Yasuva 1 - The Keyagana NT and 25 OT books

Isaleli vayaʼmogimo Kenani mopamo alisayafeʼmo alo huʼa maiʼnaya gemae

¹ Moseseʼmo Ala kava neʼmo aliʼyaʼamo neʼaliya vekamo ago falitegenoʼaeʼmo Ala kava neʼmoʼa Moseseʼmo ha maeʼniya vekamo Nani mafaʼnemo Yasuvafeʼmo mani gemo ha paiʼniye.

² Aliʼyaʼnimo neʼaliya vekamo Moseseʼmo ago faliʼniyaʼmofeʼmo hemenimo kagaeʼe muki Isaleli vayaʼeʼmo lapakaemo Yoneni aniʼmo lakaetapa nagaemo lapamisuva mopaleʼmo utapa avaʼyi hiyo.

³ Nagaemo Mosesefeʼmo lapamiguve, huʼna ha paiʼnova mopaleʼmo lapakaemo muki umenitata hisaya mopamo lapamiʼnove.

⁴ Ani alisaya mopamo hakuʼmo ina kava huno haneʼniye. Kaʼme kotega Lemanoni aveletiʼmo aepa faiteno hanelino alopa aniʼmo Yufaletisi anitegamo ugiye. Hiti vayaʼmogi mopamo muki mopaʼaʼapimo aligae. Yegemo uno lamino nefaleya haopalegamo uteno alopa Metaleniyani solovalategamo ugiye.

⁵ Yasuvao, huno, Ma mopafiʼmo maiʼnekaeʼmo muki vayaʼeʼmo kame hisanana huka aeka apakasegane. Nagaemo Moseseʼeʼmo magokepi lokaeʼna maiʼnova kava huʼna kagaeʼeʼmo magokepi lokaeʼna maiguve. Nagaemo alagi kataleʼna oʼuguve, huno ha paiʼniye.

⁶ Kagaemo koli osuge kamoʼya oʼaige huteka he tika lokiya vaikageʼmo maiyo. Nagaemo mopamo lapamiguve, huʼna lapakinago vayaʼaifeʼmo nagoʼyamo ataleʼna polomasi gemo ago hu maleʼnove. Vayakamogimo ani mopamo apakaiʼapi mopamo alisayafekeʼmo kagaemo alika fako huka apamiganaʼmofeʼmo koli osuvo.

⁷ Kagaemo koli osuka lusi kava huka he tika lokiya vaikageʼmo maiyo. Muki keʼaepa geʼnimo Moseseʼmo aliʼyaʼnimo neʼaliya vekamoʼmo akame huvo, huno kaha paiʼniya keʼaepa gemo akame hisanafeʼmo lokiya vaika maiyo. Kagaemo haiya haopalegamo visapi alagepa huka maisanafeʼmo ani keʼaepa gefatiʼmo magoke aise atupa gemo alagi oʼatalo. Ani kaʼmo ataleka lamaga kotegamofi hoga kotegamofi huka oʼuvo.

⁸ Mukufiʼmo haneʼniya gemo muki avoʼmo kae maleʼniya keʼaepa gemo akame hisanafeʼmo kagaemo ani keʼaepa gemo haneʼniya mukufiʼmo keʼaepa geʼaeʼmo felugaʼe haniʼilagaʼeʼmo kagesa afifi huka maiʼneka kavayafatiʼmo hapa paiyo alagepa huka maisanageno aliʼyakamo alagepa huno afole aigiye.

⁹ Nagaemo kagaefeʼmo ago kaha opaiʼnogekaepiye. Koli osuka he tika lokiya vaikageʼmo maiyo. Muki visana haopalegamo nagaemo Ala kava neʼmo Gotikamoʼnamo kagaeʼeʼmo magokepiʼmo lokaelitaʼa uguʼaʼmofeʼmo kamoʼyamo aiteka koli osuvo, huno ha paiʼniye.

Yasuvaʼmo Yoneni aniʼmo lakaetapa viyo, huno hapa paiʼniya gemae

¹⁰ Inagi Yasuvaʼmo Isaleli vayaʼaiteʼmo neʼyagaiya vayaʼaifeʼmo ina ge huno hapa paiʼniye.

¹¹ Lapakaemo seli noʼmo alitapa he titapa ateʼnaya yategamo uteta hutapa vayaʼaifeʼmo hapa paisageʼa apakaemo neʼyaʼapimo aliʼa alo hiyo. Loleʼe magoʼe afinaʼatomo maiteta lagaemo Yoneni aniʼmo lakaeta ani mopamo alisunafeʼmo Ala kava neʼmo Gotitimoʼmo lagaiti mopamo hanesiyafeʼmo lamigiye, huno hapa paiʼniye.

¹² Manasa nofi vayaʼmo apakaiʼapimo aliʼa fako huʼa lole Manasa nofi vayaʼmo magoke aiyaya huʼa magokayaga Manasa vayaʼmo maiʼnageʼa ani kava huʼa magokayaga alu Manasa vayaʼmo maiʼnae. Inagi Yasuvaʼmo Lumeni nofi vayaʼaifenagi Gati nofi vayaʼaifenagi Manasa nofi vayapatiʼmo magokayaga Manasa vayaʼaifenagi huno ina gemo huno hapa painoʼaeʼmo,

¹³ Ala kava neʼmo aliʼyaʼamo neʼaliya vekamo Moseseʼmo hunoʼaeʼmo, Ala kava neʼmo Gotitapimoʼmo ani mopamo lapamisigetapaeʼmo maitapa haga legae, huno lapa paiʼniya geʼaeʼmo lapake okanitapa lapakesamo afiyo.

¹⁴ Aʼne anagatapigi mafaʼne anagatapigi yuna afu anagatapigi huʼa Yoneni aniʼmo magayaga faligamo Moseseʼmo lapamiʼniya mopaleʼmo lapakava maigae. Maigayaʼmonanafa lapakae ati vayaʼmo koli osuʼa lokiya vaiʼa kame nehaya ati vayaʼmogi atigi kevegi naipegi huʼa aliteʼa uʼa hogoteʼa aniʼmo lakaeʼa uʼa konagatapimogi hapa maegae.

¹⁵ Lapakaemo hapa maeme hapa maeme neʼvisagenoʼaeʼmo Ala kava neʼmoʼa lapa maeʼnigetapa maitapa haga leʼnaya kava huno Ala kava neʼmoʼa konagatapimogimo mopamo apamisigeʼa maiʼa haga legae. Inagi ataginetapa eta Ala kava neʼmo aliʼyaʼamo neʼaliya vekamo Moseseʼmo Yoneni aniʼmo magayaga faliga yegemo haine neʼeya haopalegamo lapamiʼniya mopaleʼmo maiʼnetapa lapamogaga aigae.

¹⁶ Apakaemo Yasuva geʼaleʼmo aeʼa atagaina huʼapaeʼmo, Lagaemo muki laha paiʼnana geʼe laha paisana geʼeʼmo afaʼa afiteta akame hugune. Kagaemo haiya haopalegamo lagaefeʼmo viyo, huka hisapigeta inagi lagaemo afaʼa ugune.

¹⁷ Lagaemo muki kavatefeʼmo Mosese geʼamo akame huʼnona agufa kavaʼmo huta kagae gemo akame hugune. Hugunaʼmonanafa Ala kava neʼmo Gotikamoʼmo Moseseʼeʼmo magokepi lokaeno maiʼniya agufa kava huno kagaeʼeʼmo magokepi lokaeno maino.

¹⁸ Ina lagimo muki hiyo, huka hisana gemo oʼafiʼa amagiʼa atalesagetaeʼmo kamiti apamagigune. Kagaikageʼmo lokiya vaika maiteka koli osuvo, huʼa ha paiʼnae.