Yemisi 2 - The Keyagana NT and 25 OT books

Muki vayaʼaitegamo magoke aiyaya kavaʼmo hiyo, huno huʼniya gemae

¹ Konagaʼnimogitapae, huʼna, lapakaemo Ala kava netimo Yesu Kalaisiʼa ha le konali agi vekaeʼmo lapakesamo afita fatago nehutapaeʼmo ala apaki vayaʼaitegaʼe aise apaki vayaʼaitegaʼeʼmo magoke aiyaya kavaʼmo hiyo.

² Lapakaemo mono nehisageʼanaeʼmo lole vekalaʼmo mago kagemi yaʼaʼe vekamoʼmo ayateʼmo aenimo vaino aliteno kanale kukenamo vailiʼniya vekaʼe kagemi yaʼamo ohaneʼniya vekamoʼa hosu kukena yaʼmo vaino aliʼniya vekaʼeʼmo eʼana hai eʼana magokepi maisaʼagetapaeʼmo na agufa kavaʼmo anakaetegamo hugae.

^3-4 Kagemi yaʼaʼe vekaeʼmo hao ke hetetapaeʼmo, alagepa siyateʼmo haikeka fai maiyo, hutapa ha paitetapaeʼmo kagemi yaʼamo ohaneʼniya vekaeʼmo, afaʼa maiyo, hutapa ha paisafi, haikeka laiyafiʼmo itopale maiyo, hutapa ha paisafi hosu lapakesamo afitetapa alita fako hutapa neʼanatae.

⁵ Neʼnahaiya konagaʼnimogitapamo afiyo, huʼna, Gotiʼa kagemi yaʼapimo ohaneʼniya vayaʼmo apakesamo afiʼa fatago nehaya kavaʼmoʼa kagemi yaʼapikana huno hanesigeʼa neʼyagaiya koʼmo alisayafeʼmo lekana paino apateʼniye. Gotiʼa agaefeʼmo hapau apayamopafiʼmo hapauʼnisiya vayaʼaifeʼmo hunoʼaeʼmo, mafaʼne anagaʼmogi afoʼapimo yaʼmo neʼaliya kava hutapa ani neʼyagauva koʼmo aligae, huno hapa paiʼniyaʼmofeʼmae.

⁶ Lekana paimo apateʼniyaʼmonanafa lapakaemo kagemi yaʼapimo ohaneʼniya vayaʼmo alita afepi apateʼnae. Kagemi yaʼapiʼe vayaʼmogi kana yaʼmo aliʼa lapamige agoti huʼa lapatege nosafiye. Haʼao, agoti huʼa nelapatae.

⁷ Apakaemo lapakaefeʼmo alagepa agimo neʼaya agiʼalefeʼmo huʼa faipa huʼa neʼatae.

⁸ Lapakaemo Gotiʼmo yagaino neʼapateya kini vekatapimo Goti keʼaepa geʼamo mukufiʼmo haneʼniya keʼaepa geʼamo akame nehisayana alagepa kavaʼmo nehae. Ani gemoʼa hunoʼaeʼmo, lapakaitapieʼmo lapau lapayamopafiʼmo lapauʼniya kava hutapa lapaopaleʼmo neʼmaiya vayaʼaifeʼmo lapau lapayamopafiʼmo lapaino, huno huʼniye.

⁹ Mani gemo akame nehisayana alagepa kavaʼmo nehayaʼmonanafa alu vaya alu vayaʼaitegamo magoke agufa kavaʼmo nosisayana hosu kavaʼmo nehae. Ani agufa hosu kavaʼmo nehisagenoʼaeʼmo keʼaepa gemoʼa hunoʼaeʼmo, keʼaepa geʼamo amagitapa ataleʼnaya vayaʼmae, huno nehiye.

¹⁰ Na kava nehayaʼmofeʼmae. Muki keʼaepa geʼamo akame huteʼapaeʼmo magoke keʼaepa gemo amagiʼa neʼatalesayana muki keʼaepa geʼamo ago amagiʼa neʼatalayanageʼa vaiʼmo aligae.

¹¹ Na kava higeʼapaene. Kumai kavaʼmo osiyo, huno huʼniya vekamoʼmo magoʼe gemo hunoʼaeʼmo, vayaʼmo ohapaeyo, huno huʼniye. Kumai kavaʼmo osutapa vayaʼmo hapaeʼnisayana Goti keʼaepa geʼamo ago amagitapa ataleʼnae.

¹² Gotiʼa hatu maeno lapateʼniya keʼaepa geʼaletiʼmo alino fako huno lapategaiyaʼmofeʼmo alagepa gemo huge alagepa kavaʼmo huge hiyo.

¹³ Gotiʼa agoti huno apatesiya afinaʼmo mago vayaʼaifeʼmo hapau huʼa noʼapatesaya vayaʼaifeʼmo hau huno oʼapategaiyaʼmonanafa hapau huʼa neʼapataya vayaʼaifeʼmo Gotiʼa hau huno apatesiya kavatetiʼmo agoti huʼa aeʼa agasegae.

Aigofe apakesamo afiʼa fatago nehaya kavafeʼmo huʼniya gemae

¹⁴ Konagaʼnimogitapae, huʼna, Mago vekamoʼmo, nagesamo afiʼna fatago nehuve, huno nehiyaʼmonanafa alagepa kavaʼmo nosisiyana agesamo afino fatago huʼniya kavaʼamo ina agufa kavaʼmae. Ani agufa agesamo afino fatago huʼniya kavaʼamoʼa afaʼa ha maegaifiye. Haʼao afaʼa ha oʼmaegaiye.

¹⁵ Mago konagatapimoʼmofi lapasatapimoʼmofi huno kukena yaʼaʼe neʼyaʼaʼeʼmo ohaneʼnisigetapaeʼmo,

¹⁶ kukena yakaʼe neʼyakaʼeʼmo aligananagi uvo, hutapa ha paitetapaeʼmo alagepa huno maisiya yaʼmo oʼamitapa geʼageʼmo nehisayana ina agufa gemo haneʼniyanageno afaʼa ha oʼmaegaiye.

¹⁷ Ani kavaʼmo huno mago vekamoʼmo agesamo afino fatago nehiyaʼmonanafa alagepa kavaʼmo nosisiyana agesamo afino fatago huʼniya kavaʼamo agaiʼageʼmo haneʼnigeno faligekana huno haneʼniye.

¹⁸ Haneʼniyaʼmonanafa mago vekamoʼmo, kagaemo kagesamo afika fatago huʼnanageʼna nagaemo alagepa kavaʼmo nehuve. Alagepa kavaʼmo nosisanana kagesamo afika fatago nehana kavakamo alika nave liyo. Nagaemo alagepa kavaʼniletiʼmo nagesamo afiʼna fatago nehuva kavaʼnimo aliʼna kave liguve, huno hugiye.

¹⁹ Kagaemo Gotifeʼmo magoke vekamo maiʼniye, huka kagesamo afika fatago huʼnana kavaʼmo kanalene. Nehanaʼmonanafa hosu apaune vayaʼmogiʼeʼmo Gotiʼa maiʼniye, huʼa apakesamo afiʼa fatago nehuʼapaeʼmo atete nehae.

²⁰ Negi vekae, huʼna, kagesamo afika fatago huʼnanaʼmonanafa alagepa kavaʼmo nosanaʼmofeʼmo kagesamo afika fatago huʼnana kavakamo faligekana huno haneʼniye, huʼna aliʼna kave lisufiye.

²¹ Laginago vekamo Emalehamuʼa mafaʼneʼamo Aisikiʼmo Gotiʼa ofalinimo amisiyafeʼmo yafa hiʼyalamuteʼmo alino havaeno ateʼniya alagepa kavaʼaletiʼmo vayaʼai apaulagaleʼmo fatago vekamo maiʼnifiye.

²² Lapakaemo ago afiʼnayana agesamo afino fatago huʼniya kavaʼamoʼe alagepa kava huʼniya kavaʼamoʼeʼmo magokepi lokaeʼana aliʼyaʼmo aliʼnaʼageno alagepa kavaʼaletiʼmo agesamo afino fatago huʼniya kavaʼamoʼa ko sino afu leʼniye.

²³ Emalehamuʼa huʼniya kavafeʼmo Goti mukufiʼmo avoʼmo kae maleʼniya gemo neʼyaʼmo alagi afole aiʼniye. Ani gemoʼa hunoʼaeʼmo, Emalehamuʼa Gotifekeʼmo agesamo afino fatago huʼnigenoʼaeʼmo, naulagaleʼmo fatago vekamo maiʼnane, huno ha paiʼniye. Vayaʼmogi huʼapaeʼmo, Emalehamuʼa Goti ao vekamo maiʼniye, huʼa huʼnae.

²⁴ Lapakaemo ago ageʼnayana alagepa kavaʼmo nehaya vayaʼaifeʼmo fatago vayaʼmo maiʼnae, hutapa apakeʼnayaʼmonanafa apakesamo afiʼa fatago kavaʼageʼmo nehaya vayaʼmo fatago vayaʼmo maiʼnae, huʼa nosae.

²⁵ Kumai kavaʼmo nehiya a kanomo Lehepiʼa kame vayaʼaifeʼmo apamasa hisaʼafeʼmo eʼnaʼa vekalaʼmo noʼafiʼmo uʼana havaesaʼafeʼmo havaesaʼa yaʼmo alino alagepa huno anateʼnigeʼana uʼana havaetaʼagenoʼaeʼmo visaʼa kaʼmo alino anave liʼniye. Ani kavaʼmo huno Gotiʼa ani a kanomoʼa huʼniya alagepa kavaʼaletifeʼmo hunoʼaeʼmo, naulagaleʼmo fatago a kanomo maiʼnane, huno ha paiʼniye.

²⁶ Mago vekamo aipafiʼmo aunemeʼamo ohaneʼnisiyana ago faliʼniye. Ani kavaʼmo huno mago vekamoʼmo agesaʼageʼmo afino fatago huteno alagepa kavaʼmo nosisiyana agesamo afino fatago huʼniya kavaʼamo faligekana huno haneʼniye.