Yoni 14 - The Keyagana NT and 25 OT books

Yesuʼa hunoʼaeʼmo, kakana huʼna maiʼnove, huno huʼniya gemae

¹ Yesuʼa hunoʼaeʼmo, Lahapausoli osuge lapaipamoʼmo atete osuge hino. Gotifeʼmo lapakesamo afita fatago huge nagaefeʼmo lapakesa afita fatago huge nehayaʼmofeʼmo oʼataletapa magoʼe hutapa lapakesa afita fatago hiyo.

² Afoʼnimoʼmo maiʼniya koteʼmo maisaya noʼmo asole nokoʼmo haneʼniye. Ohaneʼniyesinana haneʼniye, huʼna lapa opauvesine. Lapakaemo haitapa maisaya noʼmo nagaemo alo hisuvafeʼmo uʼna haiguve.

³ Haiʼna notapimo alo huʼna lapateteʼnaeʼmo nagaegiʼeʼmo magokepi uta haita lokaeta maisunafeʼmo emiʼneʼna lapavalesugeta uta haigune.

⁴ Visuva koʼmo ago agege visuva kaʼmo ago agege huʼnae, huno hapa paiʼnigeno

⁵ Tomasiʼa hunoʼaeʼmo, Ala kava nene, huno, visana koʼmo lagaemo oʼageʼnonaʼmofeʼmo haiya kava huta visana kaʼmo agegaune, huno afi geʼnigenoʼaeʼmo,

⁶ Nagaemo kaʼmo maiʼneʼna lama gemo aepa vekamo maiʼneʼnaeʼmo vayaʼmo afaʼa maisaya yaʼmo aepa vekamo maiʼnove. Muki vayaʼmogimo muki yaʼmo Afoʼamotegamo apakaiʼapimo afaʼa oʼugafa nagaeteʼmo eteʼapaekeʼmo muki yaʼmo Afoʼamotegamo afaʼa ugae.

⁷ Nageta alagepa hutapa nageʼnaesinana ani kava hutapa Afoʼnimoʼmo ageta alagepa hutapa nageʼnaesine. Ageʼnayaʼmofeʼmo hemenimo mani afinatetiʼmo aepa faitapa Afoʼnimoʼmo agetapa alagepa hugae, huno hapa paiʼnigeno

⁸ Filipiʼa hunoʼaeʼmo, Ala kava nene, huno, Muki yaʼmo Afoʼamoʼmo alika lave lisanageta agetetaeʼmo alagine huteta maino, huno ha paiʼnigeno

⁹ Yesuʼa hunoʼaeʼmo, Filipigamo lapakaeʼeʼmo yatala afinaʼmo magokepi lokaeʼna maiʼnovana nageka aeto osuʼnapiye. Nageʼniya vekamoʼa muki yaʼmo Afoʼamoʼmo ago ageʼniyaʼmofeʼmo na kava higekaeʼmo muki yaʼmo Afoʼamoʼmo alika lave liyo, huka nehane.

¹⁰ Nagaemo muki yaʼmo Afoʼamopiʼmo maiʼnogeno muki yaʼmo Afoʼamoʼmo nagaepiʼmo maiʼniye, huka kagesamo afika fatago osuʼnapiye. Lapa nepauva gemo nagaiʼni nagesafatiʼmo nagesa afiʼna lapa nopauvaʼmonanafa agaemo muki yaʼmo Afoʼamoʼmo nagaepiʼmo maiʼnenoʼaeʼmo aliʼyaʼamo neʼaliye.

¹¹ Muki yaʼmo Afoʼamopiʼmo maiʼnogeno muki yaʼmo Afoʼamoʼmo nagaepiʼmo maiʼniye, huʼna nehuva geeʼmo lapakesamo afita fatago hiyo. Nehuva geeʼmo lapakesa afita fatago nosisayana lokiya kavaʼmo nehuva kavaʼmo agetetapaeʼmo lapakesa afita fatago hiyo.

¹² Lama gemo lapa nepauve, huno, nagaefeʼmo apakesa afiʼa fatago nehaya vayaʼmogimo nagaemo nehuva agufa kavaʼmo afaʼa hugae. Afoʼnimotegamo uʼna haiguvaʼmofeʼmo nagaemo nehuva kavaʼmo ago aeʼa nagaseʼa magoʼe kavaʼmo hugae.

¹³ Lapakaemo nagiʼniletiʼmo na agufa kavafeʼmo nunumuʼmo hutapa nafi gesafi Afoʼnimo ha le konali yaʼamo aliʼna lapave lisuvafeʼmo ani kavaʼmo afaʼa huguve.

¹⁴ Nagiʼniletiʼmo muki kavafeʼmo ge huta nafi gesayana ani kavaʼmo afaʼa huguve.

Yesuʼa Goti Aunemeʼamo aliʼna atesugeno emiʼnegaiye, huno hapa paiʼniya gemae

¹⁵ Nagaefeʼmo lapau lapayamopafiʼmo lapauʼnisiyaʼmoʼmo ina kavaʼmo hiyo, huʼna nehuva gemo akame hiyo.

¹⁶ Nagaemo muki yaʼmo Afoʼamofeʼmo nunumuʼmo hisugeno magoʼe huno lapa maesiya vekamo emineno lapakaeʼeʼmo muki afinaʼmo alagi magokepi lokaeno maisiyafeʼmo lapamigiye.

¹⁷ Gotiʼa Aunemeʼamo alagi lama geʼage aepa Aunemeʼamo lapamigiye. Ma mopafi vayaʼmogimo agaemo oʼageʼnayaʼmofeʼmo ageʼa aeto osuʼnayanageʼa afaʼa oʼagegayaʼmonanafa lapakaeʼeʼmo maiʼniyaʼmofeʼmo ago ageʼnae. Agaemo lapakaeʼeʼmo ago maiʼniyanageno lapakaepiʼmo maigiye.

¹⁸ Megusa mafaʼnegana hutapa oʼmaisayafeʼmo lapakaetegamo emiʼnegauve.

¹⁹ Aise afinaʼmo utesigeʼapaeʼmo ma mopafi vayaʼmogimo halate oʼnagegayaʼmonanafa lapakaemo halate nagegae. Maige maige huʼna neʼmauva vekamo maiʼnovaʼmofeʼmo lapakaemo ani kava hutapa afaʼa maigae.

²⁰ Ani afinaʼmo afole aisigetapaeʼmo agetapaeʼmo Afoʼamopiʼmo maiʼnigeta agaepiʼmo maiʼnonageno lagaepiʼmo maiʼniye, hutapa nagegae.

²¹ Vayaʼmogi keʼaepa geʼnimo ma kava hiyo, ina kava osiyo, huʼna hapa nepauva gemo afiteʼa akame nehaya vayaʼmogi nagaefeʼmo hapau apayamopafiʼmo nehapaiya vayaʼmo maiʼnae. Afoʼnimoʼmo nagaefeʼmo hapau apayamopafiʼmo nehapaiya vayaʼaifeʼmo ani kavakeʼmo huno hau ayamopafiʼmo hauʼnisigeʼna nagaeʼeʼmo ani kavakeʼmo huʼna nahau nayamopafiʼmo nahauʼnisigeʼna nagaiʼnimo aliʼna apave lisugeʼa nagegae, huno hapa paiʼnigeno

²² Yutasiʼa Isakaliyoti kotega vekamo hamoʼamoʼmo hunoʼaeʼmo, Ala kava nene, huno, na kava higekaeʼmo kagaikamo kagesunafeʼmo lagaekeʼmo alika lave liganaʼmonanafa ma mopafi vayaʼmo alika apave oligane, huno afi geʼnigenoʼaeʼmo

²³ Yesuʼa geʼaleʼmo aeno atagaina huno ha painoʼaeʼmo, nagaefeʼmo hapau apayamopafiʼmo nehapaiya vayaʼmogimo geʼnimo akame hugae. Akame hisageno Afoʼnimoʼa apakaefeʼmo hau ayamopafiʼmo hauʼnisigetaʼa agaeʼe nagaeʼeʼmo apakaemo maiʼnisayategamo emitetaʼa magokepi lokaetaʼa maige maige huta maigune.

²⁴ Nagaefeʼmo hapau apayamopafiʼmo nohapaiya vayaʼmogimo geʼnimo alagi akame nosae. Nagesafatiʼmo nagesamo afiʼna mani gemo lapa nopaufa muki yaʼmo Afoʼamoʼmo alino nateʼnigeʼna emiʼneʼnova vekalegatiʼmo mani gemo aliʼna lapa nepauve.

²⁵ Lapakaeʼeʼmo magokepi lokaeʼna maiʼneʼnaeʼmo mani gemo lapa nepauve.

²⁶ Hemenimo lapa nepauvaʼmonanafa muki yaʼmo Afoʼamoʼmo aote Aunemeʼamoʼmo lapa maesiya vekamo nagiʼniletiʼmo alino atesigeno lapakaetegamo emineno muki geʼamo alino lapaya maleteno lapaipa lapakesamo alino he tino lapatesigetapa lapa nepauva geeʼmo lapakesa afita ho hugae.

²⁷ Naipamoʼmo falu huʼnigeʼna maiʼnova kava hutapa lapaipamoʼmo falu huʼnisigetapa maisayafeʼmo nelapamuve. Ma mopafi vayaʼmogi neʼapamiya kava huʼna nolapamuve. Lapausoli hutetapa lapaipamoʼmo atete huʼnisigetapa koli osiyo.

²⁸ Nagaemo huʼnaeʼmo, lapataleʼna haiteʼnaeʼmo halate emiʼnegauve, huʼna lapa paiʼnogetapa ago afiʼnae. Nagaefeʼmo lapau lapayamopafiʼmo lapauʼniyesinana Afoʼnimoʼmo ago aeno nagaseʼniya vekalegamo uʼna haisuvafeʼmo lapamogaga neʼaiyesine.

²⁹ Ani kavaʼmo afole aisigetapaeʼmo lapakesa afita fatago hisayafeʼmo hemenimo lapa nepauve.

³⁰ Ma mopafi vayaʼaiteʼmo yagaino neʼapateya vekamo ago neʼeyaʼmofeʼmo yatala gemo lapa opaiguve. Ago neʼeyaʼmonanafa agae yaʼmo naipafiʼmo ohaneʼniyaʼmofeʼmo afaʼa yagaino oʼnategaiye.

³¹ Ma mopafi vayaʼmogi muki yaʼmo Afoʼamofeʼmo nagaemo nahau nayamopafiʼmo nahauʼniya kavaʼmo agesayafeʼmo muki yaʼmo Afoʼamoʼmo, ina kava huvo, huno naha paiʼniya kavaʼmo akame huʼna nehuve. Mani nopatiʼmo ataleta he tita vigetao.