Samu 92 - The Keyagana NT and 25 OT books

¹ O Ala kava nene, huʼna, kagaefeʼmo kahao ke hesuva kavaʼmo alagepa kavaʼmo haneʼniye. O Gotiyo, huʼna, alagi anaga hogote Gotiʼapimogamo maiʼnane. Nagaemo yokemo huna kagikaleʼmo aliʼna asaga huguve.

² Muki neteʼae neteʼaeʼmo nagaemo kagaemo muki afinaʼmo nagaefeʼmo kahau kayamopafiʼmo kahauʼniya kavafeʼmo aeʼna hakalo huge muki haniʼilagaʼae haniʼilagaʼaeʼmo nagaemo kagaemo gekamo alagi akame nehana kavafeʼmo aena hakalo huge huguve.

³ Nagaemo gitamo amagiʼna kagikaleʼmo aliʼna asaga huguve.

⁴ O Ala kava nene, huʼna, nagaemo lokiya aliʼyakaeʼmo nagesamo afiteʼna naipamo kaliʼneʼna namogaga aiteʼna yokemo huguve.

⁵ O Ala kava nene, huʼna, alopa aliʼyaʼmo neʼaline. Solovala aniʼmo lusi vasilonamo haneʼniya agufa kava huno kagesamo neʼafina kavaʼmo vasilonagana huno haneʼniye.

⁶ Oʼafiʼniya vekamoʼmo ani kavaʼmo afaʼa oʼagegaiye. Negi vekamoʼmo ani kavafeʼmo alagi afino aeto osugiye.

⁷ Inoʼmo lusi kava huno neʼaiya kava huʼa hosu vayaʼmo alagepa huʼa maiʼnayaʼmonanafa kagaemo mukiʼamo alika hosu huka apatalegane.

⁸ Ala kava neʼmogae, huʼna, kagaemo muki afinaʼmo hogote vekamo maiʼnanaʼmofeʼmae.

⁹ O Ala kava nene, huʼna, Lama gemo haneʼniyana kame vayakamo falige hosu kavaʼmo nehaya vayaʼmo apaune heʼa atagu faeʼa uʼeʼa hugae.

¹⁰ Ani kavaʼmo huʼa maigayaʼmonanafa kagaemo afela ve pulumakamo lokiyagana agufa lokiyaʼmo namiʼnane. Saufa uveliletiʼmo faleʼa apateʼnaya vayaʼmogi alagepa huʼa maiʼnaya kava huʼna maiʼneʼna namogaga neʼauve.

¹¹ Naulagaleʼmo kame vayaʼnimo asagauʼa aiʼnageʼna apakeʼnove. Hosu vayaʼmogimo kagekage huʼnageʼna afiʼnove.

¹² Alagepa kokanasi yosamo alagepa huno koʼnesiya kava huʼa fatago vayaʼmo maigae. Apakaemo Sita yosagana huʼa alagepa huʼa maige maige huʼa maige.

¹³ Ala kava neʼmo noʼafiʼmo fai maleʼniya vayaʼmogimo Gotitimo kegiʼyafiʼmo alagepa huʼa afole aigae.

¹⁴ Apakaemo kosuna lege anekalo lege huteʼa maiʼneʼapaeʼmo alagamo aeʼnaya kava huʼa alagamo neʼae. Apakaemo muki afinaʼae afinaʼaeʼmo lokiyaʼapimo haneʼnigeno haitaʼamoʼmo hegafa talili huno haneme hamene neʼviye.

¹⁵ Apakaemo ani kavatetiʼmo huʼapaeʼmo, Ala kava neʼmoʼa fatago kavaʼmo nehiye, huʼa aliʼa apave neliye. Agaemo alopa yafaʼnimo maiʼnigenoʼaeʼmo agaepiʼmo mago hosu kavaʼamo alagi ohaneʼniye.