Yemisi 3 - The Keyagana NT and 25 OT books

Apavayaleʼmo alagepa huʼa yagaisaya kavafeʼmo huʼniya gemae

¹ Konagaʼnimogitapae, huʼna, fiku yanagetapa mukiʼamogitapamo, lagaemo yagaita apatesuna tisa vayaʼmo maigesune, hutapa hugae. Na kava hinagetapaene. Gotiʼa tisa vayaʼmogitamo lusi kava huno agoti huno lategaiyaʼmofeʼmae.

² Mukiʼamogitamo muki kavaʼalefeʼmo uta haita me netalone. Mago vekamoʼmo avayaletiʼmo alagepa geʼageʼmo nehisiyana hosu kavaʼamo alagi ohaneʼniye. Ani agufa gemo nehisiya vekamoʼmo uno haino hapaiʼniya vekamogeno muki agufaʼaleʼmo alagepa huno afaʼa yagaigiye.

³ Lagaemo hosimoʼa getimo afiteno lakame hisiyafeʼmo aeniletiʼmo avayafiʼmo nofi aetata kateʼmo alita ho huta avalelita neʼune.

⁴ Lapakaemo sipiʼefeʼmo lapakesamo afiyo. Sipimo alopa yakefamo haneʼniyaʼmonanafa sipileʼmo neʼaliya vekamoʼmo lusi yasimo aliteno alino agoʼya failino neʼviya sipimoʼmo aise agoʼya kayoʼmo haneʼnigeno alagepa huno yagaiʼneno alino ho huno ateʼnigeno neʼviye.

⁵ Ani kavaʼmo huno apavayamo apakufafi aiseʼmo yaʼatomo haneʼniyaʼmonanafa magoʼe huʼna lusi gemo huguve, huno huteno himuʼnamu gemo nehiye. Ani kava huno aise atamoʼa alopa kahaufiʼmo lelinuneno huno leno hano huno neʼataleya kavafeʼmo lapakesamo afiyo.

⁶ Apavayamo atagana huno haneʼneno alu hosu ge alu hosu gemo nehiye. Lavayamo lagufafiʼmo aise yaʼatomo haneʼniyaʼmonanafa muki lagufaʼamo alagi alino hosu huno neʼate. Lavayamoʼa ata kotegatiʼmo atamo aelineno muki vayaʼamogita lahaopaleʼmo kae maleʼniye.

⁷ Vayaʼmogimo muki aunemeʼe yaʼmo namagi nagaloʼyavegi noyamemogi huʼa afaʼa aliʼa yuna heʼa apateteʼa yagaiʼa apateʼnayanageʼa afaʼa yagaiʼa apategae.

⁸ Aliʼa yuna nehayaʼmonanafa ani kavaʼmo huʼa apavayaleʼmo afaʼa yagaiʼa oʼategae. Lavayamo alagi gemo noʼafiya yaʼmo haneʼneno vayaʼmogi neteʼa nefaliya analisa yakana huno lavayafiʼmo havaiteʼniye.

⁹ Lavayafatiʼmo Afotimo Gotifeʼmo alita auleta atetetaeʼmo Gotiʼa agaiʼagana huno alo huno apateʼniya vayaʼaifeʼmo lifana huta neʼapatone.

¹⁰ Konagaʼnimogitapae, huʼna, magoke lavayafatiʼmo aulena geʼe lifana geʼeʼmo nehuna gemo kanale gemo nosune.

¹¹ Ne aniʼe oʼne aniʼeʼmo meti aniʼmo aeno latino haineno uno nelamiya aniʼmo magoke kapatiʼmo haineno uno nolamiye.

¹² Konagaʼnimogitapae, huʼna, fiki yosamoʼa alivi alagamo afaʼa aegaifiye. Nofimoʼa fiki alagamo afaʼa aegaifiye. Haʼao. Ani kava huno solovala anipatiʼmo haga aniʼmo afaʼa alino ohamalegaiye.

Alagepa huʼa ageteʼa afiʼnaya kavaʼmo Gotitegatiʼmo neʼe, huno huʼniya gemae

¹³ Lapakaepatiʼmo ina laʼmo afiteno ageʼniya vekamoʼmo alagepa huno neʼafiye. Agaemo alagepa kavaʼaletiʼmo agiʼaleʼmo alino afepi ateteno yagu yaga kavaʼmo huno alagepa huno afiteno ageʼniya kavaʼmo huno alino apave lino.

¹⁴ Hugiyaʼmonanafa hosu lapaipa kafa hapaege hosu lapaipa kalita apatege ala lapaki alisayafeʼmo lapauge nehisiyana alagepa vayaʼmo maiʼnone, hutetapa lama geʼamo aetapa ati okaeyo.

¹⁵ Ani agufa ageteʼa afiʼnaya kavaʼapimo kokuʼnapatiʼmo emi noʼmeʼnifa ma mopafi vayaʼai kavaʼapimo apakufamoʼmo hauʼniya kavaʼmo Satanitegatiʼmo afole neʼaiye.

¹⁶ Mono vayaʼmogi apaipa kafa hapaege ala apaki alisaya kavafeʼmo hapauge huʼnisiyana siosi vayaʼmo alagepa huʼa oʼmaiʼa muki alu hosu kava alu hosu kavaʼmo hugae.

¹⁷ Hugayaʼmonanafa siosi vayaʼmogi alagepa huʼa ageteʼa afiʼnaya kavaʼmo kokuʼnapatiʼmo aliʼnisayana hogoteʼa yaveyave apaipamo aliteʼa alagepa huʼa magokepi lokaeʼa maige yagu yaga kavaʼmo huge vayaʼai geʼapimo afiteʼa hapau huʼa apatege alu alagepa kava alu alagepa kavaʼmo huge nehae. Apakaemo muki vayaʼaitegamo magoke aiyaya kavaʼmo huteʼa aeʼa ati okaeʼa afole yateʼmo neʼmaiye.

¹⁸ Aliʼa nanu aeʼa neʼapataya vayaʼmogimo magoke apaipa aliʼa neʼmaiya afinaʼmo vase vase huʼa avina yaʼmo nehakalagenoʼaeʼmo fatago kavaʼmoʼmo alagaʼmo aegekana huno afole neʼaiye.