Yasuva 20 - The Keyagana NT and 25 OT books

Apakaepatiʼmo mago vayaʼmo fiku kamiti apamagiʼnisaya vayaʼmo uʼa afaʼa maisaya taonigoʼmo lekana pai maleʼnaya gemae

¹ Ala kava neʼmoʼa Yasuvafeʼmo ha painoʼaeʼmo,

² Kagaemo Isaleli vayaʼaifeʼmo ina ge huka hapa paiyo. Lapakaemo fikumo kamiti apamagiʼnisaya vayaʼmo apaune heʼa uʼa fala kiʼa maisaya taonigoʼmo lekana pai maleyo. Nagaemo Mosesetetiʼmo ani kavafeʼmo ago lapa paiʼnove.

³ Mago vekamoʼmo alu vekamo amagiguve, huno agesamo oʼafiʼniyaʼmonanafa fikumo kamiti amagiʼnisiya vekamo aune hetaleno uno mago ani agufa taonifilagamo uno haino afaʼa maisigeno kamitimo amagiʼniya vekamo anonaʼalefeʼmo amagigefeʼmo hisiya vekamoʼa afaʼa oʼamagigiye.

⁴ Amagiʼniya kavaʼmo anonaʼalefeʼmo amagisiyafeʼmo hauʼnisiya vekamoʼmo oʼamagisigeno ani taonifiʼmo afaʼa uno maigiye. Fikumo kamiti amagiʼniya vekamo aune hetaleno uno taonile yafa lafi kegiʼyamo kipateʼmo ani taonifi vayatama vayaʼaifeʼmo hapa painoʼaeʼmo, mago vekamo fikumo amagiʼnove, huno ava gemo huno hapa paisigeʼa afitesageno apakaeʼeʼmo magokepi lokaeno maisiyafeʼmo avaleliʼa uʼa haiʼa taonifilagamo ategae.

⁵ Anonaʼalefeʼmo amagisiyafeʼmo hauʼnisiya vekamoʼmo vegala aelino egaiyaʼmonanafa vayatama vayaʼmogimo avaleliʼeʼa oʼamigafa hau vaigae. Hogoteno kameʼamo oʼmaiʼnigeno aini huteno oʼamagiʼnifa fikumo amagiʼniyaʼmofeʼmae.

⁶ Agaemo ani taonifiʼmo maiʼnisigeʼapaeʼmo agoti huʼa ategae. Apakaemo huʼapaeʼmo, Agaemo kameʼamo oʼmaiʼnigeno aini huno ateteno oʼamagiʼniye, huʼa hisayaʼmoʼmo fikumo amagiʼniya vekamo ani taonifiʼmo maime maime neʼvisigenoʼaeʼmo hogote vekamo mono huno neʼapateya vekamo falisiya afinaʼmo agaemo aune heno uʼniya taonifatiʼmo ataleno halate uno noʼafiʼmo uno haino maigiye, huno ha paiʼniye.

⁷ Ani gemo afiteʼapaeʼmo inagi apakaemo Kiʼnesi taonimo Galeliya kotega Nafatali vayaʼmogi aveleʼmo haneʼniya taonimo lekana paige Sikemi taonimo Ifalemi vayaʼmogi aveleʼmo haneʼniya taonimo lekana paige Kayatama taonimo alu agiʼamo Himoni taonimo Yuta vayaʼmogi aveleʼmo haneʼniya taonimo lekana paige huʼnae.

⁸ Yoneni aniʼmo mugagayaga faliga yegemo haine neʼeya haopalega Yeliko taoni haopalega aveleʼmo hau huʼniya kaʼme otu koteʼmo Lumeni nofi vayaʼmogi mopaleʼmo Miye taonimo lekana paige Lemoti taonimo Giliyati kotega Gati nofi vayaʼmogi mopaleʼmo lekana paige Golani taonimo Mesani kotega Manasa nofi vayaʼmogi mopaleʼmo lekana paige huʼnae.

⁹ Muki ani taoniʼamo lekana paiʼnayanageʼa Isaleli vayapatiʼmofi alu kotega vayaʼmo eʼa apakaeʼeʼmo magokepi lokaeʼa maiʼnaya vayapatiʼmofi huno ina laʼmo mago vekamo fikumo kamiti amagiʼnisiya vekamo aune hetaleno uno ani agufa taonifilagamo uno haino afaʼa maigiye. Maisigeno anonaʼalefeʼmo kamitimo amagisiyafeʼmo avegala aelino eʼniya vekamoʼmo afaʼa oʼamagigiye. Agaemo maimemaime neʼvisigeʼapaeʼmo muki vayaʼmogimo agoti huʼa atesayafeʼmae.