Samu 98 - The Keyagana NT and 25 OT books

Gotiʼa muki vayaʼaiteʼmo yagaiʼniya kini vekamae, huno huʼniya gemae

¹ Lapakaemo Ala kava nefeʼmo saufa yokemo hiyo. Agaemo alopa alagepa kavaʼmo oʼageʼnona kavaʼmo huʼnigeta ageteta lahau aiʼnone. Agaemo lamaga lokiya ayatetiʼe aote himamuʼaletiʼeʼmo kamemo huno aeno apaka seʼniye.

² Ala kava neʼmoʼa vayaʼai apakufamo alino katino neʼapateya kavafeʼmo aeno hakalo huno hapa paiʼniye. Agaemo fatago kavaʼmo alino apave liʼnigeʼa alu nofi vaya alu nofi vayaʼmogimo ageʼnae.

³ Agaemo Isaleli vayaʼaifeʼmo hu maleʼniya polomasi geʼaeʼmo agesamo afiteno geʼamo akame huno Isaleli vayaʼaifeʼmo hau huno apateʼniye. Muki kotegatiʼmo muki vayaʼmogimo Gotitimoʼmo vayaʼai apakufamo alino katino neʼapateya kavaʼmo ago ageʼnae.

⁴ Muki ma mopafi vayane, huʼna, Ala kava nefeʼmo alopa gefatiʼmo hutetapa lapamogaga aiyo. Lapamogaga aitetapaeʼmo yokemo huta agiʼaleʼmo alita asaga hiyo.

⁵ Gitaʼmo amagitapa Ala kava nefeʼmo Samu yokemo hiyo.

⁶ Pikulimo huge alopa gefatiʼmo kini vekamo Ala kava nefeʼmo huge hutapa maiyo.

⁷ Solovalaʼmogaʼe solovalapiʼmo maiʼnaya noyame anagaʼmogiʼeʼmo alopa gefatiʼmo keya aeyo. Mopamogaʼe mopafiʼmo maiʼnaya vayaʼmogiʼeʼmo yokemo hiyo.

^8-9 Agaemo muki vayaʼaiteʼmo fatago kavaʼaletiʼe lama ge kavaʼaletiʼeʼmo yagaino apategaiyamofeʼmo asole aniʼmo uta nelamiya aniʼmogitapamo lapayaʼmo amagiyo. Avemogitapae, huʼna, Ala kava neʼmo aulagaleʼmo lapamogaga aiyo. Agaemo ma mopafi vayaʼaiteʼmo yagaino apate siyafeʼmo eminegaiye.