Yasuva 13 - The Keyagana NT and 25 OT books

Ala kava neʼmoʼa Isaleli vayaʼmogimo oʼaliʼnaya mopaeʼmo huʼniya gemae

¹ Yasuvaʼa asole kafugamo maiteno alagi kosuna leʼnigenoʼaeʼmo Ala kava neʼmoʼa ina ge huno ha paiʼniye. Kagaemo asole kafugamo maiteka ago kosunamo leʼnanaʼmonanafa lapakaemo asole mopamo oʼaliʼnae.

² Oʼaliʼnageno afaʼa haneʼniya mopamo Filisatini vayaʼmogi mopagi Gesayu vayaʼmogi mopagi hutapa oʼaliʼnae.

³ Ani mopamo hakuʼmo Isipi kotega yegemo haine neʼeya haopalegamo Siho anitetiʼmo aepa faiteno hanelino Isipi vayaʼmogi hakuteʼmo utegeno muki lamaga haopalega Ekaloni taonimo hakuteʼmo utegetapa ani mopamo Kenani vayaʼmogi mopamo oʼaliʼnae. Ani mopaleʼmo Filisatini nofi vayapatiʼmo faefuʼa kini vayaʼmo maiʼnae. Apakaemo Gesa taonifiʼmo maige Asanoni taonifiʼmo maige Asakeloni taonifiʼmo maige Gati taonifiʼmo maige Ekaloni taonifiʼmo maige huʼnae.

⁴ Lapakaemo hoga haopalegamo muki Kenani vayaʼmogi mopaʼe Meyala Saitoni nofi vayaʼmogi mopaʼeʼmo oʼaliʼnae. Ani mopamo hakuʼmo alagi hanelino Efeki taonimo Emo vayaʼmogi hakuteʼmo uʼniye.

⁵ Lapakaemo Gemali vayaʼmogi mopagi muki Lemanoni haopalega mopamo yegemo haine neʼeya haopalegatiʼmo aepa faiteno hanelino Meli Gati taonimo Hemoni avemo haopaletiʼmo hanelinuno Hamati taonimo ka avayaleʼmo haneʼniya mopagi hutapa oʼaliʼnae.

⁶ Nagaemo muki aveʼaleʼmo Lemanoni aveletiʼmo maili uʼa aise aniʼmo Misalefoti haopalega maiʼnaya vayanagi muki Saitoni vayanagi huʼna Isaleli vayaʼmogi apaulagaleʼmo aliʼna hapa faiʼna apatalesugeka kagaemo ani mopamo mopaʼapimo hanesiyafeʼmo fako huka Isaleli vayaʼmo apamigane. Huvo, huʼna kaha paiʼnova agufa kavaʼmo huvo.

⁷ Kagaemo ani mopamo fako huka naeniʼa Isaleli nofi vayaʼe Manasa nofi vayapatiʼmo magokayaga vayanagi huka apamiyo.

Yasuvaʼa ani mopamo alino Lumeni nofi vayanagi Gati nofi vayanagi Manasa nofi vayapati magokayaga vayanagi huno apamiʼnigeʼa aliʼnaya gemae

⁸ Moseseʼmo Ala kava neʼmo aliʼyaʼamo neʼaliya vekamoʼmo ago apamiʼnigeʼa Lumeni nofi vayanagi Gati nofi vayanagi Manasa nofi vayapati magokayaga Manasa vayanagi huʼa yegemo haine neʼeya haopalega Yoneni aniʼmo mugagayaga faliga mopamo mopaʼapimo hanesiyafeʼmo aliʼnae.

⁹ Mopaʼapimo Anoni ani haigileʼmo haneʼniya taonimo Alove taonimo mago taonimo folagapiʼmo ani kagoʼmu kaʼmo muki Meʼnema otu kotetiʼmo aepa faiteno hanelino Nimoni taonileʼmo uʼniye.

¹⁰ Apakaemo Emo kini vekamo Saihoniʼmo Hesamoni taonifiʼmo maiʼnenoʼaeʼmo muki yagaiʼniya taoniʼamo aliʼnae. Mopaʼamo hanelino Emo koʼmo hakuteʼmo uʼniye.

¹¹ Giliyati kotega mopagi muki Gesu nofi vayaʼmogi mopagi muki Maka nofi vayaʼmogi mopagi muki Hemoni avemo haopalega muki Mesani kotetiʼmo hanelino Salaka taonileʼmo uʼniya mopagi huʼa aliʼnae.

¹² Moseseʼmo muki alopa yatala vayaʼeʼmo kamemo huno ago aeno apaka seʼniye. Mago afaʼa maiʼnaya vayapatiʼmo kini vekamo Agaʼmo alopa yatala vekamoʼmo Asataloti taonifinagi Eʼnaleyi taonifinagi muki Mesani kotegagi huno muki yagaiʼniya koʼamo aliʼniye.

¹³ Huʼniyaʼmonanafa Isaleli vayaʼmogimo Gesuli vayaʼe Makati vayaʼeʼmo hapa faiʼa oʼapataleʼnae. Apakaemo Isaleli vayaʼeʼmo magokepiʼmo lokaeʼa maime maime eʼa hemeniʼeʼmo maiʼnae.

¹⁴ Moseseʼmo muki Isaleli nofi vayaʼamo mopamo apamiʼniyaʼmonanafa Livai nofi vayaʼmo mago mopamo oʼapamiʼniye. Ala kava neʼmo Isaleli vayaʼmogi Gotiʼapimoʼmo hunoʼaeʼmo, Livai nofi vayaʼmogimo mopamo oʼaligayaʼmonanafa Isaleli vayaʼmogi atafi kaeʼa neʼnamiya ofalinimo alisageno hetamaʼapimo hanegaiye, huno hapa paiʼniye.

Lumeni nofi vayaʼmogi aliʼnaya mopaeʼmo huʼniya gemae

¹⁵ Moseseʼmo mago haopalegamo Lumeni nofi vayapiʼmo magoke magoke afamo anagaʼmo mopamo ago apamiʼniye.

¹⁶ Mopaʼapimo Alove taonimo Anoni ani haigimo kagoʼmu kotetiʼmo aepa faiteno hanelino ani taonimo kagoʼmu koʼmo folagapiʼmo haneʼnigeno muki ani Meʼnema koʼmo anaga otu kotegamo hanelino uno

^17-20 Hesamoni taonifiʼmo uteno muki ani alopa otu kotega taonimo Nimoni taonigi Mamoti Meli taonigi Meti Meli Miyoni taonigi Yehasi taonigi Kenemoti taonigi Mefati taonigi Kiyateyimi taonigi Sima taonigi kagoʼmu koteʼmo aise avefiʼmo haneʼniya taonimo Seleti Saha taonigi Meti Piyo taonigi mugagayaga Pisaga avelega konagi Meti Yesimoti taonigi

²¹ muki alu taoniʼenagi huno ani anaga otu kote taonimo haneʼniye. Muki Emo nofi vayaʼmogi taonimogeno kini vekamo Saihoniʼmo Hesimoni taonifiʼmo maiʼneno yagaiʼniye. Moseseʼmo kini vekamo Saihoniʼmo kame huno aeno aga seteno ani yagaiʼa neʼapataya vayaʼmo kini vekamo Saihoniʼmo yagaino neʼapateya vayaʼamo Mitiyani nofi vayaʼmo ani koteʼmo maiʼnaya vayaʼaiteʼmo yagaiʼa neʼapataya vayaʼmo Iviʼagi Lekemiʼagi Suʼagi Heʼagi Lemaʼagi huno kame huno aeno apaka seno kamitimo hapaeʼniye.

²² Isaleli vayaʼmogimo ani vayaʼmo hapaege Melemiʼmo Miyo mafaʼnemoʼa hosu apaune vayaʼmogi afole aisiya kavaʼmo aliʼa aveliʼnaya kavaʼmo ageʼniya vekaʼeʼmo naipeletiʼmo apaiʼnae.

²³ Yoneni aniʼmo Lumeni nofi vayaʼmogi mopaʼapimo hakuʼmo haneʼniye. Lumeni nofi vayaʼmogi afamo anagaʼaʼe anagaʼaʼeʼmo ani taoniʼe koʼeʼmo magoke magoke huno alagi apakaiʼapi mopamo hanesiyafeʼmo aliʼnae.

Gati nofi vayaʼmogi aliʼnaya mopaeʼmo huʼniya gemae

²⁴ Moseseʼmo magoʼe huno Gati nofi vayaʼmo magoke magoke afamo anagaʼmo mopamo fako huno apamiʼniye.

²⁵ Agaemo Yesi kotega mopagi muki Giliyati kotega taonigi Emo nofi vayaʼmogi mopaletiʼmo uno Alove taonimo yegemo haine neʼeya haopalega Lama taonimo haopaleʼmo utegeno apamiʼniye.

²⁶ Ani mopamo hakuʼmo Hesimoni taoniletiʼmo hanelino Lemati Misipa taonileʼe Metanimi taonileʼeʼmo uteno Mehaneyimi taoniletiʼmo hanelinuno Nima taonimo hakuteʼmo uʼniye.

²⁷ Yoneni aniʼmo kagoʼmu koʼmo aliteʼa Meti Helami taonigi Meti Nimila taonigi Sukoti taonigi Yafoni taonigi kini vekamo Saihoniʼmo yagaiʼniya mopafatiʼmo Lumeni nofi vayaʼmo oʼaliʼnaya mopamo mago atupa mopaʼagi huʼa aliʼnae. Mago hakuʼmo Yoneni anitega mopamo yegemo haine neʼeya haopalegamo haneʼnigeno alagi lamaga kotetiʼmo hanelino Galeliya ani kotuteʼmo uʼniye.

²⁸ Gati nofi vayaʼmogimo ani taoniʼe koʼeʼmo apakaiʼapi mopamo hanesiyafeʼmo aliʼnae.

Manasa nofi vayapatiʼmo magokayaga nofi vayaʼmogi aliʼnaya mopaeʼmo huʼniya gemae

²⁹ Manasa nofi vayaʼmo apakaiʼapimo aliʼa fako huʼa lole Manasa nofi vayaʼmo magoke aiyaya huʼa magokayaga Manasa vayaʼmo maiʼnageʼa ani kava huʼa magokayaga alu Manasa vayaʼmo maiʼnae. Hogoteno Moseseʼmo magokayaga Manasa nofi vayaʼmo afamo anagaʼaʼe anagaʼaʼeʼmo mopamo ago apamiʼniye.

³⁰ Mopaʼapimo Mehaneyimi taoniletiʼmo aepa faiteno hanelino muki Mesani kotega kini vekamo Agaʼmo yagaiʼniya kotegamo uʼniye. Hogoteno mago vekamo Yeyiʼmo yagaiʼniya taonimo Mesani koteʼmo sigisitiʼa taonimo aliʼnae.

³¹ Moseseʼa magokayaga Giliyati koʼmo atupaleʼmo haneʼniya mopagi kini vekamo Agaʼmo hogoteno yagaiʼniya taoniʼamo Asataloti taonigi Eʼnale taonigi huno apamiʼniye. Moseseʼmo muki ani mopamo Manasa mafaʼnemo Meki nofi vayapatiʼmo magokayaga afamo anagaʼaʼe anagaʼaʼeʼmo apamiʼniye.

³² Moseseʼmo muki ani mopamo yegemo haine neʼeya haopalega Yeliko taonimo Yoneni aniʼmo mugagayaga faligamo haneʼniya mopamo Movapu otu mopamo fako huno apamiʼnigeno apakaiʼapi mopamo haneʼniye.

³³ Apamiʼniyaʼmonanafa Moseseʼmo Livai nofi vayaʼmo mago mopamo oʼapamiʼniye. Ala kava neʼmoʼa ina ge huno hapa paiʼniye. Nagaemo Ala kava neʼmo Isaleli vayaʼmogitapa Gotitapimoʼnamo lapakaemo alagepa yaʼmo aliʼnageno lapakaitapi yaʼmo hanege hanege huno hanesiya yakana huʼna maiʼnovaʼmofeʼmo mago mopamo oʼaliʼnae, huno hapa paiʼniye.