Yasuva 3 - The Keyagana NT and 25 OT books

Isaleli vayaʼmogi Yoneni aniʼmo lakaeʼnaya gemae

¹ Inagi Yasuvaʼe Isaleli vayaʼeʼmo ani haniʼilagamo havaeteʼa kotilamiyapiʼmo he tiʼa Sitimi kotetiʼmo ataleʼa uʼa Yoneni aniteʼmo avaʼyi huteʼa ani haopalegamo havaeʼnae. Aniʼmo olakaeʼnafa hogoteʼa havaeʼnae.

^2-3 Loleʼe magoʼe afinaʼmo utegeʼa yagaiʼa apateʼnaya vayaʼmogimo seli noʼmo aliʼa he tiʼa ateʼnaya yapiʼmo umenitata nehuʼapaeʼmo, Lapakaemo apakesayana mono huʼa neʼapataya Livai nofi vayaʼmogimo Ala kava neʼmo Gotitimo kotalake kesiʼamo aliʼa kofiliʼa visagetapa apaketetapaeʼmo he titapa apakame hutapa viyo.

⁴ Lapakaemo ani koteʼmo oʼmeʼnayanagetapa oʼageʼnayaʼmofeʼmo visaya kaʼmo agesayafeʼmo apakame hutapa viyo. Apakame hugayaʼmonanafa kotalake kesimo haopaʼaleʼmo oʼviyo. Haʼao, vani tauseni mita agufa afafaʼmo akamelegamo viyo, huʼa hapa paiʼnae.

⁵ Yasuvaʼa muki vayaʼaifeʼmo ina ge huno hapa paiʼniye. Egamo Ala kava neʼmoʼa alopa aune kavaʼmo oʼageʼnaya agufa aune kavaʼmo hugiyaʼmofeʼmo hemenimo lapakaitapimo alita lapaoteʼmo lapateyo, huno hapa paiteno

⁶ mono huʼa neʼapataya vayaʼaifeʼmo hapa painoʼaeʼmo, Lapakaemo kotalake kesimo alita kofi litapa uta hogotetapa aniʼmo lakaeyo, huno hapa paiʼniyaʼmofeʼmo kotalake kesimo aliʼa kofiʼa aliteʼa uʼa hogoteʼnae.

⁷ Ala kava neʼmoʼa Yasuvafeʼmo ha painoʼaeʼmo, Hemenimo nagaemo aepa faiʼna Isaleli vayaʼmogimo nagaemo Moseseʼeʼmo magokepi lokaeʼna maiʼnova agufa kava huʼna kagaeʼeʼmo magokepi lokaeʼna maiʼnova kavaʼnimo agesayafeʼmo kagikaleʼmo aliʼna asaga huguve.

⁸ Kagaemo mono huʼa neʼapataya vayapatiʼmo kotalake kesimo aliʼa kofiliʼa visaya vayaʼaifeʼmo hapa paikaeʼmo, Lapakaemo Yoneni ani agiʼnaleʼmo utapa avaʼyi hutetapaeʼmo anipiʼmo utapa he tita maiyo, huka hapa paiyo.

⁹ Inagi Yasuvaʼa Isaleli vayaʼaifeʼmo hunoʼaeʼmo, Lapakaemo etapa hogo huʼnetapa Ala kava neʼmo Gotitapimo geʼamo afiyo, huno,

¹⁰ Hemenimo lapakaemo afole aisiya kavatetiʼmo hutapaeʼmo afaʼa neʼmaiya Gotiʼa lapakae folagapiʼmo maiʼnenoʼaeʼmo uno haino me otalegaifa Kenani vayanagi Hiti vayanagi Haivi vayanagi Pelesi vayanagi Gagasi vayanagi Emo vayanagi Yemusi vayanagi huno laulagaleʼmo alino hapa faino apataleʼniye, hutapa agegae.

¹¹ Afiyo, huno, Ala kava neʼmo muki ma mopafiʼmo neʼyagaiya Goti kotalake kesiʼamo lapaulagaleʼmo kofiliʼa uʼa Yoneni aniʼmo lakaesagetapa agegae.

¹² Lakaegayaʼmofeʼmo lapakaemo muki tuolofuʼa Isaleli nofi vayapatiʼmo magoke magoke vayaʼmo tuolofuʼa vayaʼmo lekana paitapa apateyo.

¹³ Mono huʼa neʼapataya vayaʼmogimo Ala kava neʼmo muki ma mopafiʼmo neʼyagaiya Goti kotalake kesiʼamo kofiliʼa uʼa lamiʼa anipiʼmo apaiyamo neʼaesagenoʼaeʼmo visaya kateʼmo aniʼmo magoʼe huno uno olamino avegana huno aeno kosilino haino hanegaiye, huno hapa paiʼniye.

¹⁴ Inagi ani kavaʼmo afole aiʼniye. Apakaemo seli noʼmo aliʼa he tiʼa ateʼnaya yatetiʼmo ataleʼa Yoneni aniʼmo lakaesayafeʼmo uʼnae. Mono huʼa neʼapataya vayaʼmogimo kotalake kesimo aliʼa kofiliʼa uʼa hogoteʼnae.

^15-16 Ani afinaʼmo neʼyaʼmo neʼaliya afinaʼmogeno Yoneni aniʼmoʼa alopa aniʼmo neheya afinaʼmogeno aniʼmo heʼniye. Kotalake kesimo kofiliʼa ani haigileʼmo uʼa avaʼyi huteʼapaeʼmo apaiyamo anipiʼmo neʼagenoʼaeʼmo aniʼmo magoʼe huno anagatiʼmo emi noʼmeʼniye. Aniʼmo anaga afagiʼaleʼmo Atamu taonimo Saletani taoni haopaleʼmo emiʼnomeno avegana huno haneʼniye. Aniʼmo uno olamino Alama ani kotupiʼmo uno nelamiya aniʼmo alagi laneʼniye. Isaleli vayaʼmo Yeliko taonimo haopaletiʼmo aniʼmo lakaeʼnae.

¹⁷ Mono huʼa neʼapataya vayaʼmo Ala kava neʼmo kotalake kesiʼamo kofiliʼa uʼnagenoʼaeʼmo Yoneni aniʼmo folagapiʼmo mopamo hau huʼniya yateʼmo he tiʼa maite maite huliʼa neʼvageʼapaeʼmo muki Isaleli vayaʼmogi Yoneni aniʼmo lakaeʼnae.