Samu 99 - The Keyagana NT and 25 OT books

¹ Ala kava neʼmoʼa kini vekamo maiʼneno yagaino neʼapateyanageʼa muki alu nofi vaya alu nofi vayaʼmogimo atete hiyo. Agaemo mono noʼafiʼmo lole enisole vekalaʼani anauneʼamo maleʼnaya folagapiʼmo fai maiʼniye. Ma mopamoʼmo atete hino.

² Ala kava neʼmoʼa Saiyoni taonifiʼmo alagi ala vekamo maiʼniye. Agaemo muki nofi vayaʼmo aeno apakaseno maiʼniye.

³ Muki vayaʼmogimo ala agiʼamo haneʼniyanageʼa kini vekamo agiʼaleʼmo aliʼa asaga hugae. Agaemo alagi aote Gotiʼmae

⁴ Lokiya kini vekamogae, huʼna, fatago kavafekeʼmo kahauʼniye. Kagaemo Yekopu vayaʼai folagapiʼmo fatago kavaʼmo alika afole aika ateʼnane. Kagaemo fatago kavaʼmo huge alagepa huka alika fako huge huka maiʼnane.

⁵ Lapakaemo Ala kava neʼmo Gotitimo agiʼaleʼmo alita asaga hutapa ateyo. Aiyafiʼmo maiʼnetapa agaefeʼmo mono hiyo. Agaemo alagi aote Gotiʼmae.

⁶ Mono huʼa neʼapataya vayapatiʼmo Moseseʼe Eloniʼeʼmo maiʼnaʼae. Samiyoʼeʼmo ani vayapatiʼmo Goti agiʼalefeʼmo nunumuʼmo huʼa keya aeʼa ge huʼnaya vayapatiʼmo maiʼniye. Apakaemo Ala kava nefeʼmo nunumuʼmo huʼnagenoʼaeʼmo afiteno geʼapileʼmo aeno atagaina huʼniye.

⁷ Agaemo posi yosagana huno hiyapatiʼmo hapa paiʼniye. Apakaemo keʼaepa gemo akame huge avoʼmo kae maleʼnaya gemo akame huge huʼnae.

⁸ O Ala kava neʼmo Gotitimogae, huʼna, Kagaemo vayakaeʼmo geʼapileʼmo aeka atagaina huka hapa paiʼnane. Kagaemo kagaikamo alika apave liteka hosu kavaʼapimo alika ataleʼnanaʼmonanafa hosu kavaʼmo anonaʼapilefeʼmo kayoʼmo apamiʼnane.

⁹ Ala kava neʼmo Gotitimoʼmo aote vekamo maiʼniyaʼmofeʼmo agiʼaleʼmo alita asaga hutapa atetetapaeʼmo aote agaiʼa aveleʼmo agaetefeʼmo mono hiyo.