Taitasi 1 - The Keyagana NT and 25 OT books

¹ Nagaemo Poloʼnamo Goti kalavusifiʼmo maiʼneʼnaeʼmo aliʼyaʼamo alige Yesu Kalaisi apa vekaʼamo maige huʼneʼnaeʼmo mani gemo avoʼmo nekaove. Gotiʼa lekana paino apateʼniya vayaʼmogi apakesamo afiʼa fatago huge lama gemo alagepa huʼa afiʼneʼa Gotifekeʼmo alagepa huʼa mono huge hisayafeʼmo nagaemo aliʼyaʼmo neʼaluve.

² Gotiʼa alagi aigofe gemo nosiya vekamoʼmo hogoteno ma mopamo alo osuʼnenoʼaeʼmo, fikumo hapa maeʼna apamisugeʼa maige maige huʼa maigae, huno polomasi gemo ago hu maleʼniyaʼmofeʼmo agava maiʼneʼapaeʼmo apavayagunagu nehae.

³ Polomasi gemo huʼniyaʼmonanafa afole aigiye, huno huteno lekana pai maleʼniya afinaʼmo vayaʼmogi geʼamo aeʼa hakalo huʼa hapa paiʼnagenoʼaeʼmo afole yategamo alagi afole aiʼniye. Gotiʼa lagufamo alino katino nelateya vekamoʼmo mani gemo alino namitenoʼaeʼmo, aeka hakalo huka hapa paiyo, huno naha paiʼnigeʼna aeʼna hakalo huʼna hapa nepauve.

⁴ Lama ge mafaʼneʼnimo Taitasigaeʼmo mani avoʼmo nekaove. Lagesamo afita fatago huʼnona kava huka kagesamo afika fatago huʼnane. Afotimo Gotiʼe lagufamo alino katino lateʼniya vekamo Yesu Kalaisiʼeʼmo fikumo kaha maeʼana kamiteʼana hanau huʼana katesaʼageno kaipamoʼmo falu hino.

Siosi vayaʼaiteʼmo yagaiʼa apatesaya vayatama vayaʼmogimo ani kavaʼmo nehaya vayane, huno huʼniya gemae

⁵ Lagaemo mago aliʼyaʼamo alita hano osuʼnonanageka kagaemo alika hano hisanafeʼmo Kiliti ani agoʼnanenafiʼmo kataleʼna uʼnove. Siosi vayaʼaiteʼmo yagaiʼa apatesaya vayatama vayaʼmo muki taoniʼafi taoniʼafiʼmo lekana paika apato.

⁶ Ani kavaʼmo nehisaya vayaʼmo lekana paika apato, huʼna ago kaha paiʼnove. Vaiʼmo oʼaliʼa magoke aʼmo aliʼnisaya vayaʼmo vayatama aliʼyateʼmo maigae. Apakesamo afiʼa fatago huʼnisaya mafaʼneʼmogi afoʼapimogigeʼmo ani aliʼyaʼmo aligae. Gemo oʼafiʼa negi maleteʼa hosu kavaʼmo nehae, huʼa apava gemo nosisageʼa alagepa kavaʼmo huʼa neʼmaisaya mafaʼneʼmogi afoʼapimogigeʼmo maigae.

⁷ Yagaiʼa apatesaya vayatama vayaʼmogi Goti noʼaleʼmo yagaigayaʼmofeʼmo vaiʼmo oʼapamisageʼa afaʼa neʼmaisaya vayaʼmo maigae. Himuʼnamu kavaʼmo huge malage huno apaipamo lege aniʼmo neteʼa negi nagi kavaʼmo huge kaveta huge monieʼmo hapaʼye huge huʼa maiʼnisaya vayaʼmo oʼmaigae.

⁸ Oʼmaigayaʼmonanafa nata vayaʼaiteʼmo alagepa huʼa yagaiʼa apatege alagepa kavafeʼmo hapauge alagepa apaipa apakesaleʼmo yagaiʼa atege fatago kavaʼmo huge apaote kavaʼmo huge hapauʼniya kavateʼmo yagaiʼa atege huʼa maiʼnisaya vayaʼmogigeʼmo maigae.

⁹ Apakaemo lama gemo aliʼa apaya maleʼnaya gemo afiteʼa atafauʼa alagi huʼa maiʼnisayana lokiya vaino neʼapateya geletiʼmo alagepa huʼa aliʼa apaya malege geʼapileʼmo huʼa aeʼa ati nekaya vayaʼai geʼapimo huʼa aeʼa agasege huʼa maigae.

Kiliti kotega maiʼnaya vayaʼaifeʼmo huʼniya gemae

¹⁰ Na agufa kavaʼmo huʼnayaʼmofeʼmae. Asole vayaʼmogi ge oʼafiʼa afaʼa maiʼneʼa fiku gemo huge humi apatege huʼa maiʼnayaʼmofeʼmae. Asole vayaʼmogi apakufamo lagauʼnaya vayaʼmo ani agufa kavaʼmo huʼa maiʼnae.

¹¹ Ani agufa vayaʼmogi monimo alisayafeʼmo afaʼa osisaya agufa gemo aliʼa apaya neʼmaleʼapaeʼmo muki afamo anaga vayaʼae vayaʼaeʼmo aliʼa hosu huʼa neʼapatae. Ge osisayafeʼmo apavayaleʼmo huka apatafauka apato.

¹² Mago Kiliti kotega vayapati vekamoʼmo gemo aeno hakalo huno hapa nepaiya vekamoʼmo hunoʼaeʼmo, Muki afinaʼmo Kiliti kotega vayaʼmogi aigofe gemo huge afela afugana huʼa maige aliʼyaʼmo oʼaliʼa maiʼneʼa alopa neʼyaʼmo nesayafekeʼmo apakesamo afige huʼnae, huno huʼniye.

¹³ Ani vekamoʼmo lama gemo huʼniyaʼmofeʼmo kagaemo lokiya ge huka hapa paigeʼapao apakesamo afiʼa fatago huʼnaya kavaʼapimo kaita haugekana huno ohaneno alagepa huno lokiya vaino haneno.

¹⁴ Apakaemo Yu kaitene gemo oʼafige lama gemo amagiʼa neʼatalaya vayaʼmogi, ina kava hiyo, huʼa nehaya geʼapimo oʼafige hisayafeʼmo lokiya gemo huka hapa paiyo.

¹⁵ Yaveyave apaipa vayaʼmogimo muki aliʼnisaya yaʼamo apakaiʼapilefeʼmo yaveyave yaʼmo haneʼniyaʼmonanafa hosu kavaʼmoʼa alino oʼaniʼya faino apateʼnisiya vayaʼmogimo muki aliʼnisaya yaʼamo apakaiʼapilefeʼmo oʼaniʼya yaʼmo haneʼniye. Apakesamo neʼafiya yaʼapifiʼe apakupi mafaʼnefiʼeʼmo oʼaniʼya yaʼmo havai teʼniyaʼmofeʼmae.

¹⁶ Apakaemo apavayaletiʼmo huʼapaeʼmo, Gotiʼa ageʼnone, huʼa nehayaʼmonanafa kavaʼapiletiʼmo oʼageʼnae, huʼa nehae. Gotiʼa apakaefeʼmo ohauʼnigenoʼaeʼmo geʼamo oʼafiʼa alagi hosu kavaʼmo nehaya vayaʼmo maiʼnayaʼmofeʼmo alagi alagepa kavaʼmo afaʼa osugae, huno nehiye.