Yasuva 8 - The Keyagana NT and 25 OT books

Isaleli vayaʼmogi Ai taonifi vayaʼeʼmo kame huteʼa huʼa aeʼa apaka seʼnaya gemae

¹ Ala kava neʼmoʼa Yasuvafeʼmo ina gemo huno ha painoʼaeʼmo, koli osuge koliʼapimo osuge huvo. Muki ati vayaʼmo apavalelika uka Ai vayaʼeʼmo kamemo hiyo. Nagaemo Ai taonifiʼmo yagaiʼniya kini vekagi vayaʼagi taoniʼagi mopaʼagi huʼna aliʼna kagae kayapiʼmo malegauve.

² Kagaemo Yeliko taonifiʼe kini vekalegaʼeʼmo huʼnana agufa kavaʼmo huka Ai taonifiʼe kini vekalegaʼeʼmo hugane. Huganaʼmonanafa lapakaemo kagemi yaʼapimo afaʼa alige pulumakaʼapimo apavalege hisageno lapakaitapi yaʼmo hanegaiye. Lapakaemo ani taonifiʼmo kamemo hisayafeʼmo kagaemo hogoteka mago ati vayaʼmo alika apategeʼa uʼa taonimo akamelegamo fala kiʼa maigae, huno ha paiʼniye.

³ Inagi Yasuvaʼe muki ati vayaʼeʼmo Ai taonifilagamo visayafeʼmo alo huʼnae. Yasuvaʼa koli osuʼa lokiya vaiʼa kame hisaya vayaʼageʼmo teti tauseniʼa vayaʼmo lekana paino apateteno haniʼilagamo alino apateʼnigeʼa uʼnae.

⁴ Agaemo apakaefeʼmo ina kavaʼmo hiyo, huno ha paiʼniya gemo hapa paiʼniye. Afiyo, huno, Lapakaemo uta taonimo haopaleʼmo hogo hutapa akamelegamo fala kita kafoʼmo maleta maiʼnetapa kame hisayafeʼmo alo hutapa maiyo.

⁵ Maigayaʼmonanafa nagaeʼe ati vayaʼniʼeʼmo lagaemo taonifiʼmo ugune. Ai vayaʼmo kamemo hisunafeʼmo eʼa emi neʼesagetaeʼmo lagaemo hogote afinaʼmo huʼnona agufa kavaʼmo huta laune hegaune.

⁶ Inagi lagaemo afaʼa apatesunageʼa taoniʼapimo ataleʼa lavegala aeliʼa egae. Apakaemo huʼapaeʼmo, Hogoteʼa apaune heʼnaya kava huʼa apaune nehae, huʼa hisayafeʼmo laune hegaune.

⁷ Inagi lapakaemo fala kita maiʼnisayapatiʼmo ataletapa uta taonimo aliyo. Ala kava neʼmo Gotitapimoʼmo ani taonimo alino lapayapiʼmo lapamigiyanagi.

⁸ Lapakaemo taonimo ago alitetapaeʼmo Ala kava neʼmoʼa lapa paiʼniya kavaʼmo hutapa atamo kaeyo. Afiyo, huʼna, hiyo, huʼna lapa paiʼnova kavaʼmo akame hutapa hiyo.

⁹ Inagi Yasuvaʼa alino apateʼnigeʼa uʼa mago yegemo uno lamino nefaleya kotega Ai taonimo hanete Meto taonimo hanete hutegeʼa folagapiʼmo fala kiʼa maiʼnae. Ani haniʼilagamo Yasuvaʼa Isaleli vayaʼeʼmo havaeʼniye.

¹⁰ Inagi Yasuvaʼa gotilamiyapiʼmo he tino ati vayaʼaifeʼmo keya aeʼnigeʼa eʼa aliʼa anupa huʼnae. Agaeʼe Isaleli vayaʼaiteʼmo yagaiʼa apateʼnaya vayaʼeʼmo uʼa hogotetageʼa muki vayaʼamo Ai kotegamo uʼnae.

¹¹ Apakaemo Yasuvaʼeʼmo magokepi uʼnaya ati vayaʼmo uʼa taoni haopaʼaleʼmo lamaga haopalegamo seli noʼapimo aliʼa he tiʼa ateʼnae. Apakaemo maite Ai taonileʼmo alopa lafi kegiʼyamo hanete hutegeno folagapiʼmo mago kagoʼmu koʼmo haneʼniye.

¹² Yasuvaʼa faefu tauseniʼa agufa vayaʼmo alino apateʼnigeʼa ani taonifiʼmo uʼa yegemo uno nelamiya haopalega Ai taoniʼe Meto taoniʼeʼmo hanetegeno folagapiʼmo fala kiʼa maiʼnae.

¹³ Asole ati vayaʼmo taonimo lamaga haopalega haopaʼaleʼmo uʼa maiʼnageʼa mago ati vayaʼmo taonimo akamelegamo yegemo uno nelamiya haopalegamo uʼa maiʼnageno haniʼilagamo Yasuvaʼa uno kagoʼmu koteʼmo maiʼniye.

¹⁴ Ai kini vekamoʼmo apakeʼniya afinaʼmo agaeʼe muki taoniʼafiʼmo maiʼnaya vayaʼaʼeʼmo gotilamiyapiʼmo malage huʼa he tiʼa Isaleli vayaʼeʼmo kame hisayafeʼmo lekana pai maleʼnaya kotegamo uʼnae. Uʼnayaʼmonanafa Ai kini vekamoʼmo apakamelegatiʼmo eʼa kamemo hapaesaya vayaʼmo oʼapakeʼniye.

¹⁵ Inagi Yasuvaʼe muki Isaleli ati vayaʼaʼeʼmo humi apatesayafeʼmo apaune hetaleʼa kaʼme kotegamo neʼvaya kateʼmo uʼnae.

¹⁶ Kini vekamoʼmo apaketenoʼaeʼmo muki taonifiʼmo maiʼnaya vayaʼaifeʼmo keya aeno ge huʼnigeʼa taonimo ataleʼa eʼa Yasuvaʼe Isaleli vayaʼeʼmo apavegala aeliʼa uʼnae. Yasuvaʼeʼmo taonimo ataleʼa apavegala aeliʼa uʼnae.

¹⁷ Ai taonifiʼmofi Meto taonifiʼmofi huʼa ve anagaʼmo alagi oʼmaiʼnae. Muki vayaʼamogimo taonimo ataleʼa Isaleli vayaʼmo apavegala aeliʼa uʼnae.

¹⁸ Inagi Ala kava neʼmoʼa Yasuvafeʼmo ha painoʼaeʼmo, Kagaemo hayokamo alika asagauka Ai taonifiʼmo akoʼya huka ategeʼnao, nagaemo hemenimo ani taonimo aliʼna kayapiʼmo kamiguve, huno ha paiʼnigeno Yasuvaʼa ayapiʼmo aliʼniya kevemo alino asagauno taonifiʼmo akoʼya huno ateʼniye.

¹⁹ Inagi ati vayaʼmo fala kiʼa maiʼnayatetiʼmo ageteʼa malage huʼa he tiʼa taonifiʼmo nagu nagu huʼa uʼa haiʼa taonimo aliteʼa malage huʼa atamo aeʼa kaeʼnae.

²⁰ Ai taonifi vayaʼmogimo aiʼa afeleʼa apakamelegamo ageʼnayana halinamo ailino uno haiʼnigeʼa ageʼnae. Visaya kaʼapimo alagi ohaneʼnigeʼapaeʼmo apaune heʼnaya Isaleli vayaʼmo aiʼa atagineʼa eʼa Ai vayaʼmo kamitimo hapaeʼnae.

²¹ Yasuvaʼe muki Isaleli vayaʼmogiʼeʼmo halinamo ageteʼapaeʼmo fala kiʼa maiʼnaya vayaʼmogimo taonimo aliʼnae, huteʼa aiʼa atagineʼa eʼa hapaeʼnae.

²² Inagi Isaleli ati vayaʼmo taonifiʼmo uʼa haiʼnaya vayaʼmo emiʼeʼa Ai vayaʼmo faiʼa vego huʼa apateʼnae. Isaleli vayaʼmogimo mukiʼamo kamitimo hapaeʼnageʼa faliʼnae. Magoke vekamo faino kasalo opaige magoke vekamo oʼmaige huʼniye.

²³ Ai kini vekamo afaʼa maiʼnigeʼa atafauʼa Yasuvategamo avaleliʼa uʼnae.

²⁴ Isaleli vayaʼmogimo muki Ai taonifiʼmo maiʼnaya vayaʼmo apavegala aeliʼa kaʼme kotegamo uʼa hapaeʼa hano huʼa apataleteʼa Ai taonifiʼmo uʼa haiʼa muki maiʼnaya vayaʼamo naipeletiʼmo apaiʼnae.

²⁵ Ani afinaʼmo Ai taonifiʼmo maiʼnaya ve aʼnemo tuolofu tauseniʼa vayaʼmo faliʼnae.

²⁶ Yasuvaʼa keveʼamo alino Ai taonifiʼmo akoʼya huno maime maime neʼvigeʼapaeʼmo muki ani taonifi vayaʼmo faliʼnae.

²⁷ Isaleli vayaʼmogimo Ala kava neʼmoʼa Yasuvafeʼmo ha paiʼniya agufa kavaʼmo huʼa muki yuna afumo apavalege Ai taonifiʼmo haneʼniya yaʼmo alige huʼnae.

²⁸ Yasuvaʼa Ai taonimo ata kaeno ataleʼnigeno alopa aluʼmo haneme haneme eno hemenimo hosu kavakeʼmo huno haneʼniye.

²⁹ Yasuvaʼa Ai taonifi kini vekamo mago yosaleʼmo aneʼmu aeno asai maleteno agufaʼamo afaʼa ateʼnigeno hanelinuno une tiʼniye. Uneʼamo Yasuvaʼa vayaʼaifeʼmo huʼnigeʼa agufaʼamo aliʼa ani taonimo yafa lafi kegiʼyamo kipateʼmo yaga auʼa ataleʼnae. Apakaemo asole yafaʼmo aliʼa agufaleʼmo aluʼmo ai maleʼnae. Hemenimo ani yafa aluʼmo afaʼa haneʼniye.

Yasuvaʼa halate kotalake gemo hu maleʼniya gemae

³⁰ Yasuvaʼa Ala kava neʼmo Isaleli vayaʼmogi Gotiʼapimotefeʼmo mago ofalini hisiya yafa hiʼyalamuʼmo Emo avefiʼmo hu maleʼniye.

³¹ Moseseʼa Ala kava neʼmo aliʼyaʼamo neʼaliya vekamoʼmo Isaleli vayaʼaifeʼmo hiyo, huno hapa paiʼniya gemo Mosese keʼaepa gemo mukufiʼmo avoʼmo kae maleniya geʼamo Yasuvaʼa alagi akame huʼniye. Ani gemo haneʼniyana lapakaemo mago aeni atupaletiʼmo yafaʼmo apalo oʼatiyo. Apalo oʼatiʼnisaya yafatetiʼmo ofalini hiʼyalamuʼmo hiyo. Yasuvaʼa hu maleʼniya hiʼyalamuʼmo agotofuleʼmo atafiʼmo alagi kaeʼa asagalisaya ofalinimo huge Gotiʼa aipamo falu hisiya ofalinimo huge huʼnae.

³² Yasuvaʼa anileʼmo Isaleli vayaʼmogi apaulagaleʼmo ani yafa hiʼyalamuteʼmo Moseseʼa keʼaepa gemo avoʼmo kae maleʼniya gemo avoʼmo kaeʼniye.

³³ Inagi muki Isaleli vayanagi alu kotega vayanagi apakae folagapiʼmo maiʼneʼa aliʼa apateʼnaya vayanagi yagaiʼa neʼapataya vayanagi avoʼmo nekaya vayanagi agoti gemo neʼafiya vayanagi huʼa aliʼa anupa huʼa maiʼnae. Ala kava neʼmo kotalake kesimo folagapiʼmo haneʼniye. Apakaemo Livai nofi vayaʼmo mono huʼa neʼapataya vayaʼmogimo ani kesimo kofiliʼa neʼvaya vayaʼai apaulagaleʼmo he tiʼa maiʼnae. Muki vayaʼmo aliʼa fako huʼa lole vayaʼmo maiteʼa mago vayaʼmo kotalake kesimo hoga haopalega he tiʼa maiʼnageno apakamelega Gelisimo avemo haneʼnigeʼa alu vayaʼmo kotalake kesimo lamaga haopalega he tiʼa maiʼnageno apakamelegamo Emo avemo haneʼniye. Moseseʼa Ala kava neʼmo aliʼyaʼamo neʼaliya vekamoʼmo muki Isaleli vayaʼmo huʼa auleʼa apatesayafeʼmo ani kavatefeʼmo hiyo, huno hapa paiʼniye.

³⁴ He tiʼa maiʼnageno Yasuvaʼa muki keʼaepa gemo mukufiʼmo avoʼmo kae maleʼniya gemo lekana paino hapa paiʼniye. Agaemo lifana geʼe aulena geʼeʼmo lekana paiʼniye.

³⁵ Yasuvaʼa muki Mosese keʼaepa gemo lekana paiʼnigeʼapaeʼmo muki Isaleli vayaʼmogi afiʼnae. Aʼne anaganagi aise mafaʼne anaganagi alu kotega vayanagi huʼa apakaeʼeʼmo magokepi lokaeʼa maiʼnaya vayanagi huʼa afiʼnae.