Yona 4 - The Keyagana NT and 25 OT books

Gotiʼa aipamo falu huno apateʼnigenoʼaeʼmo Yonaʼa aipamo leʼniya gemae

¹ Gotiʼa huʼniya kavafeʼmo Yonaʼa alagi ohauʼnigenoʼaeʼmo aipamo leʼniye.

² Yonaʼa nunumuʼmo hunoʼaeʼmo, Ala kava nene, huno, Koʼnimo ataleʼna oʼmeʼnova afinaʼmo ani kavaʼmo hugane, huʼna huʼnofiye. He, ani gemo ago huʼnove. Ani kavaʼmo hugane, huʼna nagesamo afiʼnovaʼmofeʼmo ataleʼna naune hetaleʼna Tasisi taonifiʼmo ugefeʼmo huʼnove. Ago afiʼnovana kagaemo fiku hapa maeka apamiteka kahau huka neʼapatana Gotigamo maiʼnane. Kaipamo malage huno nole. Kahau kayamopafiʼmo kahauʼniya kavaʼmo asole kavakamo haneʼniye. Kagaemo vayaʼmo apamagisanafeʼmo okahauʼniyaʼmofeʼmo halate alu kaipa kagesamo afiʼnane.

³ Ani kava nehanaʼmofeʼmo Ala kava nene, huʼna, Hemenimo afaʼa neʼmauva yaʼnileʼmo aligeʼna ago falino. Afaʼa maisuvana kanale osugiye. Kanale kavanageʼna afaʼa faliguve, huno nunumuʼmo huʼniye.

⁴ Ala kava neʼmoʼa hunoʼaeʼmo, Yonao, huno, Kaipamo neleya kavakamo kanale kavaʼmo nehapiye, huno afi geʼniye.

⁵ Yonaʼa taonifatiʼmo ataleno malaga uno lamino yegemo haine neʼeya kategamo uno uluna noʼmo kiteno ulunapiʼmo maiʼneno taonifiʼmo na agufa kavaʼmo afole aisifi huno agava maiʼneno ageno maiʼniye.

⁶ Ala kava neʼmo Gotiʼa yegemo oʼalesigeno ulunapiʼmo maisiyafeʼmo nofifeʼmo, hago, huno huʼnigeno nofiʼmo hageteno no yosaleʼmo kino haiʼniye. Yonaʼa ani nofifeʼmo lusi kava huno amuse huʼniye.

⁷ Egamo kotilamiyapiʼmo Gotiʼa mago kafamo alino ateʼnigeno eno nofipiʼmo neʼnigeno falu teʼniye.

⁸ Yegemo haineteno leʼnigenoʼaeʼmo Gotiʼa amuko yasimo alino ateʼnigeno amuko yasimo alige yegemoʼmo Yona agenopaleʼmo alege huʼnigeno Yonaʼa aulagamoʼmo atete huteno kalafe kalafe huʼnigeno falisiyafeʼmo huʼniye. Yonaʼa Gotifeʼmo, Faliguve. Afaʼa maisuvana kanale osugiye. Kanale kavanageʼna afaʼa faliguve, huno ha paiʼnigeno

⁹ Gotiʼa hunoʼaeʼmo, Nofiʼmo falu teʼniyaʼmofeʼmo kaipamo leʼnigeka kanale kavaʼmo nehapiye, huno afi geʼnigenoʼaeʼmo, he, naipamo lusi kava huno leʼnigeʼna alagepa kavaʼmo nehuve. Afaʼa faligesuve, huno ha paiʼniye.

¹⁰ Ala kava neʼmoʼa hunoʼaeʼmo, Ani nofiteʼmo yagaika oʼatege alagepa huno hanesiyafeʼmo aliʼyaʼmo oʼalige huʼnane. Ani nofiʼmo magoke haniʼilagamo malage huno hageteno alu haniʼilagamo ago falu teʼniye. Ani aise nofiʼmo ina agufa nofifeʼmo kahau huka neʼatane.

¹¹ Ani kava huʼna Niniva vayaʼaifeʼmo nahau huʼna apateʼnove. Niniva taonifiʼmo lusi asole nute mafaʼne anagaʼmo vani hataleti tuveti tauseniʼamo (120,000) maige asole afumo maige huʼnae, huno ha paiʼniye.