Yasuva 11 - The Keyagana NT and 25 OT books

Isaleli vayaʼmogimo kini vekamo Yaminiʼe afaluʼamogiʼeʼmo kame huteʼa huʼa aeʼa apaka seʼnaya gemae

^1-2 Yaminiʼmo Haso taonifi kini vekamoʼmo ani Isaleli ati vayaʼmogi huʼnaya kavafeʼmo apava gemo afitenoʼaeʼmo eʼa agaemo ha maeʼa Isaleli vayaʼeʼmo kamemo hisayafeʼmo ge huno atalegeno uʼniye. Maʼnoni taonifi kini vekamo Yomamitegagi Simaloni taonifi kini vekalegagi Akasapi taonifi kini vekalegagi ave kotega lamaga haopalega kini vekalgagi Yoneni aniʼmo kagoʼmu kotega hoga haopalega Galeliya ani kotutega kini vayaʼaitegagi aise avelega yegemo uno lamino nefaleya haopalega kini vayaʼaitegagi huno solovala haopaleʼmo Noli taonimo haopale kini vayaʼeʼmo kamemo hisayafeʼmo ge huno atalegeno uʼniye.

³ Agaemo magoʼe huno ge huno atalegeno Kenani vayaʼmo Yoneni aniʼmo magayaga maiʼnaya vayaʼe mugagayaga maiʼnaya vayaʼaitegaʼeʼmo uge ave kotegamo maiʼnaya nofi vayaʼmo Emo vayaʼaitegagi Pelesi vayaʼaitegagi Yemusi vayaʼaitegagi huno uge huʼniye. Agaemo mago gemo huno atalegeno Haivi vayaʼmo Hemoni avemo haopaleʼmo Misipa koteʼmo maiʼnaya vayaʼaitegamo uʼniye.

⁴ Apakaemo ani kini vayaʼmogimo ani gemo afiteʼapaeʼmo muki ati vayaʼapiʼeʼmo magokepiʼmo eʼnae. Ani ami vayaʼmo magoʼe huʼa lusi asole vayaʼmo solovala anitega kahaepagana agufa vayaʼmo maiʼnae. Apakaemo asole hosiʼapimo maige kame hisaya talalaʼapimo hanege huʼnigeʼa halauliʼa eʼnae.

⁵ Apakaemo ani kini vayaʼmogimo muki ati vayaʼapimo apavaleliʼeʼa Melomi aniʼmo haopaleʼmo aliʼa anupa huteʼa Isaleli vayaʼeʼmo kamemo hisayafeʼmo seli noʼapimo aliʼa he tiʼa ateʼnae.

⁶ Inagi Ala kava neʼmoʼa Yasuvafeʼmo ha painoʼaeʼmo, Kagaemo apakaefeʼmo koliʼapimo osuvo. Inagi egamo mani agufa kanaleʼmo nagaemo Isaleli vayaʼmo hapa maesugeʼa muki kame vayaʼapimo kamitimo hapaesageʼa faligae. Lapakaemo hosi anagaʼapimogi apaiyamo apakanunaʼmo hatagauteʼa talalaʼapimo ata kaeʼa atalegae.

⁷ Apakaemo kame vayaʼapimogiʼeʼmo kamemo hisayafeʼmo alo osuʼa fikumo maiʼnayaʼaeʼmo Yasuvaʼe muki ati vayaʼaʼeʼmo malage huʼa Melomi anitegamo uʼa kamemo aliʼa he tiʼa ateʼa hapaeʼnae.

⁸ Ala kava neʼmoʼa Isaleli vayaʼmo hapa maeʼnigeʼa kame vayaʼapiʼeʼmo kamemo huteʼa huʼa aeʼa apaka seʼnae. Isaleli vayaʼmogimo kame vayaʼapimo apavegala aeʼa hapafaiʼa hapaeliʼa lamaga haopalega Misalefoti Maimi taonifilagamo uge Saitoni taonifilagamo uge yegemo haine neʼeya haopalega Misipa kagoʼmu kotegamo uge huʼnae. Apakaemo kame vayaʼapimo hapafaiʼa hapaeliʼuʼa muki vayaʼamo alagi hapaeʼa hano huʼa apataleʼnae.

⁹ Yasuvaʼa Ala kava neʼmoʼa hapaiʼniya agufa kavaʼmo huno hosi anagaʼapimogi apaiyamo apakanunaʼmo hatagauteno talalaʼapimo ata kaeno ataleʼniye.

¹⁰ Inagi Yasuvaʼe Isaleli vayaʼeʼmo ataleʼeʼa Haso taonimo aliteʼa Haso taonifi kini vekamo kamitimo haeʼnae. Ani afinaʼmo muki ani koʼafatiʼmo Haso taonimo hogote taonimo haneʼniye.

¹¹ Isaleli vayaʼmogimo muki Haso vayaʼmo kamitimo hapaeʼnageʼa faliʼnagenoʼaeʼmo magoke vekamo afaʼa alagi oʼmaiʼniye. Apakaemo ani taonimo ata kaeʼa ataleʼnae.

¹² Yasuvaʼa muki kini vayaʼamo apatafauteno muki taoniʼapimo aliʼniye. Yasuvaʼa Moseseʼmo Ala kava neʼmo aliʼyaʼamo neʼaliya vekamoʼmo hiyo, huno huʼniya agufa kavaʼmo huno muki vayaʼmo kamitimo hapaeʼnigeʼa faliʼnae.

¹³ Apakaemo Haso taonimo ata kaeʼa ataleʼnayaʼmonanafa alu taonimo kaeʼa ataleʼnaya noʼatufafiʼmo kiʼnaya taonimo kaeʼa oʼataleʼnae.

¹⁴ Isaleli vayaʼmogi muki ani taoniʼafatiʼmo muki monimo alige alopa moniletiʼmo miya nefaiya yaʼmo alige pulumakamo apavalege huʼnae. Apakaemo muki vayaʼmo kamitimo hapaeʼnageno magoke vekamo afaʼa alagi oʼmaiʼniye.

¹⁵ Hogoteno Ala kava neʼmoʼa aliʼyaʼamo neʼaliya vekamo Mosesefeʼmo ani gemo ha paiʼnigeno Moseseʼmo Yasuvafeʼmo ani gegeʼmo ha paiʼnigeno Yasuvaʼa ani gemo akame huʼniye. Ala kava neʼmoʼa Mosesefeʼmo, huvo, huno ha paiʼnigeno muki ani gemo alagi akame huno huʼniye.

Yasuvaʼa muki ani haopalega haneʼniya koʼaleʼmo kame huteno mopamo aliʼniya gemae

¹⁶ Inagi Yasuvaʼa muki ani haopalega koʼamo aliʼniye. Lamaga haopalega ave koʼmo alige hoga haopalega koʼeʼmo alige Goseni koʼmo alige ani koʼmo hoga haopalega koʼmo alige Yoneni anitega kagoʼmu koʼmo alige huʼniye.

^17-18 Ani mopamo hakuʼmo Halaki avemo hoga haopalegamo Itomi koʼmo haopaletiʼmo aepa faiteno hanelinuno Lemanoni kagoʼmuleʼmo Meli Gati taonimo haopalegaʼe Hemoni avemo lamaga haopalegaʼeʼmo haneʼniye. Yasuvaʼa ani kote kini vayaʼeʼmo yatala afinaʼmo kame huteno mukiʼamo apatafauno kamitimo hapaeʼnigeʼa faliʼnae.

¹⁹ Gimiyoni taonifiʼmo maiʼnaya Haivi vayaʼageʼmo Isaleli vayaʼeʼmo apayapiʼmo aliteʼa magokepiʼmo lokaeʼa maiʼnae. Maiʼnayaʼmonanafa muki alu taonifi alu taonifiʼmo maiʼnaya vayaʼmogimo ani agufa kavaʼmo osuʼnayaʼmofeʼmo Isaleli vayaʼmogimo muki ani taonifiʼmo maiʼnaya vayaʼeʼmo kame huteʼa hapaeʼa hano huʼa apataleʼnae.

²⁰ Ala kava neʼmoʼa ani vayaʼmogimo kamemo hisayafekeʼmo apaipamo alino lokiya vaino apateʼniyaʼmofeʼmo kame huʼnageʼapaeʼmo Isaleli vayaʼmogimo hapau huʼa oʼapateʼa hapaeʼa hano huʼa apataleʼnae. Ala kava neʼmoʼa Mosesefeʼmo ani ha paiʼniya gemo alagi akame huʼnae.

²¹ Ani afinaʼmo Yasuvaʼa uno haino aise avefiʼmo maiʼnaya Anakimi nofi vayaʼmo yatala apayamufamo haneʼniya vayaʼmo hapaeno hano huno apataleʼniye. Ani yatala vayaʼmo Hipaloni taonifiʼmo maige Nemi taonifiʼmo maige Enapi taonifiʼmo maige muki alu haopalega Yuta vayaʼmogi avefiʼe Isaleli vayaʼmogi avefiʼeʼmo maige huʼnae. Yasuvaʼa ani vayaʼmo alagi hapaeno hano huteno muki taoniʼapimo alagi alino hano huno ataleʼniye.

²² Anakimi nofi vekamo Isaleli koteʼmo magoke vekamo oʼmaiʼniyaʼmonanafa mago vayaʼamo Gasa taonifiʼmo maige mago vayaʼamo Gati taonifiʼmo maige mago vayaʼamo Asanoti taonifiʼmo maige huʼnae.

²³ Inagi Yasuvaʼa muki ani haopalega mopamo Ala kava neʼmoʼa Mosesefeʼmo ani kavaʼmo hiyo, huno ha paiʼniya agufa kavaʼmo huno aliʼniye. Yasuvaʼa Isaleli vayaʼmogi mopamo hanesiyafeʼmo ani mopamo alino fako huno muki Isaleli nofi vayaʼmo magoke magoke huno apamiʼniye. Inagi Isaleli vayaʼmo magoʼe huʼa kamemo osuʼa maiʼa haga leʼnae.