Samu 97 - The Keyagana NT and 25 OT books

Ala kava neʼmoʼa muki vayaʼaiteʼmo yagaino neʼapateya Goti agiʼaleʼmo alino asaga huno huʼniya yokemae

¹ Ala kava neʼmoʼa kini vekamo maiʼnenoʼaeʼmo yagaino neʼapate. Muki ma mopafiʼmo maiʼnaya vayaʼmogitapae, huʼna, lapamogaga aiyo. Afagitega maiʼnaya vayaʼmogitapae, huʼna, lapakaeʼeʼmo lapamogaga aiyo.

² Hiyaʼmoʼe haniʼmoʼeʼmo faino vego huno neʼate. Agaemo alagepa huno alino fako huteno fatago kavaʼaletiʼmo yagaino neʼapate.

³ Agaeteʼmo atamoʼmo uno hogoteteno faiʼa vego huʼa ateʼnaya kame vayaʼamo neʼapale.

⁴ Agaemo alino alave alave nehigenoʼaeʼmo muki mopafiʼmo aeno ha nele. Ma mopamoʼmo agetenoʼaeʼmo atete huʼniye.

⁵ Gotiʼa muki ma mopafi Ala kava neʼmae. Agaemo emine neʼegeʼapaeʼmo avemoʼmo ina kava huno aniʼmo alino nehamale.

⁶ Kokuʼnate yaʼmogi fatago kavaʼamo aliʼa lave neliye. Muki ma mopafi vayaʼmogimo ha le konali yaʼamo neʼagae.

^7-8 Aigofe gotigitefeʼmo muki mono nehaya vayaʼmo apavagage hugiye. Aigofe gotigi ala apakiʼapimo neʼapamiyaʼmonanafa apavagage hino. Muki aigofe gotigimo Ala kava nefeʼmo mono hiyo. O Gotiyo, huʼna, alagepa huka agoti huka neʼapatanaʼmofeʼmo Saiyoni vayaʼmogi afiteʼapaeʼmo apamogaga neʼaiye. Yuta aʼmafaʼne anagaʼmogi apamogaga neʼaiye.

⁹ O Ala kava nene, huʼna, kagaemo muki lokiyakamo haneʼniya Gotigamo muki haopalega ma mopafiʼmo neʼyagaine. Kagaemo muki gotigimo aeka apaka seʼnane.

¹⁰ Ala kava nefeʼmo lapau lapayamopafi lapauʼnisiya vayaʼmogitapae, huʼna, Hosu kavafeʼmo lapaini hino. Agaemo apaote vayaʼamo maige maige huʼa maisayafeʼmo yagaino neʼapate. Agaemo hosu vayaʼai apayapatiʼmo neʼapavale.

¹¹ Gotiʼa fatago vayaʼmogi ha le yaʼmo alisayafeʼmo ha le yaʼmo avina yaʼmo nefaiye. Agaemo fatago vayaʼamogi apamogaga aisayafeʼmo apamogaga aisaya avina yaʼmo nefaiye.

¹² O fatago vayaʼmogitapae, huʼna, Ala kava nefeʼmo lapamogaga aitetapa aote agiʼalefeʼmo haoke heyo.