Samu 89 - The Keyagana NT and 25 OT books

Kotalakemo hu maleʼniya geʼaeʼmo huʼniya gemae

¹ O, Ala kava nene, huʼna, nagaemo muki kahau huka neʼapatana kavaʼakalefeʼmo muki afinaʼmo yokegeʼmo huge huge huʼna maiguve. Kagaemo gekamo alagi akame nehana kavakaeʼmo hemenimo maiʼnaya vayaʼe aliʼa apateme apateme visaya vayaʼefeʼmo navayafatiʼmo hapa paiguve.

² Nagaemo, kagaemo noʼmo kigekana huka muki afinaʼmo afaʼa hanesiyafeʼmo kahau huka apatege apatege huka maigane, huʼna hapa paiʼnove. Kagaemo gekamo alagi akame nehana kavakamoʼmo kokuʼnapiʼmo noʼmo faika ategekana huka maleʼnane.

³ Gotiʼa hunoʼaeʼmo, Nagaemo mago vekamo lekana paiʼna ateteʼna agaeʼeʼmo kotalakemo hu maleʼnova geʼnimo magokepiʼmo hu maleʼnove. Aliʼyaʼnimo neʼaliya vekamo Nevinifeʼmo hunoʼaeʼmo,

⁴ kagae nofi vayaʼmogi muki afinaʼmo lokiya vaiʼa maigae. Kini vekamo maiʼneka yagaika neʼapatana kava huʼa kini vayaʼmo maiʼneʼa yagaiʼa apatete apatete hume hume uʼa maigae, huʼna ha paiʼnove.

⁵ O, Ala kava nene, huʼna, kokuʼnapiʼmo maiʼnaya vayaʼmogi nehana kavakamo ageteʼapaeʼmo hapau aiteʼa ala kagikamo kamigae. Apaote vayaʼmo aliʼa anupa huʼa maiʼneʼapaeʼmo gekamo akame nehana kavakalefeʼmo alagepa kavaʼageʼmo nehiye, huʼa hugae.

⁶ Kokuʼnapiʼmo maiʼnaya vayapatiʼmo ina laʼmo Ala kava nekana huno maiʼniye. Lokiya vayapatiʼmo mago vekamoʼmo Ala kava nekana huno oʼmaiʼniye.

⁷ Apaote vayaʼmo aliʼa anupa huʼa maiʼnayategamo Gotifekeʼmo lusi kava huʼa koli huʼnae. Gotiʼeʼmo magokepi lokaeʼa maiʼnaya vayaʼmogi agaefeʼmo koli huʼnae.

⁸ O Gotiyo, huʼna, muki vayaʼaiteʼmo yagaika neʼapatana Gotigae, huʼna, Lokiyakaʼe vekamo maiʼnanageno ina laʼmo kagaekana huno maiʼniye. Gekamo alagi akame nehana kavakamoʼmo faino vego huno nekate.

⁹ Solovala aniʼmoʼa aino holakau holakau nehigekaeʼmo yagaika neʼatane. Solovala aniʼmoʼa aepa faino aino holakau hugefeʼmo nehigekaeʼmo afaʼa hano huka nehanagenoʼaeʼmo afaʼa nehane.

¹⁰ Kagaemo Isipi kotega maiʼnaya vayaʼai himamuʼapimo ago alika hano huka ataleʼnane. Lokiya kayatetiʼmo kame vayakamo apamagiʼnanageʼa atagu faeʼa uʼeʼa huʼa maiʼnae.

¹¹ Kokuʼnaʼe ma mopaʼeʼmo kagaika yaʼmo haneʼniye. Ma mopaʼe muki ma mopafiʼmo maiʼnaya vayaʼe yaʼeʼmo alo huʼnane.

¹² Aluga aluga haopalegaʼeʼmo alo huʼnane. Alopa avemo Tamo aveʼmoʼe alopa Hemoni avemoʼeʼmo kagikalefeʼmo anamogaga neʼaiʼae.

¹³ Himamukaletiʼmo aliʼyaʼmo neʼaline. Kayaʼmo lokiya kayaʼmo haneʼniye. Lamaga kayatetiʼmo aeka apakaseʼnane.

¹⁴ Kini vekamo maiʼneka fatago kavaʼmo huka alagepa huka alika fako huka apateteka yagaika neʼapatane. Kahau huka apatege lama geʼageʼmo huge huka maiʼnane.

¹⁵ Afiteʼapaeʼmo apamogaga neʼaiya gemo afiʼa aeto huʼnaya vayaʼmo Goti aulagaleʼmo alagepa huʼa maiʼnayanageʼa afaʼa apamogaga aigae. Kaugosafatiʼmo aeno ha neleya yategamo umenitata hugae.

¹⁶ Apakaemo kagikalefeʼmo muki afinaʼmo apamogaga neʼaiye. Apakaemo fatago kavakaletiʼmo ala apakiʼapimo neʼaliye.

¹⁷ Ha le konali himamuʼapimo kagaetegatiʼmo aliʼnae. Kagaemo fiku laha maeka lamiʼnanageta aeta apakaseʼnone.

¹⁸ Ala kava neʼmo halegutigana huno maiʼniye. Isaleliʼa aote vekamo kini vekatimo maiʼniye.

¹⁹ Aote vekamoʼmo alagamuna agegekana huno ageʼnigekaeʼmo ina ge huka ha paiʼnane. Nagaemo himamuʼaʼe vekamo lokiya vaiʼna ateʼnove. Nagaemo mago vekamo vayapatiʼmo lekana paiʼna ateteʼna aliʼna asaga huʼna ateʼnove.

²⁰ Nagaemo aliʼyaʼnimo alisiya vekamo Neviniʼmo kahauya huʼna ageteʼnaeʼmo aote uveliletiʼmo lakiʼna ateʼnove.

²¹ Muki afinaʼmo himamuʼnimo agaeteʼmo maleteʼnaeʼmo lokiya vaiʼna ategauve.

²² Kame vekaʼamoʼmo anonaʼalefeʼmo asole yaʼmo oʼalisigeno hosu vekamoʼmo kana yaʼmo alino oʼamigiye.

²³ Nagaemo kame vayaʼamo apamagisugeʼa aulagaleʼmo asagauʼa aigae. Nagaemo apaini huʼa neʼataya vayaʼmo kaitaʼmo apamiguve.

²⁴ Apamiguvaʼmonanafa agaefeʼmo ani kavaʼmo huguve, huʼna ha paiʼnova geʼnimo alagi akame huʼna nahau huʼna ategauve. Nagiʼnilefeʼmo agiʼaleʼmo aliʼna asaga huʼna ategauve.

²⁵ Nagaemo alopa mopaleʼmo yagaisiyafeʼmo lokiya vaiʼna ateʼnisugeno mago ayaʼmo solovala aniteʼmo maleteno mago ayaʼmo anilafateʼmo malegaiye.

²⁶ Agaemo alopa gefatiʼmo nagaefeʼmo keya aeno ge hunoʼaeʼmo, Kagaemo afoʼnimogamo maiʼnane. Gotiʼnimogae, huno, nagufamo alika katika natesana yafaʼnimo maiʼnane, huno naha paigiye.

²⁷ Yege mafaʼneʼnimo maiʼniye, huʼna hu malegauve. Agaemo muki ma mopafiʼmo maiʼnaya kini vayaʼmo ago aeno apakaseno hogote kini vekamo maigiye.

²⁸ Nagaemo muki afinaʼmo nahau huʼna atege atege huʼna maiguve. Agaeʼeʼmo kotalakemo hu maleʼnova geʼnimoʼmo afaʼa hanege hanege huno hanegaiye.

²⁹ Agae nofi vayaʼamo afaʼa maige maige huʼa maigae. Kokuʼnaʼmoʼa hanege hanege huno hanesiya kava huno muki afinaʼmo kini vekamo maiʼneno yagaino apategaiye.

³⁰ Mafaʼne anagaʼamogimo keʼaepa geʼnimo ataleteʼa aliʼna fako hu maleʼnova geʼnimo akame osuge

³¹ avoʼmo kae maleʼnaya geʼnimo amagiʼa atalege hiyo, huʼna hapa paiʼnova gemo akame osuge huʼnisayaʼmoʼmo

³² nagaemo hosu kavaʼapilefeʼmo kayoʼmo apamiteʼna kayotetiʼmo apamagisugeno apamuʼmo apalegaiye.

³³ Kayoʼmo apamiguvaʼmonanafa alagi aliʼna hafaiʼna oʼataleʼna agaefeʼmo nahau nayamopafiʼmo nahauʼnisigeʼna ha maegauve, huʼna huʼnova geʼnimo amagiʼna oʼataleʼna alagi akame huguve.

³⁴ Kotalakemo hu maleʼnova geʼnimo amagiʼna oʼataleʼna navayafatiʼmo hu maleʼnova geʼnileʼmo halate alu gemo osuguve.

³⁵ Nagaemo magoke afinaʼmo naote kavaʼnilefeʼmo huʼnaeʼmo, Nevinifeʼmo aigofe gemo alagi osuguve, huʼna nagoʼyamo ago ataleteʼna ha paiʼnove.

³⁶ Agae nofi vayaʼamo alagi hano osuʼa afaʼa maige maige huʼa maigae. Yegemoʼmo muki afinaʼmo naulagaleʼmo lege lege huno neʼmaiya kava huno muki afinaʼmo kini vekamo maiʼneno yagaino apategaiye.

³⁷ Kaimoʼmo hanege hanege huno neʼmaiya kava huno fai maiʼneno yagaino neʼapateya siyateʼmo muki afinaʼmo fai maiʼneno yagaino apategaiye. Kokuʼnapatiʼmo kaimoʼmo, Gotiʼa maiʼniye, huno lama gemo nehiye, huno nehiya kaigana huno maiʼneno yagaino apategaiye.

³⁸ Kagaemo ani gemo huʼnanaʼmonanafa kagaemo ago alika yaga auka ataleteka kakameʼyamo amiʼnane. Kagaemo uvelimo lakika ateʼnana vekaeʼmo kaipamo leka ateʼnane.

³⁹ Kagaemo aliʼyakamo neʼaliya vekaʼeʼmo kotalakemo hu maleʼnana gemo ago alika hano huka ataleʼnane.

⁴⁰ Kagaemo kegiʼyaʼamo ago aeka halagape vaiʼnane. Halagape oʼvaisaya agufa lokiya nokoʼmo ago heka halagape vaiʼnane.

⁴¹ Muki u eʼa nehaya vayaʼmogimo kagemi yaʼamo kumayaʼmo neʼaliye. Haopaleʼmo maiʼnaya vayaʼmogimo huʼa faipa huʼa neʼatae.

⁴² Kagaemo kame vayaʼamo hapa maeʼnanageʼa kamemo huʼa aeʼa agaseʼnae. Hapa maeʼnanageʼa apamogaga aiʼnae.

⁴³ Kagaemo ati vayaʼamo lokiya vaika oʼapateʼnanageʼa kame huʼa aeʼa oʼapakaseʼnae. Kagaemo afaʼa ataleʼnanageno kame vayaʼaʼeʼmo kamemo huno aeno oʼapakaseʼniye.

⁴⁴ Kagaemo ha le konali yaʼamo alika hano huka ataleʼnane. Yagaino apatesiya himamuʼamo ago alika hano huka ataleʼnane.

⁴⁵ Kagaemo ataleʼnanageno malage huno ago kosuna leʼniye. Lokiyaʼamo ohaneʼnigeno avagage huʼniya kavaʼamoʼmo aino ati kaeʼniye.

⁴⁶ Ala kava nene, huʼna, na magi afinaʼmo fala kika maigane. Muki afinaʼmo fala kika maigapiye. Atagana huno kaipamo lesifiye.

⁴⁷ Maisuva afinaʼmo aise afinaʼmo haneʼniyaʼmofeʼmo kage okanika kagesamo afiyo. Muki vayaʼmo fiku maisayafeʼmo alo huka apateʼnapiye.

⁴⁸ Haiya vekamo ofalino afaʼa maige maige huno maigiye. Kanolufiʼmo oʼmaino faino kasalo paegaifiye.

⁴⁹ Ala kava nene, huʼna, Hogoteka Nevinifeʼmo kahau kayamopafiʼmo kahauʼnigeka alagepa huka ha maeʼnane. Na kava higekaeʼmo hemenimo ani kavaʼmo nosane. Kagaemo Nevinifeʼmo ani kavaʼmo huguve, huka huteka kagoʼyamo ataleʼnane.

⁵⁰ Ala kava nene, huʼna, aliʼyakamo neʼaliya vayakaeʼmo huʼa faipa huʼa neʼapataya kavafeʼmo kage okanika kagesamo afiyo. Muki asole vayaʼmogimo huʼa faipa huʼa nelatageʼnaeʼmo naipamoʼmo lusi kava huno kana nehiye.

⁵¹ O Ala kava nene, huʼna, kame vayakamogimo huʼa faipa huʼa lateʼnae. Apakaemo uvelimo lakika ateʼnana vekamoʼmo nehiya kavafeʼmo huʼa faipa huʼa ateʼnae.

⁵² Ala kava neʼmo muki afinaʼmo aulena Gotiʼmo maino. He, Lama ge. Lama ge.