Yasuva 6 - The Keyagana NT and 25 OT books

Isaleli vayaʼmogi Yeliko taonifiʼmo maiʼnaya vayaʼeʼmo kame huteʼa huʼa aeʼa apaka seʼnaya gemae

¹ Isaleli vayaʼmo ago eʼa hogo huʼa maiʼnayaʼmofeʼmo Yeliko vayaʼmogimo vayaʼmo oʼuge oʼmege hisayafeʼmo muki taonile kegiʼya kipate kitamo ago kiʼa alagi hu maleʼnae.

² Ala kava neʼmoʼa Yasuvafeʼmo ha painoʼaeʼmo, Afiyo, huno, Nagaemo Yeliko kini vekagi lokiya ati vayanagi Yeliko taonifi kagemi yanagi huʼna aliʼna kayapiʼmo kamiʼnove.

³ Kagaeʼe ati vayakaʼeʼmo mani taonileʼmo muki afinaʼae afinaʼaeʼmo magokeʼageʼmo aitapa vego hute hute hume hume viyo. Sigisiʼa afinaʼmo ani kavaʼmo hiyo.

⁴ Mono huʼa neʼapataya vayaʼmo seveniʼamogimo kotalake kesileʼmo uʼa hogoteteʼa ve sipisipimogi lokiyaʼapiletiʼmo alo huʼnaya pikulimo seveniʼa pikulimo aliniʼa ugae. Lapakaemo napa seveni afinaʼmo alagi taonimo seveniʼa kanaleʼmo aita vego hutapa neʼvisageʼapaeʼmo mono huʼa neʼapataya vayaʼmogi pikulimo hugae.

⁵ Apakaemo pikulimo huʼa yatala hisaya afinaʼmo afitetapaeʼmo mukiʼamogitapamo alopa gefatiʼmo keya aetapa ge hisageno ani taonimo agiʼnaleʼmo faino vego huʼniya yafa kegiʼyamo aino naku paeno mopafiʼmo asagauno aisigeʼapaeʼmo inagi muki Isaleli vayaʼmo apaulagaleʼmo haneʼniya katetiʼmo taonifiʼmo alagi uʼa haigae, huno ha paiʼniye.

⁶ Huno ha paiʼnigeno Nani mafaʼnemo Yasuvaʼa mono huʼa neʼapataya vayaʼaifeʼmo keya aeʼnigeʼa eʼnageno ina ge huno hapa paiʼniye. Lapakaemo kotalake kesimo aliyo. Mono huʼa neʼapataya vayaʼmo seveniʼamogimo seveniʼa pikulimo ve sipisipimogi lokiyaʼapiletiʼmo alo huʼnaya pikulimo aliteʼa kesileʼmo uʼa hogotegae, huno hapa paiteno

⁷ muki vayaʼaifeʼmo hapa painoʼaeʼmo, Lapakaemo uta taonileʼmo aitapa vego hisageʼapaeʼmo atimo aliʼnaya vayaʼmogi Ala kava neʼmo kesileʼmo uʼa hogotegae.

⁸ Inagi apakaemo Yasuvaʼa huʼniya agufa kavaʼmo huʼa mono huʼa neʼapataya vayaʼmo seveniʼamogimo Ala kava neʼmo kotalake kesileʼmo seveniʼa pikulimo ve sipisipimogi lokiyaʼapiletiʼmo alo huʼnaya pikulimo huliʼa uʼa hogoteʼnae.

⁹ Mago ati vayaʼmo mono huʼa neʼapataya vayaʼmo pikulimo huliʼa uʼnaya vayaʼaiteʼmo uʼa hogotetageʼa mago ati vayaʼmo kotalake kesimo akamelegamo eʼnae. Neʼuʼapaeʼmo mono huʼa neʼapataya vayaʼmo seveniʼamogimo pikulimo huliʼa uʼnae.

¹⁰ Yasuvaʼa vayaʼaifeʼmo hapa painoʼaeʼmo, Alopa gefatiʼmo osuge mago agufa ge gunugu gemo osuge mago gemo osuge hulitapa neʼvisageʼnaeʼmo alopa gefatiʼmo hiyo, huʼna huguve. Ani afinaʼmo alopa gefatiʼmo ge hiyo, huno hapa paiʼniye.

¹¹ Yasuvaʼa ani gemo huʼnigeʼa Ala kava neʼmo kotalake kesimo aliʼa kofiliʼa uʼa magoke afinaʼmo taonileʼmo aiʼa vego huteʼa eʼa seli noʼapifiʼmo havaeʼnae.

¹² Yasuvaʼa gotilamiyapiʼmo he tiʼnigeʼapaeʼmo mono huʼa neʼapataya vayaʼmogimo Ala kava neʼmo kotalake kesimo aliʼa kofiliʼa uʼnae.

¹³ Ani mono huʼa neʼapataya seveniʼa vayaʼmogi seveniʼa pikulimo aliteʼa kesileʼmo pikulimo huliʼa uʼa hogoteʼnae. Mago ati vayaʼmo mono huʼa neʼapataya vayaʼaiteʼmo uʼa hogotege kesimo akamelegamo ege huʼnae. Mono huʼa neʼapataya vayaʼmogimo pikulimo huliʼa uʼnae.

¹⁴ Napa tu afinaʼmo ani agufa kavakeʼmo huteʼa halate atagineʼa seli noʼapilegamo eʼnae. Apakaemo magoke agufa kavaʼageʼmo sigisiʼa afinaʼmo huʼnae.

¹⁵ Seveni afinaʼmo ko netigeʼapaeʼmo he tiʼa uʼa hogoteʼa huʼnaya agufa kavaʼmo huʼnayaʼmonanafa ani afinaʼmo seveniʼa kanaleʼmo taonileʼmo aiʼa vego huʼnae.

¹⁶ Seveniʼa kanaleʼmo taonileʼmo aiʼa vego nehuʼapaeʼmo mono huʼa neʼapataya vayaʼmogimo pikulimo nehagenoʼaeʼmo Yasuvaʼa vayaʼaifeʼmo hapa painoʼaeʼmo, Ala kava neʼmoʼa taonimo ago alino lapamiʼniyanagi alopa gefatiʼmo ge hiyo.

¹⁷ Ala kava neʼmoʼa taonimo heno halagape vaige muki taonifiʼmo maiʼnaya vayaʼmo hosu kava huʼa maige hisayafeʼmo ge hugiye. Ani kate a kanomo Lehapikeʼmo noʼafiʼmo maiʼnaya afamo anagaʼaʼeʼmo afaʼa maigae. Agaemo lagaemo taonimo ageʼana alagepa hisaʼafeʼmo alita anateʼnonageʼana eʼnaʼa vekalaʼmo alino fala kino anateʼniyaʼmofeʼmae.

¹⁸ Lapakaemo taonifatiʼmo magoke lifana hu maleʼnaya yaʼmo alagi haʼao oʼaliyo. Lapakaemo alisayaʼmoʼmo lifana vayaʼmo hamalege muki Isaleli vayaʼmo lifana gemoʼmo lapakenopaleʼmo asagauno aige hisigetapa alopa hanageke yaʼmo alita apamigae.

¹⁹ Muki yaʼamo siluva letinagi goli letinagi haesa aeniletinagi afa aeniletinagi huʼa alo huʼnaya yaʼmo Ala kava neʼmo agaiʼa aote yaʼagekeʼmo haneʼniye. Aliniteta Ala kava neʼmo monimo maleʼnaya seli nopiʼmo malegaune, huno hapa paiʼniye.

²⁰ Hapa paiʼnigeʼa mono huʼa neʼapataya vayaʼmogimo pikulimo nehageʼapaeʼmo Isaleli vayaʼmogimo malage huʼa alopa gefatiʼmo lusi kava huʼa ge huʼnageno taonileʼmo huʼa ku ai maleʼnaya yafa kegiʼyamo aino nakupaeno mopafiʼmo asagauno aiʼniye. Inagi muki vayaʼamogimo apaulagaleʼmo haneʼniya katetiʼmo uʼa haiʼa taonimo aliʼnae.

²¹ Apakaemo muki Yeliko taonifi vayaʼmo naipeletiʼmo kamiti apaiʼnae. Apakaemo muki yaʼe vayaʼeʼmo alagi aliʼa hano huʼa ataleʼnae. Apakaemo ve anagaʼmo apaige aʼne anagaʼmo apaige neya vayaʼmo apaige kosunaʼmo apaige pulumakagi sipisipigi nokigi huʼa apaige huʼnae.

²² Apaiʼnayaʼmonanafa Yasuvaʼa ani lole vekalaʼmo akeyaʼvilagamo alino anateʼnigeʼana eʼana ani koʼmo ageʼana alagepa huʼnaʼa vekalaʼanifeʼmo hana painoʼaeʼmo, Lanakaemo ani kate a kanomo nopiʼmo haitana agaeʼe afamo anagaʼaʼeʼmo lanakaemo lanagoʼyamo ataletana polomasi gemo ago hu maleʼnaʼa agufa kavaʼmo hutana apavalelitana eʼao.

²³ Inagi ageʼana alagepa huʼnaʼa neya vekalaʼmoganimo nopiʼmo uʼana haiʼana Lehapiʼagi itaʼafoʼalaʼmoganimogi konagaʼamogimogi afamo anagaʼapigi huʼana apavaleliʼana emiʼeʼana Isaleli vayaʼmo seli noʼapimo aliʼa he tiʼa ateʼnaya haopaleʼmo malaga apateʼnaʼageʼa maiʼnae.

²⁴ Apakaemo atamo kani aeʼa taoniʼapiʼe muki taoniʼapifiʼmo haneʼniya yaʼapiʼeʼmo kaeʼa ataleʼnae. Kaeʼa ataleʼnayaʼmonanafa siluvaletinagi goliletinagi haesa aeniletinagi afa aeniletinagi huʼa alo huʼnaya yaʼmo aliniʼa uʼa Ala kava neʼmo monimo neʼmalaya nopiʼmo maleʼnae.

²⁵ Yasuvaʼa kate a kanomo Lehapiʼagi muki konagaʼamogiʼenagi kagemiyaʼapiʼenagi afamo anagaʼapiʼenagi huno afaʼa apateʼniye. Lehapiʼa lole vekalaʼmo Yeliko taonimo ageʼana alagepa hisaʼafeʼmo alino anateʼnigeʼana eʼnaʼa vekalaʼmo alino fala kino anateʼniyaʼmofeʼmae. Inagi Lehapiʼa Isaleli vayaʼeʼmo lokaeno maime maime eno hemenimo Isaleli vayaʼekeʼmo maiʼniye.

²⁶ Inagi ani afinaʼmo Yasuvaʼa vayaʼaifeʼmo lokiya gemo huno hapa painoʼaeʼmo, Mago vekamoʼmo mani Yeliko taonimo halate kisiyaʼmoʼmo Ala kava neʼmoʼa lifana huno ategaiye. Agaemo ani taonifiʼmo aliʼyaʼmo aepa faino alisiya afinaʼmo yege mafaʼneʼamo faligiye. Agaemo taonile kegiʼyamo alopa kipate kitamo alino alo hisiya afinaʼmo henaga mafaʼneʼamo faligiye, huno hapa paiʼniye.

²⁷ Ani kavatefeʼmo Ala kava neʼmoʼa Yasuvaʼeʼmo magokepi lokaeno maiʼnigenoʼaeʼmo muki kotegamo ala agiʼamoʼmo aino atagu faeno uneno huʼniye.