hapa paiʼniye.