Yasuva 14 - The Keyagana NT and 25 OT books

Apakaemo yegemo uno lamino nefaleya haopalega Yoneni ani haigileʼmo magayagamo haneʼniya mopamo fako huʼa apamiʼnaya gemae

¹ Ileyisaʼmo mono huno neʼapateya vekagi Yasuvaʼmo Nani mafaʼnegi Isaleli vayaʼaiteʼmo yagaiʼa apateʼnaya vayanagi huʼa Kenani mopamo fako huʼa apamiʼnageno alagi apakaiʼapi mopamo haneʼniye.

² Ala kava neʼmoʼa Mosesefeʼmo ha paiʼniya gemo akame huʼa mago yaʼmo yaga au maleʼneʼa aliteʼapaeʼmo mopamo aliʼa fako huʼa naeniʼa nofi vayaʼe magokayaga nofi vayaʼeʼmo apamiʼnae.

³ Hogoteno Moseseʼmo Yoneni aniʼmo mugagayaga haopalega haneʼniya mopamo fako huno lole nofi vayaʼe magokayaga nofi vayaʼeʼmo apamiʼniyaʼmonanafa Livai nofi vayaʼmo mago mopamo oʼapamiʼniye.

⁴ Yosefe mafaʼnelapatiʼmo lole nofi vayaʼmo Manasa nofi vayaʼe Ifalaimi nofi vayaʼeʼmo maiʼnayaʼmofeʼmo apakaemo Livai vayaʼmo mago mopamo oʼapamiʼnayaʼmonanafa maisaya taoniʼageʼmo apamige taonimo atupaleʼmo haneʼniya mopaleʼmo pulumakaʼapiʼe sipisipiʼapiʼeʼmo apatesaya mopamo apamige huʼnae.

⁵ Apakaemo Isaleli vayaʼmogimo Ala kava neʼmoʼa Mosesefeʼmo ha paiʼniya kavaʼmo akame huʼa mopamo fako huʼa apamiʼnae.

Kelepiʼmo taoniʼamo Hipaloni taonimo aliʼniya gemae

⁶ Mago Yuta vayaʼmo Yasuvaʼmo Giligali taonifiʼmo maiʼniyategamo eʼnae. Apakaepatiʼmo Kelepiʼmo Yefane mafaʼnemo Kenisaiti nofi vayapati vekamoʼmo Yasuvafeʼmo ha painoʼaeʼmo, Laʼagaemo Kenesi Maneya taonifiʼmo maiʼnoʼa afinaʼmo Ala kava neʼmoʼa aliʼyaʼamo neʼaliya vekamo Mosesefeʼmo laʼagaetegamo hisiya kavafeʼmo ha paiʼniya gemo ago afiʼnane.

⁷ Ani afinaʼmo nagaemo fotiʼa kafugamo maitogenoʼaeʼmo Ala kava neʼmo aliʼyaʼamo neʼaliya vekamo Moseseʼmo ina ge huno naha paiʼniye. Mani taonimo Kenesi Maneya taonimo ataleka uka mugalegamo haneʼniya koʼmo ageka alagepa huvo, huno naha paiʼnigeʼna uʼna ageteʼnaeʼmo atagineʼna naulagafatiʼmo alagi ageʼnova kavafeʼmo naipafatiʼmo alagi lama gemo ha paiʼnove.

⁸ Ha paiʼnovaʼmonanafa nagaeʼeʼmo magokepi lokaeʼa uʼnaya vayaʼmogigeʼmo alu gemo huʼnagenoʼaeʼmo ani gemoʼmo vayaʼmo koli yaʼmo alino apamiʼnigeʼa lokiyaʼapimo alagi hano huʼniye. Huʼnayaʼmonanafa nagaemo Ala kava neʼmo Gotitimoʼmo alagi muki naipafatiʼmo akame huʼnove.

⁹ Huʼnovaʼmofeʼmo Moseseʼmo agoʼyamo ataleno ina gemo hunoʼaeʼmo, Kagaemo Ala kava neʼmo Gotitimoʼmo alagi muki kaipafatiʼmo akame huʼnanaʼmofeʼmo kagaeʼe mafaʼne anagakaʼeʼmo ani ukeka nehana mopamo mopatapimo hanesiyafeʼmo aligae, huno naha paiʼniye.

¹⁰ Afiyo, huʼna, Isaleli vayaʼmogita kahaepa kaʼme koteʼmo uteta huʼnaya afinatetiʼmo Ala kava neʼmoʼa Mosesefeʼmo ani yafeʼmo ha paiʼnigeʼna maime maime eʼnogeno foti faefuʼa kafugamo ago uno hano huʼniyaʼmonanafa Ala kava neʼmoʼa naha maeʼnigeʼna hemenimo nagaemo eiti faefuʼa kafugamo ago maiʼnogenoʼaeʼmo lokiyaʼnimo hano osuʼniye.

¹¹ Haʼao, lokiyaʼnimo akeyaʼvilagamo Moseseʼmo ani umenitata huvo, huteno alino nateʼnigeʼna uʼnova afinaʼmo haneʼniya agufa kavakeʼmo huno haneʼniye. Lokiyaʼnimo afaʼageʼmo haneʼniyanageʼna umenitata huge kamemo afaʼa huge huʼna maiʼnove.

¹² Inagi hemenimo kagaemo Ala kava neʼmoʼa akeyaʼvilagamo ani huʼniya ave koʼmo namiyo. Kagaemo afiʼnanagetaeʼmo, Ani koteʼmo Anakimi vayaʼmo alopa yatala vayaʼmo maiʼnageno alopa taonileʼmo lokiya yafa kegiʼyamo haneʼniye, huta huʼnona gemo afiʼnane. Ala kava neʼmoʼa nagaeʼeʼmo magokepi lokaeno maiʼnisigeʼna inagi nagaemo Ala kava neʼmoʼa ago huʼniya agufa kavaʼmo huʼna ani vayaʼmo afaʼa aliʼna hapa faiʼna apatalegauve, huno ha paiʼniye.

¹³ Yasuvaʼa ani gemo afitenoʼaeʼmo Yefane mafaʼnemo Kelepiʼmo alino auleno ateteno Hipaloni taonimo amiʼniye.

¹⁴ Kelepiʼmo Ala kava neʼmo Isaleli vayaʼmogi Gotiʼapimoʼmo alagi muki aipafatiʼmo akame huʼniyaʼmofeʼmo Hipaloni taonimo Kenisaiti nofi vayapatiʼmo Yefane mafaʼnemo Kelepiʼe aginago vayaʼmogiʼeʼmo taoniʼapimo haneme haneme eno hemenimo afaʼa haneʼniye.

¹⁵ Akeyaʼvilagamo Hipaloni taonimo agiʼamo Kiyati Ama taonie, huno haneʼniye. Amaʼmo hogote Anakimi vekamo maiʼniye. Kelepiʼmo kame huteno ani mopamo aliʼnigenoʼaeʼmo inagi kame nehaya kavaʼmo magoʼe huno afole oʼaiʼnigeʼa maiʼa haga leʼnae.