Yasuva 23 - The Keyagana NT and 25 OT books

Yasuvaʼmo falisiya kanaʼamo hogo huʼnigeno Isaleli vayaʼaifeʼmo henaga atupa gemo hapa paiʼniya gemae

¹ Ala kava neʼmoʼa alagepa afinaʼmo apamiʼnigeʼa Isaleli vayaʼmo kame osuʼa asole kafugamo alagepa huʼa maitagenoʼaeʼmo Yasuvaʼmo alagi ago kosuna leʼniye.

² Inagi Yasuvaʼa muki Isaleli vayaʼaifeʼmo ge huʼniye. Agaemo vayatama vayaʼaifenagi yagaiʼa neʼapataya vayaʼaifenagi agoti gemo neʼafiya vayaʼaifenagi aliʼyaʼmo neʼaliya vayaʼaiteʼmo yagaiʼa neʼapataya vayaʼaifenagi huno ge huʼnigeʼa eʼnageno ina gemo huno hapa painoʼaeʼmo, Hemenimo nagaemo ago kosunamo leʼnove.

³ Lapakaemo Ala kava neʼmo Gotitapimoʼmo lapakaetefeʼmo muki kavaʼamo ani kame nofi vayatapilegamo huʼniya kavaʼmo ago ageʼnae. Ala kava neʼmo Gotitapimoʼmo lapa maesiyafeʼmo kamemo huʼniye.

⁴ Hemenimo lapakaemo alagepa hutapa afiyo. Lagaemo muki nofi vayaʼmo kame huta ago aeta apaka seʼnona vayaʼmogi mopaʼe kame huta aeta oʼapaka seʼnona nofi vayaʼmogi mopaʼeʼmo nagaemo fako huʼna lapamisuvafeʼmo lapakaemo mago yaʼmo yaga au maleʼnetapa alita ageʼnae. Ani mopamo hakuʼmo yegemo haine neʼeya haopalegamo Yoneni anitetiʼmo aepa faiteno hanelino yegemo uno lamino nefaleya haopalega alopa Metaleniyani solovalategamo uʼniye.

⁵ Ala kava neʼmo Gotitapimoʼmo kame vayatapimo lapakaetegatiʼmo alino hapa faino apatalesigeʼa ataleʼa apaune hesaya kavaʼmo hugiye. Lapakaemo mopaʼapimo Gotiʼa polomasi gemo ago hu maleʼniya agufa kavaʼmo hutapa aligae.

⁶ Aligayaʼmofeʼmo koli osutapa lokiya vaitapa maiʼnetapa muki kavatefeʼmo Mosese keʼaepa gemo haneʼniya mukufiʼmo haneʼniya gemo akame hiyo. Goti kaʼamo ataletapa hoga haopalegamo oʼuge lamaga haopalegamo oʼuge hutetapa Goti kaʼalekeʼmo viyo.

⁷ Lapakae folagapiʼmo maiʼnaya nofi vayaʼeʼmo magokepiʼmo lokaetapa oʼmaige gotiʼapimogi apakiʼapimo oʼaege lapakaemo, ani kavaʼmo hugune, hutapa lapagoʼyamo ataletetapa ani gotigi apakiʼapimo oʼaege aliʼyaʼapimo oʼalige lapaleʼyamo faiʼnetapa apakaetefeʼmo monoʼmo osuge hiyo.

⁸ Osugayaʼmonanafa lapakaemo alagepa hutapa Ala kava neʼeʼmo magokepiʼmo lokaetapa maitetapa akame hume hume eta hemenimo akame nehaya agufa kavakeʼmo hiyo.

⁹ Ala kava neʼmoʼa asole lokiya nofi vayaʼmo lapakaetegatiʼmo alino hapa faino apataleʼnigeʼa afaʼa he tiʼa kame huʼa aeʼa lapaka osesaya kavaʼmo huʼniye.

¹⁰ Ala kava neʼmo Gotitapimoʼmo polomasi gemo huʼniya agufa kavaʼmo huno lapa maegaiyaʼmofeʼmo lapakaepatiʼmo magoke vekamoʼmo vani tauseniʼa vayaʼmo afaʼa hapa faino apatalegaiye.

¹¹ Lapakaitapileʼmo alagepa hutapa yagaitetapa Ala kava neʼmo Gotitapimofeʼmo lapau lapayamopafiʼmo lapaino.

^12-13 Lapakaemo halate atagi netapa uta alu nofi vayaʼmo logufaʼamo lapakaeʼeʼmo magokepiʼmo lokaeʼa maiʼnaya vayaʼmogi kavaʼmo hutapa aʼmafaʼneʼapimo alige aʼmafaʼnetapimo apamige hutetapa Goti geʼamo amagitapa atalesayana Ala kava neʼmo Gotitapimoʼmo magoʼe huno alino hapafaino oʼapatalegaiye. Apakaemo alagi kame vayatapimo afole aiteʼapaeʼmo lapakaetefeʼmo aneʼaifiʼmo nehaya yakana huʼa maige alopa keligana huʼa maige lapakufaleʼmo lapamagisaya nofi kayokana huʼa maige lapaulagafiʼmo faisiya nekayakana huʼa maige hugae. Ani kavatetiʼmo lahapaesagetapa mukiʼamo Ala kava neʼmo Gotitapimoʼmo ani alagepa mopamo lapamiʼniya mopaleʼmo oʼmaitapa ago faligae.

¹⁴ Afiyo, huno, Hemenimo nagaemo muki ma mopafi vayaʼmo visaya kateʼmo uguve. Lapakaemo mukiʼamogitapamo lapaipafatiʼe lapaunelapamepatiʼeʼmo ago afiʼnayana Ala kava neʼmo Gotitapimoʼmo muki alagepa yaʼmo lapamiguve, huno polomasi gemo hu maleʼniya yaʼmo lapamiʼniye. Agaemo muki kavafeʼmo huguve, huno polomasi geʼamo hu maleʼniya kavaʼmo ago afole aiʼnigeno magoke polomasi geʼamo afaʼa uno okasaeʼniye.

^15-16 Ala kava neʼmo Gotitapimoʼmo muki alagepa yaʼmo lapamiguve, huno polomasi gemo hu maleʼniya yaʼmo lapamiʼniya kava huno Ala kava neʼmo Gotitapimoʼmo kotalake geʼamo akame hiyo, huno lapa paiʼniya kotalake gemo amagitapa atalesayana agaemo muki hosu kayoʼmo lapamime lapamime uno alagi alino hano huno lapatalegaiye. Lapakaemo kotalake gemo amagitapa ataleteta utapa alu gotigimo apakame huge lapaleʼyamo faiʼnetapa monoʼmo huge hisagenoʼaeʼmo Ala kava neʼmoʼa aipamo leno lapatesigetapa ani alagepa mopamo lapamiʼniya mopaleʼmo oʼmaitapa muki vayaʼamo faligae.