Yasuva 4 - The Keyagana NT and 25 OT books

Isaleli vayaʼmogimo Giligali taonimo haopaleʼmo yafa aluʼmo ai maleʼnaya gemae

¹ Muki Isaleli vayaʼmo Yoneni aniʼmo ago lakaeʼnagenoʼaeʼmo Ala kava neʼmoʼa Yasuvafeʼmo ina ge huno ha paiʼniye.

² Kagaemo muki tuolofuʼa Isaleli nofi vayapatiʼmo magoke magoke huka tuolofuʼa vayaʼmo lekana paika apato.

³ Lekana paika apatetekaeʼmo apakaefeʼmo hapa paikaeʼmo, Yoneni aniʼmo folagapiʼmo he tiʼa maiʼnaya yatetiʼmo alisaya yafaʼmo hemenimo uta havaesaya haopalegamo maleyo, huka hapa paiyo, huno ha paiʼniye.

⁴ Inagi Yasuvaʼa tuolofuʼa vayaʼmo lekana paino apateʼniya vayaʼaifeʼmo keya aeʼnigeʼa eʼnae.

⁵ Yasuvaʼa hapa painoʼaeʼmo, Lapakaemo mono huʼa neʼapataya vayaʼmogi Ala kava neʼmo Gotitapimo kotalake kesiʼamo kofiliʼa uʼa Yoneni aniʼmo folagapiʼmo he tiʼa maiʼnaya yatetiʼmo uta lamitapa alopa yafaʼmo magoke magoke hutapa tuolofuʼa nofi vayaʼmo maiʼnaya kava hutapa tuolofuʼa yafaʼmo alita kofilitapa haita aniʼmo mugagayaga faligamo maleyo.

⁶ Ala kava neʼmoʼa huʼniya aune kavatefeʼmo vayaʼmogimo ani yafaʼmo ageteʼapaeʼmo apakesamo afisaya alagena yafaʼmae. Henagaʼamo lapakinago vayaʼmogimo mani yafaʼmo ageteʼapaeʼmo, na agufa kavaʼmo higenoʼaeʼmo mani yafaʼmo haneʼniye, huʼa ge huʼa lapafi gegae.

⁷ Inagi geʼapileʼmo aeta atagaina hutapa hapa paitapaeʼmo, Ala kava neʼmo kotalake kesiʼamo aliʼa kofiliʼa uʼa Yoneni aniʼmo lakaeʼnaya afinaʼmo Gotiʼa aniʼmo alino laneno ataleʼnigeno aniʼmo folagapiʼmo mopamo hau huʼniye. Huʼniyaʼmofeʼmo ani yafaʼmoʼmo muki afinaʼae afinaʼaeʼmo Isaleli vayaʼmogi apaipa apakesamo alino he tino apategaiye.

⁸ Isaleli vayaʼmogimo Yasuvaʼa hiyo, huno hapa paiʼniya kavaʼmo akame huʼa uʼa Yoneni aniʼmo folagapatiʼmo yafaʼmo aliʼa kofiliʼa uʼa seli nopiʼmo havaeʼnaya yateʼmo maleʼnae. Ala kava neʼmoʼa Yasuvafeʼmo ha paiʼniya kavaʼmo akame huʼa tuolofuʼa Isaleli nofi vayaʼmo maiʼnaya kava huʼa tuolofuʼa yafaʼmo aliʼa kofiliʼa uʼa maleʼnae.

⁹ Inagi Yasuvaʼa Yoneni aniʼmo folagapiʼmo mono huʼa neʼapataya vayaʼmo kotalake kesimo aliʼa kofiliʼuʼa he tiʼa maiʼnaya yateʼmo alu tuolofuʼa yafaʼmo faino ateʼniye. Hemenimo ani yafaʼmo afaʼa haneʼniye.

¹⁰ Mani kavatefeʼmo mono huʼa neʼapataya vayaʼmogimo kotalake kesimo kofiliʼa uʼnaya vayaʼmo Yoneni aniʼmo folagapiʼmo he tiʼa maite maite huliʼa neʼvageʼapaeʼmo Isaleli vayaʼmo malage huʼa lakaeʼa uʼnae. Ala kava neʼmoʼa Yasuvafeʼmo, hapa paiyo, huno ha paiʼniya kavaʼmo afole aiʼnigeʼapaeʼmo ani aniʼmo lakaeʼnae. Moseseʼa Yasuvafeʼmo ani kavaʼmo huvo, huno ha paiʼniya kavaʼmo huʼnae.

¹¹ Muki vayaʼmo aniʼmo lakaeʼa mugagayaga faligamo uʼa avaʼyi huʼnageʼapaeʼmo mono huʼa neʼapataya vayaʼmogimo vayaʼmogi apaulagaleʼmo kotalake kesimo kofiʼa aliʼneʼa aniʼmo lakaeʼa eʼnae.

¹² Lumeni nofi vayanagi Gati nofi vayanagi Manasa nofi vayapatiʼmo magokayaga nofi vayanagi huʼa Moseseʼmo hapa paiʼniya gemo afiteʼa kame hisaya yaʼmo aliniʼa uʼa hogoteʼa lakaeʼnae.

¹³ Ina kava huʼa foti tauseniʼa agufa vayaʼmogimo kamemo hisayafeʼmo alo huʼa aliteʼa Ala kava neʼmo aulagaleʼmo lakaeʼa mago otu mopamo Yeliko taonimo haopaleʼmo uʼa avaʼyi huʼnae.

¹⁴ Ani afinaʼmo Ala kava neʼmoʼa Isaleli vayaʼmogi apaulagaleʼmo Yasuva agiʼaleʼmo alino asagauno ateʼniye. Apakaemo Mosesefeʼmo koli huteʼa akame huʼnaya agufa kava huʼa Yasuvaʼmo afaʼa maiʼniya afinaʼmo Yasuvafeʼmo koli huteʼa akame huʼnae.

¹⁵ Inagi Ala kava neʼmoʼa Yasuvafeʼmo ha painoʼaeʼmo,

¹⁶ Kagaemo mono huʼa neʼapataya vayaʼmogi Gotifeʼmo ava gemo aeno hakalo huno hapa nepaiya kesimo aliʼa kofiliʼnaya vayaʼaifeʼmo hapa paikaeʼmo, Yoneni anipatiʼmo ataletapa haiteyo, huka hapa paiyo, huno ha paiʼniye.

¹⁷ Ha paiʼniyaʼmofeʼmo Yasuvaʼa mono huʼa neʼapataya vayaʼaifeʼmo hapa painoʼaeʼmo, Yoneni anipatiʼmo ataletapa haiteyo, huno hapa paiʼniye.

¹⁸ Mono huʼa neʼapataya vayaʼmo kotalake kesimo kofiliʼa eʼnaya vayaʼmo uʼa haiʼa ani agiʼnaleʼmo ago neʼvagenoʼaeʼmo halate aniʼmo aino atagu faeno noʼaleʼmo uno lamino ani heʼniya kava huno aniʼmo heʼniye.

¹⁹ Isaleli vayaʼmo Yoneni aniʼmo hogote kaileʼmo napa teni afinaʼmo lakaeteʼa Giligali koʼmo Yeliko taonimo haopaleʼmo yegemo haine neʼeya haopalegamo haneʼnigeʼa seli noʼapimo aliʼa he tiʼa ateʼnae.

²⁰ Yasuvaʼa ani tuolofuʼa yafaʼmo Yoneni anipatiʼmo vayaʼmogi aliʼnaya yafaʼmo Giligali koteʼmo faino ateʼniye.

²¹ Faino atetenoʼaeʼmo Isaleli vayaʼaifeʼmo hapa painoʼaeʼmo, Henagaʼamo mafaʼne anagatapimogimo eʼa afoʼapimogitapaeʼmo huʼapaeʼmo, Na agufa kava higenoʼaeʼmo mani yafaʼmo haneʼniye, huʼa ge huʼa lapafi gesagetapaeʼmo

^22-23 Mani yafaʼmo Isaleli vayaʼmo eʼa Yoneni aniʼmo lakaeʼnagenoʼaeʼmo Ala kava neʼmoʼa Yoneni aniʼmo alino hau hu maleʼnigeʼa lakaeʼnaya kavafeʼmo alagena yaʼamo haneʼniye. Ala kava neʼmo Gotitapimoʼmo haesa solovala anipiʼmo alino hau hu maleʼnigeta lakaeʼnona agufa kavaʼmo huno Yoneni anipiʼmo alino hau hu maleʼnigeta lakaeʼnone.

²⁴ Muki ma mopafiʼmo maiʼnaya vayaʼmogimo Ala kava neʼmo lokiyaʼamo agege lapakaemo muki afinaʼmo Ala kava neʼmo Gotitapimofeʼmo koli huʼnetapa mono huge hisayafeʼmae, hutapa hugae.