Yasuva 21 - The Keyagana NT and 25 OT books

Isaleli vayaʼmogimo Livai vayaʼmo taonimo apamiʼnaya gemae

¹ Livai nofi vayaʼmogi afamo anaga vayaʼaiteʼmo yagaiʼa apateʼnaya vayaʼmo eʼa mono huno neʼapateya vekamo Eliyesaʼagi Yasuvaʼmo Nani mafaʼnegi Isaleli nofi vayaʼaiteʼmo yagaiʼa neʼapataya vayaʼenagi huʼa maiʼnayategamo eʼa maiʼnae.

² Apakaemo Sailo taonifiʼmo Kenani koteʼmo aliʼa anupa huʼa apateʼneʼapaeʼmo ina gemo huʼa hapa paiʼnae. Ala kava neʼmoʼa Mosese avayafatiʼmo lagaefeʼmo gemo hunoʼaeʼmo, Lapakaemo Livai vayaʼmo taoniʼapiʼe taoniʼapimo haopaleʼmo kahaumo haneʼnisigeʼa pulumaka anagaʼapimogiʼmo nesaya mopaʼeʼmo apamiyo, huno huʼniye, huʼa hapa paiʼnae.

³ Inagi Isaleli vayaʼmogimo Ala kava neʼmo geʼamo akame huʼa apakae mopafatiʼmo Livai vayaʼmo muki taoniʼapiʼe taoniʼapimo haopaleʼmo haneʼniya mopaʼeʼmo apamiʼnae.

⁴ Apakaemo mago yaʼmo yaga au maleʼneʼa aliʼa ageteʼapaeʼmo ani kavatefeʼmo Kohati afamo anaga nofi vayaʼmo mopamo apamiʼnae. Kohati vayapatiʼmo mono huno neʼapateya vekamo Eloni nofi vayaʼamogimo Yuta nofi vayaʼmogi mopalenagi Simeyoni nofi vayaʼmogi mopalenagi Menisameni nofi vayaʼmogi mopalenagi huno haneʼniya tetiniʼa taonimo apamiʼnae.

⁵ Apakaemo halate mago yaʼmo yaga au maleʼneʼa aliʼa ageteʼapaeʼmo alu Kohati nofi vayaʼmo Ifalemi nofi vayaʼmogi mopalenagi Neni nofi vayaʼmogi mopalenagi Manasa vayapati magokayaga nofi vayaʼmogi mopalenagi huno haneʼniya teniʼa taonimo apamiʼnae.

⁶ Apakaemo halate mago yaʼmo yaga au maleʼneʼa aliʼa ageteʼapaeʼmo ani kavatefeʼmo Geyani nofi vayaʼmo Isaka nofi vayaʼmogi mopalenagi Asa nofi vayaʼmogi mopalenagi Manasa vayapati magokayaga nofi vayaʼmogi Mesani mopalenagi huno haneʼniya tetiniʼa taonimo apamiʼnae.

⁷ Milelai nofi vayaʼmo afamo anagaʼaʼe anagaʼaʼeʼmo Lumeni nofi vayaʼmogi mopalenagi Gati nofi vayaʼmogi mopalenagi Yemulani nofi vayaʼmogi mopalenagi huno haneʼniya tetiniʼa taoniʼmo apamiʼnae.

⁸ Isaleli vayaʼmogimo ani kavaʼmo Ala kava neʼmoʼa Mosese avayafatiʼmo hapa paiʼniya gemo akame huʼa mago yaʼmo yaga au maleʼneʼa aliʼa ageteʼapaeʼmo Livai vayaʼmo ani taoniʼe haopaleʼmo haneʼniya mopaʼeʼmo apamiʼnae.

^9-10 Isaleli vayaʼmogimo Yuta nofi vayaʼmogi mopaleʼmo haneʼniya taoniʼe Simeyoni nofi vayaʼmogi mopaleʼmo haneʼniya taoniʼeʼmo Livai nofi vayapatiʼmo Kohati nofi vayaʼmo Eloni afamo anaga vayaʼmo taoniʼapimo hogoteʼa mago yaʼmo yaga au maleʼneʼa aliʼa ageteʼapaeʼmo apamiʼnae. Apakaemo agiʼamo ago aeʼnaya taonimo apamiʼnae.

¹¹ Apakaemo Eloni nofi vayaʼmo Kaliyati Ama taonimo alu agiʼamo Hipaloni taoniʼe haopaleʼmo haneʼniya mopaʼeʼmo apamiʼnae. Amaʼmo Enaki afoʼamoʼmae. Hipaloni taonimo Yuta vayaʼmogi ave koteʼmo haneʼniye.

¹² Apamiʼnayaʼmonanafa apakaemo Hipaloni taonimo haopaleʼmo haneʼniya mopaʼe taoniʼaʼeʼmo Kelepiʼmo Yefane mafaʼnemo hetamaʼamo amiʼnae.

^13-16 Apakaemo ani kava huʼa mono huno neʼapateya vekamo Eloni afamo anagaʼamo Hipaloni taoniʼe haopaleʼmo haneʼniya mopaʼeʼmo apamiʼnae. Hipaloni taonimo fiku kamitimo apamagiʼnaya vayaʼmo apaune hetaleʼa uʼa fala kisaya taonimo apamiʼnae. Apamiteʼa Limana taonigi haopaleʼmo haneʼniya mopagi Yata taonigi haopaleʼmo haneʼniya mopagi Esitemova taonigi haopaleʼmo haneʼniya mopagi Holani taonigi Nimi taonigi Eyini taonigi Yuta taonigi Metisimesi taonigi ani muki naeniʼa taonimo haopaleʼmo haneʼniya mopaʼenagi huʼa apamiʼnae. Yuta nofi vayaʼmogiʼe Simeyoni nofi vayaʼmogiʼeʼmo aliʼnaya mopafatiʼmo apamiʼnae.

^17-19 Menisameni nofi vayaʼmogi aliʼnaya mopaleʼmo haneʼniya Gimeyoni taonigi Gima taonigi Anatoti taonigi Alimoni taonigi muki ani taoniʼamo haopaleʼmo haneʼniya mopaʼenagi huʼa loleʼe loleʼe taonimo apamiʼnae. Eloni mafaʼne anagapatiʼmo mono huʼa neʼapataya vayaʼmogi tetiniʼa taoniʼe haopaleʼmo haneʼniya mopaʼeʼmo aliʼnae.

^20-22 Mago yaʼmo yaga au maleʼneʼa aliʼa ageteʼapaeʼmo Livai nofi vayapatiʼmo alu Kohati nofi vayaʼmogimo Ifalemi nofi vayaʼmogi mopaleʼmo mago haneʼniya taoniʼamo apamiʼnae. Ifalemi nofi vayaʼmogi aveleʼmo haneʼniya Sikemu taonifiʼmo fikumo kamiti apamagiʼnaya vayaʼmo apaune hetaleʼa uʼa fala kisaya taonigi Giya taonigi Kimiyaimi taonigi Metiholani taonigi huʼa apamiʼnae. Muki ani taoniʼe haopaleʼmo haneʼniya mopaʼeʼmo apamiʼnaya taonimo loleʼe loleʼe taonimo apamiʼnae. Loleʼe loleʼe taoniʼe haopaleʼmo haneʼniya mopaʼeʼmo apamiʼnae.

^23-25 Neni nofi vayaʼmogi mopaleʼmo loleʼe loleʼe taonimo Eliteki taonigi Gimetoni taonigi Eyaloni taonigi Gatilimoni taonigi huno haneʼnigeʼa apamiʼnae. Muki ani taoniʼe haopaleʼmo haneʼniya mopaʼeʼmo apamiʼnae. Manasa vayapatiʼmo magokayaga nofi vayaʼmogi mopaleʼmo Teyanaki taoniʼe Gatilimoni taoniʼeʼmo haneʼnigeʼa Kohati vayaʼmo apamiteʼa taonimo haopaleʼmo haneʼniya mopaʼeʼmo apamiʼnae.

²⁶ Inagi alu Kohati afamo anaga nofi vayaʼmo muki ani naya loleʼa taoniʼe haopaleʼmo haneʼniya mopaʼeʼmo apamiʼnae.

^27-33 Livai nofi vayapatiʼmo alu afamo anaga vayaʼmo Geyani nofi vayaʼmogimo lole taonilaʼmo apamiʼnae. Manasa vayapatiʼmo magokayaga alu nofi vayaʼmogi mopaleʼmo Mesani kotegamo haneʼniya taonimo Golani taonifiʼmo fikumo kamiti apamagiʼnaya vayaʼmo apaune hetaleʼa uʼa fala kisaya taoniʼe haopaleʼmo haneʼniya mopaʼeʼmo apamiʼnae. Apamiteʼa Me Esitela taoniʼe haopaleʼmo haneʼniya mopaʼeʼmo apamiʼnae. Apakaemo Isaka nofi vayaʼmogi mopaleʼmo haneʼniya taonimo Kisiyoni taonigi Namelati taonigi Yamati taonigi Eniganimi taonigi huʼa apamiʼnae. Muki ani taonimo haopaleʼmo haneʼniya mopaʼeʼmo apamiʼnae. Apakaemo Asa nofi vayaʼmogi mopafatiʼmo Maisali taonigi Aʼmana taonigi Helikati taonigi Lihopi taonigi huʼa apamiʼnae. Loleʼe loleʼe taoniʼe muki haopaleʼmo haneʼniya mopaʼeʼmo apamiʼnae. Apakaemo Geyani nofi vayaʼmogimo loleʼe magoʼe taonimo Nafatali nofi vayaʼmogi mopaleʼmo haneʼniya taonimo apamiʼnae. Apakaemo Galeliya kotegamo Kinesi taonifiʼmo fikumo kamiti apamagisaya vayaʼmo apaune hetaleʼa uʼa fala kisaya taonigi Hamotano taonigi Katani taonigi huʼa apamiʼnae. Muki ani taoniʼe haopaleʼmo haneʼniya mopaʼeʼmo apamiʼnae. Apakaemo Geyani afamo anaga vayaʼmogimo muki taoniʼamo tetiniʼa taoniʼe haopaleʼmo haneʼniya mopaʼeʼmo apamiʼnae.

^34-40 Mago yaʼmo yaga au maleʼneʼa aliʼa ageteʼapaeʼmo mago alu Livai nofi vayapatiʼmo Mileli afamo anaga vayaʼmogi Yemulani nofi vayaʼmogi aliʼnaya mopafatiʼmo loleʼe loleʼe taonimo Yakineyimu taonigi Kata taonigi Nimana taonigi Nehalali taonigi huʼa apamiʼnae. Ani taoniʼe haopaleʼmo haneʼniya mopaʼeʼmo apamiʼnae. Mileli afamo anaga vayaʼmogimo Lumeni nofi vayaʼmogi aliʼnaya mopaleʼmo haneʼniya taonimo loleʼe loleʼe taonimo Miye taonigi Yehasi taonigi Kenemoti taonigi Mefati taonigi huʼa apamiʼnae. Ani taoniʼe haopaleʼmo haneʼniya mopaʼeʼmo apamiʼnae. Apakaemo Gati nofi vayaʼmogi aliʼnaya mopaleʼmo haneʼniya taonimo loleʼeʼloleʼe taonimo Giliyati kotegamo Lemoti taonifiʼmo fikumo kamiti apamagisaya vayaʼmo apaune hetaleʼa uʼa fala kisaya taonigi Mehaneyimi taonigi Hesimoni taonigi Yiye taonigi huʼa apamiʼnae. Muki ani taoniʼe haopaleʼmo haneʼniya mopaʼeʼmo apamiʼnae. Inagi Melali afamo anaga vayaʼmogimo muki tuolofuʼa taonimo alagi apamiʼnae.

^41-42 Livai nofi vayaʼmogi Isaleli vayaʼmo aliʼnaya mopaleʼmo haneʼniya taonimo foti eitiʼa taonimo apamiʼnae. Muki magoke magoke taonimo haopaleʼmo haneʼniya mopaleʼmo pulumakaʼapiʼe sipisipiʼapiʼeʼmo apatesaya mopaʼeʼmo apamiʼnae.

Goti polomasi geʼamo alagi afole aiʼniye, huno huʼniya gemae

^43-45 Inagi Ala kava neʼmoʼa Isaleli vayaʼmogi apakinago vayaʼaifeʼmo agoʼyamo ataleno polomasi gemo huno hapa painoʼaeʼmo, muki mopamo lapamiguve, huno hapa paiʼniya mopamo ago apamiʼniye. Apakaemo muki ani mopamo aliteʼapaeʼmo ani mopaleʼmo alagi maiʼnae. Maiʼnagenoʼaeʼmo Ala kava neʼmoʼa alagepa afinaʼmo apamiʼnigeʼa kame osuʼa maiʼa haga leʼnae. Ala kava neʼmoʼa agoʼyamo ataleteno hapa paiʼniya kavaʼmo huno muki kame vayaʼapimo apavaleno apayapiʼmo apateʼnigeʼa kame huʼa alagi aeʼa apaka seʼnae. Ala kava neʼmoʼa ani kavaʼmo huguve, huno hapa paiʼniya polomasi gelefeʼmo muki ani kavaʼamo alagi ago huʼniye. Magoke geʼamo alagi asagauno oʼaiʼniye.