Samu 81 - The Keyagana NT and 25 OT books

Isaleli vayaʼmogimo hopa afinaʼmo hisaya kavafeʼmo huʼniya gemae

¹ Lapakaemo alopa gefatiʼmo alino lokiya vaino nelateya Gotitimofeʼmo yokemo hiyo. Lapamogaga aitapa Yekopu Gotiʼamofeʼmo alopa gefatiʼmo hiyo.

² Alagepa agemo aisiya agufa yateʼmo amagiyo.

³ Hopa afinaʼmo monoʼmo nehuna afinaʼmo pikulimo hiyo.

⁴ Mani kavaʼmo Isaleli vayaʼmogita hisuna keʼaepa gemae. Yekopu Gotiʼamoʼmo mani keʼaepa gemo lamiʼniye.

⁵ Gotiʼa Isipi kotegamo umenitata hunoʼaeʼmo hopa afina keʼaepa gemo aeʼa hakalo huʼa hapa paisayafeʼmo Isaleli vayaʼaitegamo hu maleʼniye. Lagaemo ani kotegamo mago apakemo afiʼnonana oʼafiʼnone.

⁶ Gotiʼa hunoʼaeʼmo, Nagaemo apakiʼnaletiʼmo kana yaʼmo ago aliʼna ataleʼnove. Hapa maeʼnogeʼa masaketi kuʼmo ataleʼnae.

⁷ Lapakaemo nagaefeʼmo keya aeʼnageʼna hanageke kavapatiʼmo lapavaleliʼna uʼnove. Nagaemo hiyapiʼmo fala kiʼna hakalu nehiya hiyapatiʼmo getapileʼmo aeʼna atagaina huʼna lapa paiʼnove. Nagaemo Melima ani kotuteʼmo lapamalageka huʼnove.

⁸ Vayaʼnimogitapae, huʼna, Geʼnimo afiyo. Aliʼna api aiʼna lapategauve. O Isaleli vayaʼmogitapae, huʼna, Geʼnimo afaʼa afisafiye.

⁹ Alu nofi vayaʼai aigofe gotiʼapimogimo lapakae folagapiʼmo oʼmaiyo. Alu gotitefeʼmo mono osiyo.

¹⁰ Nagaemo Ala kava neʼmo gotitapimoʼnamo lapakaemo Isipi kotegatiʼmo lapavaleliʼna eʼnove. Lapakaemo lapavayamo lusi kava hutapa aka huʼnigeʼnao muki yaʼmo nagaemo lapamino.

¹¹ Lapamisuvafeʼmo nahauʼniyaʼmonanafa vayaʼnimogitapamo geʼnimo afisayafeʼmo olapauʼniye.

¹² Olapauʼniyaʼmofeʼmo afaʼa lapateʼnogetapa ge oʼafitapa himuʼnamu kavaʼmo hutetapa lapakaitapimo lapauʼniya kavaʼmo huʼnae.

¹³ Nagaemo lapakaemo vayaʼnimogi geʼnimo afiteʼa kaʼnileʼmo visayafeʼmo lusi kava huno nahauʼniye.

¹⁴ Geʼnimo akame huʼnaesinana nagaemo malage huʼna muki kame vayatapiʼeʼmo kamemo huʼna alagi aeʼna apaka seʼnovesine.

¹⁵ Isaleli vayaʼmogimo geʼnimo akame huʼnaesinana nagaefeʼmo apaini nehaya vayaʼmogi lusi kava huʼa koli huteʼa nagaeteʼmo aigofe kava huʼa apaleʼyamo faiʼnaesine. Nagaeteʼmo aigofe kavaʼmo huʼnaesinaʼmonanafa muki afinaʼaeʼmo kayoʼmo apamiguve.

¹⁶ Lapakaemo geʼnimo akame huʼnaesinana alagi kanale neʼyaʼmo lapamige hogote yafakana vekatapimo lume anuʼamo lapamige huʼnogeno lapaipafiʼmo lapamu hiyesine.