Yasuva 18 - The Keyagana NT and 25 OT books

Yasuvaʼa alu Isaleli vayaʼmo mopamo fako huno apamiʼniya gemae

¹ Isaleli vayaʼmogimo muki kotegamo kame huteʼa ago huʼa aeʼa apaka seteʼapaeʼmo muki Isaleli nofi vayaʼmo uʼa Sailo taonifiʼmo aliʼa anupa huteʼapaeʼmo Ala kava nefeʼmo mono nehaya seli mono noʼmo aliʼa he tiʼa ateʼnae.

² Isaleli vayapatiʼmo seveniʼa nofi vayaʼmogi mopaʼapimo oʼaliʼnae.

³ Inagi Yasuvaʼa Isaleli vayaʼaifeʼmo ina ge huno hapa paiʼniye. Na magi afinaʼmo afaʼa maiʼnetapaeʼmo Ala kava neʼmo lapakinago vayaʼmogi Gotiʼapimoʼmo lapamiʼniya mopaleʼmo uta oʼmaigae.

⁴ Muki magoke magoke nofi vayapatiʼmo loleʼe magoʼe vayaʼmo lekana paitapa apatete apatete hiyo. Inagi nagaemo aliʼna apatesugeʼa muki haopalegamo haneʼniya mopaleʼmo uʼeʼa huʼa apakaiʼapigeʼmo aligefeʼmo hisaya mopamo auneʼamo aliteʼa avoʼmo kaeʼa aliniʼa nagaetegamo egae.

⁵ Apakaemo ani mopamo fako hisagenoʼaeʼmo seveniʼa mopamo afole aigiye. Yuta nofi vayaʼmo hoga haopalegamo maisageʼa Yosefe nofi vayaʼmo lamaga haopalegamo maigae.

⁶ Apakaemo ani seveniʼa mopamo auneʼamo aliteʼa avoʼmo kaeʼa aliniʼa nagaetegamo egae. Nagaemo Ala kava neʼmo Gotitimo aulagaleʼmo mago yaʼmo yaga au maleʼneʼna aliʼna alisaya mopaeʼmo agegauve.

⁷ Lapakaemo mopamo aligayaʼmonanafa Livai nofi vayaʼmo Ala kava netefeʼmo mono huʼa neʼapataya vayaʼmo maiʼnayaʼmofeʼmo ani aliʼyaʼapigeʼmo hetamaʼapigana huno hanesigeʼa mopamo oʼaligae. Ala kava neʼmo aliʼyaʼamo neʼaliya vekamo Moseseʼmo Gati nofi vayanagi Lumeni nofi vayanagi Manasa nofi vayapatiʼmo magokayaga vayanagi huno mopamo Yoneni aniʼmo mugagayaga faligamo ago apamiʼniye, huno hapa paiʼniye.

⁸ Inagi Yasuva geʼamo afiteʼapaeʼmo visayafeʼmo he tiʼnagenoʼaeʼmo Yasuvaʼa uʼeʼa huʼa mopaʼmo auneʼamo avoʼmo kaesaya vayaʼaifeʼmo lokiya gemo huno hapa painoʼaeʼmo, Uteta hutapa aligefeʼmo hisaya mopamo auneʼamo alitetapa avoʼmo kaetapa alinita nagaetegamo eyo. Nagaemo manile Sailo taonifiʼmo Ala kava neʼmo aulagaleʼmo mago yaʼmo yaga au maleʼneʼna aliʼna alisaya mopaeʼmo agegauve, huno hapa paiʼniye.

⁹ Inagi apakaemo muki haopalegamo umenitata huʼa mopamo ageteʼapaeʼmo seveniʼa mopamo auneʼamo aliteʼa mago mukufiʼmo avoʼmo kaeteʼa Sailo taonifi seli noʼapimo haneʼniya yategamo aliniʼa Yasuvategamo eʼnae.

¹⁰ Inagi Yasuvaʼa Sailo taonifiʼmo Ala kava neʼmo aulagaleʼmo mago yaʼmo yaga au maleʼneno alino alisaya mopamo agetenoʼaeʼmo mopamo fako huno Isaleli vayaʼmo apamiʼniye.

Menisamemi nofi vayaʼmogi aliʼnaya mopaeʼmo huʼniya gemae

¹¹ Yaga auʼa maleʼneʼa ageʼnageno Menisameni afamo anaga nofi vayaʼmogi mopa hetamaʼapimo Yuta nofi vayaʼe Yosefe nofi vayaʼmogi folagapiʼeʼmo haneʼnigeʼa aliʼnae.

¹² Menisameni vayaʼmogi hakuʼapimo lamaga haopalega Yoneni anitetiʼmo aepa faiteno hanelino aise aveʼmo Yeliko taonimo lamaga haopalegamo uno haiteno hanelino ave koʼmo yegemo uno lamino nefaleya haopalegamo uteno hanelino Meti Eveni kahaepa koteʼmo uʼniye.

¹³ Hakuʼmo hanelino Layi taonimo alu agiʼamo Meto taonimo hoga haopalega aise aveleʼmo uteno hanelino Ataloti Ana taonileʼmo uno lamiʼnigeno mago avemo hoga haopalega afelaga Meti Holoni taonileʼmo hanelino uʼniye.

¹⁴ Hakuʼmo aino atagineno hanelino yegemo uno lamino nefaleya aise avemo haopalegatiʼmo Meti Holoni taonimo hoga haopalegamo uno Kiliyati Meli taonimo alu agiʼamo Kiliyati Yilimi taonileʼmo uno avaʼyi huʼniye. Ani taonimo Yuta vayaʼmogi taoniye. Ani hakuʼmo Menisameni nofi vayaʼmogi hakuʼmo yegemo uno lamino nefaleya haopalegamo haneʼniye.

¹⁵ Hoga haopalega hakuʼmo Kiliyati Yilimi taoniletiʼmo aepa faiteno hanelino yegemo uno lamino nefaleya haopalega uteno Nefatova meti aniteʼmo hanelino uʼniye.

¹⁶ Ani hakuʼmo avemo aiyafiʼmo Hinomi kagoʼmu koʼmo haopaleʼmo hanelinuno lamiʼniye. Ani Hinomi kagoʼmu kotega hoga haopalegamo alopa yatala vayaʼmogi kagoʼmu koteʼmo hanelinuno Yemusi vayaʼmogi aise ave koteʼmo uteno hanelino Inaloge koteʼmo uʼniye.

¹⁷ Hakuʼmo aino atagineno n lamaga haopalega Enasimesi ani kotuteʼmo hanelinuno alino ataleno Geliloti taonileʼmo uʼniye. Geliloti taonifiʼmo he tika maiʼnekaeʼmo Anumimi avelegamo uno haiʼniya kaʼmo agegane. Geliloti taoniletiʼmo hanelinuno alopa yafaʼmo Lumeni mafaʼnemo Mohani yafateʼmo uno lamiʼniye.

¹⁸ Ani yafatetiʼmo hanelinuno Meti Alama taonimo lamaga haopaleʼmo uteno Alama kagoʼmu kotegamo uʼniye.

¹⁹ Ani hakuʼmo hanelino aise avemo Meti Hola taonimo lamaga haopalega uteno hanelino Yoneni aniʼmo avayaleʼmo Haga ani kotuteʼmo uno avaʼyi huʼniye. Ani hakuʼmo Menisameni nofi vayaʼmogi mopamo hakuʼmo hoga haopalega hakuʼmo haneʼniye.

²⁰ Yegemo haine neʼeya haopalega hakuʼmo Yoneni aniʼmo haneʼniye. Menisameni nofi vayaʼmogi afamo anagaʼaʼe anagaʼaʼeʼmo aliʼnaya mopamo hakuʼmo haneʼniye.

²¹ Menisameni nofi vayaʼmogiʼmo afamo anagaʼaʼe anagaʼaʼeʼmo aliʼnaya taonimo agiʼamo Yeliko taonigi Meti Hola taonigi Ime Kiyi taonigi

^22-24 Meti Alama taonigi Semaleyimi taonigi Meto taonigi Evimi taonigi Pela taonigi Ofala taonigi Kefa Amoni taonigi Ofani taonigi Gima taonigi huno tuolofuʼa taonimo haneʼnigeno haopaleʼmo haneʼniya taoniʼenagi huno haneʼniye.

^25-28 Alu taoniʼapiʼeʼmo haneʼniye, Gimiyoni taonigi Lama taonigi Meyiloti taonigi Misipa taonigi Kefila taonigi Moya taonigi Likemi taonigi Aipeye taonigi Talala taonigi Yila taonigi Ilefi taonigi Yemusi taonimo alu agiʼamo Yulusalemu taonigi Gimeyati taonigi Kiliyati taonigi huno haneʼniye. Ani koteʼmo ani fotiniʼa taonigi haopaleʼmo haneʼniya taoniʼenagi huno haneʼniye. Ani mopamo Menisameni nofi vayaʼmogi afamo anagaʼaʼe anagaʼaʼeʼmo aliʼnaya mopaʼe taoniʼeʼmo hetamaʼapimo haneʼniye.