Yasuva 24 - The Keyagana NT and 25 OT books

Yasuvaʼa Isaleli vayaʼaʼeʼmo magokepiʼmo kotalakemo hu maleʼniya gemae

¹ Yasuvaʼmo muki Isaleli nofi vayaʼmo Sikemi taonifiʼmo alino anupa huno apateʼnenoʼaeʼmo vayatama vayaʼaifenagi yagaiʼa apateʼnaya vayaʼaifenagi agoti gemo neʼafiya vayaʼaifenagi aliʼyaʼmo neʼaliya vayaʼaiteʼmo yagaiʼa neʼapataya kava vayaʼaifenagi huno ge huʼnigeʼa eʼa Goti aulagaleʼmo he tiʼnae.

² Yasuvaʼa muki vayaʼaifeʼmo ina gemo huno hapa painoʼaeʼmo, Ala kava neʼmo Isaleli vayaʼmogi Gotiʼapimoʼmo hunoʼaeʼmo, Akeyaʼvilagamo lapakinago vayaʼmo Yufaletisi aniʼmo mugagayaga faligamo maiʼneʼapaeʼmo alu gotigitefeʼmo monoʼmo huʼnae. Ina kava huno Tilaʼmo Emalehamuʼe Nehaʼeʼmo afoʼanimoʼmo maiʼniye.

³ Inagi nagaemo Emalehamuʼmo lapakinago vekamo Yufaletisi aniʼmo mugagayaga faligamo haneʼniya kotetiʼmo avaleliʼna eʼnogeno eno muki Kenani haopalega mopaleʼmo umenitata huʼniye. Nagaemo asole aginago vayaʼmo amiʼnove. Nagaemo mago ve mafaʼnemo Aisakiʼmo amiʼnove.

⁴ Nagaemo Aisakiʼmo lole mafaʼnelaʼmo Yekopuʼe Isoʼeʼmo amiʼnove. Nagaemo Siya ave koʼmo Isoʼmo agaiʼa mopamo amiʼnovaʼmonanafa Yekopuʼmo mafaʼne anagaʼaʼeʼmo Isipi kotegamo uʼa maiʼnae.

⁵ Henagaʼamo nagaemo Moseseʼe Eloniʼeʼmo aliʼna anateteʼnaeʼmo nagaemo Isipi kotegamo muki agufa kavatetiʼmo Isipi vayaʼmo alagi hanageke yaʼmo apamiʼnove. Nagaemo henagaʼamo lapakaemo lapavaleliʼna eʼnogetapaeʼmo Isipi koʼmo ataleʼnae.

⁶ Inagi nagaemo afotapimogimo apavaleliʼna eʼnogeʼapaeʼmo Isipi koʼmo ataleʼa eʼnae. Eʼnageʼapaeʼmo Isipi vayaʼmogimo kame hapaesayafeʼmo talalaʼapimo alige hosiʼapimo apavalege huteʼa afotapimogimo apavegala aeliʼa Haesa solovalategamo eʼnae.

⁷ Afotapimogimo koli huteʼapaeʼmo nagaemo hapa maesuvafeʼmo lokiya vaiʼa keya aeʼa ge huʼnageʼnaeʼmo nagaemo apakaeʼe Isipi ati vayaʼmogi folagapiʼeʼmo haniʼmo hisiya kavaʼmo Isipi vayaʼaitegamo solovala anitegamo huʼnove. Huteʼna alagi aliʼna aeʼna apati kaeʼnove. Lapakaemo Isipi vayaʼaitegamo huʼnova kavaʼmo ago ageʼnae. Inagi lapakaemo yatala afinaʼmo kaʼme kotegamo umenitata huʼnae.

⁸ Nagaemo lapavaleliʼna Emo vayaʼmogi mopaleʼmo yegemo haine neʼeya haopalegamo Yoneni aniʼmo mugagayaga faliga koteʼmo uʼnogeʼapaeʼmo lapakaeʼeʼmo kamemo huʼnayaʼmonanafa nagaemo lapa maeʼnogetapaeʼmo apakaeʼeʼmo kame hutapa aeta apaka seʼnae. Lapakaemo mopaʼapimo alisayafeʼmo apavaleʼna lapayapiʼmo apateteʼnaeʼmo uʼna hogoteteʼna aliʼna hano huʼna apataleʼnove.

⁹ Henagaʼamo Melakiʼmo Yipo mafaʼnemo Movapu vayaʼmogi kini vekamoʼmo lapakaemo Isaleli vayaʼeʼmo kamemo hisiyafeʼmo alo hugefeʼmo Melamiʼmo Miyo mafaʼneeʼmo keya aeʼnigeno eno maiʼnigenoʼaeʼmo, Melakiʼmo hunoʼaeʼmo, Isaleli vayaʼmo lifana huka apato, huno ha paiʼniye.

¹⁰ Ha paiʼniyaʼmonanafa nagaemo Ala kava neʼmoʼnamo Melamiʼmo huʼniya hosu geʼamo oʼafiʼnovaʼmofeʼmo magoʼe huno alino auleno lapateʼniye. Nagaemo ani kavatetiʼmo Melaki ayapatiʼmo lapakufamo aliʼna katiʼna lapateʼnove.

¹¹ Lapakaemo Yoneni aniʼmo lakaetapa eta Yeliko taonifiʼmo avaʼyi huʼnageʼapaeʼmo Yeliko vayaʼmogimo lapakaeʼeʼmo kame huʼnae. Yeliko vayanagi Emo vayanagi Pelesi vayanagi Kenani vayanagi Hiti vayanagi Gagasi vayanagi Haivi vayanagi Yemusi vayanagi huʼa lapakaeʼeʼmo kame hugefeʼmo huʼnayaʼmonanafa nagaemo apavaleʼna lapayapiʼmo apateʼnogetapa kame hutapa aeta apaka seʼnae.

¹² Nagaemo avi lumemo aliʼna apateʼnogeʼa lapakaeteʼmo uʼa hogoteteʼa kame vayatapimo hapa faiʼa aeteʼa apateme apateme uʼa apataleʼnae. Lole Emo kini vekalaʼmo ani kavatetiʼmo lapakaetegatiʼmo ataleʼana anaune heʼnaʼae. Lapakaemo lokiyatapiletinagi naipetapiletinagi atitapiletinagi hutapa hana faitapa oʼanataleʼnae.

¹³ Nagaemo mago mopamo lapakaitapimo aliʼyaʼmo oʼaliʼnaya mopamo lapamiʼnove. Nagaemo lapakaemo okiʼnaya taonimo lapamiʼnove. Hemenimo lapakaemo ani taonifiʼmo maiʼnetapaeʼmo lapakaemo lapayapatiʼmo ofaiʼnaya nofi alagafati aniʼe olivi yosa alagaʼeʼmo neʼnae.

Yasuvaʼa Isaleli vayaʼaifeʼmo, Lapakaemo akame hisaya Gotiʼa lekana paita atetetapa akame hiyo, huno hapa paiʼniya gemae

¹⁴ Inagi Ala kava nefeʼmo koli hutetapa aigofe kavaʼmo osutapa lapaipafatiʼmo alagi lama ge kavaʼmo hutapa aliʼyaʼamo aliyo. Lapakinago vayaʼmogimo Yufaletisi aniʼmo mugagayaga faliga maiʼnayategaʼe Isipi kotegaʼeʼmo aigofe gotigitefeʼmo aliʼyaʼapimo aliʼnae. Lapakaemo ani aigofe gotigimo alita ataletetapa Ala kava nekeʼmo akame hutapa aliʼyaʼamo aliyo.

¹⁵ Lapakaemo Ala kava neʼmo akame hisayafeʼmo olapauʼnisiyana apakame hisaya gotigimo hemenimo lekana paiyo. Lapakaemo lapakinago vayaʼmogi Yufaleti aniʼmo mugagayaga faliga maiʼneʼapaeʼmo aigofe gotigimo apakame huʼnaya gotigimo apakame hisafi hemenimo lapakaemo Emo vayaʼmogi mopaʼapileʼmo maiʼnetapaeʼmo Emo vayaʼmogi gotiʼapimogimo apakame hugae. Lagaetefeʼmo nagaiʼniʼe afamo anagaʼniʼeʼmo lagaemo Ala kava nekeʼmo akame huta aliʼyaʼamo aligune

¹⁶ Isaleli vayaʼmogimo geʼaleʼmo aeʼa atagaina huʼa huʼapaeʼmo, Alu gotigimo apakame hisunafeʼmo Ala kava neʼmo alagi oʼatalegaune. Alagi haʼao, huʼa,

¹⁷ Ala kava neʼmo magokeʼageʼmo lagaemo Gotitimoʼmogeno lagaeʼe afotimogiʼeʼmo Isipi vayaʼmogi kalavusi aliʼyaʼapifatiʼmo lagufamo alino katino lateteno lavalelino eʼniye. Agaemo laulagaleʼmo alopa noʼagona agufa lokiya aune kavaʼmo ago huge alu nofi vayaʼmogi mopaleʼmo uʼnona afinaʼe haiya vayaʼmogi haopalegamo uʼnona afinaʼeʼmo alagepa huno yagaino latege huʼniye.

¹⁸ Ala kava neʼmoʼa laulagaleʼmo muki maiʼnaya vayaʼmo alino hapa faino apataleʼniye. He, Emo nofi vayaʼeʼmo mani mopaleʼmo maiʼnaya vayaʼmo alino hapa faino apataleʼniye. Ala kava neʼmo Gotitimoʼmo maiʼniyaʼmofeʼmo lagaeʼeʼmo akame huta aliʼyaʼamo afaʼa aligune, huʼa ha paiʼnae.

¹⁹ Ani gemo huʼa ha paiʼnayaʼmonanafa Yasuvaʼa ina gemo huno hapa paiʼniye. Ala kava neʼmo alagi aote vekamo maiʼniyaʼmofeʼmo haiya kava hutapa akame hugae. Agaemo kaino nefaiya Gotiʼa maiʼniyaʼmofeʼmo ataletapa visayana hosu kavatapiʼe geʼamo amagitapa atalesaya kavatapiʼeʼmo alino oʼatalegaiye.

²⁰ Ala kava neʼmoʼa alagepa huno lapa maeʼniyaʼmonanafa lapakaemo ataletapa malaga vayaʼmogi gotiʼapimogimo apakame hisagenoʼaeʼmo kayoʼmo lapamiteno alino hano huno lapatalegaiye, huno hapa paiʼniye.

²¹ Hapa paiʼnigeʼapaeʼmo, Alagi haʼao. Lagaemo aigofe gotigimo apakame osuta Ala kava nekeʼmo akame hugune, huʼa ha paiʼnae.

²² Yasuvaʼa apakaefeʼmo hapa painoʼaeʼmo, Lapakaitapimo Ala kava neʼmo akame hugune, hutapa huʼnayaʼmofeʼmo ani kavatefeʼmo vitanisi vayaʼmo maiʼnae, huno hapa paiʼnigeʼapaeʼmo, He, ani kavatefeʼmo vitanisi vayaʼmo maiʼnone, huʼa ha paiʼnae.

²³ Inagi Yasuvaʼa ina gemo hunoʼaeʼmo, Huʼnayaʼmofeʼmo alu nofi vayaʼmogi aigofe gotiʼapimogi apauneʼamo lapakae folagapatiʼmo alita ataleyo. Ataletetapa lapaipamo alita afe letetapa Ala kava neʼmo Isaleli vayaʼmogita Gotitimoʼmo akame hiyo, huno huʼnigeʼapaeʼmo

²⁴ apakaemo Yasuvafeʼmo huʼapaeʼmo, Lagaemo Ala kava neʼmo Gotitimo aliyaʼamo alige avayafatiʼmo hisiya gemo afiteta akame huge huta maigune, huʼa ha paiʼnae.

²⁵ Inagi ani afinaʼmo Yasuvaʼa Sekemi taonifiʼmo vayaʼaʼeʼmo kotalakemo hu maletenoʼaeʼmo akame hisayafeʼmo keʼaepa gemo avoʼmo kaeno apamiʼniye.

²⁶ Yasuvaʼa ani gemo mago Goti keʼaepa geʼamo haneʼniya mukufiʼmo avoʼmo kae maleteno mago alopa yafaʼmo alino Ala kava netefeʼmo monoʼmo nehaya noʼmo haopaleʼmo haneʼniya yosamo agiʼamo Oki yosamo aepafiʼmo faino ateʼniye.

²⁷ Inagi Yasuvaʼa muki Isaleli vayaʼaifeʼmo ina gemo huno hapa painoʼaeʼmo, Ageyo, huno, Ani yafaʼmoʼa Ala kava neʼmoʼa muki laha paiʼniya geʼamo ago afiʼniyaʼmofemo ani yafaʼmoʼa vitanisi agufa gemo huno lapa paigiye. Lapakaemo ani yafaʼmo agetetapaeʼmo huʼnaya polomasi getapieʼmo lapakesamo afigae. Lapakaemo Gotitapimoʼmo lapakameʼyamo oʼamisayafeʼmo alagena yakana huno hanegaiye.

²⁸ Inagi Yasuvaʼa muki vayaʼmo apatalegeʼa halate koʼapilegamo uʼnae.

Yasuvaʼe Eliyesaʼeʼmo faliʼnaʼa gemae

²⁹ Ani kavaʼmohutageno Yasuvaʼmo Nani mafaʼnemo Ala kava neʼmo aliʼyaʼamo neʼaliya vekamo vani hataleti teniʼa kafugamo maiteno faliʼniye.

³⁰ Apakaemo agaiʼa koteʼmo Timanati Sila taonifi mopaleʼmo kiʼa ateʼnae. Ani taonimo Ifalemi vayaʼmogi aveleʼmo Geyasi avemo lamaga haopalegamo haneʼniye.

³¹ Yasuvaʼmo afaʼa maiʼniya afinaʼmo Isaleli vayaʼmogimo Ala kava neʼmo geʼamo akame huʼa aliʼyaʼamo aliʼnae. Yasuvaʼmo faliʼnigeʼapaeʼmo Ala kava neʼmoʼa Isaleli vayaʼmo hapa maeno aliʼyaʼamo aliʼniya kavaʼmo ageʼnaya Isaleli vayatama vayaʼmo maiʼnageʼapaeʼmo Isaleli vayaʼmogimo Ala kava neʼmo geʼamo akame huʼa aliʼyaʼamo aliʼnae.

³² Isaleli vayaʼmogimo Yosefe ayamufamo Isipi kotegatiʼmo aliniʼa eʼnaya ayamufamo Sekemi taonifiʼmo kiʼa ateʼnae. Akeyaʼvilagamo Yekopuʼa Hemo nofi vayaʼmogi mopamo vani hataleti siluva moniletiʼmo miya fai maleʼniya mopaleʼmo kiʼa ateʼnae. Hemo mafaʼnemo Sekemiʼae. Isaleli vayaʼmogimo kiʼa ateʼnaya mopaeʼmo Yosefe nofi vayaʼmogi mopae, huʼa huʼnae.

³³ Eliyesaʼmo Eloni mafaʼnemo faliʼnigeʼapaeʼmo Gimiya taonimo Finehasiʼmo Eliyesa mafaʼnemo amiʼnaya taonimo Ifalemi vayaʼmogi aveleʼmo haneʼniya taonifiʼmo kiʼa ateʼnae.