Samu 79 - The Keyagana NT and 25 OT books

Apakaemo Isaleli vayaʼmogi Gotiʼa hapa maesiyafeʼmo nunumuʼmo huʼnaya gemae

¹ O Gotiyo, huʼa, Alu nofi vayaʼmogi alika lamiʼnana mopaleʼmo eʼa lagaemo vayakaʼeʼmo kamemo huʼnae. Apakaemo aote mono nokamo aliʼa hosu huʼa ataleʼa Yulusalemu taonimo heʼa halagape vaiʼnageno no atufaʼageʼmo haneʼniye.

² Apakaemo aliʼyakamo aliʼnaya vayaʼmo kamitimo apamagiteʼa nama anagaʼmogi nesayafeʼmo apakufaʼamo apamiʼnae. Ina kava huʼa afela afu anagaʼmo apaote vayakamogi apakufaʼamo apamiʼnae.

³ Apakaemo kamitimo hapaeʼnageʼa faliʼnageno kolaʼapimo aino lakino Yulusalemu taonifiʼmo anikana huno uno lamiʼniye. Kiʼa apatesaya vayaʼmo mago oʼmaiʼnae.

⁴ Lahaopaleʼmo maiʼnaya vayaʼmogimo huʼa faipa huʼa latege kigi yokalo gemo huʼa latege nehae.

⁵ O Ala kava nene, huʼna, na magi afinaʼmo kaipamo leka lategane. Muki afinaʼaeʼmo kaipamo leka latege latege huka maisanageno hano osugifiye. Kaipaʼmoʼmo atagana huno lalesifiye.

⁶ Kagaemo okageʼnaya nofi vayaʼaiteʼe kagikaleʼmo aeʼa keya aeʼa nunumuʼmo nosaya vayaʼaiteʼeʼmo kaipamo neleya kavaʼmo anikana huka lakiyo.

⁷ Apakaemo vayakamo kamitimo apamagige huteʼa muki taoniʼapiʼeʼmo heʼa halagape vaiʼnae.

⁸ Laginago vayaʼai hosu kavaʼapilefeʼmo lagaemo kayoʼmo olamiyo. Kametimogi aliʼa afepiʼmo lateʼnayaʼmofeʼmo malage huka kahau huka lato.

⁹ O Gotiyo, huʼna, Lagufamo alika katika nelatana Gotigamae. Kagikamo ha le konali yakalefeʼmo laha mao. Ala kagikalefeʼmo hosu kavategatiʼmo lavalelikeka hosu kavatimo alika atalo.

¹⁰ Na kava higeʼapaeʼmo alu nofi vayaʼe alu nofi vayaʼeʼmo huʼapaeʼmo, Gotiʼapimoʼmo haiyategamo maiʼniye, huʼa hugae. Apakaemo aliʼyakamo aliʼnaya vayaʼai kolaʼapimo anonaʼalefeʼmo kayoʼmo apamigetao agegaunanagi.

¹¹ Kagaemo kalavusi huʼa apateʼnaya vayaʼmogi yulagefa neʼaiya gemo afiyo. Faligae, huʼa gemo ago hu maleʼnaya vayaʼmo alopa himamukaletiʼmo hatu maeka apato.

¹² O Ala kava nene, huʼna, Alu nofi vaya alu nofi vayaʼmogiʼeʼmo huʼa faipa huʼa kateʼnaya kavaʼapimo anonaʼapilefeʼmo seveniʼa afinaʼmo aeka atagaina huvo.

¹³ Inagi lagaemo vayakamo ina kava huta sipisipi anagakamogitamo muki afinaʼae afinaʼaeʼmo kahaoke hegaune.