Yasuva 17 - The Keyagana NT and 25 OT books

Yasuvaʼmo Manasa nofi vayaʼmo yegemo uno lamino nefaleya haopalega mopamo lekana paino apateʼniya gemae

¹ Yosefe yege mafaʼneʼamo Manasaʼmo maiʼniyaʼmofeʼmo Manasa aginago nofi vayaʼmogi mopamo lekana paiʼa apateteʼa apamiʼnae. Manasa yege mafaʼneʼamo Mekiʼmo Giliyati afoʼamoʼmo lokiya vaino kame nehiya vekamo maiʼniyaʼmofeʼmo apakaemo Giliyati taoniʼe Mesani kotegaʼeʼmo lekana paiʼa ateteʼa amiʼnae. Ani mopamo Yoneni anitega yegemo haine neʼeya haopalegamo haneʼniye.

² Manasaʼmo alu aginago mafaʼne anagaʼmogimo Yoneni anitega yegemo uno lamino nefaleya haopalegamo haneʼniya mopamo aliʼnae. Ani Manasa nofi afamo anagaʼamogi apakiʼapimo Emiyesaʼagi Hilekiʼagi Asaliyoʼagi Sikemiʼagi Hifeʼagi Semainaʼagi huʼa maiʼnae. Apakaemo Manasaʼmo Yosefe yege mafaʼneʼamo ve mafaʼne anagaʼamo maiʼnae.

³ Yelofehatiʼmo Hife mafaʼnemo maiʼnigeno Hifeʼmo Giliyati mafaʼnemo maiʼnigeno Giliyatiʼmo Meki mafaʼnemo maiʼnigeno Mekiʼmo Manasa mafaʼnemo maiʼniye. Yelofehatiʼmo mago ve mafaʼneʼamo oʼmaiʼnafa a mafaʼne anagaʼageʼmo maiʼnae. Apakiʼapimo Malaʼagi Novaʼagi Holaʼagi Milikaʼagi Tiyaʼagi huno alino apateʼniye.

⁴ Ani aʼne anagaʼmogimo uʼa mono huno neʼapateya vekamo Iliyesaʼagi Nani mafaʼnemo Yasuvaʼagi yagaiʼa apateʼnaya vayaʼaifenagi huʼa ina ge huʼnae. Ala kava neʼmoʼa Mosesefeʼmo ha painoʼaeʼmo, Yelofehati a mafaʼne anagaʼmo mopamo apamiyo, huno huʼniye. Inagi Ala kava neʼmoʼa huʼniya kavaʼmo huʼa apasaʼapimogimo mopamo apamiʼniya kava huno ani a mafaʼne anagaʼmo mopamo apamiʼniye.

^5-6 Manasa a mafaʼne anagaʼe ve mafaʼneʼanagaʼeʼmo mopamo aliʼnayaʼmofeʼmo Manasa nofi vayaʼmogimo naya loleʼa mopa hetamamo aliʼnae. Alu Manasa nofi ve anagaʼmogi Yoneni aniʼmo mugagayaga faliga mopamo Giliyati koʼmo aliʼnae.

⁷ Manasa nofi vayaʼmogi mopamo hakuʼmo Asa nofi vayaʼmogi mopaletiʼmo aepa faiteno hanelino Sikemi taoni haopaleʼmo Mikimetati taonimo yegemo haine neʼeya haopalegamo hanelinuno hoga haopalega Enitapuva taonifi maiʼnaya vayaʼai mopaleʼmo uʼniye.

⁸ Manasa nofi vayaʼmogi hakuteʼmo Tapuva mopamo Manasa nofi vayaʼmogi mopamae. Haneʼniyaʼmonanafa Tapuva taonifi mopamo Ifalemi nofi vayaʼmogi mopamo haneʼniye.

⁹ Hakuʼmo hanelino aise aniʼmo Kena anitegamo uno lamiʼniye. Ani aniʼmo hoga haopalegamo muki haneʼniya taoniʼamo Ifalemi vayaʼmogi taonimo haneʼniye. Manasa nofi vayaʼmogi mopaleʼmo haneʼniyaʼmonanafa muki taoniʼamo Ifalemi vayaʼmogi taonimo haneʼniye. Manasa vayaʼmogi hakuʼmo Kena aniʼmo lamaga haopalegamo hanelino alopa Metaleniyani solovalateʼmo hanelinuno hano huʼniye.

¹⁰ Kena aniʼmo hoga haopalega mopamo Ifalemi nofi vayaʼmogi mopamo haneʼnigeno lamaga haopalegamo haneʼniya mopamo Manasa nofi vayaʼmogi mopamo haneʼniye. Yegemo uno lamino nefaleya haopalega mopamo hakuʼmo alopa Metaleniyani solovalaʼmo haneʼniye. Manasa nofi vayaʼmogi hakuʼmo lamaga haopalega Asa nofi vayaʼmogi hakuteʼmo haneʼniye. Yegemo haine neʼeya haopalega hakuʼmo Isaka nofi vayaʼmogi hakuteʼmo haneʼniye.

¹¹ Manasa vayaʼmogimo Isaka nofi vayaʼmogi mopaleʼmo haneʼniya taoniʼe Asa nofi vayaʼmogi mopaleʼmo haneʼniya taoniʼeʼmo aliʼnae. Aliʼnaya taonimo Meti Sani taonigi haopaleʼmo haneʼniya taonigi Imeyami taonigi haopaleʼmo haneʼniya taonigi No taonigi Eʼno taonigi Tenaki taonigi Megiʼno taonigi haopaleʼmo haneʼniya taonigi huʼa aliʼnae.

¹² Manasa vayaʼmogi ani muki taoniʼamo aliʼnayaʼmonanafa Kenani vayaʼmo ani muki taoniʼafatiʼmo aliʼa hapa faiʼa oʼapataleʼnayaʼmofeʼmo Kenani vayaʼmo ani taonifiʼmo afaʼa maiʼnae.

¹³ Henagaʼamo Isaleli vayaʼmo magoʼe huʼa lokiya vaiteʼapaeʼmo hapa faiʼa oʼapataleʼnayaʼmonanafa aliʼyaʼapileʼmo apavaleʼa apateʼnageʼa kalavusi aliʼyaʼmo aliʼa maiʼnae.

Ifalemi nofi vayaʼe Manasa nofi vayaʼmogiʼeʼmo huʼapaeʼmo, Magoʼe hutapa mopamo lamiyo, huʼa huʼnaya gemae

¹⁴ Henagaʼamo Yosefe aginago nofi vayaʼmogimo uʼa Yasuvafeʼmo huʼapaeʼmo, Na agufa kavaʼmo higekaeʼmo magoke mopatogeʼmo lamiʼnane. Ala kava neʼmoʼa laha maeme laha maeme neʼegeta hemenimo asole vayaʼmo afole aiʼnone, huʼa ha paiʼnae.

¹⁵ Yasuvaʼa geʼapileʼmo aeno atagaina hunoʼaeʼmo, Lapakaemo asole vayaʼmo maiʼnisageno Ifalemi kotega aise aveleʼmo aise mopamo haneʼnisiyaʼmoʼmo lapakaemo utapa Peliya vayaʼmogi mopaleʼe alopa yatala vayaʼmogi mopaleʼeʼmo yahaofilagamo yahaimo aitapa alita haleyo, huno hapa paiʼniye.

¹⁶ Apakaemo geʼaleʼmo aeʼa atagaina huʼapaeʼmo, Ave kotimoʼmo aise mopamo haneʼnigeno kanale huno nolateyaʼmonanafa otu mopaleʼmo Kenani vayaʼmo Meti Siyani taonifinagi haopaleʼmo haneʼniya taonifinagi Yesali kagoʼmu kotenagi huʼa maiʼnageno kame nehaya aeni talalaʼapimo haneʼniye, huʼa ha paiʼnae.

^17-18 Inagi Yasuvaʼa Ifalemi nofi vayaʼe Manasa nofi vayaʼefeʼmo hapa painoʼaeʼmo, Lapakaemo magoʼe hutapa lokiya vayaʼmo asole vayaʼmo maiʼnae. Magoke mopamo oʼaligayaʼmonanafa ave koʼmo aligae. Alopa yahaomo haneʼniyaʼmonanafa lapakaemo afaʼa alitapa haletetapa muki ani mopamo aligae. Kenani vayaʼmogi haopalegamo lokiya vaiʼnigeno aeni talalaʼapimo haneʼniyaʼmonanafa lapakaemo afaʼa hapa faitapa apatalegae.