Samu 80 - The Keyagana NT and 25 OT books

Gotiʼa Isaleli vayaʼmo hapa maesigeʼa halate hetiʼa alagepa huʼa maisayafeʼmo nunumuʼmo huʼnaya gemae

¹ Isaleli sipisipi vayaʼmogitaleʼmo yagika nelatana vekamogae, huta, kagaemo sipisipi anagakamo kagae kateʼmo umenitata nehunage kaeʼmo alika api aika nelatana Gotitimogae, huta, Geʼnimo kagetafo huka afiyo. Kagaemo kini siyakaleʼmo anagamo fai maiʼnanageʼa enisole vayaʼmogi kaiyafiʼmo maiʼnae.

² Kagaemo Ifalemu vayaʼai apaulagalenagi Menisameni vayaʼai apaulagalenagi Manasa vayaʼai apaulagalenagi huka afole aiteka lokiyakamo alika lavelikaeʼmo lagufamo alika katika lato.

³ O Gotiyo, huta, halate kagaetegamo lavalelika eno. Lagufamo alika katika latesanafeʼmo kahau huka lato.

⁴ Ala kava neʼmo muki lokiyakamo haneʼniya Gotigae, huta, na magi afinaʼmo vayakamogi nunumuʼmo nehaya geʼapilefeʼmo kaipamo legaiye.

⁵ Kagaemo lau kaleta maisunafeʼmo alopa kana yaʼmo lamiʼnanageta lusi kava huta aviʼyaʼmo nehunageno launumoʼmo neʼyati negegana huge aniti negegana huge huta neʼnone.

⁶ Kagaemo afaʼa lateʼnanageʼa lahaopaleʼmo maiʼnaya vayaʼmogimo eʼa lagaeʼeʼmo kamemo nehae. Ani kame vayatimogimo huʼa faipa huʼa lateteʼa apakaeʼeʼmo kigi huʼa nelatae.

⁷ O Gotiyo, huta, halate kagaetegamo lavalelika eno. Lagufamo alika katika latesanafeʼmo kahau huka lato.

⁸ Akeyaʼvilagamo kagaemo Isipi kotegatiʼmo mago nofiʼmo alinika eʼnane. Ani nofiʼmo kali malesanafeʼmo ani mopaleʼmo maiʼnaya vayaʼmo alika hapa faika apataleteka mopaʼapileʼmo ani nofiʼmo kali maleʼnane.

⁹ Kagaemo alagepa huno hagesiyafeʼmo mago mopaleʼmo alika haleteka mopamo alo huka ateʼnane. Kali maleʼnanageno ago hageteno hafuʼyaʼamo alagi ago uno lamiʼnigeno nofiʼmo akopamo aeteno uneno huno mopaleʼmo aino atikaeʼniye.

¹⁰ Ani nofiʼmo akopaʼamo muki aise aveʼagi alopa Sita yosagi huno kino aeno atikaeʼniye.

¹¹ Akopaʼamo solovalategamo uge Yufaletisi nelamiya anitegamo uge huʼniye.

¹² Ani kavaʼmo huʼniyana na kava higekaeʼmo kagaemo faino vego huʼniya kegiʼyamo ago aeka halagape vaiʼnane. Hemenimo kateʼmo uʼeʼa hisaya vayaʼmogimo hoyafatiʼmo nofi alagamo afaʼa kumaya aligae.

¹³ Yahaofilagati eʼnaya afela ve afu anagaʼmogimo aliʼa vagaiʼa ataleʼnageʼa afela afumogimo neʼnae.

¹⁴ Muki vayaʼaiteʼmo neʼyagaina Gotigae, huʼna, halate aika atagineka lagaetegamo eno. Kagaemo kokuʼnapatiʼmo afepilagamo ani nofifeʼmo aulu haeka ageteka ha mao.

¹⁵ Kagaemo lokiyakaletiʼmo ani nofi kali maleʼnana nofifeʼmo kagesamo afiyo. Ani nofiʼmo akopaʼamo kagaetefeʼmo lokiya vaika ateʼnananagi kagesamo afiyo.

¹⁶ Kame vayatimogimo hatagauʼa atafiʼmo kaeʼnae. Apakaefeʼmo kaipamo leka apato. Alika hosu huka apatalo.

¹⁷ Kagaemo lamaga kahaopaleʼmo maiʼniya vekaleʼmo kayaʼmo malo. Kagaemo Vemo Mafaʼnemo kagaetefeʼmo lokiya vaika ateʼnana vekaleʼmo kayaʼmo malo.

¹⁸ Kagaemo agaeteʼmo kayaʼmo afaʼa malesanageta kataleta oʼugune. Kagaemo faliʼnonategatiʼmo alika hetika lategetao kagikaeʼmo nunumuʼmo huta keya aegaune.

¹⁹ O Gotiyo, huta, halate kagaetegamo lavalelika eno. Lagufamo alika katika latesanafeʼmo kahau huka lato.