Yasuva 10 - The Keyagana NT and 25 OT books

Isaleli vayaʼmogimo Emo vayaʼeʼmo kame huteʼa huʼa aeʼa apaka seʼnaya gemae

¹ Yulusalemu taonifi kini vekamo Enoniyetekiʼa afiʼniyana Yasuvaʼe Isaleli vayaʼmogiʼeʼmo Yeliko taonifiʼe kini vekalegaʼeʼmo huʼnaya agufa kavaʼmo huʼa Ai taonimo aliteʼa alagi aliʼa hano huʼa ataleteʼa Ai kini vekamo kamitimo haeʼnageʼapaeʼmo Gimiyoni taonifi vayaʼmogi Isaleli vayaʼeʼmo kame osisayafeʼmo kotalakemo huteʼa Isaleli vayaʼeʼmo magokepiʼmo alagepa huʼa lokaeʼa maiʼnae, huʼa huʼnaya gemo afiʼniye.

² Gimiyoni taonimoʼmo alu taonifiʼmo maiʼnaya kini vayaʼe taoniʼeʼmo magoke aiyaya huno alopa taonimogeno Ai taonimo ago aeno aga seʼnigeʼa muki Gimiyoni vayaʼmogi kame hisayafeʼmo lokiya vayaʼageʼmo maiʼnayaʼmofeʼmo Yulusalemu taonifi vayaʼmogimo lusi kava huʼa koliʼapimo huʼnae.

³ Koliʼapimo huʼnayaʼmofeʼmo Yulusalemu taonifi kini vekamo Enoniyetekiʼmo Hipaloni taonifi kini vekamoʼmo Hohamitegagi Yamuti taonifi kini vekamo Pilamutegagi Lakisi taonifi kini vekamo Yafiyategagi Eloni taonifi kini vekamo Nemitegagi huno ge huno atalegeno uʼniye.

⁴ Agaemo ani kini vayaʼaifeʼmo hapa painoʼaeʼmo, Lapakaemo etapa naha maesageta Gimiyoni vayaʼeʼmo kamemo hugune. Gimiyoni vayaʼmogimo Yasuvaʼe Isaleli vayaʼeʼmo kamemo osisayafeʼmo kotalakemo ago hu maleʼnayaʼmofeʼmae, huno hapa paiʼniye.

⁵ Ani gemo huʼniyaʼmofeʼmo Emo nofi vayaʼaiteʼmo yagaiʼa neʼapataya kini vayaʼmogimo faefuʼa kini vayaʼmo Yulusalemu kini vekagi Hipaloni kini vekagi Yamuti kini vekagi Lekisi kini vekagi Eloni kini vekagi muki ami vayaʼapigi huʼa aliʼa anupa huteʼa uʼa Gimiyoni taonimo haopaleʼmo seli noʼapimo aliʼa he tiʼa ateteʼa Gimiyoni vayaʼeʼmo kame huʼnae.

⁶ Gimiyoni vayaʼmogimo ge huʼa ataleʼnageno Yasuvategamo Giligali taonifiʼmo seli noʼmo aliʼa he tiʼa ateʼnaya yategamo uʼniye. Apakaemo huʼapaeʼmo, Emo nofi vayaʼmogi avefiʼmo maiʼnaya kini vayaʼapimogimo kame lahaesayafeʼmo magokepiʼmo aliʼa anupa huʼa maiʼnae. Malage huka eka laha mao. Kagaemo aliʼyakamo neʼaluna vayaʼmo lataleka oʼuvo, huʼa ha paiʼnae.

⁷ Inagi Yasuvaʼagi muki ami vayaʼagi muki koli nosaya lokiya vayaʼagenagi huʼa Giligali taonifatiʼmo ataleʼa uʼnae.

⁸ Inagi Ala kava neʼmoʼa Yasuvafeʼmo ha painoʼaeʼmo, Nagaemo apakaemo ago apavaleʼna kayapiʼmo kamiʼnovaʼmofeʼmo apakaefeʼmo koliʼapimo osuvo. Magoke vekamoʼmo kaulagaleʼmo afaʼa he tino oʼmaisigeka mukiʼamo kame huka aeka apaka segane, huno ha paiʼniye.

⁹ Yasuvaʼe ami vayaʼaʼeʼmo mukiʼamogi haniʼilagamo uʼnayaʼmofeʼmo Emo nofi vayaʼaitegamo malage huʼa uʼa avaʼyi huteʼa kame huʼnae.

¹⁰ Ani kavatefeʼmo Ala kava neʼmoʼa Emo vayaʼmo koli yaʼmo alino apamiteno apaipa apakesamo alino hosu huno ataleʼniyaʼmofeʼmo Isaleli vayaʼmogimo asole Emo vayaʼmo Gimiyoni taonifiʼmo kamitimo hapaeteʼa Gimiyoni kotegatiʼmo apavegala aeliʼa uʼnageʼa apaune heʼa Metiholoni taoni haopalega avele kateʼmo uʼa lamiʼa neʼvageʼapaeʼmo Isaleli vayaʼmogi Emo vayaʼmo kamitimo hapaeme hapaeme uʼnageʼa Ayika taonifiʼe Makiʼna taonifiʼeʼmo uʼa avaʼyi huʼnae.

¹¹ Isaleli vayaʼmogi Emo vayaʼmo apavegala aeliʼa Meti Holoni taonifiʼmo uʼa nelamiya kateʼmo uʼa lamiteʼapaeʼmo apaune heʼa neʼvagenoʼaeʼmo Ala kava neʼmoʼa yafakana agufa koʼmopamo alino atalegeno emineno ani koʼmopa koʼmoʼmo apamagime apamagime uʼnigeʼapaeʼmo uʼa Ayika taonifiʼmo avaʼyi huʼnae. Koʼmopa koʼmoʼmo apamagiʼnigeʼa faliʼnaya vayaʼmogi napamoʼmo Isaleli vayaʼmogi hapaeʼnaya vayaʼmogi napamo ago aeno aga seʼniye.

¹² Ala kava neʼmoʼa Emo vayaʼmo apavalelinuno Isaleli vayaʼai apayapiʼmo apateʼniye. Ani afinaʼmo Yasuvaʼa Ala kava nefeʼmo Isaleli vayaʼai apaulagaleʼmo ina ge huno nunumuʼmo huʼniye. O yegeyo, huno, kagaemo Gimiyoni koteʼmo anagamo anileʼmo he tika haneka maiyo. O kaiyo, huno, kagaemo Aiyaloni kagoʼmufi koteʼmo anagamo anileʼmo he tika haneka maiyo, huno huʼniye.

¹³ Yegemo he tino haneno maiʼnigeno kaimo uno olamino anileʼmo haneme haneme neʼvigeʼapaeʼmo Isaleli vayaʼmogimo kame vayaʼapimogi hapaeʼnaya anonaʼapilefeʼmo kame hapaeʼnae. Ani kavafeʼmo ava geʼe fatago vayaʼaifeʼmo apava geʼeʼmo mukufiʼmo avoʼmo kae maleʼnae. Ani kava huno magoke afinaʼmo yegemo afaʼa uno olamino anile haneno maiʼniye.

¹⁴ Akeyaʼvilaga afinatetiʼmo eno hemeniʼeʼmo ani agufa kava huno magoke afinaʼmo afole oʼaiʼniye. Ani afinaʼmo Ala kava neʼmoʼa mago vayaʼmo geʼamo akame huno Isaleli vayaʼmo hapa maesiyafeʼmo kame huno apateʼniye.

¹⁵ Inagi Yasuvaʼe muki ami vayaʼaʼeʼmo halate atagineʼa Giligali kotega seli noʼapimo aliʼa he tiʼa ateʼnaya yategamo eʼnae.

¹⁶ Eʼnayaʼmonanafa ani faefuʼa kini vayaʼmo apaune heʼa uʼa Makena taonimo haopaleʼmo haneʼniya yafa kapiʼmo fala kiʼa maiʼnae.

¹⁷ Mago vayaʼmogimo apaketeʼapaeʼmo Yasuvafeʼmo ha paiʼapaeʼmo, Ani faefuʼa kini vayaʼmo uʼa Makena taonimo haopaleʼmo haneʼniya yafa kapiʼmo fala kiʼa maiʼnae, huʼa ha paiʼnae.

¹⁸ Inagi Yasuvaʼa ina gemo huno hapa painoʼaeʼmo, Mago alopa yafakoʼmo alita helave helave hulitutapa ani yafa kaʼmo avayaleʼmo aita akani maletetapa mago ati vayaʼaifeʼmo, yagaitapa maiyo, hutapa hapa paiyo.

¹⁹ Mukiʼamo anileʼmo oʼmaitapa kame vayatapimo apakame hutapa uta apakamelegamo neʼvaya vayaʼeʼmo kame hiyo. Lapakaemo afaʼa apatalegeʼa taoniʼapifiʼmo uʼa ohaiyo, Ala kava neʼmo Gotitapimoʼmo apavalelineno lapayapiʼmo apategaiye, huno hapa paiʼniye.

²⁰ Yasuvaʼe Isaleli vayaʼeʼmo uʼa kame vayaʼapimo apavegala aeʼa hapaeʼa hano nehageʼapaeʼmo mago vayaʼamo apaune heʼa uʼa lokiya yafa kegiʼyamo haneʼniya taoniʼapifi taoniʼapifiʼmo uʼa haiʼa maiʼnae.

²¹ Muki Isaleli vayaʼmo seli noʼapimo haneʼniya yategamo Makena taonimo haopaleʼmo Yasuvaʼa maiʼniyategamo halate atagineʼa eʼnae. Kame vayaʼapimogimo ohapaeʼnageʼa mukiʼamo afaʼa alagepa huʼa maiʼnae. Mukli vayaʼmo koli huʼnayaʼmofeʼmo magoke vekamoʼmo Isaleli vayaʼaifeʼmo hosu agufa gemo osuʼniye.

²² Yasuvaʼa hunoʼaeʼmo, Ani yafa kaʼmo avayamo alitapa akoli maleʼnetapa ani faefuʼa kini vayaʼmo apavalelitapa nagaetegamo eyo, huno hapa paiʼnigeʼapaeʼmo

²³ apakaemo uʼa ani kini vayaʼmo Yulusalemu kini vekagi Hipaloni kini vekagi Yamuti kini vekagi Lekisi kini vekagi Eloni kini vekagi huʼa Yasuvategamo apavaleliʼa eʼnae.

²⁴ Apavaleliʼa eʼnagenoʼaeʼmo Yasuvaʼa muki Isaleli ve anagaʼaifeʼmo keya aeno ge huʼnigeʼa eʼnagenoʼaeʼmo agaeʼeʼmo magokepi lokaeʼa uʼnaya ati vayaʼaiteʼmo yagaiʼa neʼapataya vayaʼaifeʼmo hunoʼaeʼmo, Lapakaemo manileʼmo etapa mani kini vayaʼmogi lugoʼapileʼmo lapaiyamo maleyo, huno hapa paiʼnigeʼa Yasuvaʼa huʼniya agufa kavaʼmo huʼnae.

²⁵ Inagi Yasuvaʼa apakaefeʼmo hapa painoʼaeʼmo, Ala kava neʼmoʼa lapa maesigetapa lapakaeʼeʼmo muki kame hisaya vayaʼaitegamo ani agufa kavakeʼmo hugayaʼmofeʼmo koli osuge oʼatalege hutetapa he tita lokiya vaita maiyo, huno hapa paiʼniye.

²⁶ Henagaʼamo Yasuvaʼa ani kini vayaʼmo kamiti hapaeteno faefuʼa yosaleʼmo apaneʼmuʼmo aeno asai maleʼnigeʼa haneliʼa neʼvagenoʼaeʼmo yegemo uno lamino faleʼniye.

²⁷ Yegemo uno lamino faleʼnigeno Yasuvaʼa hunoʼaeʼmo, Ani fala kiʼa maiʼnaya yafa kapiʼmo apakufaʼamo asaitapa yaga auta apataleyo, huno hapa paiʼnigeʼa ani agufa kavaʼmo huʼnae. Apakaemo mago alopa yafakotetiʼmo ani yafa kaʼmo avayaleʼmo aiʼa akani maleʼnageno hemenimo ani yafakoʼmo afaʼa haneʼniye.

²⁸ Ani afinaʼmo Yasuvaʼa kame huteno Makena taonimo aliteno kini vekaʼe muki ani taonifiʼmo maiʼnaya vayaʼeʼmo kamitimo hapaeʼnigeʼa faliʼnae. Magoke vekamo alagi afaʼa oʼmaiʼniye. Agaemo Yeliko taonifi kini vekalegamo huʼniya agufa kavaʼmo huno Makena kini vekalegamo huʼniye.

Isaleli vayaʼmogimo kame huʼa aeʼa apaka seʼnaya gemae

²⁹ Apakaemo Makena taonimo aliteʼapaeʼmo Yasuvaʼe muki Isaleli vayaʼeʼmo Lipana taonifilagamo uʼa Lipana vayaʼeʼmo kame huʼnae.

³⁰ Ala kava neʼmoʼa apavalelineno Isaleli vayaʼmogi apayapiʼmo apateʼnigeʼa muki taonifiʼmo maiʼnaya vayaʼmo kamitimo hapaeʼnageno magoke vekamo alagi afaʼa oʼmaiʼniye. Apakaemo Yeliko taonifi kini vekalegamo huʼnaya agufa kavaʼmo huʼa Lipana kini vekalegamo huʼnae.

³¹ Inagi Yasuvaʼe muki Isaleli vayaʼeʼmo Lipana taonimo ataleʼa Lekisi taonifiʼmo uʼa seli noʼapimo aliʼa he tiʼa ateteʼa aepa faiʼa kamemo huʼnae.

³² Ala kava neʼmoʼa apavalelineno Isaleli vayaʼmogi apayapiʼmo apateʼnigeʼa lole afinaʼmo kame huteʼa huʼa aeʼa apaka seʼa muki vayaʼmo kamiti hapaeʼnae. Lipana taonifiʼmo huʼnaya agufa kavaʼmo huʼa Lekisi taonifiʼeʼmo huʼnae.

³³ Inagi Giya taonifi kini vekamo Holamiʼa Lekisi vayaʼmo hapa maeno kame hisiyafeʼmo eʼnigeno agaemo Yasuvaʼa kini vekamo Holamiʼe vayaʼaʼeʼmo kame huno alagi hapaeno hano huno apataleʼniye.

³⁴ Yasuvaʼe muki Isaleli vayaʼeʼmo Lekisi taonifatiʼmo ataleʼa Eloni kotegamo uʼa seli noʼapimo aliʼa he tiʼa ateteʼa aepa faiʼa kamemo huʼnae.

³⁵ Magoke afinaʼmo kame huteʼa taonimo aliteʼa muki taonifiʼmo maiʼnaya vayaʼmo hapaeʼa hano huʼa apataleʼnae. Lekisi kotegamo huʼnaya agufa kavaʼmo huʼa Eloni taonifiʼmo huʼnae.

³⁶ Inagi Yasuvaʼe muki Isaleli vayaʼeʼmo Eloni taonifatiʼmo ataleʼa uʼa Hipaloni taonifi maiʼnaya vayaʼeʼmo kame huʼnae.

³⁷ Apakaemo taonimo aliteʼa muki Hipaloni taonifiʼmo maiʼnaya vayaʼmo hapaeʼa hano huʼa apataleʼnae. Magoke vekamo afaʼa oʼateʼnageʼapaeʼmo mukiʼamo faliʼnae. Eloni taonifiʼmo huʼnaya agufa kavaʼmo huʼnae.

³⁸ Inagi Yasuvaʼe muki Isaleli vayaʼeʼmo atagineʼa Nemi taonifilagamo eʼa kamemo huʼnae.

³⁹ Apakaemo ani taoniʼe muki hapaoleʼmo haneʼniya taoniʼeʼmo aliteʼa kini vekaʼe muki taonifiʼmo maiʼnaya vayaʼeʼmo hapaeʼa hano huʼa apataleʼnae. Magoke vekamo afaʼa oʼmaiʼniye. Apakaemo Lipana kini vekaʼe vayaʼaʼeʼmo huʼnaya agufa kavaʼmo huʼa Nemi kini vekaʼe vayaʼalegaʼeʼmo huʼnae.

⁴⁰ Ani kavaʼmo huno Yasuvaʼmo muki kini vayaʼeʼmo kame huno aeno apaka seteno muki maiʼnaya mopaʼapimo aliʼniye. Ave kotega mopamo alige Negevi kotega mopamo alige Yoneni aniʼmo haopaleʼmo kagoʼmu kotega mopamo alige aise aveleʼmo kaʼme kotega mopamo alige huʼniye. Ala kava neʼmo Isaleli vayaʼmogi Gotiʼapimoʼmo huvo, huno ha paiʼniya kavaʼmo akame huno kame huteno hapaeno hano huno apataleʼniye.

⁴¹ Yasuvaʼa uno Kenisi Maniya kotegatiʼmo kame hume hume uno Gasa taonifiʼmo uno avaʼyi huteno kame huno aeno apaka seʼniye. Agaemo muki Goseni mopamo aliteno kame hume hume uno Gimiyoni taonimo haopaleʼmo haneʼniya mopamo alige huteno kame huno aeno apaka seʼniye.

⁴² Ala kava neʼmo Isaleli vayaʼmogi Gotiʼapimoʼmo hapa maeʼnigeʼapaeʼmo Yasuvaʼe Isaleli vayaʼmogiʼeʼmo magoke afinaʼmo muki ani kini vayaʼeʼmo kamemo huʼa aeʼa apaka seteʼa mopaʼapimo aliʼnae.

⁴³ Aliteʼa Yasuvaʼe muki Isaleli vayaʼeʼmo atagineʼa Giligali kotegamo seli noʼapimo haneʼniya yategamo eʼnae.