Yemisi 5 - The Keyagana NT and 25 OT books

Asole kagemi yaʼapimo haneʼniya vayaʼaifeʼmo huʼniya gemae

¹ Asole kagemi yatapimo haneʼniya vayaʼmogitapae, huʼna, lapakufaleʼmo afole aisiya hanageke yafeʼmo lapakesamo afitetapa kage kage hutapa aviʼyaʼmo hiyo.

² Kagemi yatapimo kasalige kukenatapimo kafamoʼmo hatagauge monitapileʼmo oʼaniʼya faige huʼniye.

³ Monitapileʼmo oʼaniʼya faiʼniya yaʼmoʼa agoti huno lapateteno atagana huno leno lapasaga ligiye. Lapakaemo henaga afinafeʼmo magoʼe kagemi yatapimo alita anupa hutapa malege malege hutapa neʼmaiye.

⁴ Aliʼyatapimo neʼaliya vayaʼmogi hoyatapifiʼmo aliʼyaʼmo neʼaliya vayaʼaifeʼmo humi apatetetapa hosu miyaʼmo neʼapamiye. Oʼapamiʼnaya monimoʼa hosu kavatapieʼmo keya aeno ge hugekana huno haneʼniye. Aliʼyatapimo neʼaliya vayaʼmogi keya aeʼa ge nehagenoʼaeʼmo Ala kava neʼmoʼa muki kokuʼnapi neʼmaiya vayaʼaiteʼmo yagaino neʼapateya vekamoʼa ani keya aeʼa ge nehaya gemo neʼafiye.

⁵ Lapakaemo muki ma mopafi kagemi yatapimo agetapa malege lapakufamoʼa hauʼniya kavaʼmo huge hutapa maiʼnae. Muki afinaʼmo afumo heʼa lusi yagita nehaya kavakana hutapa maiʼnetapa apaipaguʼe vayakana hutapa maiʼnae.

⁶ Lapakaemo fatago vayaʼaina agoti hutapa apatetetapaeʼmo kamitimo apamagiʼnae. Afaʼamo maiʼneʼapaeʼmo lapakaetegamo mago kavaʼmo osuʼnayaʼmonanafa fikumo apamagiʼnae.

Goti mafaʼnemogitapae, huʼna, oʼataleta atafauta alagi huʼnetapa agava maiyo, huno huʼniya gemae

⁷ Konagaʼnimogitapae, huʼna, kagemi yaʼapiʼe vayaʼmogimo ani kavaʼmo nehayaʼmofeʼmo oʼataletapa atafauta alagi huʼnetapa agava maime maime neʼvigenoʼao Ala kava neʼmo eminegaiye. Hoyamo aliʼa neʼvaiya vayaʼmogimo avina yaʼmo nehakalaya afinaʼe neʼyaʼmo hagesigeʼa alisaya afinaʼefeʼmo oʼataleʼa atafauʼa alagi huʼa maiʼneʼapaeʼmo agava maiʼniye.

⁸ Ani kava hutapa atafauta alagi huʼnetapaeʼmo oʼataleta agava maiyo. Ala kava neʼmo aise afinaʼmo eminegaiyaʼmofeʼmo lapaipamo alita lokiya vaitapa lapateyo.

⁹ Konagaʼnimogitapae, huʼna, konagatapieʼmo ge ohapaiyo fiku yanageno Gotiʼa hosu gemo nehae, huno hugiye. Afiyo, huʼna, alino fako huno apatesiya vekamo kipateʼmo he tino maiʼniye.

¹⁰ Konagaʼnimogitapae, huʼna, ema akeyaʼvilaga vayaʼmogi Gotitegati gemo alini eʼa aeʼa hakalo huʼa hapa nepaiya vayaʼai kavafeʼmo lapakesamo afitetapa apakame hiyo. Apakaemo Ala kava neʼmo agiʼalefeʼmo geʼamo hapa nepaiʼapaeʼmo kana yaʼmo aliʼneʼapaeʼmo oʼataleʼa atafauʼa alagi huʼnae.

¹¹ Lagaemo hutaeʼmo, oʼataleʼa atafauʼa alagi huʼa maiʼnaya vayaʼaifeʼmo Gotiʼa hunoʼaeʼmo, naulagaleʼmo alagepa huʼa maiʼnaya vayane, huno nehiye, huta nehune. Lapakaemo ago afiʼnayana akeyaʼvilaga vekamo Yopuʼa kana yaʼmo aliʼnenoʼaeʼmo oʼataleno atafauno alagi huno maime maime neʼegenoʼaeʼmo Ala kava neʼmoʼa ha maeʼniya kavafeʼmo ava gemo ago afiʼnae. He, Ala kava neʼmoʼa lusi kava huno hau huno apateteno hau ayamopafiʼmo nehaiya vekamo maiʼniye, hutapa ago afiʼnae.

¹² Konagaʼnimogitapae, huʼna, hogote kavaʼmo ina kavaʼmo huno haneʼniyanagi getapimo alita lokiya vaitapa atesayafeʼmo hutapaeʼmo kokuʼnategaeʼmofi ma mopalefeʼmofi alu yatetiʼeʼmofi hutapa alagi lama gemo nehuve, hutapa osiyo. Fiku yanageno Gotiʼa agoti huno lapategaiyaʼmofeʼmo he, nehutapaeʼmo heʼageʼmo hiyo. Haʼao, nehutapaeʼmo haʼaoʼageʼmo hiyo.

Siosi vayaʼmogi hisaya kavafeʼmo huʼniya gemae

¹³ Lapakaepatiʼmo mago vekamoʼmo kana yaʼmo neʼalisiyana nunumuʼmo hino. Lapakaepatiʼmo mago vekamoʼmo amogaga neʼaisiyana Samu mono yokemo hino.

¹⁴ Lapakaepatiʼmo mago vekamo kaitaʼmo nehaisiyana siosi vayaʼaiteʼmo yagaiʼa neʼapataya vayatama vayaʼaifeʼmo ge hino. Ge hisageʼa eʼa Ala kava neʼmo agiʼaletiʼmo uvelimo agenopaleʼmo lakiʼa ateteʼa nunumuʼmo huʼa ategae.

¹⁵ Apakaemo Gotifeʼmo apakesamo afiʼa fatago huʼneʼa nunumuʼmo huʼa atesageno Ala kava neʼmoʼa alagepa huno alino hageno ategaiye. Kaitaʼmo hauʼniya vekamoʼmo hosu kavaʼmo huʼnisiyaʼmoʼmo Ala kava neʼmoʼa hosu kavaʼamo alino atalegaiye.

¹⁶ Lapakaemo konagatapimogifeʼmo hosu kavatapieʼmo aeta hakalo hutapa hapa paigeʼa apakaemo ani kava huʼa hosu kavaʼapieʼmo aeʼa hakalo huʼa lapa paisagetapa nunumuʼmo hutapa apategeʼa ani kava huʼa nunumuʼmo huʼa lapatenagetapa higenoʼao Gotiʼa alino alagepa huno lapateno. Fatago vayaʼmogimo lokiya vaiʼa nunumu huʼa ge huʼa afi nekagenoʼaeʼmo Gotiʼa himamu lokiyaʼaletiʼmo aliʼyaʼmo aliteno alino afole aino neʼate.

¹⁷ Ilaiyaʼa vayalafaʼmo maiʼneno lagaekana huno maiʼniyaʼmonanafa lokiya vaino nunumuʼmo hunoʼaeʼmo, ko oʼaiyo, huno nunumuʼmo huʼnigeno loleʼe magoʼe kafugaʼe sigisiʼa kaiʼeʼmo koʼmo oʼaiʼniye.

¹⁸ Halate nunumuʼmo huʼnigeno kokuʼnapatiʼmo ko aiʼnigenoʼaeʼmo mopafatiʼmo neʼyaʼmo hageʼniye.

¹⁹ Konagaʼnimogitapae, huʼna, lapakaepatiʼmo mago vekamoʼmo alagepa kaʼmo ataleno uneno nehisigenoʼaeʼmo mago vekamoʼa avalelino esiyana,

²⁰ Hosu kavaʼmo nehiya vekamoʼmo hosu kavaʼmo osuno alagi atalesiyafeʼmo alino aino atagi neno avalelino eʼniya vekamoʼmo hunoʼaeʼmo, falisiya kavategatiʼmo agupi mafaʼnemo alino katino atesigeno Gotiʼa asole hosu kavaʼamo aeno ati kaeno ategaiye, huno agesamo afigiye.