Yasuva 5 - The Keyagana NT and 25 OT books

Isaleli vayaʼmogimo mafaʼne anagaʼapimogi apakufa atupamo hatagauʼa ataleʼnaya gemae

¹ Emo nofi vayaʼmo yegemo uno lamino nefaleya haopalega Yoneni anitegamo maiʼnageʼapaeʼmo Kenani nofi vayaʼmo alopa solovala aniʼmo Meteleniyani ani haigifiʼmo maiʼnae. Ala kava neʼmoʼa Isaleli vayaʼmogi Yoneni aniʼmo lakaegefeʼmo huʼnaya afinaʼmo aniʼmo alino hau hu maleʼnigeʼa lakaeʼnae, huʼa huʼnaya gemo Emo vayaʼaiteʼmo neʼyagaiya kini vayaʼmogiʼe Kenani vayaʼaiteʼmo neʼyagaiya kini vayaʼmogiʼeʼmo afiteʼapaeʼmo Isaleli vayaʼaifeʼmo koliʼapimo huʼnagenoʼaeʼmo kame hisaya lokiyaʼapimo ago hano huʼniye.

² Ani afinaʼmo Ala kava neʼmoʼa Yasuvafeʼmo ha painoʼaeʼmo, Asole haginamo lokiya yafatetiʼmo aveʼmo nesiya agufa haginamo alo huteka napa tu afinaʼmo Isaleli ve anagaʼmogi apakufamo atupamo hatagauka atalo, huno ha paiʼniye.

³ Ha paiʼnigeno Yasuvaʼa lokiya yafatetiʼmo asole haginamo alo huteno Isaleli ve anagaʼmo aise avefiʼmo agiʼamo apakufa atupamo hatagauno ataleʼniya avefiʼmo apakufa atupamo hatagauno ataleʼniye.

^4-5 Yasuvaʼa huʼniya kavaʼmo aepaʼamo haneʼniyana muki Isaleli ve anagaʼmo Isipi kotegatiʼmo ataleʼa eʼnaya vayaʼmogi apakufamo atupamo hatagauʼa ataleʼnaya vayaʼmo kame nehaya vayaʼmo hau huʼniya kaʼme kateʼmo ago faliʼnae. Faliʼnayaʼmonanafa hau huʼniya kaʼme koteʼmo aliʼa apateʼnaya vayaʼmogi apakufamo atupamo hatagauʼa oʼataleʼnae.

⁶ Isaleli vayaʼmo hau huʼniya kaʼme koteʼmo fotiʼa kafugamo umenitata hume hume neʼvageʼapaeʼmo muki kame nehaya ve anagaʼmo Isipi kotegatiʼmo eʼnaya vayaʼmo ago faliʼnae. Ala kava neʼmoʼa agoʼyamo ataleno laginago vayaʼaifeʼmo hunoʼaeʼmo, Nagaemo kanale lanitani mopafatiʼmo alagepa neʼyaʼmo afole neʼaiya mopamo mafaʼne anagatapimo apamiguve, huno hapa paiʼniyaʼmonanafa Ala kava neʼmoʼa hiyo, huno hapa paiʼniya kavaʼmo akame huʼa osuʼnayaʼmofeʼmae. Ala kava neʼmoʼa agoʼyamo ataleno hunoʼaeʼmo, Ani mopaleʼmo lapavaleliʼna oʼuguve, huno hapa paiʼniye.

⁷ Inagi Yasuvaʼmo faliʼnaya Isaleli vayaʼmogi ve mafaʼne anagaʼapimo kategamo neʼvagenoʼaeʼmo apakufamo atupamo hatagauno oʼataleʼniyaʼmofeʼmo hatagauno ataleʼniye. Ala kava neʼmoʼa ani ve mafaʼne anagaʼmo afoʼapimogi apaimuʼyaleʼmo alino afole aino apateʼniye.

⁸ Apakaemo apakufamo hatagauʼa ataleʼnageʼapaeʼmo seli noʼapifiʼmo hapatesiyaʼaeʼmo agava maiʼnae.

⁹ Inagi Ala kava neʼmoʼa Yasuvafeʼmo ha painoʼaeʼmo, Hemenimo nagaemo ani lapavagage huʼniya kavatapimo Isipi kotegamo aliʼnaya kavatapimo aliʼna ataleʼnove, huno ha paiʼniye. Huʼniyaʼmofeʼmo ani taoniyeʼmo agiʼamo Giligaliye, huʼa aeme aeme eʼa hemenimo neʼae. Giligaliye agimo aepaʼamo alino ataleʼniya kone.

¹⁰ Inagi Isaleli vayaʼmo Giligali kotega otu mopamo Yeliko taonimo haopaleʼmo seli noʼmo aliʼa he tiʼa ateteʼa maiʼnae. Hogote kaimo fotini afinaʼmo yegemo uno lamino nefalegeʼapaeʼmo Pasova neʼyaʼmo yagita huʼa neʼnae.

¹¹ Egaʼamo apakaemo Kenani mopafatiʼmo afole aiʼniya neʼyaʼmo aliteʼa aeno apafu oleʼniya peleti mayaʼe vitiʼeʼmo kaeʼa neʼnae.

¹² Netagenoʼaeʼmo egaʼamo mana neʼyaʼmo magoʼe huno emiʼnoʼmeʼniye. Apakaemo magoʼe huʼa manamo oʼneʼa aepa faiʼa Kenani kote neʼyakeʼmo neʼnae.

Ala kava neʼmo ami vayaʼaleʼmo neʼyagaiya vekaeʼmo ava gemo huʼniya gemae

¹³ Yasuvaʼa Yeliko taoni haopaleʼmo maiʼnenoʼaeʼmo alino aulu heno ageyana mago vekamoʼmo naipeʼamo ayapiʼmo aliteno he tino maiʼnigeno ageʼniye. Yasuvaʼa agaetegamo uno, Kagaemo laha maesana vekamo maiʼnapi kametimo maiʼnane, huno ge huno afi geʼnigenoʼaeʼmo

¹⁴ agaemo, Haʼao, huno, nagaemo Ala kava neʼmo asole ami vayaʼaleʼmo hogote vekamo yagaiʼna neʼapatova vekamo eʼnove, huno huʼnigeno Yasuvaʼa augosalegatiʼmo mopafiʼmo asagauno aiteno mono huʼniye. Mono hutenoʼaeʼmo, Ala kava neʼnimogae, huno, aliʼyakaleʼmo maiʼnova vekaeʼmo na agufa ge huka naha paigane, huno ge huno afi geʼniye.

¹⁵ Ala kava neʼmo ami vayaʼaleʼmo neʼyagaiya vekamoʼmo Yasuvafeʼmo hunoʼaeʼmo, He tika maiʼnana mopamo aliʼna aote maleʼnova mopalekeʼmo he tika maiʼnanaʼmofeʼmo sukamo asagika malo, huno ha paiʼnigeno Yasuvaʼa ani kavaʼmo huʼniye.