Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Samu 84 - The Keyagana NT and 25 OT books


Gotiʼa laha maegaiye, huʼa nehaya vayakeʼmo alagepa huʼa maisaya kavafeʼmo huʼniya gemae

1 Ala kava nene, huʼna, muki vayaʼaiteʼmo yagaika neʼapatana vekamae. Nagaemo maiʼnanatega haneʼniya mono nokaeʼmo lusi kava huno neʼnahaiye.

2 Nokafiʼmo maisuva yafeʼmo lusi kava huno nagupi mafaʼnemoʼmo hauʼniye. Muki nagufamoʼe naipa nagesafatiʼeʼmo afaʼa neʼmaiya Gotifekeʼmo nehaiye.

3 Aise nama anagaʼmogi apanoʼmo kiteʼa maiʼnageʼapaeʼmo kisaveʼyave anagaʼmogi apanoʼmo haneʼnigeʼa apamuʼmo maleteʼa aiʼa apalo atiteʼa neʼyagaiye. Nokafiʼmo neʼmaiyaʼmonanafa muki vayaʼaiteʼmo yagaika neʼapatana vekae, huʼna, kini vekaʼnimo Gotiʼnimogae, huʼna, nokafiʼmo oʼmaiʼneʼna ofalinimo kamisuva hiʼyalamukaleʼe muki ofalinimo nehaya hiʼyalamukaleʼefeʼmo nagesamo neʼafuve.

4 Nokafiʼmo maiʼneʼa yokemo huʼa kagikaleʼmo aliʼa asaga nehaya vayaʼmo aulena vayaʼmo maiʼnae.

5 Kagaetegatiʼmo lokiyaʼapimo aliʼnisaya vayaʼmogimo aulena vayaʼmo maiʼnae. Kagaetegamo visaya apaipamo nekaliye.

6 Kaʼmo umenitata nehuʼapaeʼmo aniʼmo leno laneʼniya kalokalopafiʼmo apaunumo uno nelamigeʼa umenitata nehuʼapaeʼmo kelimo kafi maleʼnageno koʼmo aiteno aniʼmo maleno havai teʼnigeʼa neʼnae.

7 Lokiya vaime vaime uʼa magoʼe huʼa lokiya vaiʼa uʼa aigofe gotiʼapimogimo aeno apakaseʼniya Gotitegamo Saiyoni kotegamo agegae.

8 Muki vayaʼaiteʼmo yagaika neʼapatana vekae, huʼna, nunumuʼmo nehuvanagi geʼnimo afiyo. Yekopu Gotiʼamogae, huʼna, afiyo.

9 O Gotiyo, huʼna, halegutimogae, huʼna, ago. Lekana paika ateʼnana vekamo augosafiʼmo ago.

10 Mago alagepa haopalegamo uʼna yatala afinaʼmo maisuvana namogaga aiguvaʼmonanafa nokafiʼmo aise afinaʼmo maisuvana magoʼe huʼna namogaga aiguve. Nagaemo Gotiʼnimo noʼafiʼmo afa ina agufa vekamo kipateʼmo yagaisuva vekamo maisuvafeʼmo nahauʼniyaʼmonanafa hosu vayaʼai noʼapifiʼmo uʼna haiʼna maisuvafeʼmo oʼnahauʼniye.

11 Ala kava netimo yegetiʼe halegutiʼeʼmo maiʼniye. Agaemo ala apakiʼapimo apamiteno alagepa yaʼmo fiku hapa maeno apamigiye. Agaemo api kavaʼmo nehaya vayaʼaifeʼmo alagepa yaʼmo magokeʼageʼmo lapamiguve huno osugifa muki alagepa yaʼamo afaʼa apamigiye.

12 Muki vayaʼaiteʼmo yagaika neʼapatana vekae, huʼna, Kagaemo aliʼa amufa nekamiya vayaʼmo aulena vayaʼmo maiʼnae.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ