Taitasi 3 - The Keyagana NT and 25 OT books

Ani alagepa kavaʼmo hiyo, huka hapa paiyo, huno ha paiʼniya gemae

¹ Kagaemo, Gamani vayaʼai geʼapimo afige ala vayatapimo yagaiʼa nelapataya vayaʼai geʼapimo afige hutetapa akame nehutapaeʼmo muki alagepa kavaʼamo hisayafeʼmo alo hutapa maiyo, huka hapa paiyo. Mani gemo ago afiʼnayaʼmonanafa halate hapa paiyo.

² Mago vayaʼaifeʼmo huta faipa huta oʼapatetapa kaveta hisaya agufa gemo osutapa yagu yaga kavaʼmo nehutapa muki vayaʼeʼmo alagepa hutapa magokepi lokaeta maiyo, huka hapa paiyo.

³ Hogoteta apakaekana huta maiʼneta negi kava huta ge oʼafita aigofe gegeʼmo afita maiʼnone. Asole agufa hosu kavatimo haneʼniyana lagufamoʼmo hauʼniya kavatimoʼe hosu lahaʼye nehiya kavaʼmoʼeʼmo yagaino lateʼnigeta alagepa huʼa oʼmaisayafeʼmo lagesamo afiʼnetaeʼmo hosu laipamo kalita apatege laipa kafa hapaege huta maiʼnone. Lagaefeʼmo apaini huʼnagetaeʼmo lagaeʼeʼmo apakaefeʼmo laini huʼnone.

⁴ Ani agufa kavaʼmo hume hume neʼonagenoʼaeʼmo lagufamo alino katino nelateya vekamo Gotiʼa alino ao yaʼmo huteno ma mopafi vayaʼaifeʼmo hau ayamopafiʼmo hauʼniya kavaʼamo laulagaleʼmo ago alino afole aino ateʼnigeta ageʼnone.

⁵ Agaemo fatago kavaʼmo huta alagepa aliʼyaʼmo aliʼnona kavatiletiʼmo lagufamo alino katino olateʼnifa fikumo hau huno latetenoʼaeʼmo lagufamo alino katino lateʼniye. Aunemeʼaletiʼmo alino lateteno hosu kavatimo aeno kalo paeno lateʼnigetaeʼmo saufa vayaʼmo hamaleʼnone.

⁶ Lagufamo alino katino nelateya vekatimo Yesu Kalaisitetiʼmo lagaeteʼmo Aunemeʼamo aniʼmo lakigekana huno lamiʼniye.

⁷ Gotiʼa fikumo laha maeno lamitenoʼaeʼmo, naulagaleʼmo fatago vayaʼmo maiʼnae, huno huʼnigetaeʼmo faliʼniya kavatetiʼmo Afotimotegatiʼmo maige maige huta maisuna yatimo alisunafeʼmo agava maiʼneta lamogaga neʼauna yaʼmo ago lamiʼniye.

⁸ Mani nehuna gemo lama gemo haneʼniyaʼmofeʼmo ani kavafeʼmo lokiya gemo huka hapa paisanafeʼmo nahauʼniye. Hapa paigeʼapao Gotifeʼmo apakesamo afiʼa fatago huʼnaya vayaʼmogimo apayamukiki huʼa alagepa kavaʼmo hiyo. Ani kavaʼmo alagepa kavaʼmo haneʼneno vayaʼaina hapa neʼmaeya kavaʼmo haneʼniye.

⁹ Hapa maegaiyaʼmonanafa negi nagi gemo huteʼa ge neʼvaiya gemoʼagi apakinago vayaʼmogi apakiʼapilefeʼmo nehaya gemoʼagi hega neʼaya gemoʼagi keʼaepa gelefeʼmo ge neʼvaiya gemoʼagi huno hapa maeno alino alagepa huno oʼapategaiyanagi ataleka maika halove huvo.

¹⁰ Kagaemo Goti mafaʼnemo aliʼa fako huʼa neʼapataya vayaʼaifeʼmo magoke afinaʼmofi lole afinaʼmofi hukaeʼmo, hosu kava hae, huka hapa paiyo. Oʼafisayana maika halove huka apato.

¹¹ Ago afiʼnanana ani vayaʼmogimo api kaʼmo ataleʼa kayagiʼniya kateʼmo neʼuʼapaeʼmo hosu kavaʼmo nehae. Apakaiʼapi hosu kavaʼapimoʼmo agoti huno apatetenoʼaeʼmo, hosu kavaʼmo nehae, huno nehiye.

Ge atupa gemo huʼniya gemae

¹² Nagaemo yasimo neʼaliya afinaʼmo Nikopolisi taonifiʼmo maiguve, huʼna nagesamo afiʼnove. Nagaemo kagaetegamo Atemasiʼa aliʼna atesugeno visifi Tikikasiʼa aliʼna atesugeno visifigi uno avaʼyi hisigekaeʼmo malage huka he tika nagaetegamo eno.

¹³ Keʼaepa gemo afiʼniya vekamo Sinasiʼe Apolosiʼeʼmo umenitata hisaʼagekaeʼmo hana maegeʼanao mago yafeʼmo kafu osuʼana alagepa huʼana viʼao.

¹⁴ Vayatimogi muki afinaʼmo alagepa kavaʼmo nehuʼa mago yafeʼmo kafu nehaya vayaʼmo hapa maesayafeʼmo fiku yanageʼa kafu hugayanagi apakeyo.

¹⁵ Nagaeʼeʼmo muki neʼmaiya ve aʼnemogi ge kamamaeʼnae. Lagaefeʼmo hapauʼnigeʼapaeʼmo Gotifeʼmo apakesamo afiʼa fatago nehaya vayaʼaifeʼmo, Poloʼeʼmo ge lapamamaeʼnae, huka hapa paiyo. Gotiʼa mukiʼamogitapamo fikumo lapa maeno lapamino. He, lama ge.