Samu 91 - The Keyagana NT and 25 OT books

Ala vekaʼapimo fala kino maiʼniyategamo uno haino maiʼniya vekaeʼmo huʼniya gemae

¹ Hogote Ala vekaʼapimo fala kino maiʼniyategamo uno haino maiʼniya vekamoʼmo lokiyaʼaʼe vekamo aunefiʼmo fala kino maige maige huno maigiye.

² Nagaemo Ala kava nefeʼmo huʼnaeʼmo, agaepiʼmo fala kiʼna maiʼnogeno faino vego huno yagaino nateʼneno naha maeno nagufamo alino katino nateʼniya vekaʼnimo maiʼniye. Gotiʼnimoʼmo maiʼniyanageʼna aliʼna amufa amiguve.

³ Agaemo oʼageʼnana nofitetiʼmo aneʼaimo hanagiʼa katafausayafeʼmo hisaya nofiʼmoʼa okatafausiyafeʼmo hatu maeno kateteno lusi kaitaʼmo kahausigekaeʼmo ofalisanafeʼmo alagepa huno yagaino kategaiye.

⁴ Agaemo hakumo alino atalelineno hakufiʼmo alino fala kino katesigeka alagepa huka hakufiʼmo fala kika maigane. Lama geʼamoʼmo kagae halegukana huno haneʼneno yagaino katesigeka maigane.

⁵ Apakaemo hanipifeʼmo koli hisaya yafeʼmo kagaemo koli osugane. Kevemoʼmo malage huno eno haniʼniya kava huno yegemo neleya afinaʼmo hosu kavaʼmoʼa malage huno kahaesiya kavafeʼmo koli osugane.

⁶ Haniʼilagamo lusi kaitaʼmo kahausigekaeʼmo koli osugane. Felugamo alopa hanageke yaʼmo kagaeteʼmo afole aisiya kavafeʼmo koli osugane.

⁷ Kahaopaleʼmo vani tauseniʼa vayaʼmo falige lamaga kahaopaleʼmo teni tauseniʼa vayaʼmo falige hisagenoʼaeʼmo falisana kavaʼmo kahaopaleʼmo afole oʼaigiye.

⁸ Kahaopaleʼmo afole oʼaigiyaʼmonanafa kaulagafatikeʼmo hosu vayaʼmogimo hosu kavaʼmo anonaʼapilefeʼmo hosu yaʼmo alisageka apakegane.

^9-10 Kagaemo agaepiʼmo uʼna fala kiʼnova vekafikeʼmo, maige maige huʼna maiguve, huka huʼnanaʼmofeʼmo mago hosu yaʼmoʼa okahaesigeno hosu kaitaʼmo nokaleʼmo afole oʼaigiye.

¹¹ Ala kava neʼmoʼa enisole vayaʼaeʼmo, yagaitapa ateyo, huno hapa paisigeʼa muki afinaʼmo kategamo umenitata hisana afinaʼmo yagaiʼa kategayaʼmofeʼmo hosu kavaʼmo kagaeteʼmo alagi afole oʼaigiye.

¹² Apayatetiʼmo kavaleʼa kasagausageno yafaʼmoʼa kaiyafiʼmo okahaegaiye.

¹³ Kaiyaletiʼmo laiyoniʼe nagaloʼyaveʼeʼmo aeka latapaigane.

¹⁴ Gotiʼa, nagaefeʼmo hau ayamopafiʼmo hauʼniyaʼmofeʼmo agufamo aliʼna katiʼna ategauve, huno huʼniye. Nagiʼnimo afino alagepa huʼniyaʼmofeʼmo aliʼna asaga huʼna ategauve.

¹⁵ Nagaefeʼmo keya aeno ge hisigeʼnaeʼmo afiguve. Hanageke yaʼmo neʼalisigeʼnaeʼmo agaeʼeʼmo magokepi lokaeʼna maiguve. Agufamo aliʼna katiʼna ateteʼna ala agiʼamo amiguve.

¹⁶ Yatala kafugamo maisiya yaʼmo amisugenoʼaeʼmo, alagi haine, huno huteno hao ke hegaiye. Agufamo aliʼna katiʼna ateʼnova kavaʼnimo aepaʼamo aliʼna ave liguve, huno huʼniye.