Taitasi 2 - The Keyagana NT and 25 OT booksAlopa vayaʼe neya vayaʼefeʼmo, ani kavaʼmo hiyo, huka hapa paiyo, huno ha paiʼniya gemae 1 Ani agufa hosu kavaʼmo hugayaʼmonanafa kagaemo lokiya gelefeʼmo magoʼe huka alika apaya malo. 2 Kosuna vayaʼaifeʼmo hapa paigeʼapao hapauʼniya kavateʼmo alagepa huʼa yagaiʼa atege alagepa huʼa yagaiʼa neʼapataya yahauve vayakana huʼa maige apaipa apakesaleʼmo alagepa huʼa yagaiʼa atege aigofeʼmo osuʼa lokiya vaiʼa apakesamo afiʼa fatago huge hapau apayamopafiʼmo hapauge atafauʼa alagi huʼa maige hiyo. 3 Ani kava huka anekalo aʼneʼaifeʼmo alika apaya malegeʼapao aniʼmo neteʼa negi gemo osuge hosu faigoko gemo osuge huteʼa alagepa huʼa yagaiʼa neʼapataya yahauve aʼnegana huʼa maiyo. Apakaemo alagepa gemo venemo aʼne anagaʼaifeʼmo aliʼa apaya malegeʼapao 4 afiteʼapaeʼmo anauʼapimogiʼe mafaʼneʼapiʼefeʼmo hapau apayamopafiʼmo hapaino. 5 Aliʼa apaya malesageʼa venemo aʼnemogimo afiteʼapaeʼmo apaipa apakesaleʼmo alagepa huʼa yagaiʼa atege yaveyave apaipa apakesa afige noʼapifiʼmo alagepa aliʼyaʼmo alige yuna apaipa kalige anauʼapimogi apaiyafiʼmo maige hisageʼapaeʼmo muki vayaʼmogi Goti geʼaeʼmo huʼa faipa huʼa oʼategae. 6 Ani kava huka neya vayaʼaifeʼmo, lapaipa lapakesaleʼmo alagepa hutapa yagaita ateyo, huka apakesamo alika hapa paiyo. 7 Kagaemo muki kavaʼalefeʼmo vayaʼmogi kakame hisaya agufa alagepa kavaʼageʼmo huvo. Alika apaya neʼmalekaeʼmo okasalisiya geletiʼmo lokiya geletiʼmo Gotitefeʼmo aliʼyaʼmo alika apaya malo. 8 Huʼa faipa huʼa oʼatesayafeʼmo alagepa lokiya gemo hapa paigeʼapao kame vayakamogi lagaefeʼmo hosu faigoko gemo osisageno apavagage hino. 9-10 Kalavusi huʼneʼa aliʼyaʼmo neʼaliya vayaʼaifeʼmo hukaeʼmo, kava vekatapimo geʼamo afitetapa muki aliʼyaʼalefeʼmo amuse hisiya agufa kavaʼmo hiyo. Kava vekatapimo geʼaleʼmo aeta atagaina hutapa osuta maleʼnisiya yapatiʼmo mago yaʼmo kumaya oʼalitapa alagepa kavaʼmo higenoʼao kava vekatapimoʼa, alagepa huʼa aliʼyaʼmo neʼaliya vayaʼmo maiʼnae, huno hugiye, huka hapa paiyo. Apakaemo muki ani kavaʼmo hisaya kavatetiʼmo Gotiʼa lagufamo alino katino nelateya vekamo geʼaleʼmo aliʼa asaga huʼa atesayafeʼmae. Alagepa kavaʼmo nehutapa Kalaisifeʼmo agava maiyo, huno huʼniya gemae 11 Gotiʼa fikumo hapa maeno apamitenoʼaeʼmo vayaʼai apakufamo alino katino neʼapateya kavaʼamo muki vayaʼmo ago alino afole aino apave liʼniye. 12 Gotiʼa ani kavaʼaletiʼmo hunoʼaeʼmo, mono nosaya kavatapimogi ma mopafi kavafeʼmo lapaʼye nehiya kavatapimogi hutapa alita ataletetapa hemenimo maiʼnetapaeʼmo lapauʼniya kavateʼmo yagaige vayaʼaitegamo fatago kavaʼmo huge Gotifekeʼmo mono huge hutapa maiyo, huno alino laya neʼmale. 13 Ani kavaʼmo nehutaeʼmo ala vekamo Gotitimoʼmo lagufamo alino katino nelateya vekamo Yesu Kalaisiʼa ha le konali yaʼaʼeʼmo alino auleno atesiya afinaʼmo afole aisiyafeʼmo lamogaga aita agava neʼmaune. 14 Agaemo muki keʼaepa gemo amagita ataleʼnona kavategatiʼmo miya faino hatu maeno latetenoʼaeʼmo hosu kavatimo aeno kalo paeno lateʼnigeta agaiʼa vayaʼamo maiʼneta layamukiki huta alagepa kavaʼmo huta maisunafeʼmo agaiʼa agufaʼamo ofalinigana huno Gotina amiʼniye. 15 Ani kavatefeʼmo alika apaya neʼmalekaeʼmo himamukaletiʼmo alagepa kavaʼmo hisayafeʼmo apakesamo alige hosu kavaʼmo osisayafeʼmo hosu kavaʼmo nehae, huka huge huka hapa paiyo. Mago vayaʼmo apateʼnegeʼa afa vekamo maiʼnane, huʼa osiyo. |
© 2013, Wycliffe Bible Translators, Inc. All rights reserved.
Wycliffe Bible Translators, Inc.