Yona 3 - The Keyagana NT and 25 OT books

Yonaʼa Niniva taonifiʼmo uʼniya gemae

^1-2 Halate Ala kava neʼmoʼa Yonafeʼmo ha painoʼaeʼmo, Alo huka alopa taonimo Niniva taonifiʼmo uka ago kaha paiʼnova gemo aeka hakalo huka hapa paiyo, huno ha paiʼniye.

³ Ha paiʼnigeno Yonaʼa Ala kava neʼmo geʼamo afiteno alo huno Niniva taonifiʼmo uʼniye. Niniva taonimo alopa taonimo haneʼniye. Mago vekamoʼmo ani taonifiʼmo magokayaga atupalegatiʼmo visiyana loleʼe magoʼe felugaʼe haniʼilagaʼeʼmo maiteno uno magokayaga atupalegamo avaʼyi hisiya agufa alopa taonimo haneʼniye.

⁴ Yonaʼa ani taonimo magokayaga atupalegatiʼmo uno magoke felugamo maiteno uno taoni folagapiʼmo muki vayaʼaifeʼmo hunoʼaeʼmo, Fotiʼa afinaʼmo utesigeno Gotiʼa Niniva taonimo alino hano huno ataleteno alino lapagoʼya lagauno lapatalegaiye, huno aeno hakalo huno hapa paiʼniye.

⁵ Niniva taonifiʼmo maiʼnaya vayaʼmogimo ani Goti geʼamo afiteʼapaeʼmo, lama gemo huʼniye, huteʼa apakesamo afiʼa fatago huʼnae. Lagaemo ina agufa vayaʼmogitaʼe ala lagi vayaʼmogitaʼeʼmo laipamo alita afe leteta neʼyaʼmo mosiʼneta kogu agufa kukenamo alita vaiteta maigune, huʼa huʼnae.

⁶ Ala kini vekaʼapimo Niniva vayaʼaiteʼmo yagaino neʼapateya vekamoʼmo ani gemo afitenoʼaeʼmo yagaino neʼapateya siyateʼmo fai maiʼniyatetiʼmo he tino vailiʼneno yagaino neʼapateya kukenaʼamo asagino maleteno kogu kukenamo alino vaiteno laʼnefafiʼmo itopale maiʼniye.

⁷ Agaemo mago keʼaepa gemo huteno Niniva vayaʼaitegamo ataleʼnigeno uneno huʼniye. Ani gemo hunoʼaeʼmo, Ala vekatapimoʼnaʼe yahauve vayaʼeʼmo keʼaepa gemo hu maleʼnone. Ani gemo hutaeʼmo, Muki vayaʼamogitapamogi pulumakagi sipisipimogi hutapa aniʼmo oʼnege neʼyaʼmo oʼnege hutetapa afaʼa mositapa maiyo.

⁸ Muki vayaʼamogitapamo kogu kukenamo vaitetapa afumo kogu kukenamo kofita apateyo. Gotifeʼmo lokiya vaitapa nunumuʼmo hiyo. Muki vayaʼamogitapamo lapaote lapaote hutapa hosu kavatapimo atalege vayaʼmo neʼapamagiya kavaʼe kaveta nehaya kavaʼeʼmo atalege hutetapa maiyo.

⁹ Gotiʼa ani kavaʼmo huguve, huno huʼniya geʼe aipamo leno lateʼniya kavaʼeʼmo atalesifi oʼatalesifigeta ofalisunafeʼmo amalageka huta agegaune, huno hapa paiʼniye.

¹⁰ Ani kava huʼa hosu kavaʼapimo ataleʼnageno Gotiʼa apaketenoʼaeʼmo halate alu aipa agesamo afiteno ani kavaʼmo huguve, huno hapa paiʼniya kavaʼmo osuno ataleʼniye.