Yasuva 2 - The Keyagana NT and 25 OT books

Yasuvaʼmo lole vekalaʼmo alino anateʼnigeʼana uʼana Yeliko taonimo ageʼana alagepa huʼnaʼa gemae

¹ Isaleli vayaʼmo Sitami kotegamo maiʼnagenoʼaeʼmo Nani mafaʼnemo Yasuvaʼmo lole vekalaʼanifeʼmo hana painoʼaeʼmo, Lanakaemo utana Yeliko taonifiʼe haopaleʼmo haneʼniya mopaʼeʼmo agetana alagepa hiʼao, huno hana paiteno alino anateʼnigeʼana uʼnaʼae. Uʼana mago kate a kanomo agiʼamo Lehapi noteʼmo avaʼyi huteʼana agae nopiʼmo maiʼnaʼae.

² Maiʼnaʼageʼapaeʼmo mago vayaʼmogimo Yeliko kote kini vekaeʼmo ina ge huʼa ha paiʼnae. Afiyo, huʼa, hemeni haniʼilagageʼmo mago Isaleli vekalaʼmo kagae koʼmo ageʼana alagepa hisaʼafeʼmo eʼana avaʼyi huʼnaʼae.

³ Yeliko kini vekamoʼmo ani gemo afitenoʼaeʼmo mago vayaʼmo alino apateʼnigeʼa uʼa Lehapifeʼmo huʼapaeʼmo, Kagae nopiʼmo eʼana maiʼnaʼa vekalaʼmoganimo mani koʼmo ageʼana alagepa hisaʼafeʼmo eʼnaʼae. Kagaemo anavalelika eno, huʼa ha paiʼnae.

⁴ Hogoteno Lehapiʼa lole vekalaʼmo anavalelino uno ago alino fala kino anateʼniyaʼmofeʼmo ina gemo huno hapa painoʼaeʼmo, He, huno, ani vekalaʼmo nagaetegamo eʼnaʼaʼmonanafa haiya kotegatiʼmo eʼnaʼafi huʼna oʼafiʼnove.

⁵ Inagi hani hugefeʼmo nehigeʼanaeʼmo taonifi yafa kegiʼyale kitamo nekiya kanaleʼmo ani haopalegatiʼmo ago ataleʼana uʼnaʼae. Nagaemo oʼanakeʼnovanageʼana haiyaʼalegamo uʼnisaʼafi lapakaemo malage hutapa anavegala aeʼao. Afaʼa anatafausaʼafi, huno hapa paiʼniye.

⁶ Ani gemo huno hapa paiʼniyaʼmonanafa agaemo ani lole vekalaʼmo anavalelino uno haino nokatoʼmulegamo kahaugana neʼya hayamo maleʼniya yapiʼmo fala kino anateʼniye.

⁷ Inagi Lehapiʼmo huʼniya gemo afiteʼapaeʼmo taonifatiʼmo ataleʼa uʼnageʼapaeʼmo taonile yafa kegiʼya kipateʼmo yagaiʼnaya vayaʼmogimo malage huʼa alopa kitamo kiʼnae. Apakaemo kahauya hume hume Yoneni aniʼmo lakaeʼa neʼvaya haopalegamo uʼnae.

^8-9 Lole Isaleli vekalaʼmo ohavaeʼnaʼagenoʼaeʼmo Lehapiʼmo nokatoʼmuleʼmo uno haino lole vekalaʼanifeʼmo hana painoʼaeʼmo, Nagaemo afiʼnovana Ala kava neʼmoʼa mani koʼmo lapakaemo Isaleli vayaʼmogitapa lapayapiʼmo ago alino lapamiʼniye. Lapakaefeʼmo kolitapimo nehuna kavaʼmo laipafiʼmo afole aiʼnigeta mukiʼamogitamo kame hisuna lokiyatimo ago hano huʼniye.

¹⁰ Lapakaemo Isipi kotegatiʼmo ataletapa eʼnaya afinaʼmo Ala kava neʼmoʼa lapa maeno haesa solovala aniteʼmo huʼnigeno hau huʼniya kavafeʼmo ava gemo ago afige lapakaemo Yoneni aniʼmo mugagayaga Emo nofi vayaʼmogi kini vekalaʼmo Sihoʼagi Agaʼagi ami vayaʼanigi hutapa kame hutetapa hapaeta hano huʼnaya kavafeʼmo ava gemo ago afige huʼnone.

¹¹ Lagaemo ani gemo afitetaeʼmo lapakaefeʼmo kolitapimo huʼnonagenoʼaeʼmo lokiyatimo alagi ohaneʼniye. Ala kava neʼmo Gotitapimoʼmo ma mopalenagi kokuʼnatenagi huno Gotiʼa maiʼniyaʼmofeʼmae.

¹² Inagi hemenimo lanakaemo Ala kava neʼmo agiʼaletiʼmo lanakoʼyamo ataletana lokiya gefatiʼmo hiʼao. Nagaemo lahana maeʼna alagepa huʼna yagaiʼna lanateʼnova agufa kavaʼmo hutana afamo anagaʼnimo hapa maetana alagepa hutana yagaitana apatesaʼafeʼmo hiʼao. Lanakaemo ani polomasi getanimo alitana lokiya vaitana atesaʼafeʼmo mago alagena yaʼmo namiʼao.

¹³ Isaleli vayaʼmogitapamo itaʼni afoʼnilaʼmoganimo ohanaege naganaʼnimogimo ohapaege nasaʼnimogimo ohapaege muki afamo anagatimo ohapaege hiyo.

¹⁴ Inagi anakaemo geʼaleʼmo aeʼana atagaina huʼanaeʼmo, Lapakaemo laʼagaemo huʼnoʼa kavafeʼmo vayatapieʼmo hapa opaisayana lapakaemo afaʼa maisayafeʼmo falisuʼa kavategatiʼmo afaʼa maiguʼae. Ala kava neʼmoʼa mani koʼmo alino lamisigetaeʼmo lapakaetegamo lama ge kavaʼmo yagu yaga huta hugune, huʼana ha paiʼnaʼae.

¹⁵ Lehapi noʼmo taonile yafa kegiʼyaleʼmo lokaeno haneʼnigeno yasi kaʼmo taonile kegiʼyalegamo haneʼniye. Haneʼniyaʼmofeʼmo Lehapiʼa mago nofiʼmo yasi katetiʼmo aetalegeno lamino kegiʼya malagamo mule kalale huno haneʼnigeʼana lole vekalaʼmo ani nofiteʼmo alime alime uʼana lamisaʼafeʼmo aeʼniye.

¹⁶ Agaemo lole vekalafeʼmo hunoʼaeʼmo, Lanakaemo utana avefilaga loleʼe magoʼe afinaʼmo fala kitana maiʼao. Fiku yanageʼa lanavegala aesaya vayaʼmogimo lanakegae. Apakaemo Yeliko taonifiʼmo eʼa haiʼetesagetanaeʼmo lanakaemo halate nofi vayatanilegamo ugaʼae.

^17-18 Lole vekalaʼmoganimo Lehapifeʼmo ha paiʼanaeʼmo, Lagaemo Isaleli vayaʼmo mani taonifiʼmo eta avaʼyi hisuna afinaʼmo kagaemo mani haesa nofiteʼmo alime alime utaʼa lamisuʼa nofiʼmo mani lamisuʼa yasi kateʼmo aeka oʼmalesanana laʼagoʼyamo ataletaʼa lokiya gemo huʼnoʼa gemo akame osuguʼae. Akame hisuʼafeʼmo kagaemo itaka afokalaʼmoganimogi konagakamogomogi muki afamo anagatapigi huka kagae nopiʼmo alika anupa huka apato.

¹⁹ Mago kanomo nopatiʼmo ataleno taoni kategamo neʼvisigeʼa agaemo kamiti haesageno falisiyaʼmoʼmo inagi ani kavaʼmo agaiʼageʼmo hisiya kavaʼmokeʼmae. Laʼagaemo hosu kavatiʼamo ohanegaiye. Hiyaʼmonanafa mago kanomo nopatiʼmo hosu yaʼmo alisiyaʼmoʼmo inagi laʼagaemo hosu kavatiʼamo hanegaiye.

²⁰ Hiyaʼmonanafa ehekae. Kagaemo laʼagaemo ani nehuʼa kavafeʼmo ava gemo huka hapa paisanaʼmoʼmo laʼagaemo laʼagoʼya ataletaʼa huʼnoʼa polomasi gemo alagi hano hugiye.

²¹ Lehapiʼa hunoʼaeʼmo, Lanakaemo haʼa gelefeʼmo kanalene, huʼna huve. Ani gemo hutenoʼaeʼmo alino anateʼnigeʼana uʼnaʼae. Utaʼagenoʼaeʼmo ani haesa nofiʼmo yasi kateʼmo ae maleʼniye.

²² Inagi ani lole vekalaʼmo avelegamo uʼana avaʼyi huteʼanaeʼmo loleʼe magoʼe afinaʼmo maiʼna ageʼapaeʼmo anavegala aeʼnaya vayaʼmo oʼanakeʼana ataleʼa Yeliko taonifiʼmo atagineʼa uʼnae. Anavegala aeʼnaya vayaʼmogi muki koteʼmo kahauya huliʼa uʼeʼa huʼnayaʼmonanafa oʼanakeʼnae.

²³ Inagi lole vekalaʼmo avefatiʼmo ataleʼana emiʼeʼana Yoneni aniʼmo lakaeʼana Nani mafaʼnemo Yasuvategamo uʼana avaʼyi huteʼanaeʼmo muki afole aiʼniya kavafeʼmo ha paiʼnaʼae.

²⁴ Anakaemo huʼanaeʼmo, Alagi lama gemo haneʼniyana Ala kava neʼmoʼa muki ani kotega mopamo ago alino layapiʼmo maleʼniye. Muki vayaʼamogimo lagaefeʼmo koli nehaya kavaʼmo apaipafiʼmo afole aiʼnigeno kame hisaya lokiyaʼapimo alagi ago hano huʼniye, huʼana ha paiʼnaʼae.