Samu 90 - The Keyagana NT and 25 OT books

Moseseʼa nunumuʼmo huʼniya gemae

¹ Ala kava nene, huʼna, lagaemo muki afinaʼaeʼmo afole aige aige huta neʼmaunagekaeʼmo kagaemo muki afinaʼmo notigana huka maiʼnane.

² Akeyaʼvilagamo aveʼe ma mopaʼeʼmo alo osuʼnana afinaʼmo hogoteka maiʼnananageka maige maige huka alagi maigane.

³ Kagaemo vayaʼaifeʼmo, halate mopamo alita hamaleyo, huka huteka nefaligekaeʼmo mopamo alika hamaleka neʼapatane.

⁴ Vani tauseniʼa kafugamo magoke afinakana huno haneʼniye, huka kagesamo afiʼnane. Egamo malage huno hano huʼniya kava huno vani tauseniʼa kafugamo malage huno hano nehiye. Magoke haniʼilagamo malage huno hano huʼniya kava huno kaulagaleʼmo vani tauseniʼa kafugamo malage huno hano nehiye.

^5-6 Aniʼmo heteno alinino neʼviya kava huka lavalelikuka nelatanageta nefalune. Alagamunamo ageʼnageno malage huno apake nekaniya kava huta malage huta nefalune. Kahaumo netepiʼmo lagiteno ause hetenoʼaeʼmo uneʼamo ago falu neteya kava huta maiʼneta nefalune.

⁷ Kaipamo leka latetekaeʼmo nelamagine. Kayamukiki nehanagetaeʼmo atete nehune.

⁸ Hosu kavatimo afole yateʼmo haneʼnigeka neʼagane. Huta fala kita neʼatalona hosu kavatimo kaulagalekeʼmo haneʼnigeka alika afole yateʼmo neʼmalane.

⁹ Kaipamo leʼnigeka ge nehukaeʼmo ma mopafiʼmo maisuna afinatimo alika hogo huka nelatane. Kaiteneʼmo huʼa hapa nepaigenoʼaeʼmo malage huno apake nekaniya kava huta malage huta nefalune.

¹⁰ Lagaemo sevetiʼa kafugamo maige lokiya vayaʼmo eitiʼa kafugamo maige nehunaʼmonanafa lokiya aliʼyaʼmo alige hanageke yaʼmo alige huta aise afinaʼmo maiʼneta ma mopamo malage huta ataleta halelita neʼune.

¹¹ Ina laʼmo kaipamo leʼniya lokiyakamo ageno alagepa huʼniye. Kaipamo leʼnigeka kayamukiki nehanageʼapaeʼmo lusi kava huʼa koli nehaya kavakamo ina laʼmo ageno alagepa huʼniye.

¹² Ma mopafiʼmo maisuna afinatimo lekana paisunafeʼmo alika laya malegeta alagepa huta ageteta afino.

¹³ Ala kava nene, huʼna, aika atagi neka lagaetegamo eno. Na magi afinaʼmo kaipamo leka lategane. Aliʼyakamo neʼaluna vayakaeʼmo kahau huka lato.

¹⁴ Muki afinaʼmo lamogaga aige amuse huge huta maisunafeʼmo muki afinaʼmo neteʼae neteʼaeʼmo olataleka kahau huka lato.

¹⁵ Hanageke yaʼmo lamiʼnanageno laipamoʼmo kana huʼniye. Laha maegeta na magi afinaʼmo laipamoʼmo kana huʼnifi huta ani agufa yatala afinakeʼmo lamogaga aino.

¹⁶ Aliʼyakamo neʼaluna vayaʼmo aliʼyakamo alika lave liyo. Laginago mafaʼne anagatimo himamukamo alika apave liyo.

¹⁷ Ala kava neʼmo Gotitimogae, huʼna, amuse huka lateteka laha maegenoʼao aliʼyatimo alagepa huno afole aigiye.