Yona 1 - The Keyagana NT and 25 OT books

Yonaʼa ataleno aune hetaleno uʼniya gemae

¹ Ala kava neʼmoʼa Yonaʼmo Amitai mafaʼneeʼmo ha painoʼaeʼmo,

² Alo huka alopa taonimo Niniva taonifiʼmo uka ge hapauvo. Lusi hosu kavaʼmo nehageʼna apakeʼnove, huno ha paiʼniyaʼmonanafa

³ Yonaʼa Ala kava netegatiʼmo ataleno aune hetaleno Tasisi taonifiʼmo ugefeʼmo huʼniye. Ataleno uno Yopa taonifiʼmo uno lamino Tasisi taonifiʼmo ugefe huʼniya sipimo miya faiteno sipifiʼmo uno haino maiʼniye. Yonaʼa Ala kava netegatiʼmo ataleno aune hetaleno uʼniye.

⁴ Aune hetaleno neʼvigenoʼaeʼmo Ala kava neʼmoʼa lusi lokiya yasimo alino ateʼnigeno solovala aniteʼmo alinino eʼniye. Lusi yasimo alige ko aige huʼnigeno aniʼmoʼa aino holakau holakau huno sipimo aeno atagisiya agufa kavaʼmo huʼniye.

⁵ Sipifiʼmo aliʼyaʼmo neʼaliya vayaʼmogi lusi kava huno apamoʼya aiteno hapausoli huʼnigeʼapaeʼmo gotiʼapimogifeʼmo apamete apamete huʼa, laha mao laha mao, huʼa keya aeʼnae. Sipimoʼmo kana osisiyafeʼmo sipifiʼmo haneʼniya kagemi yaʼmo aliʼa anipiʼmo yaga auʼa ataleʼnae. Ani kava huʼnagenoʼaeʼmo Yonaʼa anagamo oʼmaiʼnifa sipimo afepilagamo uno lamino au kaleno maiʼniye.

⁶ Sipifiʼmo aliʼyaʼmo neʼaliya vayaʼaiteʼmo yagaino neʼapateya vekamoʼmo ageyana Yonaʼa afaʼageʼmo au kaleno maiʼnigeno agetenoʼaeʼmo, Na kava higekaeʼmo kau kaleka maiʼnane. He tika kagaemo gotikamofeʼmo keya aeka ge huvo. Ofalisunafeʼmo afiteno laha maesifi laha oʼmaesifigi ge huka afi go, huno ha paiʼniye.

⁷ Sipifiʼmo aliʼyaʼmo neʼaliya vayaʼmogi apakaiʼapi apakaiʼapimo huʼapaeʼmo, Lagitimo avoʼmo kaeteta kupiʼmo ku ai maleʼneta kupatiʼmo ina la agimo alisupi mani neʼaluna hanageke yaʼmo aepa vekamo agaemae, huta agegaune, huʼa huʼnae. Ani kavaʼmo huteʼa Yona agimo aliʼnae.

⁸ Apakaemo Yonafeʼmo huʼapaeʼmo, Mani neʼaluna hanageke yaʼmo aepa vekamo ina laʼae. Na kava higekaeʼmo sipifiʼmo maiʼnane. Kagaemo haiya kotega vekamo maiʼnane. Haiya nofi vayapati vekamo maiʼnane, huʼa loka huʼa afi geʼnae.

⁹ Afi geʼnagenoʼaeʼmo, Himulu nofi vekamo maiʼnove. Ala kava neʼmo kokuʼnapi neʼmaiya Gotiʼmo solovalate aniʼe mopaʼeʼmo alo huʼniya Gotitefeʼmo mono nehuva vekamo maiʼnove, huno hapa paiʼniye.

¹⁰ Ani gemo afiteʼapaeʼmo sipifiʼmo aliʼyaʼmo neʼaliya vayaʼmogi lusi kava huno apamoʼya aiʼnigeʼapaeʼmo, Kagaemo lusi hosu kavaʼmo huʼnane, huʼa ha paiʼnae. Hogoteno yasimo oʼaliʼnigenoʼaeʼmo Yonaʼa hunoʼaeʼmo, Nagaemo Ala kava netegatiʼmo ataleʼna naune hetaleʼna neʼove, huno hapa paiʼnigeʼa ago afiʼnayaʼmofeʼmo lusi hosu kavaʼmo huʼnane, huʼa ha paiʼnae.

¹¹ Solovala aniʼmoʼa lusi kava huno ayamukiki huno magoʼe magoʼe huno aino holakau holakau huʼnigeʼapaeʼmo sipifiʼmo aliʼyaʼmo neʼaliya vayaʼmogi Yonafeʼmo huʼapaeʼmo, Kagaetegamo na agufa kavaʼmo hisunageno aniʼmo afaʼa hanesigeta ugune, huʼa afi geʼnageno

¹² Yonaʼa hunoʼaeʼmo, nasagauta yaga autapa natalegenoʼao aniʼmo afaʼa haneno, huno hapa paiʼniye. Ago afiʼnovana aniʼmoʼa lapakaetegamo lusi kava huno aino holakau holakau nehiya kavaʼmo aepa vekamo nagaekeʼmo maiʼnove, huno hapa paiʼniye.

¹³ Sipifiʼmo aliʼyaʼmo neʼaliya vayaʼmogimo ani agiʼnaleʼmo visayafeʼmo latapa kayotetiʼmo apaya mukiki huʼa aniʼmo avaleʼa apakamelaga ataleme ataleme uʼnayana ani agiʼnaleʼmo malage huʼa oʼuʼnageno yasimo alige aniʼmoʼa magoʼe magoʼe huno aino holakau holakau huge huʼniyaʼmofeʼmo afaʼa oʼuʼnae.

¹⁴ Apakaemo Ala kava nefeʼmo huʼapaeʼmo, Ala kava nene, huʼa, Mani vekamo asagauta anipiʼmo yaga auta atalegaunaʼmofeʼmo ani kavaʼmo anonaʼatimo alagi olategeta afaʼa maino. Vayaʼmo neʼapamagiya vayaʼmo agoti huka neʼapatana kava huka agoti huka olato. Ala kava nene, huʼa, Kagaemo ani kavaʼmo alika lave liʼnane, huʼa ha paiteʼa

¹⁵ Yonaʼmo asagauʼa anipiʼmo yaga auʼa ataleʼnagenoʼaeʼmo aniʼmo aino holakau holakau osuno afaʼa haneʼniye.

¹⁶ Sipifiʼmo aliʼyaʼmo neʼaliya vayaʼmogi ani kavaʼmo ageteʼapaeʼmo Ala kava nefeʼmo lusi kava huʼa koli huteʼa afumo amagiʼa Gotiʼmo ofalinimo amiteʼa mago alagepa kavaʼmo hisayafeʼmo magoke magoke vayaʼm ogi huʼapaeʼmo, ina kava huguve, ma kava huguve, huʼa hute hute huʼnae.

¹⁷ Ala kava neʼmoʼa alopa noyamemo alino ateʼnigeno uno aka huʼneno Yonaʼmo alino nakaitalegeno uno lamino loleʼe magoʼe felugaʼe haniʼilagaʼeʼmo noyamemo agupafiʼmo maiʼniye.