Samu 96 - The Keyagana NT and 25 OT books

Ala kava neʼmo agiʼaleʼmo alino asaga huno ateʼniya gemae

¹ Ala kava nefeʼmo saufa yokemo hiyo. Muki ma mopafi vayaʼmogimo Ala kava nefekeʼmo yokemo hiyo.

² Ala kava nefeʼmo yokemo hutetapa agiʼaleʼmo alita asaga hiyo. Lagufamo alino katino lateʼniye, hutapa muki afinaʼae afinaʼaeʼmo aeta hakalo hutapa hapa paiyo.

³ Ala agiʼamo amitetapaeʼmo aliʼyaʼmo aliʼniya kavaʼaenagi lokiya kavaʼmo huʼniya kavaʼaenagi huta muki vayaʼaifeʼmo ava gemo huta hapa paiyo.

⁴ Ala kava neʼmo maiʼniyaʼmofeʼmo magoʼe hutapa agiʼaleʼmo alita asaga hiyo. Aigofe gotiʼapimogimo alagi aeno apakaseʼniyaʼmofeʼmo agaefekeʼmo magoʼe hutapa koli huʼnetapa mono hiyo.

⁵ Muki alu nofi vaya alu nofi vayaʼai gotiʼapimogimo aigofe gotigimo maiʼnayaʼmonanafa Ala kava neʼmoʼa kokuʼnaʼmo alo huʼniye.

⁶ Ha le konali yaʼamo haneʼnigeno kini vekamo maiʼniye. Lokiya vekamo maiʼnigeʼa hapaʼye huʼnigeʼapaeʼmo neʼagaya vekamo maiʼniye.

⁷ Muki ma mopafi vayaʼmogitapae, huʼna, Ala kava neʼmo agiʼaleʼmo alita asaga hutetapa ha le konali yaʼaleʼe lokiyaʼaleʼefeʼmo agiʼaleʼmo alita asaga hiyo.

⁸ Ala agiʼamo haneʼniyaʼmofeʼmo agiʼaleʼmo alita asaga hutetapa ofalinimo alinita agaetegamo eyo.

⁹ Aote kavaʼmo nehutapaekeʼmo Ala kava nefeʼmo mono hiyo. Muki ma mopafi vayaʼmogitapamo agaefekeʼmo atete hiyo.

¹⁰ Muki alu nofi vaya alu nofi vayaʼaifeʼmo, Ala kava neʼmoʼa yagaino neʼmaiye, hutapa hapa paiyo. Mopamo alino lokiya vaino ateteno maleʼniyanageno afaʼa hanegaiye. Agaemo fatago kavaʼmo nehunoʼaeʼmo muki vayaʼmo alino fako huno apategaiye.

¹¹ Kokuʼnaʼmogamo kamogaga aigenoʼao mopamoʼeʼmo amogaga aino. Solovala aniʼmogaʼe solovala anipiʼmo maiʼnaya yaʼmogiʼeʼmo alopa gefatiʼmo huteʼa apamogaga aiyo.

¹² Hoyamogaʼe hoyafiʼmo haneʼnaya neʼyaʼmogiʼeʼmo lapamogaga aiyo. Yahaofilaga yosamoʼa alopa gefatiʼmo huteno amogaga aigiye.

¹³ Ala kava neʼmo muki ma mopafi vayaʼaiteʼmo yagaino apatesiyafeʼmo eminegaiye. Agaemo alagi alagepa fatago kavaʼmo huno muki ma mopafi vayaʼaiteʼmo yagaino apategaiye.