Samu 85 - The Keyagana NT and 25 OT books

Hau huno neʼapateya kavafeʼmo huʼniya gemae

¹ Ala kava nene, huʼna, kagaemo mopakaleʼmo maiʼnaya vayaʼmo alagepa huka hapa maeʼnane. Kagaemo Yekopu nofi vayaʼmo hatu maeka apateteka apavalelikeka apakaiʼapi mopaleʼmo apateʼnane.

² Kagaemo vayakamogi hosu kavaʼapimo alika ataletekaeʼmo, afaʼa ateyo, huka huʼnane. Muki hosu kavaʼapimo aeka ati kaeka ataleʼnane.

³ Hogoteka kaipamo leka apateʼnanaʼmonanafa henagaʼamo kaipamo falu huka apateʼnane. Lusi kava huno kaipamo leʼniyana afaʼa ataleʼnane.

⁴ O, Gotiyo, huʼna, lagufamo alika katika nelatana vekamae. Halate alika alagepa huka lateteka alika aika atagi neka lavalelika eno. Kaipamo falu huka lato.

⁵ Muki afinaʼmo kaipamo leka latesapiye. Hemenimo maiʼnaya vayaʼaifenagi henagaʼamo afole aisaya vayaʼaifenagi huka kaipamo leka apateka hano osuka kaipamo leka apateme apateme ugapiye.

⁶ Faligekana huta maiʼnonanagi halate alika he tika olategapiye. Vayakamogimo kagaefekeʼmo apamogaga aisayafeʼmae.

⁷ O Ala kava nene, huʼna, kahau huka lato. Lagufamo alika katika lato.

⁸ Nagaemo Ala kava neʼmo Gotiʼa hisiya gemo afiguve. Agaemo agaiʼa vayaʼmo apaote vayaʼaeʼmo alino nanu aeno apatesiya geeʼmo hunoʼaeʼmo, lapaipamoʼmo falu hino, huno hapa paigiye. Hapa paigiyaʼmonanafa fiku yanageʼa aiʼa atagineʼa eʼa halate negi kavaʼmo hugae.

⁹ Ha le konali yaʼamoʼmo lagae mopaleʼmo hanege hanege huno hanesiyafeʼmo agaefeʼmo koli nehaya vayaʼmogi hapaopaleʼmo eno apakufamo alino katino apategaiye.

¹⁰ Hau huno apatesiya kavaʼaʼe lama geʼaʼeʼmo eʼana fotu huʼnaʼae. Fatago kavaʼaʼe alino nanu aeno apatesiya kavaʼaʼeʼmo eʼana hanaeʼana neʼnaʼae.

¹¹ Lama ge kavaʼmo ma mopafatiʼmo hagegekana huno afole aisigeno fatago kavaʼmoʼa kokuʼnapatiʼmo he tino aeno kavafaino apakegaiye.

¹² He, Ala kava neʼmoʼa alagepa yaʼmo lamisigeno lagae mopafatiʼmo neʼyaʼmo hagegaiye.

¹³ Fatago kavaʼmo hogoteno neʼvisigenoʼaeʼmo agaemo egaiye. Fatago kavaʼamo aiyakamo alisunafeʼmo kaʼmo valino lategaiye.