Yemisi 1 - The Keyagana NT and 25 OT books

¹ Nagaemo Yemisiʼnamo Gotiʼe Ala kava neʼmo Yesu Kalaisiʼeʼmo aliʼyaʼanimo neʼaluve. Nagaemo tuolofuʼa Yu nofi vayaʼmo kotapimo ataletapa atagu faetapa uteta huʼnaya vayaʼmogitapaeʼmo ge lapamamaeʼna mani gemo avoʼmo nekaove.

Oʼataleta Gotifekeʼmo ge hutapa afi gegenoʼa lapamino, huno hapa paiʼniya gemae

² Konagaʼnimogitapae, huʼna, lapakaemo asole hanageke kavapiʼmo asagautapa aiʼnisayaʼmoʼmo lapamalageka nehisigetapaeʼmo lusi kava huta lamogaga aisuna agufa kavaʼmo afole aiʼniye, hutapa lapakesamo afiyo.

³ Ago afiʼnayana hanageke kavaʼmoʼa lapakesamo afita fatago nehaya kavatapileʼmo lapamalageka nehisigetapaeʼmo oʼataletapa lokiya vaita maisayafeʼmo ani kavaʼmoʼa lapaipafiʼmo aliʼyaʼmo aligiye.

⁴ Lapaipafiʼmo aliʼyaʼmo alisiya kavateʼmo ka akanitapa oʼategenoʼao alagi oʼataletapa lokiya vaitapa maisaya himamutapimo alagepa huno ko sino afu lesigetapa uta haita me otaletapa uta haitapa hapaigae.

⁵ Lapakaepatiʼmo mago vekamoʼmo ageteno afiʼniya kavaʼamo magoʼe huno oʼaliʼnisiyaʼmoʼmo Gotifeʼmo ge huno afi gesigeno Gotiʼa ge ohaugiyanageno muki vayaʼaina magoʼe huno apamigiye.

⁶ Amigiyaʼmonanafa lole agesamo oʼafiʼneno alagepa huno agesamo afino fatago huʼnenoʼaeʼmo ge huno afi gegaiye. Lole agesamo neʼafiya vekamo solovala aniteʼmo yasimo neʼaligenoʼaeʼmo aino holakau holakau hulino uneno nehiya agufa anikana huno maiʼniye.

^7-8 Agaemo magoke kavafeʼmo agesamo oʼafiʼnifa lole agesamo neʼafiya vekamo maiʼniyaʼmofeʼmo Ala kava netegatiʼmo mago yaʼmo afaʼa oʼaligiye. Fiku yanageno aliguve, huno agesamo afigiye.

⁹ Apaki ohaneʼniya konagatimogi apakiʼapileʼmo Gotiʼa alino asagauno apateʼniya kavafeʼmo apamogaga aiyo.

¹⁰ Kagemi yaʼapiʼe vayaʼmogi apakiʼapileʼmo alino afepi apateʼniya kavafeʼmo apamogaga aiyo. Yosa ausemo heteno hifalino hali nelamiya kava huʼa faligae.

¹¹ Yegemoʼmo haineno neʼagegenoʼaeʼmo lusi kava huno amuko huʼnigeno kahaumo leno falu teʼnigenoʼaeʼmo auseʼamo hali nehigenoʼaeʼmo konali yaʼamo alagi hano nehiye. Ani kava huʼa kagemi yaʼapiʼe vayaʼmo aliʼyaʼapimo neʼalisaya folagapatiʼmo faligae.

¹² Hanageke kavaʼmoʼa apamalageka nehisigeʼapaeʼmo oʼataleʼa atafauʼa alagi huʼa maiʼnisaya vayaʼmo aulena vayaʼmo maiʼnae. Na kava hinageʼapaene. Apamalageka nehisigeʼapaeʼmo oʼataleʼa atafauʼa alagi huʼa maiʼnisagenoʼaeʼmo Ala kava neʼmoʼa hunoʼaeʼmo, nagaefeʼmo hapauʼniyaʼmofeʼmo alagepa huʼa maige maige huʼa maisaya yaʼmo apamiguve, huno huʼniya yaʼmo aligae.

¹³ Apamalageka nehisiya vayaʼmogimo huʼapaeʼmo, Gotiʼa hosu kavaʼmo hisunafeʼmo layate neʼaliye, huʼa apakesamo oʼafisaya kavaʼmo haneʼniye. Mago vekamoʼmo Gotiʼa hosu kavaʼmo hisiyafeʼmo ayateʼmo afaʼa oʼaligiye. Gotiʼa vayaʼmogi hosu kavaʼmo hisayafeʼmo apayateʼmo noʼaliye.

¹⁴ Apakaiʼapi apakufamoʼmo hauʼniya kavaʼmoʼa apayateʼmo heno apavayu hulino hosu kavategamo neʼviye.

¹⁵ Aʼnemogi apaipaguʼeʼmo maiteʼa mafaʼnemo aliʼa neʼapataya kava huno apakufamoʼmo hauʼniya kavaʼmoʼa aipaguʼeʼmo maiteno hosu kavaʼmo alino neʼate. Hosu kavaʼmo alino ateʼnigeno ko sino alopa hetenoʼaeʼmo nefaliya kavaʼmo alino afole aino neʼate.

¹⁶ Nahauʼniya konagaʼnimogitapae, huʼna, humi lapatesayafeʼmo hisaya gemo alagi oʼafiyo.

¹⁷ Gotiʼa muki alagepa yaʼe haino hapaiʼniya yaʼeʼmo fikumo neʼapamigenoʼaeʼmo kokuʼnapatiʼmo emineʼniye. Muki kokuʼnate aeno ha neleya yaʼmoʼa alu kava alu kavaʼmo huno aeno ha neleyaʼmonanafa ani aeno ha neleya yaʼmo Afoʼamoʼmo alu kava alu kavaʼmo osuno magoke agufa kavaʼmo huno fikumo neʼapamiye.

¹⁸ Agaemo hauʼnigeno muki alo huno apateʼniya vayaʼmo aeta apakaseta maisunafeʼmo lama geʼaletiʼmo alino lateʼnigeta mafaʼneʼamo maiʼnone.

Goti geʼamo fikumo oʼafitapa afiteta akame hiyo, huno huʼniya gemae

¹⁹ Nahauʼniya konagaʼnimogitapae, huʼna, geʼaletiʼmo alino lapateʼniyaʼmofeʼmo mukiʼamogitapamo geʼamo afisayafeʼmo lapayamukiki hutapa afiyo. Gemo hisayafeʼmo vase vase hutapa ge hiyo. Lapaipamo lesiyafeʼmo vase vase huno lapaipamo leno.

²⁰ Na kava nehiyaʼmofeʼmae. Vayaʼmogi apaipamo neleya kavaʼmoʼa Goti fatago kavaʼamo alino afole aino noʼate.

²¹ Inagi muki hosu oʼaniʼya kavaʼmo lapaipafiʼmo havai teʼniya kavaʼmo alita ataletetapa Goti aiyafiʼmo ape huta maiʼnetapa lapaipafiʼmo faiʼniya geʼamo aliyo. Ani gemokeʼmo lapakufamo afaʼa alino katino lapategaiye.

²² Goti geʼamo fikumo afisayana lapakaitapieʼmo humi lapategayanagi fikumo oʼafitapa alagepa huta afitetapa akame hiyo.

²³ Fikumo afiteno alagepa huno akame nosiya vekamoʼmo vayaʼmogi laveʼyofatiʼmo apaugosamo neʼagaya kava huno maiʼniye.

²⁴ Laveʼyofatiʼmo augosamo ageteno ataleno neʼunoʼaeʼmo, haiya agufa naugosaʼe vekamo maiʼnofi, huno agesamo noʼafifa malage huno age nekaniye.

²⁵ Age nekaniyaʼmonanafa mago vekamoʼmo Goti keʼaepa geʼamoʼa uno haino hapaiʼniya kanale geʼaletiʼmo hatu maeno neʼapateya geleʼmo aulu heno ageʼniya geeʼmo age okanino agesamo afifi huno akame nehisiyana kanale hugiye. Muki kavaʼamo nehisigenoʼaeʼmo Gotiʼa alino auleno ategaiye.

²⁶ Mago vekamoʼmo hunoʼaeʼmo, mono vekamo maiʼnove, huno agesamo afiʼnisiyaʼmoʼmo avayaleʼmo alagepa huno oʼyagaino hosu gemo nehisiyana mono nehiya kavaʼamo ina agufa kavaʼmo haneʼniyanageno alagi ha oʼmaegaiye. Agaiʼaeʼmo humi neʼate.

²⁷ Gotiʼa muki yaʼmo afoʼamo aulagaleʼmo alagepa monoʼmo nehaya kavaʼmo haneʼniyana kogu aʼnemogiʼe megusa mafaʼne anagaʼmogiʼeʼmo kana yaʼmo neʼaliya afinaʼmo uʼa hapa maege ma mopafi vayaʼmogimo aliʼa hosu huʼa oʼapatesayafeʼmo apakaiʼapileʼmo alagepa huʼa yagaiʼa apatege nehaya kavaʼmo haneʼniye.