Yasuva 7 - The Keyagana NT and 25 OT books

Ai taonifi vayaʼmogimo Isaleli vayaʼeʼmo kame huteʼa huʼa aeʼa apaka seʼnaya gemae

¹ Isaleli vayaʼmo aeʼa apakaseʼnayaʼmonanafa lifana hu maleʼniya yafeʼmo Ala kava neʼmoʼa huʼniya gemo ago amagiʼa ataleʼnae. Ekaniʼmo Kami mafaʼnemo maiʼnigeno Kamiʼmo Sapani mafaʼnemo maiʼnigeno Sapaniʼmo Sela mafaʼnemo maiʼnigeno huʼa Yuta nofi vayapatiʼmo maiʼnae. Ekaniʼmo mago lifana hu maleʼniya yaʼmo aliʼniyaʼmofeʼmo Ala kava neʼmoʼa Isaleli vayaʼaifeʼmo aipamo leno apateʼniye.

² Yasuvaʼa Yeliko taonifiʼmo maiʼnenoʼaeʼmo vayaʼmo alino apateʼnigeʼa Ai taonifiʼmo uʼnae. Meto taonimo hanetegeno yegemo haine neʼeya kotegamo Ai taonimo Meteveni taonimo haopaleʼmo haneʼniye. Yasuvaʼa ina gemo huno hapa paiʼniye. Utapa Ai haopalegamo agetapa alagepa hiyo, huno hapa paiʼnigeʼa uʼa Ai taoni haopalegamo ageʼa alagepa huʼnae.

³ Apakaemo atagineʼa eʼa Yasuvafeʼmo ha paiʼapaeʼmo. Ai taonifi vayaʼmo aise vayaʼmo maiʼnae. Muki Isaleli vayaʼmo alika apategeʼa oʼuʼa tu tauseniʼa vayaʼmofi tali tauseniʼa vayaʼmofi huka alika apategeʼa uʼa kame hiyo. Fiku yanageno muki Isaleli vayaʼmo alagaʼmo hapaegaiye, huʼa ha paiʼnae.

⁴ Ha paiʼnayaʼmofeʼmo tali tauseniʼa agufa ati vayaʼmo uʼa haiʼnageʼa Ai vayaʼmogimo apavegala aeʼa hapaeliʼa eʼnae.

⁵ Ai vayaʼmogi taonimo kegiʼya kipatetiʼmo Isaleli vayaʼmo apavegala aeʼa hapaeli hapaeliʼa avelegatiʼmo uʼa nelamiya kateʼmo Semali kotegamo uʼnae. Teti sigisiʼa Isaleli vayaʼmo hapaeʼnayaʼmofeʼmo Isaleli ati vayaʼmogi apaipamoʼmo ani heʼniye.

⁶ Yasuvaʼmo ani kavafeʼmo ava gemo afitenoʼaeʼmo kukena yaʼamo alino apake aiteno augosalegatiʼmo mopafiʼmo asagauno aiteno Ala kava neʼmo kesimo haopaleʼmo mailino neʼvigenoʼaeʼmo yegemo uno lamino faleʼniye. Yasuvaʼe Isaleli vayatama vayaʼeʼmo mumusopamo aliʼa apakenopafiʼmo faleʼnae.

⁷ Yasuvaʼa nunumuʼmo hunoʼaeʼmo, Vaehae, huno, Ala kava neʼmo Gotiyo, huno, na kava higekaeʼmo lavalelika eka Yoneni aniʼmo lakaeka eʼnane. Kagaemo Emo vayaʼmogi apayapiʼmo lavaleka apamisanageʼa kamitimo lahaesayafeʼmo huʼnapiye. Lagaemo Yoneni aniʼmo mugagayaga faligamo afaʼa maisunafeʼmo lahauʼniyesinana kanale huʼniyesine.

⁸ O Ala kava nene, huno, Isaleli vayaʼmo kame vayaʼapilegatiʼmo apaune heʼa eʼnayaʼmofeʼmo na agufa gemo huguve.

⁹ Kenani vayaʼe muki alu vayaʼmo mani koteʼmo maiʼnaya vayaʼmogiʼeʼmo ani kavafeʼmo ava gemo afiteʼapaeʼmo faiʼa vego huʼa lateʼneʼa mukiʼamo kamitimo lahaegae. Ani afinaʼmo ala kagikalefeʼmo na agufa kavaʼmo hugane, huno nunumuʼmo huʼniye.

Ekaniʼmo hosu kavaʼmo huʼniya gemae

¹⁰ Inagi Ala kava neʼmoʼa Yasuvafeʼmo ha painoʼaeʼmo, He tiyo. Na agufa kava higekaeʼmo kaugosalegatiʼmo havaeka maiʼnane.

¹¹ Isaleli vayaʼmogimo hosu kavaʼmo huge kotalake geʼnimo hiyo, huʼna hu maleʼnova geʼnimo amagiʼa atalege huʼnae. Apakaemo mago lifana hu maleʼnova yaʼmo alige kumaya alige aigofe kavaʼmo huge huteʼa ani hosu yaʼmo aliʼa apakaiʼapi yapiʼmo fala ki maleʼnae.

¹² Huʼnayaʼmofeʼmo Isaleli vayaʼmo kame vayaʼapimogi apaulagaleʼmo afaʼa he tiʼa oʼmaiʼa apaune heʼnae. Nagaemo lifana huʼna apateʼnovaʼmofeʼmae. Lapakaepatiʼmo lifana huʼna ateʼnova vekamo kamitimo ohaesayaʼmoʼmo nagaemo lapakaeʼeʼmo magoʼe huʼna magokepi lokaeʼna oʼmaiguve.

¹³ He tiyo, huʼna, Kagaemo Isaleli vayaʼmo alika apaoteʼmo apato. Ina gemo huka hapa paiyo, Egamo lapakaitapimo alita lapaoteʼmo lapateyo. Ala kava neʼmo Isaleli vayaʼmogi Gotiʼapimoʼmo lapa painoʼaeʼmo, O Isaleli vayaʼmogitapae, huno, lapakae folagapiʼmo lifana hu maleʼnova yaʼmo haneʼniye. Lapakaemo kame vayatapimo he titapa aeta oʼapaka seme oʼapaka seme neʼvisageʼapaeʼmo lapakaepatiʼmo alita atalegae.

¹⁴ Netepiʼmo lapakae nofi vayapatiʼmo magoke magoke huʼa nagaetegamo eʼa avaʼyi hiyo. Nagaemo magoke nofi vayaʼmo lekana paisugeʼapaeʼmo ani nofi vayapatiʼmo magoke kolaʼageʼmo eʼa avaʼyi hiyo. Nagaemo ani magoke kolapatiʼmo lekana paisugeʼa ani magoke magoke kolapati afamo anagaʼmo eʼa avaʼyi hiyo. Ani afamo anagapatiʼmo magoke afamo anagaʼmo lekana paisugeʼa ani afamo anaga vayaʼmo magoke magoke huʼa eʼa avaʼyi hiyo.

¹⁵ Nagaemo magoke vekamoʼmo lifana hu maleʼnova yaʼmo aliʼniya vekamo lekana paisugetapaeʼmo lapakaemo ani vekagi afamo anagaʼagi muki yaʼaʼenagi hutapa ata kaetapa apasagaliyo. Ani vekamoʼmo Ala kava neʼmo kotalake geʼamo amagino atalege lusi apavagage yaʼmo alino apamige huʼniyaʼmofeʼmae.

¹⁶ Inagi gotilamiyapiʼmo Yasuvaʼa he tino muki magoke magoke Isaleli nofi vayaʼaifeʼmo ge huʼnigeʼa eʼa avaʼyi huʼnae. Ala kava neʼmoʼa Yuta nofi vayaʼmo lekana paiʼniye.

¹⁷ Muki Yuta nofi vayaʼmo apavalelineno magoke kolapatiʼmo Sela nofi vayaʼmo lekana paino apateʼniye. Yasuvaʼa muki Sela nofi vayaʼmo magoke magoke afamo anagaʼmo apavalelineno Sapani afamo anagaʼmo lekana paino apateʼniye.

¹⁸ Yasuvaʼa muki magoke magoke vayaʼmo Sapani afamo anagapatiʼmo Ekaniʼmo lekana paino ateʼniye. Ekaniʼmo Kami mafaʼnemo maiʼnigeno Kamiʼmo Sapani mafaʼnemo maiʼnigeno Sapaniʼmo Sela mafaʼnemo Yuta nofi vekamae.

¹⁹ Yasuvaʼa Ekanifeʼmo ha painoʼaeʼmo, Mafaʼneʼnimogae, huno, kahao ke hovanagi, Kagaemo Ala kava neʼmo Isaleli vayaʼmogita Gotitimofeʼmo hosu kavakaeʼmo ha paiteka ala agiʼamo amiyo. Hemenimo hosu kavakaeʼmo naha paiyo. Ati kaeka oʼnato, huno huʼnigenoʼaeʼmo

²⁰ Ekaniʼa geʼaleʼmo aeno atagaina hunoʼaeʼmo, Alagi lama gemo huʼnaeʼmo, Ala kava neʼmo Gotitimotegamo hosu kavaʼmo ago huʼnove. Inagi hemenimo ani huʼnova kavafeʼmo kaha paiguve.

²¹ Lagaemo kame hutetaeʼmo Yeliko vayaʼmogi yaʼmo aliʼnona afinaʼmo ani kagemi yaʼmo folagapiʼmo mago kanale kukena yaʼmo Mamiloni vayaʼmogi kukena yanagi fo kilo siluva monigi magoke kilo goli yafanagi huʼna ageʼnove. Ageteʼna ani yafeʼmo nahaʼye huʼnigeʼna aliʼnove. Nagaemo aliniʼnuʼna seli noʼnifiʼmo haiʼna muki yaʼamo mopafiʼmo keli vai maleʼnove. Siluvaʼmo ema afepiʼmo haneʼniye.

²² Inagi Yasuvaʼa mago vayaʼmo alino apateʼnigeʼa Ekani seli notegamo nagu nagu huʼa uʼa ageʼnayana ani huʼniya yaʼmo hanetegeno siluvaʼmo ema afepiʼmo haneʼniye.

²³ Apakaemo ani yaʼmo aliteʼa aliniʼa Yasuvategaʼe muki Isaleli vayaʼaitegaʼeʼmo eʼa Ala kava neʼmo aulagaleʼmo mopafiʼmo maleʼnae.

²⁴ Inagi Yasuvaʼe muki Isaleli vayaʼmogiʼeʼmo Ekaniʼmo avaleteʼa ani siluvagi kukenagi goli yafanagi Ekani ve mafaʼne anagaʼagi a mafaʼne anagaʼagi pulumaka anagaʼagi nokiʼagi sipisipi anagaʼagi seli noʼagi huʼa muki yaʼamo alige apavalege huliʼa Eko kotega kagomufilagamo uʼnae.

²⁵ Yasuvaʼa hunoʼaeʼmo, Na agufa kava higekaeʼmo hanageke yaʼmo alika lamiʼnane. Hemenimo Ala kava neʼmoʼa hanageke yaʼmo kamigiye, huno nehigeʼapaeʼmo muki Isaleli vayaʼmogimo yafa kayotetiʼmo Ekaniʼe muki afamo anagaʼaʼeʼmo kamitimo apamagiteʼa muki yaʼapiʼe apakaeʼeʼmo ata kaeʼa apasagaliʼnae.

²⁶ Apakaemo Ekani agufaleʼmo asole yafa aluʼmo ai maleʼnageno hemenimo ani yafa aluʼmo haneʼniye. Inagi Ala kava neʼmo aipamoʼmo falu huʼniye. Ani kavaʼmo afole aiʼniyaʼmofeʼmo apakaemo ani koʼmo agiʼamo Eko kagoʼmu kone, huʼa ateʼnae. Eko kone agimo aepaʼamo hanageke yaʼmae. Ani agimo aeme aeme eʼa hemenimo ani agigeʼmo neʼae.