Yasuva 22 - The Keyagana NT and 25 OT books

Yasuvaʼa yegemo haine neʼeya haopalega maiʼnaya Isaleli vayaʼmo alino apateʼnigeʼa noʼapilegamo atagineʼa eʼnaya gemae

¹ Inagi Yasuvaʼa Lumeni nofi vayaʼaifenagi Gati nofi vayaʼaifenagi Manasa vayapati magokayaga nofi vayaʼaifenagi huno ge huʼnigeʼa eʼa aliʼa anupa huʼnae.

² Agaemo ina gemo huno hapa painoʼaeʼmo, Lapakaemo Ala kava neʼmo aliʼyaʼamo neʼaliya vekamo Moseseʼmo muki lapa paiʼniya gemo alagi ago akame hutapa hano huʼnae. Ani kavaʼmo hutapa muki geʼnimo akame huʼnae.

³ Lapakaemo yatala afinaʼmo konagatapimo oʼapataletapa hapa maeme hapa maeme etapa hemenimo maiʼnae. Ala kava neʼmo Gotitapimoʼmo akame hiyo, huno huʼniya gemo akame huʼnae.

⁴ Hemenimo Ala kava neʼmo Gotitapimoʼmo polomasi gemo huʼniya agufa kavaʼmo huno konagatapimogimo alagepa afinaʼmo apamiʼnigeʼa kame osuʼa afaʼa maiʼa haga leʼnae. Inagi lapakaemo Ala kava neʼmo aliʼyaʼamo neʼaliya vekamo Moseseʼmo Yoneni aniʼmo mugagayaga faliga lapamiʼniya mopaleʼmo seli notapilegamo halate atagi netapa viyo.

⁵ Uta maigayaʼmonanafa Ala kava neʼmo aliʼyaʼamo neʼaliya vekamo Moseseʼmo hiyo, huno lapa paiʼniya geʼe Goti keʼaepa geʼeʼmo alagepa hutapa afitetapa akame hiyo. Lapakaemo Ala kava neʼmo Gotitapimofeʼmo lapau lapayamopafi lapauge kaʼaleʼmo oʼataletapa hauʼniya kateʼmo umenitata huge keʼaepa geʼamo akame huge atafautapa alagi huge muki lahapauʼniya yapatiʼe lapaipa lapakesafatiʼenagi hutapa aliʼyaʼamo aliyo, huno hapa paiʼniye.

⁶ Yasuvaʼa ina kava huno aulena gemo hapa paiteno alino apateʼnigeʼa seli noʼapilegamo uʼnae.

⁷ Hogoteno Moseseʼmo Mesani kotegamo Manasa nofi vayapatiʼmo magokayaga nofi vayaʼamo mopamo apamiʼniyaʼmonanafa yegemo uno lamino nefaleya haopalegamo magokayaga alu Manasa nofi vayaʼamo Yoneni aniʼmo malaga mopamo apamiʼniye. Inagi Yasuvaʼa ani kotegamo alino apatetenoʼaeʼmo aulena gemo hapa paitenoʼaeʼmo,

⁸ Lapakaemo kame hutetapa kame vayatapimogi kagemiyaʼmo aliʼnae. Lapakaemo ani kagemiyaʼmo asole alagepa yanagi asole pulumakagi siluva yafanagi goli yafanagi haesa aeni yafanagi afa aeni yafanagi asole kukena yanagi hutapa alinitapa viyo. Lapakaemo uta avaʼyi hutetapaeʼmo kame vayatapimogi yapatiʼmo alita fako hutapa konagatapimogimo apamiyo, huno hapa paiʼniye.

⁹ Inagi apakaemo Lumeni nofi vayanagi Gati nofi vayanagi Manasa vayapatiʼmo magokayaga nofi vayanagi huʼa Isaleli vayaʼapimo apataleʼa halate koʼapilegamo atagineʼa uʼnae. Apakaemo Kenani kotega Sailo taonifiʼmo maiʼnaya vayaʼapimo apataleʼa Ala kava neʼmoʼa Mosesetetiʼmo apamiʼniya Giliyati kotega mopaleʼmo uʼnae.

Apakaemo uʼa Yoneni aniʼmo haopaleʼmo ofalini hisaya yafa hiʼyalamuʼmo huʼnaya gemae

¹⁰ Apakaemo uʼa Kenani koteʼmo Yoneni aniʼmo haopaleʼmo Lumeni nofi vayanagi Gati nofi vayanagi Manasa vayapati magokayaga nofi vayanagi huʼa uʼa avaʼyi huteʼa mago alopa kanale ofalini hisaya yafa hiʼyalamuʼmo huʼnae.

¹¹ Inagi mago vayaʼmogimo uʼa Isaleli vayaʼaifeʼmo hapa paiʼapaeʼmo, Afiyo, huʼa, Lumeni vayanagi Gati vayanagi Manasa vayapati magokayaga nofi vayanagi huʼa Yoneni aniʼmo mugagayaga ani haigifiʼmo mago yafa hiʼyalamuʼmo ago hu maleʼnae, huʼa hapa paiʼnae.

¹² Isaleli vayaʼmogi ani gemo afiteʼapaeʼmo apakaeʼeʼmo kamemo hisayafeʼmo muki vayaʼmo eʼa Sailo taonifiʼmo aliʼa anupa huʼnae.

¹³ Inagi Isaleli vayaʼmogi Eliyesa mafaʼnemo Finehasiʼmo mono huno neʼapateya vekamo aliʼa atageno Giliyati kotegamo Lumeni nofi vayaʼaitegagi Gati nofi vayaʼaitegagi Manasa vayapati magokayaga nofi vayaʼaitegagi huno uʼniye.

¹⁴ Yagaiʼa apateʼnaya vayaʼmo naya loleʼa vayaʼmogi Finehasiʼmo avagi huʼa uʼnae. Apakaemo ani vayaʼmo naya loleʼa Isaleli nofi vayapatiʼmo apakaiʼapi afamo anaga nofi vayaʼaiteʼmo yagaiʼa neʼapataya vayaʼmae.

¹⁵ Apakaemo Giliyati kotega uʼa avaʼyi huteʼapaeʼmo Lumeni nofi vayaʼaifenagi Gati nofi vayaʼaifenagi Manasa vayapati magokayaga nofi vayaʼaifenagi huʼa ina ge huʼa hapa paiʼnae.

¹⁶ Muki Ala kava neʼmo vayaʼamogimo ge huʼa lapafi geʼnae. Lapakaemo na agufa kavaʼmo higetapaeʼmo ani hosu kavaʼmo Isaleli vayaʼmogi Gotiʼapimotegamo huʼnae. Hemenimo lapakaemo Ala kava neʼmo akame osutapa ataleʼnae. Ala kava neʼmo geʼamo amagitapa atalesayafeʼmo ani ofalini hisaya yafa hiʼyalamuʼmo lapakaitapilefeʼmo huʼnafiye.

¹⁷ Akeyaʼvilagamo lagaemo Piyo kotegamo alopa hosu kavaʼmo huʼnonagenoʼaeʼmo Ala kava neʼmoʼa alopa kaitaʼmo lamiʼnigeta asole vayaʼmo faliʼnone. Ani hosu kavatimo aeno kalo paeno oʼataleʼnigeno hano osuno lagae folagapiʼmo haneme haneme eno hemeniʼeʼmo afaʼageʼmo haneʼniye. Ani hosu kavafekeʼmo haine, hutapa osuʼnafa magoʼe hosu kavakeʼmo huʼnafiye.

¹⁸ Hemenimo lapakaemo Ala kava neʼmo geʼamo amagitapa atalesayana egamo muki Isaleli vayaʼmogitaeʼmo aipamo leno lategaiye.

¹⁹ Mopatapimo aote mopamo ohaneʼnisiyaʼmoʼmo lapakaemo mopatapimo ataleta aniʼmo lakaeta eta lagae mopamo folagapiʼmo Ala kava neʼmo seli mono noʼamo haneʼniya mopamo aligae. Aligayaʼmonanafa Ala kava netefeʼmo magoʼe hutapa lapakaitapilefeʼmo yafa hiʼyalamuʼmo osiyo. Fiku yanagetapa Ala kava neʼmo geʼamo amagitapa ataletetapa getimo amagitapa atalegae.

²⁰ Ekaniʼmo Yila mafaʼnemoʼmo Ala kava neʼmoʼa lifana hu maleʼniya yatetiʼmo hosu kavaʼmo huʼnigeno Ala kava neʼmoʼa mukiʼamogitaeʼmo aipamo leno lateʼnigeʼa mago Isaleli vayaʼe agaeʼeʼmo faliʼnae. Agaiʼageʼmo ofaliʼniye, huʼa hapa paiʼnae.

²¹ Inagi Lumeni nofi vayanagi Gati nofi vayanagi Manasa vayapati magokayaga nofi vayanagi huʼa Isaleli afamo anaga nofi vayaʼaiteʼmo yagaiʼa neʼapataya vayaʼmogi geʼapileʼmo ina ge huʼa aeʼa atagaina huʼnae.

²² Lokiyaʼamo haneʼniya Gotiʼa magokeʼageʼmo Ala kava neʼmoʼa muki gotigiteʼmo yagaino neʼapateya Gotiʼa huʼnona kavaʼmo aepaʼamo ago ageʼniye. Lapakaeʼeʼmo afaʼa agegae. Lagaemo Ala kava neʼmo geʼamo amagita ataleteta kotalake gemo ataleʼnisunaʼmoʼmo lapakaemo laha oʼmaetapa kamitimo lahaegae.

²³ Lagaemo Ala kava neʼmo atalesunafeʼmo lagaiti ofalini yafa hiʼyalamuʼmo huteta atafiʼmo kaesunageno alagi leno saga lisiya ofalinimo kaesupi viti ofalinimo kaesupi Gotiʼeʼmo magoke laipamo hanesiya ofalinimo ani hiʼyalamuteʼmo malesupi nehisunaʼmoʼmo Ala kava neʼmoʼa agaiʼamo agoti huno lategaiye.

^24-25 Lagaemo lagesa afitaeʼmo, Henagaʼamo lapakinago vayaʼmogimo laginago vayaʼaifeʼmo huʼapaeʼmo, Na agufa kava higetapaeʼmo Ala kava neʼmo Isaleli vayaʼmogita Gotitimofeʼmo monoʼmo nehae. Ala kava neʼmoʼa Yoneni anitetiʼmo hakugana huno lagae folagapiʼe lapakaemo Lumeni vayaʼe Gati vayaʼmogitapa folagapiʼeʼmo haneʼniyaʼmofeʼmo lapakaemo Ala kava neʼmo Gotitapimoʼmo oʼmaiʼniye, huʼa hisaya geeʼmo koli huʼnone. Fiku yanageʼa lapakinago vayaʼmogi laginago vayaʼmo aliʼa he tiʼa apatesageʼa ala kava nefeʼmo magoʼe huʼa koli osuʼa atalegae.

^26-27 Koli hutetaeʼmo ina gemo huʼnone, Lagaemo alo huteta yafa hiʼyalamuʼmo hugune. Ani hiʼyalamuteʼmo ofalini yaʼmo okaege afumo amagita Gotina oʼamige hisunageno mago alagena yaʼmogenoʼa lagaeʼe lapakaeʼenagi afole aisaya laginago vayaʼaitefenagi huno faigoko gemo hugiye. Lagaemo Ala kava nefeʼmo mono nehutaeʼmo ofalini yaʼmo kaege afumo amagige Gotiʼeʼmo magoke laipamo hanesiya ofalinimo amige hisunageʼapaeʼmo henagaʼamo lapakinago vayaʼmogi huʼapaeʼmo, Ala kava netimo Gotitapimoʼmo oʼmaiʼniye, huʼa laha opaisayafeʼmae.

²⁸ Henagaʼamo ani agufa gemo huʼa laha paisafi afole aisaya laginago vayaʼaifeʼmo hapa paisafi huta ina gemo huta hapa paigune. Ageyo, huta, afotimogimo hu maleʼnaya ofalini yafa hiʼyalamuʼmoʼa Ala kava neʼmo ofalini yafa hiʼyalamukana huno haneʼniye. Ani hiʼyalamuteʼmo ofalini yaʼmo kaege afumo amagige hisunafeʼmo osuʼnopa haneʼneno vitanisimo huno laha paige lapa paige hisiyafeʼmae.

²⁹ Lagaemo Ala kava neʼmo geʼamo amagita ataleteta hemenimo Ala kava neʼmo ataleta mani yafa hiʼyalamuteʼmo ofalini yaʼmo kaege viti ofalinimo amige afumo amagige osugune. Alagi osugune. Lagaemo Ala kava neʼmo Gotitimo yafa hiʼyalamuʼamo seli mono noʼamo aulagamo haneʼniya hiʼyalamuteʼmo mono hugunaʼmonanafa alita alu kavaʼmo hisunafeʼmo lagesamo oʼafiʼnone, huʼa hapa paiʼnae.

³⁰ Inagi mono huno neʼapateya vekamo Finehasiʼe Isaleli nofi vayaʼaiteʼmo yagaiʼa neʼapataya vayaʼmo avagi huʼa uʼnaya vayaʼmogiʼeʼmo Lumeni nofi vayaʼmogimogi Gati nofi vayaʼmogimogi Manasa vayapati magokayaga nofi vayaʼmogimogi huʼa ani huʼnaya gemo afiteʼapaeʼmo amuse huʼa apateʼnae.

³¹ Inagi Finehasiʼmo Eliyesa mafaʼnemo mono huno neʼapateya vekamoʼmo ina ge huno Lumeni nofi vayaʼaifenagi Gati nofi vayaʼaifenagi Manasa vayapati magokayaga nofi vayaʼaifenagi huno hapa painoʼaeʼmo, Lapakaemo Ala kava neʼmo ataletetapa geʼamo amagitapa oʼataleʼnayaʼmofeʼmo hemenimo afiʼnonana Ala kava neʼmo lagaeʼeʼmo magokepiʼmo lokaeno maiʼniye, huta ago afiʼnone. Lapakaemo Ala kava neʼmoʼa Isaleli vayaʼmo kayoʼmo oʼapamisiyafeʼmo apakufamo alita katitapa apateʼnae.

³² Inagi mono huno neʼapateya vekamo Eliyesa mafaʼnemo Finehasiʼe yagaiʼa neʼapataya vayaʼeʼmo Lumeni nofi vayaʼe Gati nofi vayaʼeʼmo Giliyati kotegamo apataleʼa aiʼa atagineʼa eʼa Kenani kotegamo avaʼyi huteʼa Isaleli vayaʼaifeʼmo afole aiʼniya kavafeʼmo ava gemo huʼa hapa paiʼnae.

³³ Isaleli vayaʼmogimo afiteʼapaeʼmo amuse huteʼa Goti agiʼaleʼmo aliʼa asaga huʼa ateʼnae. Apakaemo huʼapaeʼmo, Lagaemo Lumeni vayaʼe Gati vayaʼeʼmo kamemo huteta ani maiʼnaya haopalega mopamo alita hosu huta atalegaune, huʼa huʼnaya agufa gemo magoʼe huʼa osuʼnae.

³⁴ Lumeni vayaʼe Gati vayaʼmogiʼeʼmo ani ofalini yafa hiʼyalamufeʼmo agi aeʼapaeʼmo, Vitanisi yafa hiʼyalamune, huʼa agi aeʼnae. Huʼapaeʼmo, Ani yafa hiʼyalamuʼmoʼa mukiʼamogitaeʼmo, Ala kava neʼmo magokeʼageʼmo Gotiʼmo maiʼniye, huno vitanisi gemo huno laha nepaiye.