Samu 9 - The Keyagana NT and 25 OT books

¹ O Ala kava nene, huʼna, muki naipafatiʼmo ala kagikamo kamiguve. Lusi kava huka alagepa kavaʼmo nehana kavafeʼmo aeʼna hakalo huʼna hapa paiguve.

² Kagaetefeʼmo lusi kava huʼna namogaga aiguve. O magoʼe huka anaga Gotigae, huʼna, kagaefeʼmo yokemo huʼna kagikaleʼmo aliʼna asaga huʼna kategauve.

³ Kagaemo naha maesanafeʼmo eʼnanageʼapaeʼmo kame vayaʼnimo apaune heʼuʼa asagauʼa aiteʼa faliʼnae.

⁴ Kagaemo yagaiʼnana siyakaleʼmo fai maiʼneka fatago kavakaletiʼmo alika fako huka natetekaeʼmo fatago kavaʼmo huʼnane, huka naha paiʼnane.

⁵ Kagaefeʼmo mono nosaya vayaʼmo alika fako huka apatetekaeʼmo, hosu vayane, huka hapa paiteka alika apagoʼya lagauka apataleʼnane. Vayaʼmogimo apakaefeʼmo magoʼe huʼa apakesamo oʼafigae.

⁶ Kame vayatimo alagi hano huʼnae. Kagaemo taoniʼapimo heka halagape vaika ataleʼnane. Apakiʼapimo alagi hano huʼniye.

⁷ Apakaemo hano huʼnayaʼmonanafa Ala kava neʼmoʼa muki afinaʼmo kini vekamo maige maige huno maigiye. Agaemo alino fako huno apatesiyafeʼmo fai maisiya siyaʼamo maleʼniye.

⁸ He, agaemo muki ma mopafi vayaʼaiteʼmo fatago kavaʼaletiʼmo yagaino neʼapate. Muki alu nofi vaya alu nofi vayaʼmo api kavatetiʼmo alino fako huno neʼapate.

⁹ Ala kava neʼmoʼa aliʼa afepi neʼapataya vayaʼmo avaʼe note lafi kegiʼyaʼapimo maiʼniye. Hanageke yaʼmo neʼaliya afinaʼmo agaepiʼmo alagepa huʼa maiʼnae.

¹⁰ O Ala kava nene, huʼna, Hapa maesanafeʼmo kagaetegamo neʼaya vayaʼmo apataleka oʼuganaʼmofeʼmo kagikamo afiʼa alagepa huʼa afiʼnaya vayaʼmogimo kagaefekeʼmo aliʼa amufa nekamiye.

¹¹ Ala kava neʼmoʼa Saiyoni taonifiʼmo maiʼniya vekaeʼmo yokemo hutapa agiʼaleʼmo alita asaga hiyo. Muki nofi vayaʼaifeʼmo huʼniya kavafeʼmo ava gemo huta hapa paiyo.

¹² Apamagige hapaege huʼnaya vayaʼai anonaʼapilefeʼmo neʼapamiya Gotiʼa kana yaʼmo neʼaliya vayaʼaifeʼmo agesamo neʼafiye. Agaefeʼmo keya aeʼa ge nehaya vayaʼaifeʼmo age nokaniye.

¹³ O Ala kava nene, huʼna, kahau huka nato. Ago, nagaefeʼmo apaini nehaya vayaʼmogi alopa kana yaʼmo namiʼnae. O Ala kava nene, huʼna, falisuva kavategatiʼmo nagufamo alika katika nato.

¹⁴ Alika katika nategeʼnao namogaga aiteʼna Yulusalemu vayaʼaifeʼmo naha maeʼnana kavafeʼmo ava gemo aeʼna hakalo huʼna hapa paiguve.

¹⁵ Kagaefeʼmo mono nosaya vayaʼmogi kateʼmo esaya vayaʼmo asagauʼa aisayafeʼmo kafi maleʼnaya kelifiʼmo apakaiʼapimo asagauʼa aiʼnae. Aneʼaimo hanagi maleʼnayaʼmonanafa apakaiʼapigeʼmo heʼnae.

¹⁶ Ala kava neʼmoʼa anonaʼapilefeʼmo apamiʼniya kavatetiʼmo alagepa kavaʼamo alino apave liʼniye. Hosu vayaʼmogi hosu kavaʼapilefeʼmo apakaiʼapigeʼmo hapaeʼnae.

¹⁷ Hosu kavaʼmo nehaya vayaʼmogimo ata kopiʼmo uʼa lamigae. Muki vayaʼmogimo Gotifeʼmo apake nekaniya vayaʼmo ata kopiʼmo uʼa lamigae.

¹⁸ Muki afinaʼmo Gotiʼa kagemi yaʼapimo ohaneʼniya vayaʼaifeʼmo age kanino oʼapatalegaifa alagepa huno agesamo afiteno hapa maegaiye. Gotiʼa laha maegaiye, huʼa huteʼa hapauʼnigeʼa apavayagunagu huʼa agava neʼmaiya kavaʼmo afaʼa afole aigiye.

¹⁹ O Ala kava nene, huʼna, he tiyo. Fiku yanageka apakeka apataleʼnisanageʼa aeʼa apaka segae. Malaga vayaʼmo apavalelikeka apateʼneka agoti huka apato.

²⁰ O Ala kava nene, huʼna, koli yaʼmo alika apamiteka afaʼa vayalafaʼmo maiʼnae, huka alika apave liyo.