Yasuva 9 - The Keyagana NT and 25 OT books

Gimiyoni vayaʼmogimo Isaleli vayaʼaifeʼmo humi apateʼnaya gemae

¹ Muki kini vayaʼmo Yoneni aniʼmo magayaga yegemo uno lamino nefaleya haopalega maiʼnaya kini vayaʼmogimo Isaleli vayaʼmogi huʼnaya kavafeʼmo apava gemo afiʼnae. Ani kini vayaʼmo Hiti kini vayanagi Emo kini vayanagi Kenani kini vayanagi Pelesi kini vayanagi Haivi kini vayanagi Yemusi kini vayanagi huʼa alopa Metaleniyani solovala aniʼmo haopaletiʼmo uno Lemanoni mopamo hakuteʼmo utegeʼa maiʼnae. Ave kotega maige otu kotemo maige alopa solovala ani haigifiʼmo maige huʼnaya kini vayaʼmogiʼeʼmo apava gemo afiʼnae.

² Afiteʼapaeʼmo magoke apaipa apakesamo aliteʼa eʼa Yasuvaʼe Isaleli vayaʼeʼmo kamemo hisayafeʼmo aliʼa anupa huʼa maiʼnae.

³ Maiʼnayaʼmonanafa Haivi nofi vayaʼmo Gimiyoni taonifiʼmo maiʼnaya vayaʼmogimo Yasuvaʼa Yeliko vayaʼaitegaʼe Ai vayaʼaitegaʼeʼmo huʼniya kavafeʼmo ava gemo afiteʼapaeʼmo

⁴ Isaleli vayaʼmogi apakesamo faisayafeʼmo gemo aliniʼa neʼaya vayakana huʼa eʼnae. Apakaemo atafa kuʼmo aliteʼa atalagauʼniya atafa meme agufamo halate fakaniteʼa neʼyaʼmo ku aiʼnae. Apakaemo ani yaʼmo nokiʼapimo agotofuleʼmo malege

⁵ atafa kukena yaʼmo vaige atafa suʼmo atalagauʼniya suʼmo fakaniteʼa vaige kalakisa aiteno lokiya vaiʼniya peleti mayamo alige huteʼa aliniʼa uʼnae.

⁶ Yasuvaʼa Giligali kotega seli noʼmo aliʼa he tiʼa ateʼnaya yateʼmo maiʼnigeʼapaeʼmo ani Haivi vayaʼmo uʼa Yasuvaʼa maiʼniya yateʼmo avaʼyi huteʼa Yasuvaʼe Isaleli vayaʼefeʼmo hapa paiʼapaeʼmo, Lagaemo afagi kotegatiʼmo eʼnonaʼmofeʼmo lagaeʼeʼmo kotalakemo hiyo, huʼa hapa paiʼnae.

⁷ Hapa paiʼnayaʼmonanafa Isaleli vayaʼmogi Haivi nofi vayaʼaifeʼmo hapa paiʼapaeʼmo, Na agufa kavaʼmo hinagetaeʼmo lapakaeʼeʼmo kotalakemo hu malegaune. Lapakaemo afagi kotega vayaʼmo maiʼnafi lahaopale vayaʼmo maiʼnae, huʼa huʼnae.

⁸ Huʼnayaʼmonanafa Haivi vayaʼmogimo Yasuvafeʼmo ha paiʼapaeʼmo, Lagaemo aliʼyatapimo neʼaliya vayakana huta aliʼyatapimo aligune, huʼa ha paiʼnagenoʼaeʼmo, Haiya nofi vayaʼmo maiʼnae. Haiyategatiʼmo eʼnae, huno ge huno apafi geʼniye.

⁹ Apakaemo huʼapaeʼmo, Lagaemo afagi kotegatiʼmo eʼnone. Ala kava neʼmo Gotitapimo ala agiʼalefeʼmo ava gemo afitetaene. Isipi kotegamo muki huʼniya kavafeʼmo ava gemo afiʼnone.

¹⁰ Lagaemo agaemo Yoneni aniʼmo mugagayaga faliga Emo kotega lole kini vekalaʼmo Sihoʼmo Hesimoni taonifi kini vekalegaʼe Agiʼmo Mesani kotega kini vekamo Asatalo taonifiʼmo maiʼniya vekalegaʼeʼmo huʼniya kavafeʼmo ava gemo ago afiʼnone.

¹¹ Afiʼnonaʼmofeʼmo yagaiʼa lateʼnaya vayaʼmogiʼe muki kotilega vayaʼmogiʼeʼmo ina ge huʼa laha paiʼnae, lapakaemo mago alinitapa visaya neʼyaʼmo alo hutapa alitetapa alinituta ani vayaʼeʼmo fotu hutetapaeʼmo ina ge hutapa hapa paiyo. Lagaemo aliʼyatapimo neʼaluna vayaʼmae. Lagaeʼeʼmo magokepiʼmo kotalakemo hiyo, hutapa hapa paiyo.

¹² Mani peleti mayamo kotiʼmo ataleta eʼnona afinaʼmo kaeta aliʼnonagenoʼaeʼmo amuko huʼniyaʼmonanafa ageyo, kalakisa aeteno lokiya vaiʼniye.

¹³ Mani saufa meme agufa kepiʼmo nofi alagafati aniʼmo lakita aliʼnonaʼmonanafa hemenimo ageyo, ago atalagauʼniye. Yatala kateʼmo eʼnonagenoʼaeʼmo kukena yatiʼe sutiʼeʼmo ago hosuʼniye, huʼa hapa paiʼnae.

¹⁴ Inagi Isaleli vayaʼmogimo ani neʼyaʼmo agesayafeʼmo aliʼnayaʼmonanafa Ala kava neʼmoʼa hapa paisigeʼa hisaya kavafeʼmo ge huʼa afi okeʼnae.

¹⁵ Inagi Yasuvaʼa ohapaeʼa apakaeʼeʼmo alagepa huʼa magokepi lokaeʼa maisayafeʼmo apakaeʼeʼmo kotalakemo hu maleʼniye. Ina kava huʼa Isaleli vayaʼaiteʼmo yagaiʼa neʼapataya vayaʼmogiʼeʼmo apagoʼyamo ataleteʼa huʼapaeʼmo ani kotalakemo akame hugune, huʼa huʼnae.

¹⁶ Apakaemo kotalakemo hu maleteʼapaeʼmo loleʼe magoʼe afinaʼmo utegeʼa Isaleli vayaʼmogimo afiʼnayana ani vayaʼmo afagi kotega vayaʼmo oʼmaiʼnafa hapaopale vayakeʼmo maiʼnae agufa gemo afiʼnae.

¹⁷ Inagi Isaleli vayaʼmo he tiʼa ani vayaʼmogi taonifiʼmo uʼa loleʼe magoʼe afinaʼmo avaʼyi huʼnae. Ani taonimogi apakiʼapimo Gimiyoni taonifinagi Kefila taonifinagi Miloti taonifinagi Kiyatiyalimi taonifinagi huʼa uʼnae.

¹⁸ Uʼnayaʼmonanafa Isaleli vayaʼaiteʼmo yagaiʼa apateʼnaya vayaʼmogimo apagoʼyamo ataleʼa Ala kava neʼmo Isaleli vayaʼmogi Gotiʼapimo agiʼaletiʼmo kotalakemo ago hu maleʼnayaʼmofeʼmo apakaeʼeʼmo kame osuʼnae. Kame osuʼnayaʼmofeʼmo muki Isaleli vayaʼmogimo yagaiʼa neʼapataya vayaʼaifeʼmo gemo hapauʼnae.

¹⁹ Yagaiʼa neʼapataya vayaʼmogimo muki Isaleli vayaʼaifeʼmo huʼapaeʼmo, Lagaemo lagoʼyamo ataleta Ala kava neʼmo Isaleli vayaʼmogita Gotitimo agiʼaletiʼmo kotalakemo hu maleʼnonaʼmofeʼmo kame osugune.

²⁰ Lagaemo afaʼa apategaune. Lagoʼyamo ataleta kotalakemo hu maleʼnonaʼmofeʼmo fiku yanageno Ala kava neʼmoʼa aipamo leno lategaiye.

²¹ Afaʼa maisayafeʼmo muki Isaleli vayaʼmogi aliʼyaʼapimo aligayanageʼa ataʼapimo lagige aniʼapimo uʼa hefiliʼa ege hugae. Ani kavatefeʼmo yagaiʼa neʼapataya vayaʼmogimo ani vayaʼaifeʼmo polomasi gemo huʼa hapa paiʼnae.

²² Inagi Yasuvaʼa apakaefeʼmo ge huʼnigeʼa eʼnageno ina ge huno hapa paiʼniye. Na agufa kava higetapaeʼmo aigofeʼmo laha paiʼnae. Lapakaemo hutapaeʼmo, Lagaemo mago afagi kotegatiʼmo eʼnone, hutapa huʼnayaʼmonanafa lapakaemo lahaopale vayakeʼmo maiʼnae.

²³ Aigofeʼmo huʼnayaʼmofeʼmo Gotiʼa lifana huno lapateʼninagetapa muki afinaʼmo Gotiʼnimo mono noʼaleʼmo kalavusi aliʼyaʼmo alitetapaeʼmo ata lagige uta aniʼmo hefilita ege hugae, huno hapa paiʼniye.

²⁴ Apakaemo Haivi nofi vayaʼmogimo geʼaleʼmo aeʼa atagaina huʼa huʼapaeʼmo, Ala kava neʼmo Gotitapimoʼmo Moseseʼa aliʼyaʼamo neʼaliya vekaeʼmo ago ha painoʼaeʼmo, Muki mani mopaleʼmo maiʼnaya vayaʼmo alagi hapaeta hano hutapa apataleyo. Kagaemo mani mopaʼapimo alika vayakamo apamiyo, huno ha paiʼniya gemo ago afiʼnone. Afiʼnonaʼmofeʼmo lusi kava huta lapakaefeʼmo kolitapimo hutetaeʼmo ani humi lapateʼnona gemo ago huʼnone.

²⁵ Inagi hemenimo kayapiʼmo maiʼnone. Na agufa kavaʼmo alagepa kavaʼmo haneʼniye, huka kagesamo afiʼnisapi lagaetegamo ani kavaʼmo afaʼa hugane, huʼa ha paiʼnae.

²⁶ Yasuvaʼa hapa paiʼniya kava huno Isaleli vayaʼmogi apayapatiʼmo apakufamo alino katino apateʼnigeʼapaeʼmo Isaleli vayaʼmogimo kamiti ohapaeʼnae.

²⁷ Ani afinaʼmo Yasuvaʼa Isaleli vayaʼmogi aliʼyaʼapileʼmo apavaleno apateʼnigeʼa ata lagige uʼa aniʼmo hefiliʼa ege Ala kava neʼmo ofalini hisaya yafa hiʼyalamuteʼmo aliʼyaʼmo alige huʼa maiʼnae. Apakaemo Ala kava neʼmoʼa lekana pai maleʼnisiya koteʼmo ani aliʼyaʼmo alisayafeʼmae. Ani aliʼyaʼmo alime alime eʼa hemeniʼeʼmo ani aliʼyakeʼmo neʼaliye.